2 Reyes 3:1-27
3 Rü yexguma Yochapáx marü 18 ga taunecü ãẽ̱xgacü ixĩxgu ga Yudáanewa rü Yoráü̃ ga Acáx nane rü inanaxügü ga nax ãẽ̱xgacü yixĩxü̃ ga Iraéanewa. Rü nüma ga Yoráü̃ rü 12 ga taunecü ĩane ga Chamáriawa ãẽ̱xgacü nixĩ.
2 Rü yema nacüma ga Cori ya Tupanape̱xewa naxüxü̃ rü nachixe. Natürü tama namaxã nawüxigu ga yema chixexü̃chixü̃ ga nanatü rü naé ügüxü̃, yerü ínanata̱x ga guma Baáxarü nuta ga üünecü ga nanatü ücü.
3 Natürü nüma ga Yoráü̃ rü nanaxü ga yematama chixexü̃ ga Nabáx nane ga Yeruboáü̃ üxü̃ ga namaxã Iraéanecüã̱xgüxü̃ chixexü̃gu nayixẽẽxü̃.
Erichéu rü nüxü̃ nixu nax Moáanearü ãẽ̱xgacüxü̃ tá naporamaegüxü̃
4 Rü Mechá ga Moáanearü ãẽ̱xgacü rü carnéruarü yaẽxẽwa napuracü. Rü yemaca̱x ga Iraéanearü ãẽ̱xgacü rü namaxã nanaxuegu nax naxütanüãxü̃ca̱x ga 100,000 ga carnérugü rü naétü 100,000 ga carnérugüta̱xagü.
5 Natürü yexguma Acáx yuxguwena ga Moáanearü ãẽ̱xgacü, rü tama marü Iraéanearü ãẽ̱xgacüga naxĩnü.
6 Rü yemaca̱x ga Iraéanearü ãẽ̱xgacü ga Yoráü̃ rü ínaxũxũ ga ĩane ga Chamáriawa nax guxü̃ma ga Iraéanewa yexmagüxü̃ ga norü churaragüxü̃ yangugüãxü̃ca̱x.
7 Rü yemawena rü Yudáanearü ãẽ̱xgacüca̱x yéma namuga rü ñanagürü: —Moáanearü ãẽ̱xgacü rü chomaxã nanu. ¿Rü taxṹ chi cuxü̃́ namexü̃ i choxü̃ cuxümücü nax namaxã yigü ida̱i̱xü̃ca̱x? —ñanagürü. Rü nüma ga Yudáanearü ãẽ̱xgacü rü nanangãxü̃ rü ñanagürü: —Cuxü̃ tá chaxümücü wüxigu namaxã i chorü churaragü rü namaxã i ngẽma chorü churaragü i cowarugu ĩxü̃. Rü cumaxã rü curü duü̃xü̃gümaxã tá tangexmagü.
8 ¿Natürü ngexü̃rüüxü̃ i namawa tá tichocu nax naxca̱x ítayaxũãchixü̃ca̱x? —ñanagürü. Rü nüma ga Yoráü̃ rü nanangãxü̃ rü ñanagürü: —Ngẽma nama i chianexü̃ i Edóü̃waama ne daxü̃wa tá pechocu —ñanagürü.
9 Rü yemaacü ga Iraéanearü ãẽ̱xgacü rü Yudáanearü ãẽ̱xgacü rü Edóü̃anearü ãẽ̱xgacü rü wüxigu inaxĩãchi. Natürü yema 7 ga ngunexü̃ nax ínaxĩxü̃, rü düxwa nayagu̱x ga norü dexá ga norü churaragü rü naxü̃nagü.
10 Rü yemaca̱x ga Iraéanearü ãẽ̱xgacü rü ñanarügü: —Dücax, Cori ya Tupana rü nua tüxü̃ nagagü i yixema tomaepü̱x i ãẽ̱xgacügü nax Moáanecüã̱xme̱xẽgu tüxü̃ nayi̱xẽẽxü̃ca̱x nax tüxü̃ nada̱i̱xü̃ca̱x —ñanagürü.
