2 Reyes 20:1-21
20 Rü nüma ga Echequía rü poraãcü nida̱xawe. Rü yemaca̱x ga orearü uruxü̃ ga Ichaía ga Amúx nane, rü ínayadau, rü ñanagürü nüxü̃: —Cori ya Tupana rü ñanagürü cuxü̃: “Ẽcü ¡namaxã idexa i cuxacügüx, rü namaxã nüxü̃ ixu nax ñuxãcü tá cuwena namaxẽxü̃! Erü ñu̱xma rü taxũtáma cuxca̱x nitaane, rü tá cuyu” —ñanagürü.
2 Rü nüma ga Echequía rü nadixeguãchi rü ĩxtapüguama nabuenü rü ñaãcü nayumüxẽ:
3 —Pa Corix, Pa Tupanax, cuxü̃ chaca̱a̱xü̃ nax nüxna cucua̱xãchixü̃ca̱x nax ñuxãcü cuxca̱x chapuracüxü̃ rü guxü̃guma chanaxüxü̃ ga yema cuma namaxã cutaãẽxü̃ —ñanagürü. Rü yema ñaxguwena rü ñu̱xũchi poraãcü naxaxu.
4 Rü naxü̃pa ga Ichaía nax ixũxũxü̃ naã̱xtüwa ga guma ãẽ̱xgacüpata, rü nüma ga Cori ya Tupana rü Ichaíamaxã nidexa rü ñanagürü nüxü̃:
5 —¡Wena íyadau ya Echequía ya chorü duü̃xü̃güarü ãẽ̱xgacü ixĩcü! ¡Rü namaxã nüxü̃ ixu: “Choma ya nũxcümaü̃cü ga curü o̱xi ga Dabíarü Tupana rü marü cuxü̃́ nüxü̃ chaxĩnü i curü yumüxẽ, rü nüxü̃ chadau i cu̱xgüxü̃etü nax cuxaxuxü̃! Rü choma rü tá cuxca̱x chayataanexẽxẽ rü tomaepü̱x i ngunexü̃guwena rü tá marü ícurüda rü tá chopata ya taxü̃newa cuxũ.
6 Rü cuxü̃́ tá chanaxǘnagü i 15 ya taunecü nax cumaxü̃xü̃. Rü choma rü tá cuxü̃ íchapoxü̃ rü tá íchanapoxü̃ ya yimá ĩane ya Yerucharéü̃ nüxna i ngẽma Achíriaanecüã̱xarü ãẽ̱xgacü. Rü ngẽmaãcü chanaxü erü nüxü̃ changechaü̃ ya chorü duü̃ ya Dabí rü chayanguxẽxẽ i ngẽma nüxü̃ chixuxü̃” —ñanagürü.
7 Rü Ichaía rü nanamu nax naxügüãxü̃ ga wüxi ga iguchara. Rü yemamaxã nanachagü ga yema ínataixnaã́xü̃wa ga ãẽ̱xgacü. Rü yemaacü naxca̱x nitaane.
8 Rü nüma ga Echequía rü Ichaíana naca rü ñanagürü: —¿Ta̱xacürü cua̱xruü̃wa tá nixĩ i nüxü̃ chacuáxü̃ nax Cori ya Tupana cha̱u̱xca̱x yataanexẽxẽxü̃, rü tomaepü̱x i ngunexü̃guwena rü napata ya taxü̃newa tá nax chaxũxü̃? —ñanagürü.
9 Rü nüma ga Ichaía rü nanangãxü̃ rü ñanagürü: —Ñaa tá nixĩ i ngẽma cua̱xruxü̃ i nüma ya Cori ya Tupana tá cuxna ãxü̃ nax nawa nüxü̃ cucuáxü̃ca̱x rü aixcüma tá nayanguxẽxẽ i ngẽma cumaxã inaxunetaxü̃: ¿Cunaxwa̱xe i üa̱xcüpechita rü 10 i wüye nax naxĩnagüxü̃, rüe̱xna 10 i wüye nax nataeguxü̃? —ñanagürü.
10 Rü nüma ga Echequía nanangãxü̃ rü ñanagürü: —Ngẽma üa̱xcüpechita nax naxĩnagüxü̃ rü natauxcha, natürü ngẽma nügü nax nataeguxü̃ nixĩ i guxchaxü̃ —ñanagürü.
11 Rü yexguma nüma ga orearü uruxü̃ ga Ichaía rü Cori ya Tupanana naca, rü nüma ga Cori ya Tupana rü 10 ga wüye nanatáeguxẽxẽ ga üa̱xcüpechita nawa ga yema Acháxarü üa̱xcüarü ngugüruxü̃ ga ãẽ̱xgacüpatawa yexmaxü̃.
