2 Reyes 17:1-41
17 Rü yexguma 12 ga taunecü nüxü̃́ inguxgu ga Acháx nax ãẽ̱xgacü yixĩxü̃ ga Yudáanewa, rü yexguma nixĩ ga nüma ga Ochéa ga Erá nane rü yexwacax yangucuchixü̃ nax Iraéanearü ãẽ̱xgacü yixĩxü̃ca̱x. Rü nüma ga Ochéa rü 9 ga taunecü nixĩ ga Chamáriaarü ĩanewa ãẽ̱xgacü yixĩxü̃.
2 Rü yema Ochéa üxü̃ rü nachixe ga Tupanape̱xewa, natürü tama yema nüxíraxü̃güxü̃ ga Iraéanearü ãẽ̱xgacügü ügüxü̃rüxü̃ nixĩ.
3 Rü nüma ga Achíriaanearü ãẽ̱xgacü ga Chamanachá, rü norü churaragümaxã Iraéanecüã̱xarü ãẽ̱xgacü ga Ochéaca̱x ínayagoõchi rü nüxü̃ narüporamae. Rü nüma ga Chamanachá rü nügüme̱xwa nanayexmaxẽxẽ ga Ochéa rü naxü̃tawa tacü ga diẽruca̱x ínacaüüxü̃ ga guxcüma ga taunecügügu.
4 Natürü nüma ga Achíriaanearü ãẽ̱xgacü ga Chamanachá rü nüxü̃ nacua̱xama nax Ochéa rü bexma Equítuanearü ãẽ̱xgacü ga Chóxmaxã nax nügü naxucu̱xẽgüxü̃ nax Achíriaaneme̱xẽwa ínanguxuchixü̃ca̱x. Rü naétü marü tama nüxü̃́ ngĩxü̃ naxütanü ga yema diẽru ga wüxichigü ga taunecü nüxna ngĩxü̃ naxãgücü. Rü yemaca̱x nüma ga Chamanachá rü norü churaragüxü̃ namu nax Ochéaxü̃ yayauxgüxü̃ca̱x rü napoxcugüãxü̃ca̱x.
5 Rü norü churaragü rü Iraéanegu nachocu rü Chamáriaarü ĩaneca̱x ínayaxüãchi rü tomaepü̱x ga taunecü yéma nüxna nadaugü nax taxúema íxũxũxü̃ca̱x.
6 Rü yexguma 9 ga taunecü marü ãẽ̱xgacü yixĩxgu ga Ochéa, rü nüma ga Achíriaanearü ãẽ̱xgacü rü nanapu ga guma ĩane. Rü Achíriaarü naanewa nanagagü ga yema Iraéanecüã̱xgü. Rü ĩane ga Arágu nayanu ga natü ga Abócutüwa ga Gocháü̃anewa. Rü togü rü Médiatanüxü̃arü ĩanegügu nayanu.
7 Rü yema guxchaxü̃ nüxü̃ nangupetü ga yema Iraéanecüã̱xgü, yerü tama naga naxĩnüe ga Cori ya Tupana ga Equítuanewa ínanguxü̃xẽẽcü ga Faraóü̃me̱xẽwa. Rü tomare ga tupanagüxü̃ nicua̱xüü̃gü, rü yemaacü Tupanape̱xewa chixexü̃ naxügü.
8 Rü nagu namaxẽ ga nacümagü ga yema duü̃xü̃gü ga nüxíra yema naanewa yexmagüxü̃ ga Tupana norü o̱xigüpe̱xewa íwoxü̃xü̃. Rü ñu̱xmachi yema Iraéanearü ãẽ̱xgacügü naxca̱x íxügüxü̃ ga nacümagü ga chixexü̃gu rü ta namaxẽ.
9 Rü yema Iraéanecüã̱xgü rü Cori ya norü Tupanape̱xewa chixexü̃ ga ore nixugüe. Rü guxü̃nema ga norü ĩanegüwa, rü norü dauxü̃taechicagüwa, rü norü ĩanegü ga meama ípoxegugünewa nanamexẽxẽ ga nachicagü ga ngextá norü tupananetagüxü̃ nawa yacua̱xüü̃güxü̃.
10 Rü yexgumarüxü̃ ta rü wüxichigü ga ma̱xpǘnegüetügu rü naigü ga meetaxü̃tüü̃gu nayanuã ga norü tupananetachicüna̱xãgü ga nutanaxca̱x rü Acheráchicüna̱xãgü.
