2 Reyes 6:1-33
6 Rü wüxi ga ngunexü̃gu ga yema Tupanaarü orearü uruü̃gü rü Erichéuxü̃ ñanagürügü: —Dücax, ñaa nachica i nawa tomaxã cungexmaxü̃ rü toxca̱x naxíanexü̃chi.
2 Rü ngẽmaca̱x, name nixĩ i natü i Yudáü̃wa taxĩ nax ngéma wüxíechigü tanayaxuxü̃ca̱x i wüxi i naixpüta nax ngẽxma tanaxüxü̃ca̱x ya wüxi ya ĩpata nax yimawa tamaxẽxü̃ca̱x —ñanagürügü. Rü yexguma nüma ga Erichéu rü nanangãxü̃ rü ñanagürü: —Marü name, rü ¡ẽcü ngéma pexĩ! —ñanagürü.
3 Rü yexguma wüxi ga yema Tupanaarü orearü uruxü̃ rü ñanagürü: —Name nixĩ i towe curüxũ —ñanagürü. Rü yexguma nüma ga Erichéu rü ñanagürü: —Marü name. Rü marü tá pewe charüxũ —ñanagürü.
4 Rü yemaacü nüma ga Erichéu rü ta yéma naxũ. Rü yexguma natü ga Yudáü̃wa nangugügu rü inanaxügüe nax nai ne natuxgüxü̃.
5 Rü wüxi ga yema Tupanaarü orearü uruxü̃ rü nanatuxu ga wüxi ga nai. Natürü yexguma yema nai ínatuxyane rü dexágu tangu ga norü yuema. Rü yexguma Erichéuca̱x aita naxü rü ñanagürü: —Pa Ngúexẽẽruxü̃x, itangu ya chorü yuema. Rü yíxema yuema rü tama choxrüxüchi tixĩ rü paxaãchica̱x tümaca̱x íchacamarexe tixĩ —ñanagürü.
6 Rü nüma ga Erichéu rü nüxna naca rü ñanagürü: —¿Ngexta nixĩ i tanguxü̃? —ñanagürü. Rü nüma ga yema yuema tüxü̃ inguxẽẽcü rü naxuneta nax ngexta nanguxü̃ ga yema yuema. Rü nüma ga Erichéu rü nayadaxüchi ga wüxi ga naixmena̱xã rü guxema yuema ínguxü̃gu nanaña. Rü yexguma ga guxema yuema rü tangünagü.
7 Rü nüma ga Erichéu rü ñanagürü: —¡Ngĩxü̃ nayaxu! —ñanagürü. Rü nüma ga guma yuema ngĩxü̃ inguxẽẽcü rü ngĩxü̃ nayaxu ga yuema.
Erichéu rü Chíriaanecüã̱xgüchiga
8 Rü nüma ga Chíriaanecüã̱xarü ãẽ̱xgacü rü Iraéanecüã̱xgümaxã nügü nadaixchaü̃. Rü yemaca̱x namaxã nangutaque̱xe ga norü churaragüerugü rü namaxã nüxü̃ nixu nax ta̱xacürü nachicawa tá nagagüãxü̃ ga norü churaragü.
9 Natürü Tupana rü Erichéuxü̃ nüxü̃ nacua̱xẽxẽ ga yema Chíriaanecüã̱xarü ãẽ̱xgacüarü ĩnü. Rü yemaca̱x ga Erichéu rü Iraéanecüã̱xgüarü ãẽ̱xgacüxü̃tawa namuga nax tama yema nachicawa naxĩxü̃ca̱x yerü yema Chíriaanecüã̱xgü rü yexma ínayacu̱xeü̃güchaü̃.
10 Rü nüma ga Iraéanecüã̱xarü ãẽ̱xgacü rü yéma nanamugü ga norü ngugütaeruü̃gü nax nüxü̃ nacuáxü̃ca̱x rü aixcüma yixĩxü̃ ga yema Erichéu nüxü̃ ixuxü̃. Rü aixcüma nixĩ ga yema, rü yemaacü muẽ̱xpü̱xcüna tama yema Chíriaanecüã̱xgüme̱xẽgu nayi ga Iraéanecüã̱xgü.
