2 Reyes 7:1-20
7 Rü nüma ga Erichéu nanangãxü̃ rü ñanagürü: —¡Irüxĩnü i Cori ya Tupanaarü ore! Erü nüma ya Cori rü ñanagürü: “Moxü̃arü ngunexü̃gu i ñaatama oragu rü daa ĩane ya Chamáriaca̱x íchocuxü̃wa rü tá natauxcha nax naxca̱x petaxegüxü̃ i 7 i litru nagúxü̃ i arína ngĩmaxã i wüxitachinütama i diẽru. Rü ngẽxgumarüxü̃ ta rü tá natauxcha nax wüxitachinü i diẽrumaxã naxca̱x petaxexü̃ i 15 litru i chebáda” —ñanagürü.
2 Rü nüma ga ãẽ̱xgacüarü ngü̃xẽẽruxü̃ rü Erichéuxü̃ nangãxü̃ rü ñanagürü: —Rü woo chi Cori ya Tupana yawãxnagu i dauxü̃guxü̃ i naanewa rü taxũchima nangupetü i ngẽma nüxü̃ quixuxü̃ —ñanagürü. Natürü nüma ga Erichéu rü nanangãxü̃ rü ñanagürü: —Cuma rü tá cuxetümaxãxü̃chi nüxü̃ cudau natürü taxũtáma cunangõ̱x i ngẽma nüxü̃ cudauxü̃ —ñanagürü.
3 Rü yexgumayane rü 4 ga rüchaxünegüxü̃ ga guma ĩaneca̱x íchocuxü̃wa yexmagüxü̃ rü nügümaxã ñanagürügü: —¿Ta̱xacü nua taxüe rü nua rütogüxü̃ rü yu nua rüngu̱xẽxẽgüxü̃?
4 Rü ngẽxguma chi ĩanegu ichocuxgu rü chi tayue erü ngéma aixepewa rü poraãcü taiya nangu̱x. Rü ngẽxguma chi nua rütogüechagu rü ngẽxgumarüxü̃ chitama tayue. Rü ngĩxã rü Chíriaarü churaragü íngẽxmagüxü̃wa taxĩ. Rü ngẽxguma taxũtáma tüxü̃ nadaixgu rü tá tamaxẽ. Rü ngẽxguma tüxü̃ nadaixgu rü tayueama tátama —ñanagürügü.
5 Rü yexguma noxri nachütagu rü inachigü rü Chíriaarü churaragü íyexmagüxü̃wa naxĩ. Natürü yexguma yangaicagügu rü nüxü̃ nicua̱xãchitanü rü marü taxuxü̃ma yéma yaxüxü̃.
6 Rü yema ngupetüxü̃ nixĩ ga nüma ga Cori ya Tupana rü yema Chíriaarü churaragüxü̃ nüxü̃ naxĩnüxẽxẽ ga naga ga caru ga dairuü̃gü rü naga ga cowarugü rü naga ga muxũchixü̃ ga churaragü. Rü yemaca̱x nüma ga Chíriaarü churaragü nagu narüxĩnüe rü nüma ga Iraéanearü ãẽ̱xgacü rü Itítanüxü̃arü ãẽ̱xgacüarü ngü̃xẽẽca̱x ínacaxü̃ rü Equítuanearü ãẽ̱xgacüarü ngü̃xẽẽca̱x ínacaxü̃ nax yemamaxã naxca̱x íyaxü̃ãchixü̃ca̱x.
7 Rü yemaca̱x ga yema Chíriaanearü churaragü rü yexguma noxri nachütagu rü inachigü rü nibuxmü. Rü yéma nanawogü ga norü düxenügü rü norü cowarugü rü norü búrugü. Rü guxü̃maxã yéma nanawogü ga napatagü, rü nibuxmü nax tama nayuexü̃ca̱x.
8 Rü nüma ga yema rüchaxünegüxü̃ rü yexguma yema Chíriaanearü churaragüpatagüpechinüwa nangugügu, rü nagu nachocu ga wüxi ga norü düxenü. Rü õnaxü̃ yéma nayangaugü rü nachibüe rü naxaxegü. Rü yéma nanade ga diẽru rü úiru rü naxchiru. Rü ñu̱xũchi nayanacu̱xgü. Rü yemawena inaxĩ rü nai ga düxenügu nachocu. Rü yéma rü ta nanade ga yemaxü̃gü rü yema rü ta inayanacu̱xgü.
9 Natürü yixcaama rü nügümaxã ñanagürügü: —Tama mexü̃ taxügü. Erü ñaa ngunexü̃chire̱x nixĩ i namexü̃ nax nüxü̃ yarüxugüexü̃ i mexü̃ i ore natürü yixema rü nua tarüchianegümare. Rü ngẽxguma chi moxü̃ ínanguxẽẽgü nax nüxü̃ yarüxugüxü̃ rü chi tüxü̃ napoxcue. Rü narümemae nixĩ nax ãẽ̱xgacüpatawa ixĩxü̃ rü nüxü̃ yarüxugüexü̃ nax yabuxmüxü̃ i Chíriaanearü churaragü —ñanagürügü.
10 Rü inaxĩãchi rü yexguma ĩanewa nangugügu rü ĩanearü dauruü̃ca̱x nacagü rü ñanagürügü nüxü̃: —Ngẽma Chíriaarü churaragüpatawa taxĩ rü taxuxü̃ma rü bai i wüxi ngẽma ngẽxmaxü̃. Rü taxuxü̃ma i ngextá nidexa. Rü cowarugü rü búrugü i ngẽxma ngagüü̃xü̃ rü churaragüarü düxenügü ya mea itexechigünexicatama nangẽxma —ñanagürügü.
