2 Reyes 16:1-20
16 16:1-2 Rü yexguma marü 17 ga taunecü Iraéanearü ãẽ̱xgacü yixĩxgu ga Péca ga Remaría nane rü yexguma nixĩ nax ãẽ̱xgacüxü̃ yaxücuxü̃ ga Acháx ga Yotáü̃ nane nax Yudáanearü ãẽ̱xgacü yixĩxü̃ca̱x. Rü nüma ga Acháx rü 20 ga taunecü nüxü̃́ nayexma ga yexguma. Rü 16 ga taunecü nixĩ ga ãẽ̱xgacü yixĩxü̃ ga Yerucharéü̃wa. Natürü yema naxüxü̃ ga Acháx rü tama Tupanape̱xewa name, yerü tama norü o̱xi ga Dabírüxü̃ mexü̃ naxü.
2 Nüü̃ nadau 16:1
3 Rü nagu nixũ ga yema nacüma ga nüxíraxü̃güxü̃ ga Iraéanearü ãẽ̱xgacügü nagu ĩxü̃. Rü poraãcü chixexü̃ naxü, rü nawa nangu nax norü tupananetaca̱x wüxi ga nane tüxü̃ yaguxü̃. Rü yemaacü nagu nixũ ga yema nacümagü ga chixexü̃gü ga yema duü̃xü̃gü ga Tupana íwoxü̃xü̃ Iraétanüxü̃pe̱xewa.
4 Rü yema nachicagü ga tupananetagüca̱x ãmare íyagugüxü̃ ga ma̱xpǘnegüwa rü guxü̃ma ga naigü ga imeetaxü̃tüü̃wa, rü nüma ga Acáx rü yemawa ínanagu ga naxü̃nagü rü pumarate̱xegü.
5 Rü yexgumaü̃cüxü rü Rechíü̃ ga Chíriaanearü ãẽ̱xgacü rü ñu̱xũchi Remaría nane ga Péca ga Iraéanearü ãẽ̱xgacü rü Yerucharéü̃ca̱x ínayaxüãchi. Rü nüxü̃ ínachomaeguãchi ga Acháxarü ĩane ga Yerucharéü̃ nax yemaacü yapugüãxü̃ca̱x. Natürü taxucürüwama nanapugü ga guma ĩane.
6 Rü yexgumaü̃cüxü ga nüma ga Edóü̃arü ãẽ̱xgacü rü nachixü̃aneca̱x nanatáeguxẽxẽ ga ĩane ga Eráx. Rü yema Edóü̃cüã̱xgü rü guma ĩanewa nangugü rü Yudáanecüã̱xgüxü̃ yéma ínawoxü̃. Rü yemawena ga yema Edóü̃cüã̱xgü rü guma ĩanewa namaxẽ. Rü ñu̱xma rü ta ngématama nangẽxmagüecha.
7 16:7-8 Rü yexguma nüma ga Acháx rü nanade ga yema úirugü rü diẽrugü ga Tupanapata ga taxü̃negu nuxü̃ rü yema ãẽ̱xgacüpataarü yemaxü̃gü. Rü ñu̱xũchi Tigáx-piréche ga Achíriaanearü ãẽ̱xgacüxü̃tawa nanamugü namaxã ga ore ga ñaxü̃: —Chomax rü curü ngü̃xẽẽruxü̃ chixĩ rü wüxi i cunerüxü̃ chixĩ. Rü ngẽmaca̱x chanaxwa̱xe i nua cuxũ nax choxü̃ ícuyapoxü̃xü̃ca̱x naxme̱xwa i Chíriaanearü ãẽ̱xgacü rü Iraéanearü ãẽ̱xgacü, erü cha̱u̱xca̱x ínayachoõchi —ñaxü̃ ga ore yéma namu.
8 Nüü̃ nadau 16:7
9 Rü yexguma nüma ga Tigáx-piréche ga Achíriaanearü ãẽ̱xgacü rü Acáxü̃ narüngü̃xẽxẽ. Rü nanamexẽxẽ ga norü churaragü nax naxca̱x íyagoõchixü̃ca̱x ga guma ĩane ga Damácu. Rü ñu̱xũchi nayapu ga guma ĩane rü norü ãẽ̱xgacü ga Rechíü̃xü̃ nima̱x. Rü ínanawoxü̃ ga yémacüã̱xgü, rü ĩane ga Quíruwa nanagagü.
10 Rü nüma ga Acháx rü guma ĩane ga Damácuwa naxũ nax Tigáx-piréche ga Achíriaanearü ãẽ̱xgacüxü̃ yexma yangauxü̃ca̱x. Rü guma ĩane ga Damácuwa nüxü̃ nadau ga wüxi ga ãmarearü guruxü̃ ga yéma yexmaxü̃. Rü yemaca̱x mea nanaxüxchicüna̱xã ga yema ãmarearü guruxü̃ rü chacherdóte ga Uríaxü̃tawa nanamu ga yema naxchicüna̱xã.
