2 Reyes 24:1-20
24 Rü yexguma Yoaquíü̃ Yudáanewa ãẽ̱xgacü yixĩxgu, rü nüma ga Babiróniaanearü ãẽ̱xgacü ga Nabucudonochó rü Yudáanegu naxücu nax yapuãxü̃ca̱x ga norü ĩane ga Yerucharéü̃. Rü nüma ga Yoaquíü̃ rü tomaepü̱x ga taunecü Nabucudonochóme̱xẽwa nayexma rü nüxü̃́ nanaxütanü ga yema taxü̃ ga diẽru ga naxca̱x ínacaxü̃. Natürü ga yixcamaxü̃ra rü togu narüxĩnü rü yemaca̱x Nabucudonochómaxã nanu rü tama nanaxütanü ga yema diẽru.
2 Natürü nüma ga Cori ya Tupana rü Yoaquíü̃ca̱x yéma nanamugü ga muxü̃ma ga ngĩ́ta̱xagüxü̃ ga Cadéugü,* rü Chíriaanecüã̱xgü, rü Moáanecüã̱xgü, rü Amóü̃anecüã̱xgü nax nachixexẽẽgüãxü̃ca̱x ga norü naane, yema Cori ya Tupana norü duü̃xü̃gü ga orearü uruü̃güa̱xwa nüxü̃ yaxuxü̃rüxü̃.
3 24:3-4 Rü yema guxchaxü̃ naxca̱x ínangu ga yema Yudáanecüã̱xgü, yerü nüma ga Cori ya Tupana rü marü namaxã nanaxuegu nax nügüpe̱xewa ínawoxü̃ãxü̃ca̱x nagagu ga yema chixexü̃gü ga Manaché üxü̃. Yerü nanadai ga muxü̃ma ga duü̃xü̃gü ga taxuxü̃ma ga chixexü̃ ügüxü̃, rü yemaacü nagü inabaxẽxẽ rü gumámaxã nanapáxẽxẽ ga Yerucharéü̃. Rü yema chixexü̃ ga Manaché üxü̃gagu nixĩ ga Cori ya Tupana ga tama nüxü̃́ nüxü̃ iyanangümaxü̃ ga norü chixexü̃gü.
4 Nüü̃ nadau 24:3
5 Rü guxü̃ma ga yema Yoaquíü̃chiga rü yema naxüxü̃chiga rü yema popera ga Yudáanearü ãẽ̱xgacügüchiga nagu ümatüxü̃gu naxümatü.
6 Rü yexguma nayu̱xgu ga Yoaquíü̃ rü nane ga Yoaquíü̃ nachicüxü ãẽ̱xgacüxü̃ ningucuchi.
7 Rü yexgumama ga Equítuanearü ãẽ̱xgacü rü taguma nachixü̃anena ínaxũxũ yerü nüma ga Babiróniaanearü ãẽ̱xgacü rü marü nüxna nanapu ga guxü̃ma ga yema norü naanegü ga Equítuarü natüacüwa ixügüxü̃ rü ñu̱xmata natü ga Eufrátewa nangu.
Babiróniawa nanagagü ga Yoaquíü̃ norü ngü̃xẽẽruü̃gümaxã
8 Rü nüma ga Yoaquíü̃ rü 18 ga taunecü nüxü̃́ nayexma ga yexguma ãẽ̱xgacüxü̃ yangucuchigu. Rü tomaepü̱x ga tauemacü ãẽ̱xgacü nixĩ ga Yerucharéü̃wa. Rü naé rü Neuchá nixĩ ga ngĩéga. Rü ngĩnatü rü Enatáü̃ nixĩ ga naéga. Rü nüma rü Yerucharéü̃cüã̱x nixĩ.
9 Natürü yema naxüxü̃ ga Yoaquíü̃ rü poraãcü nachixexüchi ga Cori ya Tupanape̱xewa yema nanatü üxü̃rüü̃tama.
10 Rü yexgumaü̃cüxü rü Babiróniaanearü ãẽ̱xgacü ga Nabucudonochó rü nanamu ga norü churaragü nax Yerucharéü̃ca̱x íyaxü̃ãchixü̃ca̱x. Rü nüxü̃ ínachomaeguãchi nax nagu nachocuxü̃ca̱x.
