2 Reyes 5:1-27
5 Rü nüma ga Naamáü̃ rü guma Chíriaanearü ãẽ̱xgacü ga réiarü churaragüeru nixĩ. Rü norü ãẽ̱xgacü rü poraãcü nüxü̃ nangechaü̃ rü nüxü̃ narüngü̃xẽxẽ yerü muẽ̱xpü̱xcüna rü norü churaragümaxã norü uanügüxü̃ narüporamae. Natürü nüma ga Naamáü̃ rü chaxünemaxã nida̱xawe.
2 Rü nüma ga Chíriaanearü churaragü rü ñuxguacü Iraéanecüã̱xgüca̱x ínayaxüãchi. Rü guxema tüxü̃ ínayauxü̃etanüwa rü iyexma ga wüxi ga pacü ga Iraéanecüã̱x ga Naamáü̃ napatawa ngĩxü̃ gacü nax naxma̱xü̃taxü̃ yixĩxü̃ca̱x.
3 Rü wüxi ga ngunexü̃gu ga yema pacü rü ngĩrü chiũraxü̃ ngĩgürügü: —Chierüx nax namexü̃ ya yimá chorü cori ega naxü̃tawa naxũxgu ya yimá orearü uruxü̃ ya Chamáriaanewa ngẽxmacü, rü ngẽxguma rü chi naxca̱x nitaane i norü chaxünewa —ngĩgürügü.
4 Rü nüma ga Naamáü̃ rü nachixü̃anearü ãẽ̱xgacü ga réimaxã nüxü̃ nixu ga yema ore ga yema pacü nüxü̃ ixuxü̃.
5 Rü nüma ga guma Chíriaanearü ãẽ̱xgacü rü nanangãxü̃ rü ñanagürü: —¡Ẽcü ngéma naxũ! Rü choma rü tá cuxna chanaxã i wüxi i popera naxca̱x ya Iraéanecüã̱xgüarü ãẽ̱xgacü nax cuxü̃ nacuáxü̃ca̱x —ñanagürü. Rü yexguma nüma ga Naamáü̃ rü inaxũãchi. Rü yéma nanana ga 6,000 tachinü ga diẽru ga úirunaxca̱x rü 30,000 tachinü ga diẽrumünaxca̱x rü 10 ga naxchiru ga imexü̃.
6 Rü yema popera ga yéma namuxü̃ naxca̱x ga Iraéanecüã̱xgüarü ãẽ̱xgacü, rü ñanagürü: —Yimá yatü ya ngéma nangecü i ñaa popera rü chorü duü̃xü̃ ya Naamáü̃ nixĩ. Rü chanaxwa̱xe nax naxca̱x cuyataanexẽẽxü̃ nawa i norü chaxüne —ñanagürü ga yema popera.
7 Rü yexguma yema poperaxü̃ nadaumatügu ga guma Iraéanecüã̱xgüarü ãẽ̱xgacü, rü nügü narügáutechiru rü ñanagürü: —¿Ẽ̱xna nüma nüxü̃ nacua̱xgu rü choma chixĩ ya Tupana i maxü̃ nüxna chaxãxü̃ rü nüxna chanayaxuxü̃, rü ngẽmaca̱x nua cha̱u̱xca̱x namuaxü̃ i ñaa yatü nax naxca̱x chayataanexẽxẽxü̃ca̱x i norü chaxünewa? Rü ñu̱xma i nüma rü ngẽmagu nügü nicu̱xmare nax ñuxãcü wena tá taxca̱x íyaxüãchixü̃ —ñanagürü.
8 Natürü yexguma gumá orearü uruxü̃ ga Erichéu nüxü̃ cuáchigagu ga yema nügü nax nagáutechiruxü̃ ga guma ãẽ̱xgacü nagagu ga yema popera ga nayaxuxü̃, rü naxca̱x yéma namuga rü ñanagürü: —¿Tü̱xcüü̃ i cugü curügáutechiruxü̃? ¡Rü ẽcü nua namu i ngẽma yatü nax nua choxü̃ íyadauxü̃ca̱x! Rü tá naxca̱x nitaane nax ngẽmawa nüxü̃ nacuáxü̃ca̱x rü nua Iraéanewa nax nangẽxmaxü̃ i Tupanaarü orearü uruxü̃ —ñanagürü.
9 Rü nüma ga Naamáü̃ rü yéma naxũ nagu ga norü caru ga cowarugü itúxü̃ne, rü Erichéuarü ĩã̱xpatawa nayachaxãchi.
10 Natürü nüma ga Erichéu rü Naamáü̃xü̃tawa nanamu ga wüxi ga norü ngü̃xẽẽruxü̃ nax namaxã nüxü̃ yanaxuxü̃ca̱x ga yema Erichéuarü ore. Rü nüma ga yema duü̃xü̃ rü ñanagürü Naamáü̃xü̃: —¡Ẽcü 7 e̱xpü̱xcüna natü i Yudáü̃wa ínabaie! Rü ngẽmaãcü tá cuxca̱x nitaane i curü chaxünewa —ñanagürü.
