2 Samuel 1:1-27
1 Rü yexguma Chaú yuxguwena, rü nüma ga Dabí rü Amaréxtanüxü̃arü daiwa ne naxũ. Rü ĩane ga Chicáxca̱x nataegu. Rü taxre ga ngunexü̃ yexma narüxã̱ũ̱x.
2 Natürü norü tomaepü̱x ga ngunexü̃gu, rü yéma Dabíxü̃tawa nangu ga wüxi ga yatü ga Chaú rü norü churaragümaxã íyexmaxü̃wa ne ũxü̃. Rü norü ngechaü̃maxã nügüchirugu nagáugü rü waixü̃mümaxã nügü nabuxeru, rü yemaacü ínangu. Rü yexguma Dabípe̱xewa nanguxgu rü ñaxtüanegu nanangücuchi.
3 Rü nüma ga Dabí rü nüxna naca rü ñanagürü: —¿Ngextá ne cuxũ? —ñanagürü. Rü nüma ga yema yatü rü nanangãxü̃ rü ñanagürü: —Iraéanecüã̱xgüarü churaragü íngẽxmagüxü̃wa chiña —ñanagürü.
4 Rü nüma ga Dabí rü nüxna naca, rü ñanagürü: —¿Ta̱xacü nangupetü? ¡Chomaxã nüxü̃ ixu! —ñanagürü. Rü nüma ga yema duü̃xü̃ nanangãxü̃ rü ñanagürü: —Ngẽma Iraéanecüã̱xgüarü churaragü rü nibuxmü i ngẽma nügü ínadaixü̃wa, rü muxü̃ma ngẽxma nayue. Rü ngẽxma ta nayu i Chaú rü nane i Yonatáü̃ —ñanagürü.
5 Rü nüma ga Dabí rü nüxna naca ga yema yatü ga namaxã nüxü̃ yarüxuxü̃ nax Chaú rü nanegü rü marü nayuexü̃. Rü Dabí rü ñanagürü nüxü̃: —¿Ñuxãcü nüxü̃ cucuáxü̃ nax nayuexü̃ i Chaú rü nane i Yonatáü̃? —ñanagürü nüxü̃.
6 Yema yatü ga namaxã nüxü̃ ixuxü̃ nanangãxü̃ rü ñanagürü: —Yerü choma rü guma ma̱xpǘne ga Guibóawa chayexmayane rü nüxü̃ chadau ga Chaú nax norü wocaemaxã nügü nacaxcuxü̃. Rü ñu̱xũchi norü uanügüarü carugü rü yema uanügü ga cowarutagu ĩxü̃ nax marü nüxü̃ iyangaugüchaü̃xü̃.
7 Rü yexgumayane ga nüma ga Chaú rü nügü inidau rü choxü̃ nadau rü cha̱u̱xca̱x naca. Rü choma rü naga chaxĩnü rü naxca̱x chixũ.
8 Yemawena rü choxna naca nax texé chixĩxü̃ i chomax. Rü chanangãxü̃ nax Amaréxtanüxü̃ chixĩxü̃.
9 Rü yexguma rü cha̱u̱xca̱x naxca̱x nax naxca̱x chixũxü̃ca̱x nax wüxicana chayamáxü̃ca̱x yerü marü nayuxchaü̃, natürü namaxü̃ratama.
10 Rü naxca̱x chixũ rü chayama̱x yerü nagu charüxĩnü nax taxũchima namaxü̃xü̃ nawena nax yexma yanguxü̃. Rü yemawena chanayaxu ga norü nga̱xcueruxü̃ ga naeruwa rü ñu̱xũchi nachacüüwa chanayaxu ga norü ngaxcupüxme̱xẽxü̃ nax cuxü̃tawa chananaxü̃ca̱x, Pa Chorü Corix —ñanagürü.
11 Rü nüma ga Dabí rü yema norü duü̃xü̃gü rü yexguma yema orexü̃ naxĩnüegu rü norü ngechaü̃maxã nügüchirugu nagáugüe.
12 Rü poraãcü nangechaü̃gü rü naxauxe naxca̱x ga Chaú rü nane ga Yonatáü̃. Rü yexgumarüxü̃ ta naxca̱x naxauxe ga yema muxü̃ ga churaragü ga Iraéanecüã̱xgü ga yuexü̃. Rü yemaca̱x tama nachibüe ñu̱xmata nayáuanemare.
13 Rü yemawena ga Dabí rü yema yatü ga namaxã nüxü̃ yarüxuxü̃na naca rü ñanagürü: —¿Nge̱xtácüã̱x quixĩ i cumax? —ñanagürü. Nüma nanangãxü̃ rü ñanagürü: —Choma rü to i nachixü̃anecüã̱x chixĩ rü Amaréxtanüxü̃ chixĩ —ñanagürü.
