2 Reyes 2:1-25
2 Rü yexguma nawa nanguxchaü̃gu nax daxũguxü̃ ga naanewa Eríaxü̃ nagaxü̃ ga Cori ya Tupana nagu ga wüxi ga buanecü ga íxã̱ũ̱xẽmacü, rü nüma ga Ería rü wüxigu norü ngü̃xẽẽruxü̃ ga Erichéumaxã rü ĩane ga Guirigáwa ínachoxü̃.
2 Rü nüma ga Ería rü Erichéuxü̃ ñanagürü: —¡Nuxã rüxã̱ũ̱x erü Cori ya Tupana rü Betéwa choxü̃ namu! —ñanagürü. Natürü nüma ga Erichéu rü nanangãxü̃ rü ñanagürü: —Cori ya Tupanaégagu rü cuégagu cumaxã nüxü̃ chixu rü tagutáma cuxü̃ changemücüxẽxẽ —ñanagürü. Rü yemaca̱x wüxigu nügümaxã Betéwa naxĩ.
3 Natürü yema ngextü̱xücügü ga Betéwa Tupanaarü orearü uruü̃ca̱x ngúexü̃ rü Erichéuca̱x nibuxmü. Rü nüxna nacagüe rü ñanagürügü: —¿Nüxü̃ cucuáxü̃ rü ñu̱xma tá nixĩ ya Tupana i cuxna yagaãxü̃ ya Ería? —ñanagürügü. Rü nüma ga Erichéu rü nanangãxü̃ rü ñanagürü nüxü̃: —Ngẽmáacüx, marü nüxü̃ chacua̱x. Natürü tama chanaxwa̱xe i nüxü̃ pixu —ñanagürü.
4 Rü yemawena rü nüma ga Ería rü Erichéuxü̃ ñanagürü: —¡Ẽcü nuxã rüxã̱ũ̱x!, erü Cori ya Tupana rü Yericúwa choxü̃ namu —ñanagürü. Natürü nüma ga Erichéu rü nanangãxü̃ rü ñanagürü: —Cori ya Tupanaégagu rü cuégagu cumaxã nüxü̃ chixu rü tagutáma cuxü̃ changemücüxẽxẽ —ñanagürü. Rü yemaca̱x wüxigu nügümaxã Yericúwa naxĩ.
5 Natürü yema ngextü̱xücügü ga Yericúwa Tupanaarü orearü uruü̃ca̱x ngúexü̃ rü Erichéuca̱x nibuxmü. Rü nüxna nacagüe rü ñanagürügü nüxü̃: —¿Nüxü̃ cucuáxü̃ rü ñu̱xma tá nixĩ ya Cori ya Tupana i cuxna yagaãxü̃ ya yimá curü ngu̱xẽẽruxü̃ ya Ería? —ñanagürügü. Rü nüma ga Erichéu rü nanangãxü̃ rü ñanagürü: —Ngẽmáacüx, marü nüxü̃ chacua̱x. Natürü tama chanaxwa̱xe i nüxü̃ pixu —ñanagürü.
6 Rü yexguma ga nüma ga Ería rü Erichéuxü̃ ñanagürü: —¡Ẽcü nuxã rüxã̱ũ̱x! Erü Cori ya Tupana rü natü i Yudáü̃wa choxü̃ namu —ñanagürü. Natürü nüma ga Erichéu rü nanangãxü̃ rü ñanagürü: —Cori ya Tupanaégagu rü cuégagu cumaxã nüxü̃ chixu rü tagutáma cuxü̃ changemücüxẽxẽ —ñanagürü. Rü yemaca̱x wüxigu yema natüwa naxĩ.
7 Natürü 50 ga yema ngextü̱xücügü ga orearü uruü̃gü rü nawe narüxĩ. Rü yexguma Yudáü̃cutüwa nangugügu, rü Eríaarü yáxü̃waxü̃ra nayachaxãchitanü. Rü nüma ga Ería rü Erichéu rü natü ga Yudáü̃cutügu nayachigü.