11 Rü nüma ga Yochapáx rü ínaca rü ñanagürü: —¿Ẽ̱xna nataxuma i Cori ya Tupanaarü orearü uruxü̃ i nua nax ngẽmaxü̃ imuxü̃ca̱x nax Cori ya Tupanana naca̱xaxü̃ca̱x? —ñanagürü. Rü wüxi ga Iraéanearü ãẽ̱xgacüarü churaragüeru rü ñanagürü: —Nua nangẽxma ya Erichéu ya Chapáx nane ga Eríaarü ngü̃xẽẽruxü̃ ixĩcü —ñanagürü.
12 Rü nüma ga Yochapáx rü ñanagürü: —Ngürüãchi nüxü̃́ nangẽxma i wüxi i ore i Cori ya Tupana namaxã nüxü̃ ixuxü̃ i taxca̱x —ñanagürü. Rü yexgumatama ga Iraéanearü ãẽ̱xgacü rü nüma ga Yochapáx rü nüma ga Edóü̃arü ãẽ̱xgacü rü Erichéuxü̃tawa naxĩ.
13 Natürü nüma ga Erichéu rü Iraéanearü ãẽ̱xgacüxü̃ nangãxü̃ rü ñanagürü: —Choxü̃́ nataxuma i ta̱xacüchiga cumaxã chixuxü̃. ¡Ẽcü nüxna yaca i ngẽma cunatü rü cuéarü tupananetagüarü orearü uruü̃gü! —ñanagürü. Natürü nüma ga Iraéanearü ãẽ̱xgacü rü nidexachigüama rü ñanagürü: —Tama. Erü nüma ya Cori ya Tupana rü nua toxü̃ nagagü i toma i tomaepü̱x i ãẽ̱xgacügü nax Moáanecüã̱xme̱xẽgu toxü̃ nayixẽẽxü̃ca̱x —ñanagürü.
14 Rü yexguma ga Erichéu rü ñanagürü: —Rü Cori ya Tupana ya Guxãétüwa Ngẽxmacü ya choxü̃ idawenücüpe̱xewa nüxü̃ chixu, rü ngẽxguma chi taxũchima Yochapáx ya Yudáanearü ãẽ̱xgacü nua ngẽxmagu, rü taxũchima cuxü̃́ ichaxĩnü, rü bai chi cuxü̃ chadawenüxü̃.
15 ¡Rü paxa nua penaga i wüxi i paxetaruxü̃! —ñanagürü. Rü yexguma yema paxetaruxü̃ inaxügügu ga nax napaxetaxü̃, rü Cori ya Tupana rü Erichéuna nangu.
16 Rü nüma ga Erichéu rü ñanagürü: —Cori ya Tupana rü ñanagürü: “Rü muxü̃wama peyagüyechigü i ñaa doxonexü̃.
17 Erü woo tama nibuaane rü tama nüxü̃ pedau nax napuxü̃, rü ñaa doxonexü̃ rü tá dexámaxã nayapa. Rü guxãtáma i pemax rü tá nawa pexaxegü, rü ngẽxgumarüxü̃ tá ta i perü wocagü rü pexü̃nagü.
18 Rü ñaa nixĩ i wüxi i íxramarexü̃ i Cori ya Tupana pexü̃ wéxü̃ nax ngẽmawa nüxü̃ pecuáxü̃ca̱x nax nüxü̃́ natauxchaxü̃ nax ta̱xacü naxüxü̃. Rü naétü rü tá pexme̱xgu nanayixẽxẽ i ngẽma Moátanüxü̃ nax penada̱i̱xü̃ca̱x.