11 Rü yexguma marü nagu nachoxguyane ga guma ĩane ga Yerucharéü̃ rü yéma nangu ga nüma ga Nabucudonochó.
12 Rü yexguma nüma ga Yoaquíü̃ ga Yudáanearü ãẽ̱xgacü rü wüxigu ngĩmaxã ga naé, rü namaxã ga norü churaragüerugü, rü norü ngü̃xẽẽruü̃gü, rü togü ga ãẽ̱xgacügü, rü Babiróniaanearü ãẽ̱xgacüna nügü nana. Rü nüma ga yema Babiróniaanearü ãẽ̱xgacü rü ínanayauxü̃. Rü yexguma yema ngupetügu rü 8 ga taunecü ninge nax ãẽ̱xgacü yixĩxü̃ ga Nabucudonochó.
13 Rü yemawena ga nüma ga Nabucudonochó rü nanade ga guxü̃ma ga diẽru ga Tupanapata ga taxü̃newa yexmaxü̃, rü guxü̃ma ga diẽru ga ãẽ̱xgacüpatawa yexmaxü̃ yematama Tupana naxueguxü̃rüxü̃. Rü nagu napogü ga guxü̃ma ga Tupanapata ga taxü̃nearü yemaxü̃gü ga úirunaxca̱x ga Iraéanearü ãẽ̱xgacü ga Charomóü̃ üxü̃.
14 Rü ñu̱xũchi nayagagü ga guxü̃ma ga Yerucharéü̃cüã̱xgü, rü norü ãẽ̱xgacügü rü yema churaragü ga yexeraãcü nüxü̃ rücua̱xmaegüxü̃, rü guxü̃ma ga yema ta̱xacüarü üxü̃ icua̱xgüxü̃, rü guxü̃ma ga yema fieruwa ta̱xacü íxüxü̃mügüxü̃. Rü yemaacü 10,000 wa nangu ga yema duü̃xü̃gü ga ínayauxü̃xü̃. Rü yema naanewa rü yema yexeraãcü ingearü diẽruã̱xgüxü̃xicatama yéma nayaxügü.
15 Rü Nabucudonochó rü nayagagü ga Yoaquíü̃, rü naé, rü naxma̱xgü, rü norü churaragüerugü, rü guxü̃ma ga yema yatügü ga Yudáanewa tachigagüxü̃ ga mexü̃ ügüxü̃. Rü Yerucharéü̃wa ínanagaxü̃ rü Babiróniawa nanagagü.
16 Rü yema churaragü ga Babiróniaanearü ãẽ̱xgacü igagüxü̃, rü 7,000 nixĩ ga norü mu. Rü ñu̱xũchi 1,000 nixĩ ga yema ta̱xacüarü üxü̃ icua̱xgüxü̃ rü yema fieruwa ta̱xacü íxüxü̃mügüxü̃. Rü naétü nayagagü ga yema yatügü ga iporaexü̃ rü daixü̃ cuáxü̃.
17 Rü yemawena ga Babiróniaanearü ãẽ̱xgacü rü Mataníaxü̃ naxuneta nax Yudáanearü ãẽ̱xgacü yixĩxü̃ca̱x, nachicüxü ga namagü ga Yoaquíü̃. Rü ñu̱xũchi nanaxüchicüxü ga Mataníaéga, rü Chedequíagu nanaxüéga.
Yudáanearü ãẽ̱xgacü nixĩ ga Chedequía
18 Rü Chedequía rü 21 ga taunecü nüxü̃ nayexma ga yexguma ãẽ̱xgacüxü̃ yangucuchigu. Rü 11 ga taunecü ĩane ga Yerucharéü̃wa ãẽ̱xgacü nixĩ. Rü naé rü Amutá nixĩ ga ngĩéga rü Yeremía nixĩ ga ngĩnatü. Rü ngĩma rü Lixnácüã̱x iyixĩ.
19 Natürü guxü̃ma ga yema naxüxü̃ ga Chedequía rü Cori ya Tupanape̱xewa rü nachixe. Rü yema chixexü̃ ga Yoaquíü̃ üxü̃maxã nawüxigu ga yema chixexü̃ ga naxüxü̃.
20 Rü yemaca̱x ga nüma ga Cori ya Tupana rü ĩane ga Yerucharéü̃cüã̱xgümaxã rü Yudátanüxü̃maxã nanu rü nügüpe̱xewa ínanawoxü̃.
Notas
^ 24:2 Babiróniaanecüã̱x.