8 Rü yexguma nüma ga Ería rü nanayaxu ga naxchiru ga mámüxü̃ rü nanadixcumü rü yemamaxã dexáchiüwa nanacua̱i̱xca. Rü ga dexá rü niyauxyexü̃chíüãchi. Rü nüma ga yema taxre rü yéma nügümaxã nichoü̃ pachitamaxü̃wa.
9 Rü yexguma marü Yudáü̃arü tocutüwa nangugügu, rü nüma ga Ería rü Erichéuxü̃ ñanagürü: —¡Chomaxã nüxü̃ ixu rü ta̱xacü cunaxwa̱xe nax cuxca̱x chaxüxü̃ naxü̃pa nax Tupana cuxna choxü̃ igaxü̃! —ñanagürü. Rü nüma ga Erichéu rü nanangãxü̃ rü ñanagürü: —Ngẽma Tupanaarü pora i cuxü̃́ ngẽxmaxü̃ rü chanaxwa̱xe i taxree̱xpü̱xcüna ngẽmaarü yexera choxna cunaxã —ñanagürü.
10 Rü yexguma nüma ga Ería rü nanangãxü̃ rü ñanagürü: —Tama wüxi i tauxchaxü̃ nixĩ i ngẽma naxca̱x ícuca̱xaxü̃. Natürü ngẽxguma choxü̃ cudauamagu i ngẽxguma Tupana choxü̃ igaxgu, rü tá cunayaxu i ngẽma naxca̱x ícuca̱xaxü̃. Natürü ngẽxguma tama choxü̃ cuda̱u̱xgu i ngẽxguma Tupana choxü̃ igaxgu rü taxũtáma cunayaxu —ñanagürü.
11 Rü yemaacü yadexatanüyane ga nax inaxĩxü̃ rü ngürüãchi naxca̱x nango̱x ga wüxi ga naweü̃ ga iya̱u̱xracüxǘne ga cowaru ga iya̱u̱xratanüxü̃ itúgüne, rü yema taxretanügu nayangaxi. Rü guma nixĩ ga Eríaxü̃ igaxü̃ne ga dauxü̃guxü̃ ga naanewa nagu ga wüxi ga buanecü ga íxã̱ũ̱xẽmacü.
12 Rü yemaxü̃ nada̱u̱xgu ga Erichéu rü tagaãcü aixta naxü rü ñanagürü: —Pa Chaunatüx, Pa Chaunatüx, cuma rü Iraéanecüã̱xgüca̱x rü ñoma wüxi i churaratücumü i poraxü̃chixü̃rüxü̃ quixĩ —ñanagürü. Rü yema ñaxguwena rü marü tama Eríaxü̃ nadau. Rü yexguma nüma ga Erichéu rü norü ngechaü̃maxã nügü narügáutechiru.
Eríachicüxü inarüxa̱u̱x ga Erichéu
13 Rü yemawena rü nüma ga Erichéu rü nanayaxu ga Eríachiru ga mámüxü̃ ga yéma nguxü̃. Rü natü ga Yudáü̃ca̱x nataegu rü yemacutügu nayachi.
14 Rü ñu̱xũchi yema Eríachirumaxã dexáchiüwa nanacua̱i̱xca, rü tagaãcü ñanagürü: —¿Ngexcü yixĩxü̃ ya Cori ya Eríaarü Tupana ixĩcü? —ñanagürü. Rü yexguma yema ñaxgu rü dexáchiüwa nanacua̱i̱xca rü niyauxyexü̃chíü ga dexá. Rü nüma ga Erichéu rü wenaxarü nixüe nawa ga yema natü.
15 Rü yexguma yema orearü uruü̃gü ga Yericúcüã̱xgü nüxü̃ daugügu ga yema ngupetüxü̃, rü tagaãcü ñanagürügü: —Ngẽma Naãxẽ ya Üünexü̃ i Eríawa ngẽxmaxü̃ rü Erichéuwa naxüe —ñanagürügü. Rü ñu̱xũchi naxca̱x naxĩ rü nape̱xegu nayangücuchitanü.