19 Rü pemax rü tá nagu pepogüe ya guxü̃nema ya norü ĩanegü ya meama ípoxegugüne rü norü ĩanegü ya itaxü̃ne. Rü tá penadaxü̃ i guxü̃ma i nanetügü. Rü tá penagütagü i guxü̃ma i nachicagü i nawa dexá nayauxgüxü̃. Rü nutagümaxã tá penapaxẽxẽ i norü naanegü i nagu natoegüxü̃” —ñanagürü ga Erichéu.
20 Rü moxü̃ãcü pa̱xmama, yema ora ga nagu Cori ya Tupanana ãmare naxuaxü̃güxü̃gu, rü Edóü̃waama ne naya̱x ga dexá, rü guxü̃wama nibaixü̃.
21 Rü nüma ga Moátanüxü̃ rü yoxni nüxü̃ nacuáchigagü nax yema tomaepü̱x ga ãẽ̱xgacügü yéma ngugüxü̃ nax namaxã nügü nada̱i̱xü̃ca̱x. Rü yemaca̱x nananutaque̱xe ga norü ngextü̱xüxü̃gü rü yema iyaxü̃ ga churarawa mexü̃. Rü norü üyeanena nadaugü.
22 Rü moxü̃ãcü pa̱xmama ga yexguma pewa ínadagügu ga Moátanüxü̃ rü dexáchiügu nabáxi ga üa̱xcü. Rü yexguma yemaxü̃ nadaugügu ga Moátanüxü̃ rü nüma nüxü̃ nacua̱xgügu rü nanaduãchixü̃chiü ga dexá.
23 Rü yexguma rü ñanagürügü: —Nagü nixĩ. Rü ngẽma ñu̱xma ngupetüxü̃ nixĩ nax ngẽma ãẽ̱xgacügü rü düxwa nügütama ngẽxma nadai rü nügü ngéma nayuexẽxẽ. Pa Tomücügüx, ¡ngĩxã rü yigüaxü̃́ tayade i norü ngẽmaxü̃gü i ngéma nawogüxü̃! —ñanagürügü.
24 Natürü yexguma yema Iraétanüxü̃arü churaragü ípegüxü̃gu nachocuxgu ga Moátanüxü̃, rü nüma ga Iraétanüxü̃ rü naxca̱x nixü nax nadaiaxü̃ca̱x. Rü nayabuxmü. Rü ñu̱xũchi nawe nangẽgü rü nayadai.
25 Rü yemawena ga Iraétanüxü̃arü churaragü rü Moátanüxü̃arü ĩanegügu napogüe. Rü nutagümaxã nanapagüxẽxẽ ga naanegü ga nabü nagu natogüxü̃. Rü nanagütagü ga guxü̃ma ga nachicagü ga nawa dexá nayauxgüxü̃. Rü guxü̃ma ga nanetügü rü nanadaxü̃. Rü guma ĩane ga Quíru-aréchexicatama ínayaxü. Natürü yema churaragü ga maxgütaeruxü̃maxã ixãnexü̃ rü nüxü̃ ínachomaeguãchi rü yemaacü ínanayauxü̃.
26 Rü yexguma Moátanüxü̃arü ãẽ̱xgacü nüxü̃ icua̱xãchigu ga nax Iraétanüxü̃arü churaragü rü namumaexü̃, rü nanade ga 700 ga norü churaragü ga nacutügumare ixĩxü̃ nax yemamaxã Edóü̃arü ãẽ̱xgacü íyexmaxü̃waama naxüpetüxü̃ca̱x. Natürü taxucürüwama yéma nachopetü.
27 Rü yemaca̱x nayayaxu ga nane ga yacü ga nachicüxü ãẽ̱xgacüxü̃ íxücuchaü̃cü rü ĩanearü poxeguxü̃tápü̱xétüwa nanaga. Rü yexma nayama̱x rü norü tupananetaca̱x nayagu. Rü yemagagu rü duü̃xü̃gü rü poraãcü Iraétanüxü̃maxã nanue. Rü yemaca̱x ga yema Iraétanüxü̃ rü nanabugü ga guma norü düxenügü rü nachixü̃aneca̱x nawoegu.
