2 Reyes 22:1-20
22 Rü nüma ga Yochía rü nüxü̃́ nayexma ga 8 ga taunecü ga yexguma ãẽ̱xgacüxü̃ yangucuchigu. Rü 31 ga taunecü ãẽ̱xgacü nixĩ ga Yerucharéü̃wa. Rü naé rü Yedidá nixĩ ga ngĩéga, rü ngĩnatü rü Adaía ĩane ga Bucácüã̱x nixĩ.
2 Rü nüma ga Yochía rü Tupanape̱xewa mexü̃ naxü. Yerü nũxcümaü̃cü ga norü o̱xi ga Dabícümagu nixũ. Rü taguma ta̱xacüca̱x ñuxgu nüxna ínaxũxũ ga yema nacüma ga mexü̃.
Nüxü̃ inayangau ga yema popera ga Tupanaarü mugü nagu ümatüxü̃
3 Rü yexguma marü 18 ga taunecü ãẽ̱xgacü yixĩxgu ga Yochía, rü nüma rü Tupanapata ga taxü̃newa nanamu ga norü poperaarü ümatüruxü̃ ga Chapáü̃ ga Acharía nane ga Mechuráü̃ nataxa. Rü ñanagürü nüxü̃:
4 —¡Ẽcü yea chacherdótegüarü ãẽ̱xgacü ya Irichíaxü̃tawa naxũ rü namaxã nüxü̃ yarüxu nax ngĩxü̃ nanutaque̱xexü̃ca̱x i ngẽma diẽru i duü̃xü̃gü Tupanapata ya taxü̃newa ngĩxü̃ ngegücü rü ngẽma diẽru ga Tupanapata ya taxü̃nearü ĩã̱xarü dauruü̃gü duü̃xü̃güxü̃tawa ngĩxü̃ decü!
5 ¡Rü ngẽma diẽru rü nüxna ngĩxü̃ naxã i ngẽma duü̃xü̃gü i Tupanapata ya taxü̃nearü mexẽxẽmaxã icua̱xgüxü̃! Rü nümagü rü ngẽma diẽrumaxã tá nüxü̃́ nayaxügütanü i norü puracütanüxü̃ i Tupanapata ya taxü̃nearü mexẽxẽwa puracüexü̃.
6 Rü ngẽma diẽrumaxã tá corapinagüaxü̃́ rü ngẽma puracü̃maxã icua̱xgüxü̃axü̃́ rü ngẽma nutaarü nucuruü̃güaxü̃́ nanaxütanügü. Rü ngẽxgumarüxü̃ ta chanaxwa̱xe nax ngẽma diẽrumaxã naxca̱x nataxegüxü̃ i mürapewa rü nutagü ya marü mexpechinügücü nax Tupanapata ya taxü̃ne namexẽẽgüxü̃ca̱x.
7 Rü ñu̱xũchi chacherdótegüarü ãẽ̱xgacü ya Irichíamaxã nüxü̃ ixu nax tama ngẽma yatügü i Tupanapataarü mexẽẽmaxã icua̱xgüxü̃na tümaca̱x naca̱xaxü̃ ya yíxema diẽruchiga. Erü ngẽma duü̃xü̃gü rü mea ngẽma diẽrumaxã icua̱xgüxü̃ nixĩgü —ñanagürü ga ãẽ̱xgacü ga Yochía.
8 Rü wüxi ga ngunexü̃ rü nüma ga chacherdótegüarü ãẽ̱xgacü ga Irichía rü Yochíaarü poperaarü ümatüruxü̃ ga Chapáü̃maxã nüxü̃ nixu nax Cori ya Tupanapata ga taxü̃negu nüxü̃ iyangauxü̃ ga Tupanaarü mugüpane, rü Chapáü̃na nanaxã. Rü nüma ga Chapáü̃ rü nüxü̃ nadaumatü.
9 Rü yemawena rü nüma ga Chapáü̃ rü ãẽ̱xgacü ga Yochíamaxã nüxü̃ nayarüxu rü ñanagürü nüxü̃: —Ngẽma curü duü̃xü̃gü, Pa Ãẽ̱xgacüx, rü marü ngĩxü̃ nanutaque̱xe i ngẽma diẽru i Tupanapata ya taxü̃newa ngẽxmacü. Rü marü nüxna ngĩxü̃ naxã i ngẽma Tupanapata ya taxü̃nearü mexẽẽmaxã icua̱xgüxü̃ —ñanagürü.
10 Rü nüma ga Chapáü̃ rü yexgumarüxü̃ ta ãẽ̱xgacümaxã nüxü̃ nixu rü chacherdóte ga Irichía rü nüxna nax naxããxü̃ ga wüxi ga mugüpane ga Tupanapata ga taxü̃negu nüxü̃ iyangauxü̃. Rü ñu̱xũchi nüma ga Chapáü̃ rü ãẽ̱xgacüca̱x nüxü̃ nadaumatü.
