2 Samuel 10:1-19
10 Ñuxre ga taunecüguwena rü nayu ga Naáx ga Amóü̃tanüxü̃arü ãẽ̱xgacü. Rü nachicüxü ãẽ̱xgacüxü̃ ningucuchi ga nane ga Anúü̃.
2 10:2-3 Rü nüma ga Naáx rü Dabímaxã namecüma, rü yemaca̱x Dabí nagu narüxĩnü nax yexgumarüxü̃ ta Naáx nane ga Anúü̃maxã namecümaxü̃. Rü yemaca̱x ga Dabí rü ñuxre ga norü churaragüeruxü̃ Anúü̃xü̃tawa namugü nax yataãẽxẽẽgüaxü̃ca̱x nawa ga norü ngechaü̃ nax nanatü yuxü̃. Natürü yexguma Dabíarü churaragüerugü yéma Amóü̃tanüxü̃arü naanewa ngugügu, rü nümagü ga Amóü̃tanüxü̃arü churaragüerugü rü norü ãẽ̱xgacü ga Anúü̃xü̃ ñanagürügü: —¿Ẽ̱xna cuma i nüxü̃́ cuyaxõxü̃, Pa Ãẽ̱xgacüx, nax ngẽma yatügü i Dabí nua mugüxü̃ rü aixcüma yixĩxü̃ i curü taãẽxẽẽwa nua naxĩxü̃? Ngẽma nawa nua namugüãxü̃ nixĩ nax tórü ĩane nax iyadauxgüxü̃ rü nangugüãxü̃ nax yixcama rü nagu nachocuxü̃ca̱x rü tüxü̃ nada̱i̱xü̃ca̱x —ñanagürügü.
3 Nüü̃ nadau 10:2
4 Rü yexguma ga Anúü̃ rü norü churaragüxü̃ namu nax Dabíarü churaragüeruxü̃ ínayauxü̃xü̃ca̱x. Rü ngãxü̃gu nayadüyechinágugü rü ñu̱xũchi ngãxü̃gu nanagáute ga naxchirugü ñu̱xmata natarüxüwa nangu̱xẽẽgüã. Rü yemaacü nanamuegutanü.
5 Rü yexguma yemaxü̃ nacua̱xgu ga Dabí rü norü duü̃xü̃güxü̃ namu nax norü churaragüeruca̱x yadaugüxü̃ca̱x, erü nüxü̃ nacua̱x nax nümagü rü poraãcü naxãneexü̃. Rü nanamu nax Yericúgutama nachoxü̃ ñu̱xmata naxügüchinagugü rü yexguma nawoegu.
6 Rü yexguma nüma ga Amóü̃tanüxü̃ nüxü̃ cua̱xgügu nax poraãcü Dabíxü̃ nanuxẽẽgüxü̃, rü yemaca̱x nüxü̃́ nanaxütanü ga 20,000 ga Chíriaanearü churaragü ga Bex-reóxcüã̱x, rü Chobácüã̱x, rü ñu̱xũchi 1,000 ga yatügü ga ãẽ̱xgacü ga Maacáarü churaragü rü 12,000 ga Ix-tóxarü churaragü nax nüxü̃ nangü̃xẽẽgüxü̃ca̱x.
7 Natürü nüma ga Dabí rü nüxü̃ nacua̱xama ga yema, rü yemaca̱x Yoáxü̃ inamuãchi guxü̃ma ga norü churaragümaxã.
8 Rü nüma ga Amóü̃tanüxü̃ rü marü inaxĩãchi, rü ĩanearü ĩã̱x ga taxü̃wa nügü ínamexẽẽgü nax nügü nada̱i̱xü̃ca̱x. Rü yema Chíriaanearü churaragü ga Chobácüã̱x, rü Reóxcüã̱x, rü ñu̱xũchi yema Ix-tóxarü churaragü rü ãẽ̱xgacü i Maacáarü churaragü rü düxétügumare nügü ninu.