11 Rü nüma ga Iraéanecüã̱xgü rü nagu namaxẽ ga nacümagü ga yema duü̃xü̃gü ga nüxíra yema naanewa yexmagüxü̃ ga Cori ya Tupana yéma íwoxü̃xü̃ Iraétanüxü̃pe̱xewa. Rü yema tupananetagüca̱x nayagu ga pumarate̱xegü, rü ñu̱xũchi taxü̃ ga to ga chixexü̃gü yéma naxügü, rü yemaacü poraãcü Cori ya Tupanaxü̃ nanuxẽẽgü.
12 Rü tupananetachicüna̱xãgüxü̃ nicua̱xüü̃gü, rü nanaxügüama ga yema Cori ya Tupana poraãcü nüxna chu̱xuxü̃.
13 Rü yema nixĩ ga norü orearü uruü̃güwa marü Iraétanüxü̃maxã nüxü̃ yaxuxü̃ ga Cori ya Tupana nax nüxü̃ naxoexü̃ca̱x ga yema chixexü̃ ga nacümagü, rü nüma ya Tupana nanaxwa̱xexü̃ãcüma nax yanguxẽẽgüãxü̃ca̱x ga yema mugü rü ngu̱xẽẽtaegü ga norü o̱xigüna naxãxü̃ ga norü orearü uruü̃güwa.
14 Natürü woo Tupana rü norü orearü uruü̃güwa nayaxucu̱xẽgü, natürü ga nüma ga Iraéanecüã̱xgü rü tama inaxĩnüechaü̃ naxrüxü̃ ga norü o̱xigü ga tama aixcüma Cori ya Tupanaaxü̃́ yaxõgüxü̃.
15 Rü yemaacü ga yema duü̃xü̃gü rü nüxü̃ naxoe ga Tupanaarü mugü rü yema uneta ga nũxcüma norü o̱xigümaxã Tupana nüxü̃ ixuxü̃. Rü tama naga naxĩnüe ga Tupanaarü ucu̱xẽgü. Rü woo Tupana nüxna nachu̱xuxü̃, natürü nügügutama nayanachixexẽẽgü yerü naxca̱x nadauxü̃taegüama nax naxchicüna̱xãgü i taxuwama mexü̃xü̃ nax yacua̱xüü̃güxü̃ naxrüxü̃ ga yema togü ga nachixü̃anecüã̱xgü ga norü üyeanecüwawa yexmagüxü̃ ga tama Tupanaaxü̃́ yaxõgüxü̃.
16 Rü nüxü̃ narüxoe ga guxü̃ma ga norü Cori ya Tupanaarü mugü. Rü yemaca̱x nügüca̱x nanaxügü ga taxre ga wocaxacüchicüna̱xãgü ga úirunaxca̱x, rü nanaxügü ta ga tupananeta ga Acheráchicüna̱xãx. Rü naétü nüxü̃ nicua̱xüü̃gü ga üa̱xcü rü tauemacü rü woramacurigü rü ñu̱xũchi Baáchicüna̱xã rü ta.
17 Rü yexgumarüxü̃ ta yema tupananetagüarü ãmarearü guruü̃wa tüxü̃ nigu ga naxacüxe ga yatüxe rü ngexe. Rü nagu ínamaxẽ ga yuü ga ẽxü̃guxü̃xü̃ nawa icuáxü̃. Rü chixexü̃ca̱x nügü inaxãgü ga Tupanape̱xewa rü yemaacü poraãcü nananuxẽxẽ.
18 Rü yemaca̱x ga Cori ya Tupana rü yema Iraéanecüã̱xgümaxã nanu, rü ínanawogü. Rü Yudáanecüã̱xgüxü̃tawaxicatama nayexma.
19 Natürü woo ga Yudáanecüã̱xgü rü ta tama nayanguxẽẽgü ga Cori ya norü Tupanaarü mugü, yerü yema nacümagü ga chixexü̃gü ga Iraéanecüã̱xgü nagu maxẽxü̃gu naxĩ.
20 Rü yema naxügüxü̃gagu rü nüma ga Cori ya Tupana rü Iraétanüxü̃güxü̃ naxo, rü nanaxãneexẽxẽ. Rü ngĩ́ta̱xagüxü̃me̱xẽwa nanamugü. Rü yemaacü nüxna nixũgachi.
21 Rü yexguma nüma ga Iraéanecüã̱xgü rü Dabítanüxü̃na yaxĩgachigu, rü nüma ga Iraéanecüã̱xgü rü nüxü̃ naxunetagü ga Yeruboáü̃ ga Nabáx nane nax norü ãẽ̱xgacü yixĩxü̃ca̱x. Rü nüma nixĩ ga Cori ya Tupanana yaxĩgachixẽẽãxü̃ ga yema Iraéanecüã̱xgü, rü ñu̱xũchi poraãcü pecadugu nayixẽẽxãxü̃.