11 Rü yexguma ãẽ̱xgacü nüxü̃ ĩnügu ga yema Tupanaarü mugü ga poperagu ümatüxü̃, rü poraãcü naxoegaãxẽ rü nügü narügáutechiru.
12 Rü yexgumatama ga nüma ga ãẽ̱xgacü rü nanamu ga Chapáü̃, rü Irichía, rü Aicáü̃ ga Chapáü̃ nane, rü Abúru ga Micaía nane, rü Achaía ga norü ngü̃xẽẽruxü̃, rü ñanagürü nüxü̃:
13 —¡Ẽcü Cori ya Tupanana peyaca̱xa chauégagu rü Yerucharéü̃cüã̱x i duü̃xü̃güégagu, rü guxü̃ma i Yudáanecüã̱xégagu nax tüxü̃ nüxü̃ nacua̱xẽxẽxü̃ca̱x i norü ore i ñaa popera i nüxü̃ ipeyangauxü̃gu ümatüxü̃! Erü ngürüãchi ya Cori ya Tupana rü tamaxã nanu yerü ga tórü o̱xigü rü tama naga naxĩnüe i ngẽma ñaa poperawa nüxü̃ yaxuxü̃, rü tama nagu namaxẽ i ngẽma ñaa poperagu ümatüxü̃ —ñanagürü ga ãẽ̱xgacü ga Yochía.
14 Rü nüma ga Irichía, rü Aicáü̃, rü Abúru, rü Chapáü̃, rü Achaía rü ngĩxü̃tawa naxĩ ga yema orearü uruxü̃ ga Úda ga Charúü̃ naxma̱x. Rü nüma ga Charúü̃ rü Tibá nane nixĩ rü Arátaxa nixĩ. Rü nüma ga Ará rü chacherdótegüchiruarü dauruxü̃ nixĩ. Rü ngĩma ga Úda rü Yerucharéü̃wa yema yexwaca̱xü̃ ga ĩanegu ĩ̱xãchiü̃.
15 22:15-16 Rü yexguma ngĩxna nacagüegu rü ngĩma rü inangãxü̃ rü ngĩgürügü: —Ñaa nixĩ i norü ngãxü̃ga ya Cori ya Iraéanecüã̱xgüarü Tupana, rü ñanagürü i nümax: “Namaxã nüxü̃ pixu ya yimá nua pexü̃ mugücü nax choxna peyaca̱xaxü̃ca̱x, rü choma i Cori ya Tupana rü nüxü̃ chixu rü guxchaxü̃ tá naxca̱x íchanguxẽxẽ ya daa ĩane rü norü duü̃xü̃gü, yema popera ga Yudáanearü ãẽ̱xgacü nüxü̃ daumatüxü̃ nüxü̃ ixuxü̃rüxü̃.
16 Nüü̃ nadau 22:15
17 Yerü yema duü̃xü̃gü rü choxna nixĩgachi rü norü tupananetagüca̱x pumara ínagu. Rü yemaacü choxü̃ nanuxẽẽgü namaxã ga yema chixexü̃ nax naxügüxü̃. Rü ngẽmaca̱x nixĩ i chanuxü̃ namaxã ya daa ĩane rü taxũtáma icharüngüxmüxü̃.
18 22:18-19 Natürü chanaxwa̱xe nax namaxã nüxü̃ pixuxü̃ ya yimá Yudáanearü ãẽ̱xgacü ya nua pexü̃ mugücü nax choxna peyaca̱xaxü̃ca̱x, rü choma ya Iraétanüxü̃arü Tupana rü ñachagürü nüxü̃: ‘Marü nüxü̃ chadau nax ñuxãcü chauga cuxĩnüxü̃ i ngẽxguma chorü orexü̃ cuxĩnügux, rü tü̱xcüü̃ cuxoegaãxẽ i ngẽxguma poxcu namaxã chaxuegugu i ñaa ĩane rü norü duü̃xü̃gü rü tá yagagüxü̃, rü ñuxãcü cugü curügáutechiru rü cuxaxuxü̃ i chope̱xewa, rü ngẽmaca̱x i choma rü marü cuxü̃ chaxĩnü. Rü choma i Cori ya Tupana rü ñacharügü cuxü̃:
19 Nüü̃ nadau 22:18
20 Ñu̱xmax nax chauga cuxĩnüxü̃gagu rü taxũtáma cumaxyane chanapoxcu ya daa ĩane nax ngẽmaãcü taãẽãcü cuyuxü̃ca̱x rü naxü̃tawa cunguxü̃ca̱x i curü o̱xigü. Rü ngẽmaãcü taxũtáma nüxü̃ cudau i ngẽma poxcu i namaxã tá chanapoxcuxü̃ ya daa ĩane’ ” —ñanagürü. Rü yema ãẽ̱xgacüarü duü̃xü̃gü ga Údaxü̃tawa namugüxü̃ rü nawoegu nax ãẽ̱xgacümaxã nüxü̃ yanaxugüexü̃ca̱x ga yema Tupanaarü ngãxü̃.