11 Rü nüma ga Chíriaanearü ãẽ̱xgacü rü naba̱i̱xãchiãxẽ. Rü norü churaragüeruxü̃ nangutaque̱xexẽxẽ rü nüxna naca rü ñanagürü: —¿Texé tixĩ ya petanüwa ya bexma namaxã nüxü̃ ixuamáxẽ? ¿Rü texé tixĩ ya Iraéanecüã̱xgüarü ãẽ̱xgacümaxã nüxü̃ ixuamáxẽ i ngẽma nagu charüxĩnüxü̃? —ñanagürü.
12 Rü wüxi ga norü churaragüeru rü nanangãxü̃ rü ñanagürü: —Pa Ãẽ̱xgacüx, taxúema tixĩ ya texé ya nüxü̃ ixuxe i ngẽma nagu curüxĩnüxü̃. Natürü yimá Erichéu ya Tupanaarü orearü uruxü̃ ga Iraéanewa ngẽxmacü, rü yimá nixĩ ya Iraéanecüã̱xgüarü ãẽ̱xgacümaxã nüxü̃ ixuamacü woo ngẽma cuxicatama nagu curüxĩnüxü̃ ega curü pechicawa cungexmagu —ñanagürü.
13 Rü yexguma nüma ga Chíriaanearü ãẽ̱xgacü rü norü duü̃xü̃güxü̃ namu rü ñanagürü: —Ẽcü ¡ngéma pexĩ rü naxca̱x peyada̱u̱x i ngẽma Erichéu! Rü ngẽxguma nüxü̃ ipeyangauxgu rü ¡chomaxã nüxü̃ pixu nax ngéma chanamugüxü̃ca̱x i ñuxre i churaragü nax yanayauxgüãxü̃ca̱x! —ñanagürü. Rü norü duü̃xü̃gü namaxã nüxü̃ nixugüe ga ĩane ga Dotáü̃wa nax nayexmaxü̃.
14 Rü yexguma ga nüma ga ãẽ̱xgacü rü yéma nanamugü ga wüxitücumü ga churaragü ga cowaruétügu ĩxü̃ rü totücumü ga carugü ga cowaru itúgünegu ĩxü̃ rü muxü̃ma ga churaragü ga nacutügumare ĩxü̃. Rü yema churaragü rü chütacü guma ĩane ga Dotáü̃wa nangugü rü nüxü̃ ínachomaeguãchi.
15 Rü moxü̃ãcü pa̱xmama ínarüda ga Erichéuarü ngü̃xẽẽruxü̃. Rü yexguma ínaxũxü̃gu ga ĩpatawa, rü nüxü̃ nadau ga yema churaragü ga guma ĩanexü̃ íchomaeguãchixü̃ namaxã ga norü cowarugü, rü namaxã ga naweü̃gü ga cowaru itúgüne. Rü Erichéumaxã nüxü̃ nayarüxu rü ñanagürü: —¿Ñu̱xmax, Pa Ngu̱xẽẽruxü̃, rü ta̱xacü tá ixüexü̃? —ñanagürü.
16 Rü nüma ga Erichéu rü nanangãxü̃ rü ñanagürü: —¡Taxṹ i cumuü̃xü̃! Erü ngẽma Tupanaarü churaragü i dauxü̃cüã̱x i tamaxã ngẽxmagüxü̃ rü ngẽma Chíriaanecüã̱xarü churaragüarü yexera narümumae —ñanagürü.
17 Rü nüma ga Erichéu rü nayumüxẽ rü ñanagürü: —Pa Corix, Pa Tupanax, cuxna chaca nax cunango̱xetüxẽẽxü̃ca̱x ya daa chorü ngü̃xẽẽruxü̃ nax nüxü̃ nadauxü̃ca̱x i ngẽma curü churaragü i torü dauruxü̃ ixĩgüxü̃ —ñanagürü. Rü nüma ga Cori ya Tupana rü nanango̱xetüxẽxẽ ga gumá Erichéuarü ngü̃xẽẽruxü̃. Rü nüxü̃ nadau ga guma ma̱xpǘne rü namaxã nanapa ga Tupanaarü churaragü ga cowaruétügu ĩxü̃ rü naweü̃ ga ñoma üxüemarüxü̃ ixĩgüne ga Erichéuxü̃ íchomaeguãchixü̃.
