2 Reyes 21:1-26
21 Rü nüma ga Manaché rü 12 ga taunecü nüxü̃́ nayexma ga yexguma ãẽ̱xgacüxü̃ yangucuchigu. Rü 55 ga taunecü ãẽ̱xgacü nixĩ ga Yerucharéü̃wa. Rü ngĩéga ga naé rü Echíba nixĩ.
2 Natürü yema Manaché üxü̃ rü Tupanape̱xewa tama name. Rü nagu namaxü̃ ga yema nacümagü ga chixexü̃ ga nagu naxĩxü̃ ga yema duü̃xü̃gü ga nüxíra yema naanewa yexmagüxü̃ ga Cori ya Tupana Iraétanüxü̃pe̱xewa íwoxü̃xü̃.
3 Yerü wena nayamexẽẽgü ga yema tupananetagüarü ãmarearü guruü̃gü ga ma̱xpǘnetape̱xewa yexmagüxü̃ ga nanatü ga Echequía nagu pogüexü̃. Rü wena ínanaxüxü̃ ga Baáchicüna̱xãxarü ãmaregüarü guruxü̃. Rü Iraéanearü ãẽ̱xgacü ga Acáxrüxü̃ nanaxü ga wüxi ga Acheráchicüna̱xãxarü ãmaregüarü guruxü̃. Rü ñu̱xũchi nüxü̃ nicua̱xüxü̃ ga üa̱xcü, rü tauemacü rü woramacurigü.
4 Rü guma Tupanapata ga taxü̃nechiãwa rü nayaxüagü ga ãmaregüarü guruxü̃ naxca̱x ga tupananetachicüna̱xãgü woo nüma ga Tupana rü nüxü̃ nixu nax naxca̱xicatama yixĩxü̃ ga guma napata ga Yerucharéü̃wa.
5 Rü yema taxre ga Tupanapata ga taxü̃neã̱xtüwa rü üa̱xcüca̱x, rü tauemacüca̱x rü woramacurigüca̱x nayaxüagü ga ãmaregüarü guruxü̃.
6 Rü naétü nanetama tüxü̃ nigu nawa ga wüxi ga yema tupananetachicüna̱xãarü ãmarearü guruxü̃. Rü nagu namaxü̃ ga yuü ga naãẽgümaxã nawa yadexaxü̃, rü yuü ga nawa nüxü̃ icuáxü̃ ga ẽxü̃guxü̃. Rü duü̃xü̃gümaxã nanaxunagü nax nangúexü̃ca̱x ga yuü rü nax nangúexü̃ca̱x nax ñuxãcü duü̃xẽxü̃ nachixexẽẽgüxü̃. Rü yemaacü poraãcü chixexü̃ naxü ga Tupanape̱xewa rü poraãcü Tupanaxü̃ nanuxẽxẽ.
7 Rü Cori ya Tupanapata ga taxü̃negu nayaxǘ ga wüxi ga Acheráchicüna̱xã ga nainaxca̱x. Rü yemaca̱x nixĩ ga Cori ya Tupana rü marü Dabímaxã rü nane ga Charomóü̃maxã nüxü̃ yaxuxü̃ rü ñanagürü: —Choma rü guxü̃nema ga Iraégüarü ĩanegütanüwa nüxü̃ chaxuneta ga Yerucharéü̃ nax nawa nangẽxmaxü̃ca̱x ya chopata. Rü yima chopata ya taxü̃newa tá guxü̃gutáma changexma.
8 Rü ngẽxguma ngẽma Iraétanüxü̃ yanguxẽẽgüãgu rü nagu namaxẽgu i guxü̃ma i chorü mugü rü ngu̱xẽẽtaegü ga chorü duü̃ ga Moichémaxã nüxü̃ chixuxü̃, rü choma rü tagutáma wena íchanawoxü̃ nawa i ngẽma naane ga norü o̱xigüna chaxãxü̃ —ñanagürü.
9 Natürü nüma ga Iraétanüxü̃ rü tama Tupanaga naxĩnüe. Yerü nüma ga Manaché rü poraãcü chixexü̃ nüxü̃ naxüxẽxẽ, norü yexera ga yema duü̃xü̃gü ga nüxíra yema naanewa yexmagüxü̃ ga Tupana norü o̱xigüpe̱xegu daixü̃.
10 21:10-11 Rü yemaca̱x ga Cori ya Tupana rü norü duü̃xü̃gü ga orearü uruü̃güwa nidexa rü ñanagürü: —Nüma ga Manaché rü poraãcü chixexü̃ naxü yema Amoréutanüxü̃ ga nüxíra yéma yexmagüxü̃arü yexera. Yerü nüma ga Manaché rü Yudáanecüã̱xgüxü̃ tupananetachicüna̱xãgüxü̃ nicua̱xüü̃güxẽxẽ.