14 Rü nüma ga Dabí rü tagaãcü nüxü̃ ñanagürü: —¿Ñuxãcü tama cumuü̃ nax cuyamáxü̃ ya yimá ãẽ̱xgacü ga Cori ya Tupana nüxü̃ unetacü? —ñanagürü.
15 Rü wüxi ga norü duü̃xü̃ca̱x naca ga Dabí rü nanamu rü ñanagürü nüxü̃: —¡Yéa naxũ rü yama̱x! —ñanagürü nüxü̃. Rü nüma rü yema Amaréxtanüxü̃xü̃ nima̱x.
16 Rü yexguma yema Amaréxtanüxü̃xü̃ yama̱xyane, rü nüma ga Dabí rü ñanagürü nüxü̃: —Cugagutama nixĩ i cuyuxü̃ erü cugütama quixu nax cuyamáxü̃ ya yimá ãẽ̱xgacü ga Cori ya Tupana nüxü̃ unetacü —ñanagürü.
Chaúca̱x rü Yonatáü̃ca̱x naxaxu ga Dabí
17 Dabí rü nangechaü̃ãcüma nawiyae i ñaa wiyaegu naxca̱x ga Chaú rü nane ga Yonatáü̃ yerü nayue.
18 Rü ñu̱xũchi nanaxunagü nax yema wiyae ga ngechaü̃gu ixuxü̃maxã nangu̱xẽẽtaegüxü̃ ga Yudáanearü duü̃xü̃gü. Rü yema wiyae rü Yachéxarü poperagu naxümatü rü ñanagürü:
19 “Pa Iraétanüxü̃x,rü ngẽma cumaxã poraexü̃ rü ma̱xpǘneanegu nayue.Rü dücax i ñuxãcü nayue i ngẽma iporaexü̃.
20 ¡Taxṹ i Gáxwa nüxü̃ peyarüxuxü̃,rü taxṹ i Acharóü̃arü ĩanearü namagüwa nüxü̃ peyarüxuxü̃ nax tama nataãẽgüxü̃ca̱x i ngẽma ngexü̃gü i Firitéugü,rü tama taãẽmaxã nayunagütanüxü̃ca̱x i ngẽma ngexü̃gü i tama Tupanaaxü̃́ yaxõgüxü̃!
21 ¡Rü tagutáma wena pegu napu rü woo i cherenaane pegu nangu,Pa Guibóaarü Ma̱xpǘnegü, erü pegu nixĩ i nayuexü̃ i ngẽma tama muü̃wa̱xegüxü̃!Yexma nixĩ ga nagu napúgüexü̃ ga norü poxü̃ruü̃gü ga yema daigu yuexü̃ rü yexma nixĩ ga yaxoxü̃ ga yema Chaúarü poxü̃ruxü̃arü yáuxratachinü.
22 Rü yexguma daiwa naxĩxgu ga nüma ga Chaú rü Yonatáü̃ rü guxü̃guma nadumagugü rü niyi̱xamagugü ga norü tara rü naxnegü nagümaxã rü norü chíxü̃maxã ga yema noxrü uanügü ga poraexü̃ ga nügü namaxã nada̱i̱xü̃.
23 Rü duü̃xü̃gü rü poraãcü Chaúxü̃ rü Yonatáü̃xü̃ nangechaxü̃gü rü nanaxwa̱xegü.Rü yexguma namaxẽgu rü taguma nügüna nixĩgachitanü rü ñu̱xma nax nayuexü̃ rü wüxigu nayue.Rü nümagü rü ĩyügüarü yexera napaxaãẽgü rü leónarü yexera narüporamaegü.
24 Pa Iraéanecüã̱xgü i Ngexü̃güx,¡Chaúca̱x pexauxe!Nüma rü dauxracharaxü̃ ga naxchirumaxã rü naxchiru ga línunaxca̱xmaxã pexü̃ nixüxchiru.Rü úirumaxã pexü̃ ninga̱xãẽ.
25 Rü dücax i ñuxãcü daigu nayue i ngẽma poraexü̃ i tama muü̃wa̱xegüxü̃.Nüma ga Yonatáü̃ rü gumá curü ma̱xpǘnegu nixĩ ga nayuxü̃.
26 Pa Chauenexẽ, Pa Yonatáü̃x, poraãcü cuxca̱x changechaü̃.Cuma rü chomaxã cumecümaxü̃chi.Ngẽma choxü̃ nax cungechaü̃xü̃ rü ngexü̃gü tüxü̃ ngechaü̃xü̃arü yexera nixĩ.
27 Taxü̃ i ngechaü̃ nixĩ nax nayuexü̃ i ngẽma tama muü̃wa̱xegüxü̃.Rü naxnegü rü nagu napogüe”,
ñanagürü ga Dabí.