11 Rü nüma ga Naamáü̃ rü nanu rü íniña rü ñanagürü: —Choma nagu charüxĩnügu rü chi cha̱u̱xca̱x ínaxũxũ rü ngẽmaãcü mea choxü̃ nayaxu rü ngẽxma nachiãcüma chi Cori ya Tupanana naca rü nagu ningõgü i ngẽma ícharüchaxünexü̃wa rü ngẽmaãcü chi cha̱u̱xca̱x nitaane nawa i chorü chaxüne.
12 ¿Rü tama ẽ̱xna i ngẽma natügü i Abaná rü Fáfa i Damácuwa ngẽxmagüxü̃ rü guxü̃ i togü i natü i Iraéanewa ngẽxmagüxü̃arü yexera namechíüxüchi? Rü ngẽmaca̱x rü taxucürüwama ngéma natü i Yudáü̃wa chaxũ nax ngẽma natüwa chaugü chayayaxuxü̃ca̱x rü charümexü̃ca̱x —ñanagürü. Rü yemaacü poraãcü nanu rü nataegu.
13 Natürü ga norü duü̃xü̃gü rü naxca̱x naxĩ rü ñanagürügü nüxü̃: —Pa Corix, ngẽxguma chi yimá orearü uruxü̃ rü ta̱xacürü guxchaxü̃ cuxü̃ naxüxẽẽgu rü ngẽxguma rü chi cunaxü. Natürü i ñu̱xma nax natauxchaxü̃ i ngẽma cumaxã nüxü̃ yaxuxü̃ rü yexera name nixĩ i naga cuxĩnü. ¡Rü cugü nayaxunemare nawa i ngẽma natü nax ngẽmaãcü cuxca̱x yataanexü̃ca̱x! —ñanagürügü.
14 Rü yexguma ga nüma ga Naamáü̃ rü nawa naxũ ga yema natü ga Yudáü̃. Rü 7 e̱xpü̱xcüna nawa naxüe rü nügü nayaxune yema orearü uruxü̃ namaxã nüxü̃ ixuxü̃rüxü̃. Rü yexguma ga naxcha̱xmüxü̃ rü narüme rü wüxi ga buxecha̱xmüxü̃rüxü̃ nixĩ.
15 Rü yexguma ga nüma ga Naamáü̃ rü guxü̃ma ga yema namücügü rü Erichéuxü̃tawa naxĩ. Rü yexguma Erichéuxü̃tawa nangugügu, rü nüma ga Naamáü̃ rü ñanagürü nüxü̃: —Ñu̱xma waxi nixĩ i aixcüma chayaxõxü̃ rü guxü̃wama i ñoma i naanewa rü nataxuma i to ya Tupana, rü yimá Iraéanecüã̱xgüarü Tupanaxicatama nixĩ ya aixcüma Tupana ixĩcü. Rü ngẽmaca̱x cuxü̃ chachixewe nax choxü̃́ cunayaxuxü̃ i ñaa wüxi i ãmare i cuxna chaxãxchaü̃xü̃ —ñanagürü.
16 Natürü nüma ga Erichéu rü nanangãxü̃ rü ñanagürü: —Chorü Tupanaégagu cumaxã nüxü̃ chixu rü taxũtáma cuxü̃́ chanayaxu i ngẽma ãmare —ñanagürü. Rü nüma ga Naamáü̃ rü namaxã nayachixewechigüama nax nüxü̃́ naya̱u̱xãxü̃ca̱x. Natürü ga nüma ga Erichéu rü tama nanayaxu.
17 Rü yexguma ga nüma ga Naamáü̃ rü ñanagürü: —Ẽcü, ngẽxguma ngẽmaãcü yixĩxgu ¡rü nua choxü̃ yangexẽxẽ i taxre i cowaruwetaãcu naguxü̃ i waixü̃mü! Erü ñu̱xmaü̃cüü rü marü taxũtáma togümare i tupanaca̱x chayama̱x rü chayagu i naxü̃nagü, rü Cori ya Tupanaca̱xicatama tá nixĩ ichanaxüxü̃ i ngẽma.
18 Natürü ngẽxguma yimá chorü ãẽ̱xgacü norü tupana i Rimóü̃patagu naxücu̱xgu rü chauchacüxü yangĩãcüma nape̱xegu chomaxã nacaxã́pü̱xügu, rü chanaxwa̱xe ya Tupana rü choxü̃́ nüxü̃ inarüngüma i ngẽma —ñanagürü.