11 Rü nüma ga chacherdóte ga Uría rü nanaxü ga wüxi ga ãmarearü guruxü̃ yema napane ga ãẽ̱xgacü ga Acháx Damácuwa naxca̱x ne muxü̃rüxü̃ nax marü ínamemarexü̃ca̱x ga yexguma Damácuwa ne naxũxgu ga ãẽ̱xgacü ga Acháx.
12 Rü yexguma yéma nanguxgu ga nüma ga Acáx rü ínayadau ga yema ãmarearü guruxü̃ ga Uría üxü̃. Rü yéma nayagu ga norü ãmare ga wüxi ga naxü̃na.
13 Rü yéma nayagu ta ga norü ãmare ga trigute̱xe rü bínu naétügu nanaba. Rü yema naxü̃na ga nada̱i̱xü̃gümaxã nanamaxétü ga yema ãmarearü guruxü̃.
14 Rü nüma ga Acáx rü nayaxügachi ga yema Tupanaarü ãmarearü guruxü̃ ga bróũchenaxca̱x ga Tupanapata ga taxü̃nearü to̱xma̱xtagu üchiréxü̃. Rü nórteguama nayaxǘ yerü yema ngexwaca̱xü̃xü̃ ga ãmarearü guruxü̃ yéma naguxchachica. Rü ñu̱xũchi yema Tupanapata ga taxü̃nepe̱xewa yexmaxü̃ ga nachicagu nanaxǘ ga yema yexwaca̱xüxü̃ ga ãmarearü guruxü̃.
15 Rü yemawena nüma ga Acháx rü chacherdóte ga Uríaxü̃ ñanagürü: —Ngẽma ngexwaca cuxüxü̃ i ãmarearü guruxü̃ i taxü̃wa tá ícunagu i ngẽma pa̱xmamaarü ãmare i naxü̃nagü. Rü yáuanecü rü tá ngéma ícunagu i ngẽma ãmaregü i trigute̱xe. Rü ngẽxgumarüxü̃ ta rü ngéma tá ícunagu i chorü ãmaregü i naxü̃nagü rü trigute̱xe. Rü ngẽxgumarüxü̃ ta rü ngéma tá ícunagu i guxü̃ma i duü̃xü̃güarü ãmare i naxü̃nagü rü trigute̱xe rü bínu. Rü ngẽmawena rü ngẽma naxü̃nagü i cuda̱i̱xü̃gümaxã tá cunamaxcu i ngẽma ãmarearü guruxü̃. Rü ngẽma bróũchenaxca̱x i ãmarearü guruxü̃ rü cha̱u̱xca̱xicatama tá nixĩ —ñanagürü.
16 Rü nüma ga chacherdóte ga Uría rü yema ãẽ̱xgacü ga Acháx namuxü̃ãcü nanaxü ga guxü̃ma.
17 Rü yemawena nüma ga Acháx rü nayanugachitanü ga yema 10 ga ya̱u̱xme̱xü̃páxü̃gü ga bróũchenaxca̱x. Rü nayaxügachi ga yema dexápáxü̃ ga taxüchixü̃ ga wocagü ga iyatüxü̃chicüna̱xãgü ga bróũchenaxca̱xétügu ünagüxü̃. Rü ñaxtügu nucü ga nutaétügu nanaxǘnagü.
18 Rü nüma ga Acáx rü nanataãẽxẽẽchaü̃ ga Achíriaanearü ãẽ̱xgacü. Rü yemaca̱x nayaxügachi ga yema natamü ga Cori ya Tupanapata ga taxü̃nearü düxétüwa yexmaxü̃ ga ngü̃chigaarü ngunexü̃gu nawa nangutaque̱xegüxü̃. Rü ñu̱xũchi nanaxoxẽxẽ ga yema Tupanapata ga taxü̃nearü ĩã̱x ga düxétüwaama üxü̃ ga ãẽ̱xgacüca̱xicatama ixĩxü̃.
19 Rü guxü̃ma ga yema naxüxü̃ ga Acháx, rü yema popera ga Yudáanearü ãẽ̱xgacügüchiga nagu ümatüxü̃gu naxümatü.
20 Rü yexguma nayu̱xgu ga Acháx rü norü o̱xigü íta̱xgüxü̃gu nanata̱xgü ga Dabíarü Ĩanewa. Rü nawena rü nane ga Echequía nixĩ ga nachicüxü ãẽ̱xgacü ixĩcü.