16 Rü ñanagürügü nüxü̃: —Toma nax curü duü̃xü̃gü tixĩgüxü̃ rü nua totanüwa nangẽxmagü i 50 i totanüxü̃ i poraexü̃. ¡Rü ngẽma ngéma namugü nax curü ngu̱xẽẽruxü̃ ya Eríaca̱x yadaugüxü̃! Erü ngürüãchi i ngẽma Tupanaãxẽ ya Üünecü rü ma̱xpǘnewa rüe̱xna wüxi i ngatewa nayata̱x —ñanagürügü. Natürü nüma ga Erichéu rü nanangãxü̃ rü ñanagürü: —Tama chanaxwa̱xe i texéxü̃ ngéma pemugü —ñanagürü.
17 Natürü ga nümagü rü poraãcü nanachixewegü, rü düxwa nüxü̃́ inaxĩnü nax yéma namugüãxü̃ca̱x ga yema 50 ga yatügü nax Eríaca̱x yadaugüxü̃ca̱x. Rü tomaepü̱x ga ngunexü̃ naxca̱x nayadaugü, natürü taguma nüxü̃ inayangaugü.
18 Rü yemaca̱x wenaxarü Yericúca̱x nawoegu ga Erichéu íyexmaxü̃wa. Rü nüma rü ñanagürü nüxü̃: —Marü pemaxã nüxü̃ chixu nax tama yéma pexĩxü̃ca̱x —ñanagürü.
Erichéu rü nanamexẽxẽ ga Yericúarü dexá
19 Rü yema Yericúwa maxẽxü̃ ga duü̃xü̃gü, rü Erichéuxü̃ ñanagürügü: —Dücax, Pa Erichéux, daa ĩane rü mexü̃ i nachicawa nangẽxma, cuma nüxü̃ cudauxü̃rüxü̃. Natürü ngẽma norü dexá rü tama name. Rü ngẽma waixü̃mü rü tama nanetü nawa narüxü —ñanagürügü.
20 Rü yexguma nüma ga Erichéu rü ñanagürü: —¡Ẽcü, nua penange i wüxi i tachóü̃ i ngexwaca̱xü̃xü̃ i yucüramaxã ããcuxü̃! —ñanagürü. Rü yexguma nüma ga yema duü̃xü̃gü rü Erichéuxü̃tawa nanangegü ya yema tachóü̃ ga yucüramaxã ããcuxü̃.
21 Rü yexguma nüma ga Erichéu rü yema ĩanearü natüwa namaxã naxũ. Rü yema dexáchiüwa nanagüe ga guma yucüra rü ñanagürü: —Cori ya Tupana rü ñanagürü: “Marü chanamexẽxẽ i ñaa dexá, rü marü taxúetama nawa tayu. Rü waixü̃müwa rü tá narüxügü i nanetügü” —ñanagürü.
22 Rü yexgumacürüwa ga yema dexá rü narüme yema Erichéu nüxü̃ ixuxü̃rüxü̃.
23 Rü yemawena nüma ga Erichéu rü ĩane ga Betéwa naxũ. Rü yexguma namagu yaxũxgu rü yexma nüxü̃ nangaugü ga wüxitücumü ga ngextü̱xüxü̃gü ga guma ĩanewa ne ĩxü̃. Rü yema ngextü̱xüxü̃gü rü Erichéuxü̃ nacugüe rü ñanagürügü: —¡Dauxü̃ naxĩ, Pa Báixeruxü̃x, Dauxü̃ naxĩ, Pa Báixeruxü̃x! —ñanagürügü.
24 Rü yexguma nüma ga Erichéu rü nügü ínidau, rü Tupanaégagu guxchaxü̃ namaxã naxuegu. Rü yexgumatama yema naixnecüwa inayayi ga taxre ga osu. Rü yema osugü rü yema ngextü̱xüxü̃gütanüwa nanadai ga 42.
25 Rü ñu̱xũchi nüma ga Erichéu rü guma ma̱xpǘne ga Carméruwa naxũ. Rü yéma nataegu̱xgu rü ĩane ga Chamáriawa naxũ.