19 Rü yexguma ga Erichéu rü nanangãxü̃ rü ñanagürü: —¡Ẽcü, taãẽãcü nataegu! —ñanagürü. Rü nüma ga Naamáü̃ rü nataegu.
20 Rü yexguma marü yáxü̃waxü̃ra nanguxgu, rü gumá Erichéuarü ngü̃xẽẽruxü̃ ga Guexáchi rü ñaxü̃gu narüxĩnü: —Yimá chorü cori rü taxuxü̃ma Naamáü̃ ya Chíriacüã̱xna nayaxu i ngẽma ngẽmaxü̃gü i nua naxca̱x nanaxü̃. Rü ngẽmaca̱x i ñu̱xma rü tá nawe change nax nüxna chayaca̱xaxü̃ca̱x —ñaxü̃gu narüxĩnü.
21 Rü nüma ga Guexáchi rü Naamáü̃we nangẽ. Rü yexguma Naamáü̃ nüxü̃ da̱u̱xgu nax nawe nangexü̃ rü ínayachaxãchi rü ínachie nawa ga norü caru. Rü Guexáchica̱x nixũ rü nüxna naca: —¿Ta̱xacürü chixexü̃ nangupetü? —ñanagürü.
22 Rü yexguma nüma ga Guexáchi rü Naamáü̃xü̃ ñanagürü: —Taxuxü̃ma nangupetüchire̱x. Natürü yimá chorü cori rü cuwe choxü̃ narümu nax cumaxã nüxü̃ chayarüxuxü̃ca̱x rü ngexwaca̱xtama ngéma nangugü i taxre i orearü uruü̃gü i ngextü̱xüxü̃ i Efraíü̃arü ma̱xpǘneanewa ne ĩxü̃. Rü ngẽmaca̱x i nüma ya chorü cori rü nua cuxca̱x namuga nax nüxna cunaxãxü̃ca̱x i 3,000 tachinü i diẽru rü taxremü i naxchiru —ñanagürü.
23 Rü nüma ga Naamáü̃ rü nanangãxü̃ rü ñanagürü: —¡Ẽcü, yange i 6,000 tachinü nagúxü̃ i diẽru! —ñanagürü. Rü nüma ga Naamáü̃ rü yexeraxü̃ ga diẽru nüxna naxããma. Rü taxre ga chocagu ngĩxü̃ nanucu wüxigu namaxã ga yema taxremü ga naxchiru. Rü taxre ga norü duü̃xü̃güna nanana nax Guexáchipatawa nangegüaxü̃ca̱x.
24 Rü yexguma guma ma̱xpǘne ga Erichéu nagu ãchiü̃newa nangugügu, rü nüma ga Guexáchi rü Naamáü̃arü duü̃xü̃güna nanayaxu ga yema diẽru, rü ñu̱xmachi nanamuegutanü. Rü yemawena rü ĩpatagu nayacu̱xgü ga yema diẽru.
25 Rü nüma ga Guexáchi rü ñu̱xũchi norü corixü̃tawa naxũ. Rü nüma ga Erichéu rü nüxna naca rü ñanagürü: —¿Ngextá ne cuxũ Pa Guexáchix? —ñanagürü. Rü nüma ga Guexáchi nanangãxü̃ rü ñanagürü: —Taxuwama nixĩ ne chaxũxü̃ —ñanagürü.
26 Natürü nüma ga Erichéu rü nüxna nicachigüama rü ñanagürü: —¿Tama ẽ̱xna nüxü̃ cucua̱x i ngẽxguma Naamáü̃ naweü̃wa cuxca̱x ixüegu rü Tupana rü choxü̃ nüxü̃ nacua̱xẽxẽ i ngẽma? Natürü ñu̱xma nax Tupanaarü poramaxã yixĩxü̃ i naxca̱x yataanexü̃ i ngẽma yatü, rü ngẽmaca̱x tama name nax naxü̃tawa naxca̱x ícaxü̃ i naxchiru, rü nayauxtanüxü̃ nax naxca̱x itaxexü̃ca̱x i naanegü, rü úbanecügü, rü carnérugü, rü wocagü, rü puracütanüxü̃ i yatüxü̃gü rü ngexü̃gü.
27 Rü ngẽmaca̱x i ñu̱xma i ngẽma Naamáü̃arü chaxüne rü tá cuxna naxüe rü nüxna naxüe i cuxacügü rü cutaagü. Rü ngẽmaãcü tá nixĩ i guxü̃gutáma —ñanagürü. Rü yexguma nüma ga Guexáchi rü Erichéuna yaxũgachigu rü nüxna naxüe ga chaxüne, rü nanacómüãchi ga naxcha̱xmüxü̃.