11 Nüü̃ nadau 21:10
12 Rü ngẽmaca̱x i choma ya Cori ya Iraétanüxü̃arü Tupana, rü namaxã chanaxuegu rü ñacharügü: “Poraãcü tá chanapoxcue i Yerucharéü̃cüã̱xgü rü Yudáanecüã̱xgü. Rü yíxema nüxü̃ ĩnüexe i ngẽma guxchaxü̃gü rü tá poraãcü taba̱i̱xãchie rü tangu̱xmachixegü.
13 Rü ngẽma Chamáriamaxã, rü Acáxtanüxü̃maxã chaxüxü̃ i poxcu tá nagu changu̱xẽxẽ ya yima ĩane ya Yerucharéü̃. Rü taxuxü̃táma i ta̱xacü nawa chayaxüxẽxẽ, ñoma wüxi ya poratu ega nabia̱xü̃magu rü nangaeguxgu nax taxuxü̃ma i ta̱xacü nawa yaxüxü̃rüxü̃ tá chayaxĩxẽxẽ ya yima ĩane ya Yerucharéü̃.
14 Rü ngẽma togü i chorü duü̃xü̃gü, rü nüxna tá chixũgachi rü norü uanügüme̱xẽgu tá chanayixẽxẽ nax ngẽma norü uanügü norü ĩanegu nachocuxü̃ca̱x rü nadeãcuãxü̃ca̱x ya yima ĩane.
15 Erü ngẽma chope̱xewa naxügüxü̃ i chorü duü̃xü̃gü rü nachixe. Rü choxü̃ nanuxẽẽgü ga yexguma norü o̱xigü Equítuanewa íchoxü̃gucürüwa rü ñu̱xmata ñoma i ngunexü̃wa nangu” —ñanagürü ga Tupana.
16 Rü yema Manaché üxü̃ rü Tupanape̱xewa poraãcü nachixe, rü ñu̱xũchi yema duü̃xü̃gü ga Yudáanecüã̱xgüxü̃ namu nax nümagü rü ta naxügüãxü̃ ga yema chixexü̃gü. Rü naétü rü nüma ga Manaché rü Yerucharéü̃wa nanadai ga muxü̃ma ga duü̃xü̃gü ga taxuxü̃ma ga chixexü̃ ügüxü̃. Rü yemaacü ga guma ĩane rü nagümaxã nanapa.
17 Rü guxü̃ma ga yema Manachéchiga rü yema naxüxü̃chiga rü norü pecaduchiga, rü yema popera ga Yudáanecüã̱xarü ãẽ̱xgacügüchiga nagu ümatüxü̃gu naxümatü.
18 Rü yexguma nayu̱xgu ga Manaché, rü ãẽ̱xgacüpataã̱xtü ga Uchágu nanata̱xgü. Rü yemawena rü nane ga Amóü̃ rü nachicüxü ãẽ̱xgacüxü̃ ningucuchi.
Yudáanewa ãẽ̱xgacü nixĩ ga Amóü̃
19 Rü nüma ga Amóü̃ rü nüxü̃́ nayexma ga 22 ga taunecü ga yexguma ãẽ̱xgacüxü̃ yangucuchigu. Rü taxre ga taunecü ãẽ̱xgacü nixĩ ga Yerucharéü̃wa. Rü naé rü Mechurémex nixĩ ga ngĩéga, rü ngĩnatü rü Achúru ga ĩane ga Yobácüã̱x nixĩ.
20 Natürü yema naxüxü̃ ga Amóü̃ rü Tupanape̱xewa rü nachixe yema nanatü ga Manaché üxü̃rüü̃tama.
21 Rü yema chixexü̃gü ga nanatü nagu ixũxü̃gu nixũ yerü naxca̱x nangutaque̱xe rü nüxü̃ nicua̱xüxü̃ ga yema tupananetagüchicüna̱xãgü ga nanatü nüxü̃ icua̱xüxü̃güxü̃.
22 Rü yemaacü Cori ya norü o̱xigüarü Tupanana nixũgachi, rü tama yema Cori ya Tupana naxwa̱xexü̃ãcüma nanaxügü.
23 Rü yema Amóü̃arü churaragüerugü rü nagu narüxĩnüe nax ñuxãcü yama̱xgüãxü̃. Rü napata ga nawa ãẽ̱xgacü yixĩnegu nayama̱xgü.
24 Natürü ga duü̃xü̃gü ga guma ĩanecüã̱xgü rü nanadai ga yema churaragüerugü ga ãẽ̱xgacü ga Amóü̃xü̃ ima̱xgüxü̃. Rü Amóü̃chicüxü nane ga Yochíaxü̃ nimucuchigü nax ãẽ̱xgacü yixĩxü̃ca̱x.
25 Rü guxü̃ma ga yema Amóü̃chiga rü yema naxüxü̃chiga rü yema popera ga Yudáanecüã̱xarü ãẽ̱xgacügüchiga nagu ümatüxü̃gu naxümatü.
26 Rü yexguma nayu̱xgu ga Amóü̃, rü ãẽ̱xgacüpataã̱xtü ga Uchágu nanata̱xgü. Rü yemawena rü nane ga Yochía rü nachicüxü ãẽ̱xgacüxü̃ ningucuchi.