11 Rü nümagü ga yema ĩanearü ĩã̱xarü dauruü̃gü rü yexgumatama ãẽ̱xgacüpatawa naxĩ rü tagaãcü nüxü̃ nixugüe ga yema ngupetüxü̃.
12 Rü yexguma ga nüma ga ãẽ̱xgacü rü woo nax nachütaxü̃ rü ínarüda. Rü norü churaragüeruxü̃ ñanagürü: —Ñu̱xma rü tá pemaxã nüxü̃ chixu i ngẽma nagu naxĩnüexü̃ i ngẽma Chíriaanearü churaragü. Rü nüma nüxü̃ nacua̱xgü nax taiya tüxü̃́ ngúxü̃ rü ngẽmaca̱x nümaxü̃ ínachoxü̃ i ngẽma ínangexmagüxü̃wa rü ngẽxma naanegu nicu̱xgü. Erü nagu narüxĩnüe rü ngẽxguma yixema íchoxü̃gu nawa ya tórü ĩane rü nüma rü tá ímaxẽãcüma tüxü̃ ínayauxü̃ rü ñu̱xũchi ĩanegu nachocu —ñanagürü.
13 Natürü wüxi ga norü churaragüeru rü ñanagürü: —Name nixĩ i ngéma tanamu i ñuxre i churaragü namaxã i 5 i cowarugü i nua yaxüxü̃. Rü ngẽmaãcü tá nüxü̃ tacua̱x nax ta̱xacü nangupetüxü̃. Rü ngẽxguma maxü̃ãcü ínangugügu rüe̱xna nayuegu rü ngẽma nüxü̃ ngupetüxü̃ rü taxũtáma ngẽma ñu̱xma tüxü̃ ngupetüxü̃arü yexera tá nixĩ. Erü guxãtáma i yixema i Iraétanüxü̃ i nua yaxügüe rü tá tayue —ñanagürü.
14 Rü yemaacü ga yema churaragü rü nanayauxgü ga taxre ga carugü ga cowaru itúgüne. Rü nüma ga ãẽ̱xgacü rü yema Chíriaanearü churaragü íyexmagüxü̃wa nanamugü nax íyadaugüãxü̃ca̱x.
15 Rü nüma rü yéma naxĩ rü naxca̱x nadaugü ga nacutüchicagü ga Chíriaanearü churaragü ñu̱xmata natü ga Yudáü̃wa nangugü. Rü nüxü̃ nadaugü nax guxü̃ma ga yema nama ga nagu naxĩxü̃wa rü naxchiru rü togü ga norü yemaxü̃gü yéma nawogüxü̃ yerü ñu̱xãẽãcüma nibuxmü. Rü ñu̱xũchi yema churaragü ga ãẽ̱xgacü nüxü̃ íyadauxẽẽxü̃ rü nawoegu. Rü ãẽ̱xgacümaxã nüxü̃ nixugüe ga yema nüxü̃ nadaugüxü̃.
16 Rü yexgumatama ga duü̃xü̃gü rü ínachoxü̃, rü yema Chíriaanearü churaragü íyexmagüxü̃wa naxĩ. Rü nanade ga guxü̃ma ga norü yemaxü̃gü rü yemawa ñuxre namaxã nataxegü. Rü yemaacü yema Cori ya Tupana nüxü̃ ixuxü̃rüü̃ãcü rü 7 litru ga arína rü wüxitachinü ga diẽru naxãtanü. Rü 15 litru ga chebáda rü wüxitachinü ga diẽru naxãtanü.
17 Rü nüma ga ãẽ̱xgacü rü guma ĩanearü ĩã̱xwa nanamu ga norü ngü̃xẽẽruxü̃ nax nüxna nadauxü̃ca̱x. Natürü nüma ga duü̃xü̃gü rü yexma nanapu̱xcuchigü rü yexma nayu ga yema ãẽ̱xgacüarü ngü̃xẽẽruxü̃, yema Erichéu nüxü̃ ixuxü̃rüxü̃ ga yexguma ãẽ̱xgacü Erichéuxü̃tawa ũxgu.
18 Rü ningu ga yema ü̃pa Erichéu ãẽ̱xgacümaxã nüxü̃ ixuxü̃ ga yexguma ñaxgu: —Ĩane ya Chamáriaarü ĩã̱xwa rü wüxitachinü i diẽrumaxã tá naxca̱x petaxe i 7 litru i arína, rü wüxitachinü i diẽrumaxã tá naxca̱x petaxe i 15 litru i chebáda —ñaxgu.
19 Rü ĩneacü ga nüma ga ãẽ̱xgacüarü ngü̃xẽẽruxü̃ rü orearü uruxü̃xü̃ nangãxü̃ rü ñanagürü: —Rü woo chi Cori ya Tupana yawãxnagu i dauxü̃guxü̃ i naanewa rü taxũchima nangupetü i ngẽma nüxü̃ quixuxü̃ —ñanagürü. Natürü nüma ga Erichéu rü nanangãxü̃ rü ñanagürü: —Cuma rü cuxetümaxãxü̃chi tá nüxü̃ cudaumare i ngẽma õna, natürü taxũtáma cunangõ̱x i ngẽma nüxü̃ cudauxü̃ —ñanagürü.
20 Rü aixcüma yema Erichéu nüxü̃ ixuxü̃rüxü̃ nangupetü, yerü ga duü̃xü̃gü rü ĩanearü ĩã̱xgu nanapu̱xcuchigü ga guma ãẽ̱xgacüarü ngü̃xẽẽruxü̃ rü nayu.