22 Rü yemaacü ga yema Iraéanecüã̱xgü rü yema chixexü̃ ga Yeruboáü̃ üxü̃gu namaxẽ, rü tama nüxü̃ narüxoe.
23 Rü yemaca̱x ga Cori ya Tupana rü düxwa Iraéanecüã̱xgüna nixũgachi, yema guxü̃ma ga norü orearü uruxü̃güwa nüxü̃ yaxuxü̃rüxü̃. Rü yemaacü ga yema Iraéanecüã̱xgü, rü Achíriaanewa nanagagü. Rü yexguma nachiga naxümatügu rü yématama nayexmagü.
Tomare ga duü̃xü̃gü Chamáriaarü ĩanewa namugü
24 Rü nüma ga Achíriaanearü ãẽ̱xgacü rü Iraéanecüã̱xgüchicüxü Chamáriaarü ĩanegüwa nanamugü ga duü̃xü̃gü ga Babiróniaanecüã̱x rü Cútaanecüã̱x rü Abáanecüã̱x, rü Amáanecüã̱x, rü Cheparabaíü̃anecüã̱x nax Chamáriaanegu naxãchiü̃güxü̃ca̱x nachicüxü ga yema Iraéanecüã̱x. Rü yemaacü ga yema togü ga duü̃xü̃gü rü Chamáriaanegu nachocu rü Iraéanecüã̱xarü ĩanegügu naxãchiü̃gü.
25 Natürü yema duü̃xü̃gü ga Achíriaanearü ãẽ̱xgacü yéma mugüxü̃ rü tama Cori ya Tupanaxü̃ nicua̱xüü̃gü. Rü yemaca̱x yexguma yexwacax Chamáriaarü ĩpatagügu nügü yanuxgu, rü Tupana rü yéma nanamugü ga leóü̃gü nax nadaiaxü̃ca̱x ga ñuxre ga yema duü̃xü̃gü.
26 Rü yemaca̱x ñuxre ga yema duü̃xü̃gü rü Achíriaanearü ãẽ̱xgacüxü̃tawa naxĩ ga namaxã nüxü̃ yanaxugüxü̃ca̱x, rü ñanagürügü nüxü̃: —Toma i Chamáriaanearü ĩanegüwa toxü̃ nax cumugüxü̃ nax ngẽxma taxãchiü̃güxü̃ca̱x, rü tama nüxü̃ tacua̱x i nacüma i norü Tupana i ngẽma nachixü̃ane. Rü ngẽmaca̱x i ngẽma norü Tupana rü toxca̱x ngéma nanamugü i leóü̃gü i toxü̃ ngõ̱xcuxü̃ —ñanagürügü.
27 Rü yemaca̱x ga nüma ga Achíriaanearü ãẽ̱xgacü rü nanaxuegu rü ñanagürü: —¡Penamuegu i wüxi i chacherdóte i Chamáriaanecüã̱x nax Chamáriaaneca̱x nataeguxü̃ rü ngéma nangẽxmaxü̃ca̱x rü ngẽma ngexwaca ngugüxü̃ i duü̃xü̃güxü̃ nangúexẽẽxü̃ca̱x i ngẽma Chamáriaanecüã̱xarü tupanacüma! —ñanagürü.
28 Rü yemaacü ga wüxi ga chacherdóte ga Chamáriaanewa ínagaxüchigüxü̃ rü wenaxarü Chamáriaaneca̱x nataegu, rü Betégu nayaxãchiü̃. Rü yema nixĩ ga nangúexẽẽxü̃ nax ñuxãcü Cori ya Tupanaxü̃ nax yacua̱xüü̃güxü̃.
29 Natürü yema duü̃xü̃gü ga to ga nachixü̃anewa ne ĩxü̃ rü wüxichigü ga Chamáriaarü ĩanewa iyexmagüchigüxü̃ rü noxrütama tupanachicüna̱xã ta naxügü. Rü Chamáriaanecüã̱xgü ügüxü̃ ga tupanachicüna̱xãchicagu nananugü ga ma̱xpǘnetape̱xegüwa.
30 Rü yema Babiróniaanecüã̱x rü yema namaxã natupanaã̱xgüxü̃ ga Chucóx-benúchicüna̱xã naxügü. Rü yema Cútaanecüã̱xgü rü yema namaxã natupanaã̱xgüxü̃ ga Nerigáchicüna̱xã naxügü. Rü yema Amáanecüã̱xgü rü yema namaxã natupanaã̱xgüxü̃ ga Achímachicüna̱xã naxügü.