18 Rü yexguma yema churaragü ga Chíriaanecüã̱x Erichéuca̱x ibuxmüchaü̃gu, rü nüma ga Erichéu rü Cori ya Tupanana naca rü ñanagürü: —Pa Tupanax, ẽcü ¡yangexetüxẽxẽ i ngẽma duü̃xü̃gü! —ñanagürü. Rü nüma ga Cori ya Tupana rü nayangexetüxẽxẽ yema Erichéu naxca̱x íca̱xaxü̃rüxü̃.
19 Rü yexguma ga Erichéu rü ínaxũxũ ga napatawa rü yema Chíriaanearü churaragüxü̃ ñanagürü: —Pa Churaragüx, rü ípetüe rü tama daa nixĩ ya yima ĩane ya naxca̱x pedauxü̃ne. Rü ẽcü ¡nua chowe perüxĩ! Rü tá naxü̃tawa pexü̃ chagagü i ngẽma yatü i naxca̱x pedauxü̃ —ñanagürü. Rü ĩane ga Chamáriawa nanagagü.
20 Rü yexguma Chamáriawa nangugügu, rü nüma ga Erichéu rü nayumüxẽ rü ñanagürü: —Pa Corix, ñu̱xma rü ¡yadauuchigüxẽxẽ nax nüxü̃ nadaugüxü̃ca̱x! —ñanagürü. Rü yexguma ga nümagü rü nidauuchigü, rü nüxü̃ nicua̱xãchitanü ga ĩane ga Chamáriaarü aixepewa nax nayexmagüxü̃.
21 Rü yexguma ga nüma ga guma Iraéanecüã̱xgüarü ãẽ̱xgacü rü yema Chíriaanecüã̱xgüarü churaragüxü̃ nada̱u̱xgu, rü Erichéuna naca rü ñanagürü: —Pa Corix ¿namexü̃ nax chanadaixü̃? —ñanagürü.
22 Natürü nüma ga Erichéu rü nanangãxü̃ rü ñanagürü: —Tama name nax cunadaixü̃, erü tama tacüma nixĩ nax nadaixü̃ i ngẽma duü̃xü̃gü íiyauxü̃xü̃. Rü narümemae nixĩ nax mea cunachibüexẽẽxü̃, rü nax cunaxaxegüxẽẽxü̃. Rü ñu̱xũchi ¡nachixü̃aneca̱x nawoeguxẽxẽ! —ñanagürü.
23 Rü yexguma ga nüma ga Iraéanecüã̱xarü ãẽ̱xgacü rü nanaxü ga wüxi ga taxü̃ ga õna naxca̱x ga yema Chíriaanecüã̱x ga churaragü, rü nanachibüexẽxẽ rü nanaxaxegüxẽxẽ. Rü ñu̱xũchi norü ãẽ̱xgacüca̱x ínayamugü. Rü yexgumaü̃cüxü ga nüma ga Chíriaanecüã̱xgü rü marü taguma Iraéanecüã̱xü̃ nachixewe.
Chamáriaca̱x ínayaxüãchi ga Ben-adáxü̃
24 Rü yemawena nüma ga Chíriaarü ãẽ̱xgacü ga Ben-adáxü̃ rü nananutaque̱xe ga norü churaragü rü Chamáriaca̱x ínayaxüãchi. Rü guma ĩanexü̃ ínachomaeguãchi nax yemaacü namaxã nügü nada̱i̱xü̃ca̱x.
25 Rü taxucürüwa texé guma ĩanewa ítaxũxũ rü tixücu, rü yemaca̱x düxwa nigu̱xgü ga nawemügü rü poraãcü taiya nangu̱x ga Chamáriawa. Rü wüxi ga búrueru rü naxãtanü ga 80 tachinü ga diẽru. Rü wüxi ga litruarü ngãxü̃arü ngãxü̃ nagune ga muxtucuü̃ rü naxãtanü ga 5 tachinü ga diẽru.