Echequía nanayaxu ga duü̃xü̃gü ga Babiróniawa ne mugüxü̃
12 Rü yexgumaü̃cüxü rü nüma ga Babiróniaanearü ãẽ̱xgacü ga Merodá-baradáü̃ ga ãẽ̱xgacü ga Baradáü̃ nane ixĩcü, rü Echequíaxü̃tawa nanamugü ga ñuxre ga norü duü̃xü̃gü nax norü moxẽ yéma nangegüxü̃ca̱x rü ãmare nüxna yaxãgüxü̃ca̱x yerü nüxü̃ nacuáchiga ga nax yada̱xawexü̃.
13 Rü nüma ga Echequía rü meama nanayaxu ga yema ãẽ̱xgacüarü duü̃xü̃gü. Rü nüxü̃ nanawe̱x ga guxü̃ma ga norü yemaxü̃gü ga nüxü̃́ yexmaxü̃ ga diẽrumü, rü úiru, rü pumaragü rü chíxü̃. Rü yexgumarüxü̃ ta rü nüxü̃ nanawe̱x ga naxnegüpataxü̃, rü guxü̃ma ga norü yemaxü̃gü ga yexma namaxã nanguxü̃xü̃. Rü guxü̃ma ga norü yemaxü̃gü ga ãẽ̱xgacüpatawa yexmagüxü̃, rü nüxü̃ nanawe̱x rü taxuxü̃ma inicu̱x.
14 Rü yemawena ga nüma ga orearü uruxü̃ ga Ichaía rü ãẽ̱xgacü ga Echequíaxü̃tawa naxũ rü nüxna nayaca rü ñanagürü: —¿Ngextá ne naxĩ i ngẽma yatügü i cuxü̃tawa ngugüxü̃, rü ta̱xacüxü̃ yixĩxü̃ i cumaxã yaxugüxü̃? —ñanagürü. Rü nüma ga Echequía rü nanangãxü̃ rü ñanagürü: —Ngẽma duü̃xü̃gü rü yáxü̃guxü̃ i nachixü̃ane i Babiróniawa nixĩ i ne naxĩxü̃ —ñanagürü.
15 Rü yexguma ga nüma ga Ichaía rü ãẽ̱xgacüna naca rü ñanagürü: —¿Rü ta̱xacü nixĩ ga nüxü̃ nadaugüxü̃ i nua cupatawa? —ñanagürü. Rü nüma ga Echequía rü nanangãxü̃ rü ñanagürü: —Nüxü̃ nadaugü i guxü̃ma i ngẽmaxü̃gü i chopatawa ngẽxmaxü̃. Rü guxü̃ma nüxü̃ chawe̱x rü taxuxü̃ma ichicu̱x —ñanagürü.
16 Rü yexguma ga nüma ga Ichaía rü ñanagürü nüxü̃: —¡Dücax, irüxĩnü i ñaa ore ya Tupana cuxca̱x nua muxü̃!:
17 “Rü tá ínangugü i ngunexü̃gü i nagu ngẽma Babiróniacüã̱x tá nadexü̃ i guxü̃ma i ngẽmaxü̃gü ga curü o̱xigü daa ãẽ̱xgacüpatagu nutaque̱xexü̃. Rü tá Babiróniawa nanana, rü taxuxü̃táma nua nayaxǘ.
18 Rü woo ya cutaagü rü ngéma Babiróniaanewa tá tüxü̃ nagagü rü tá tüxü̃ nidegüpü̱xücharexe, rü ngẽmaãcü norü puracütanüxü̃xü̃ ãẽ̱xgacüpatagu tá tüxü̃ namugü” —ñanagürü.
19 Natürü Echequía rü tama poraãcü naxoegaãxẽ yerü ñaxü̃gu narüxĩnü: —Ñu̱xma nax chamaxü̃gu rü taxũtáma ngẽma nangupetü —ñaxü̃gu narüxĩnü. Rü yemaca̱x Ichaíaxü̃ nangãxü̃ rü ñanagürü: —Cha̱u̱xca̱x name i ngẽma Tupanaarü ore i chomaxã nüxü̃ quixuxü̃ —ñanagürü.
Nayu ga Echequía
20 Rü guxü̃ma ga yema Echequíaarü puracü ga naxüxü̃ rü Yudáanecüã̱xarü ãẽ̱xgacügüarü poperagu naxümatü. Rü ngéma nango̱x ga ñuxãcü nax naxüaxü̃ ga yema ĩanearü dexápáxü̃ ga taxüchixü̃ rü wüxi ga dexámaxü̃ ga ĩanewa nadaxü̃.
21 Rü yexguma nayu̱xgu ga Echequía, rü nane ga Manaché rü nachicüxü Yudáanecüã̱xarü ãẽ̱xgacüxü̃ ningucuchi.