31 Rü yema Abáanecüã̱xgü rü yema namaxã natupanaã̱xgüxü̃ ga Nibáchicüna̱xã rü Tataxchicüna̱xã naxügü. Rü yema Cheparabaíü̃anecüã̱xgü rü naxacüxegü tüxü̃ ínagu nape̱xewa ga norü tupananetachicüna̱xãgü ga Adramérex rü Anamérex.
32 Rü yema duü̃xü̃gü ga to ga nachixü̃anewa ne ĩxü̃, rü Cori ya Tupanaxü̃ nicua̱xüü̃güchire̱x. Natürü nügütanüwa nüxü̃ naxunetagü ta ga norü chacherdótegü nax yemagü norü tupanachicüna̱xãgü íyexmaxü̃wa naxca̱x ínaguxü̃ ga ãmaregü ga ma̱xpǘnetape̱xegüwa.
33 Rü yemaacü rü woo Cori ya Tupanaxü̃ nax yacua̱xüü̃güchiréxü̃, natürü norü tupananetagüxü̃ rü ta nicua̱xüü̃gü. Rü yema nachixü̃anegü ga noxri nawa ne naxĩxü̃cümagutama naxĩ ga wüxichigü.
34 Rü ñu̱xma rü ta nanaxügüama ga yema chixexü̃gü ga ü̃pa nagu namaxẽxü̃. Rü tama Cori ya Tupanaxü̃ nicua̱xüü̃gü rü tama nayanguxẽẽgü ga norü mugü rü norü ngu̱xẽẽtaegü ga nüma ga Cori ya Tupana Acóbutaagümaxã nüxü̃ yaxuxü̃ nax nagu namaxẽxü̃ca̱x. Rü Tupana rü Iraégu nanaxüéga ga Acóbu.
35 Rü yexguma Cori ya Tupana Iraétanüxü̃maxã inaxunetagu rü namaxã nüxü̃ nixu rü ñanagürü nüxü̃: —Tama name nax ta̱xacürü tupananetagüca̱x pengutaque̱xegüxü̃, rü nüxü̃ picua̱xüü̃güxü̃, rü ñu̱xũchi ãmare nüxna pexãxü̃ rü naxü̃nagü naxca̱x pedaixü̃.
36 ¡Rü cha̱u̱xca̱x ngutaque̱xe pexü̱x! Erü choma nixĩ i perü Cori ya Tupana ga Equítuanewa pexü̃ íchanguxü̃xẽẽxü̃ chorü poramaxã. Rü ngẽmaca̱x name i cha̱u̱xca̱xicatama pengutaque̱xegü, rü choxü̃ picua̱xüü̃gü rü ãmare choxna pexãgü rü pexü̃nagü cha̱u̱xca̱x pedai.
37 ¡Rü ngẽxgumarüxü̃ ta mea peyanguxẽẽ̱x i ngẽma mugü rü ucu̱xẽgü rü ngu̱xẽẽtaegü ga pexca̱x chaxümatüxü̃! Rü tama name i ta̱xacürü tupananetagüca̱x pengutaque̱xegü nax nüxü̃ picua̱xüü̃güxü̃ca̱x.
38 Rü tama chanaxwa̱xe nax nüxü̃ perüngümaexü̃ ga yema uneta ga pemaxã chaxüxü̃, rü tama name i ta̱xacürü tupananetagüca̱x pengutaque̱xegü nax nüxü̃ picua̱xüü̃güxü̃ca̱x.
39 ¡Rü cha̱u̱xca̱xica pengutaque̱xegü nax choxü̃ picua̱xüü̃güxü̃ca̱x! Erü choma nixĩ ya Cori ya perü Tupana chixĩxü̃, rü choma tá nixĩ i pexü̃ íchanguxü̃xẽẽxü̃ i perü uanügüme̱xẽwa —ñanagürü nüxü̃.
40 17:40-41 Natürü nüma ga yema Iraétanüxü̃ rü tama Tupanaga naxĩnüe, yerü nagu namaxẽama ga yema nũxcümaü̃güxü̃ ga nacümagü. Rü woo Cori ya Tupanaca̱x nangutaque̱xegügu nax nüxü̃ yacua̱xüü̃güxü̃ca̱x, natürü norü tupananetachicüna̱xãgüxü̃ rü ta nicua̱xüü̃gü. Rü yema nataagü ga yema duü̃xü̃gü rü yematama chixexü̃gü ga norü o̱xigü üxü̃tama naxügü. Rü ñu̱xma rü ta ngẽmaãcütama nanaxügü.
41 Nüü̃ nadau 17:40