26 Rü wüxi ga ngunexü̃gu nüma ga Iraéanearü ãẽ̱xgacü rü guma ĩanearü poxegü̃étügu ínayaxüegu. Rü wüxi ga nge rü nüxna yéma icagü rü ngĩgürügü: —¡Pa Ãẽ̱xgacüx, choxü̃ rüngü̃xẽxẽ! —ngĩgürügü.
27 Rü yexguma nüma ga ãẽ̱xgacü rü ngĩxü̃ nangãxü̃ rü ñanagürü: —¿Ñuxãcü chi i cuxü̃ charüngü̃xẽxẽxü̃ ega Tupana rü tama cuxü̃ rüngü̃xẽẽgu? Rü choxü̃́ nataxuma i trigu rü bínu nax cuxna chanaxãxü̃ca̱x.
28 ¿Rü ta̱xacü nixĩ i ngẽma curü guxcha? —ñanagürü. Rü yexguma ga ngĩma rü inangãxü̃ rü ngĩgürügü: —Ñaa nge rü choxna ica nax tüxü̃ ichamuxü̃ca̱x ya chaune nax ñu̱xma tüxü̃ tangõ̱xgüxü̃ca̱x rü moxü̃ rü tá inamu ya ngĩne nax tanangõ̱xgüxü̃ca̱x.
29 Rü ngẽmaca̱x tüxü̃ tamuxra ya chaune rü tüxü̃ tangõ̱x. Rü moxü̃ãcü rü ngĩxna nüxü̃ chacua̱xãchixẽxẽ nax ngĩne tüxü̃ namuxü̃ nax tüxü̃ tangṍxü̃ca̱x. Natürü i ngĩma rü ngĩnexü̃ iyacu̱x —ngĩgürügü ga yema nge.
30 Rü yexguma yema ngearü dexaxü̃ naxĩnügu ga nüma ga ãẽ̱xgacü rü poraãcü nanaxĩ̱xãchiãxẽ rü nügüchirugu nagáugü. Rü yema nax ĩanearü poxeguxü̃étüwa nayexmaxü̃ ga nüma ga ãẽ̱xgacü rü duü̃xü̃gü nüxü̃ nadaugü nax naxchiru ga aixepewa üxü̃ rü témüxü̃ yixĩxü̃.
31 Rü yexguma nüma ga ãẽ̱xgacü rü ñanagürü: —¡Tupana choxü̃ poxcu ega ñomatama i ngunexü̃gu tama chayadaerugu i Erichéu i Chapáx nane! —ñanagürü.
32 Rü yexguma nüma ga Erichéu rü napatawa nayexma rü yéma narüto namaxã ga ĩane ga Chamáriaarü ãẽ̱xgacügü. Rü nüma ga Iraéanearü ãẽ̱xgacü rü Erichéuxü̃tawa nanamu ga wüxi ga norü duü̃xü̃. Natürü naxü̃pa ga nax yéma nanguxü̃ ga yema yatü ga ãẽ̱xgacü yéma muxü̃, rü nüma ga Erichéu rü namücügüxü̃ ñanagürü: —Yimá ãẽ̱xgacü rü wüxi i máetaxü̃ nixĩ, rü nua nanamu i wüxi i yatü nax choxü̃ yadaeeruxü̃ca̱x. ¡Natürü choxü̃́ iperüxĩnüe! Rü ngẽxguma tá nua nanguxgu i ngẽma yatü, rü chanaxwa̱xe i penawãxta i ĩã̱x rü penanguxta. Erü naweama tá nüxü̃ pexĩnüe i nacutüga i ngẽma ãẽ̱xgacü —ñanagürü ga Erichéu.
33 Natürü yexguma namücügümaxã íyadexayane ga Erichéu, rü yéma nangu ya yema yatü ga ãẽ̱xgacü yéma muxü̃. Rü Erichéuxü̃ ñanagürü: —Ñaa guxchaxü̃ rü Tupana nixĩ i taxca̱x nua namuxü̃. Rü ngẽmaca̱x marü taxuacüma íchayangu̱xẽxẽ nax nüma rü tá tüxü̃ nangü̃xẽẽxü̃ —ñanagürü.