9 Rü yexguma Yoá nüxü̃ da̱u̱xgu ga tá nape̱xewaama, rü naweama ne naxĩxü̃ ga norü uanügü rü yexgumatama nayadexechi ga yema Iraéanearü churaragü ga nüxü̃ rücua̱xmaegüxü̃ rü yemaacü nügü namexẽẽgü nax Chíriaanearü churaragümaxã nügü nada̱i̱xü̃ca̱x.
10 10:10-11 Rü ñu̱xũchi yema togü ga churaragü rü naenexẽ ga Abicháixü̃ namaxã inacua̱xẽxẽ nax nüma rü Amóü̃tanüxü̃maxã nügü nada̱i̱xü̃ca̱x. Rü ñu̱xũchi naenexẽxü̃ ñanagürü: —Ega ngẽxguma Chíriaanearü churaragü choxü̃ rüporamaegügu, rü cuma tá choxü̃ curüngü̃xẽxẽ, rü ngẽxguma ngẽma Amóü̃tanüxü̃ cuxü̃ rüporamaegügu, rü choma rü tá cuxü̃ charüngü̃xẽxẽ.
11 Nüü̃ nadau 10:10
12 ¡Taxṹ i cumuü̃xü̃ rü cugü naporaxẽxẽ! ¡Rü ngĩxã yigü namaxã tadai naxca̱x i tórü nachixü̃ane rü tóxrü Cori ya Tupanaarü ĩanegü! Rü nüma ya tórü Cori ya Tupana rü tá nanaxü i ngẽma nüma nüxü̃ nacuáxü̃ nax namemaexü̃ —ñanagürü.
13 Rü nüma ga Yoá rü inaxũãchi namaxã ga norü churaragü nax Chíriaanearü churaragümaxã nügü nada̱i̱xü̃ca̱x. Natürü nüma ga Chíriaanecüã̱xgü rü naxcha̱xwa nibuxmü.
14 Rü yexguma yema Amóü̃tanüxü̃ nüxü̃ daugügu ga nax yabuxmüxü̃ ga yema Chíriaanearü churaragü, rü nüma rü ta nibuxmü Abicháicha̱xwa, rü ĩanegu naxücu. Rü yexguma ga Yoá rü nüxü̃ narüchau nax Amóü̃tanüxü̃maxã nügü daixü̃. Rü Yerucharéü̃ca̱x nataegu.
15 Rü yexguma yema Chíriaanecüã̱xgü nüxü̃ cua̱xgügu nax Iraéanecüã̱xgü nüxü̃ rüporamaegüxü̃, rü wenaxarü nügü nanutaque̱xe.
16 Rü nüma ga Chíriaanearü ãẽ̱xgacü ga Adáx-éche rü nayagagüxẽxẽ ga yema Chíriaanearü churaragü ga natü ga Eufrátearü tocutüwa yexmagüxü̃. Rü yemagü rü ĩane ga Eráü̃wa nangugü. Rü yema namaxã icuáxü̃ nixĩ ga Chobáx ga Adáx-échearü churaragüeru.
17 Natürü yexguma Dabímaxã yema Chíriachigaxü̃ yaxugügu, rü nüma ga Dabí rü yexgumatama nananutaque̱xe ga guxü̃ma ga Iraéanearü churaragü rü namaxã inaxũãchi. Rü natü ga Yudáü̃wa nichoü̃ rü Eráü̃wa nangugü. Rü yexma nixĩ ga Chíriaanecüã̱xgü ga Dabímaxã nügü nada̱i̱xü̃.
18 Natürü yema Chíriaanecüã̱xgü rü Iraéanearü churaragücha̱xwa nibuxmü. Rü Dabí nanadai ga 40,000 ga churaragü ga cowaruétügu ĩxü̃, rü 700 ga churaragü ga carugümaxã icua̱xgüxü̃. Rü yexgumarüxü̃ ta Dabí nayama̱x ga Chobáx ga Chíriaanecüã̱xgüarü churaragüeru, rü yexma nayu.
19 Rü guxü̃ma ga yema ãẽ̱xgacügü ga Adáx-échewa ügüxü̃ rü yexguma nüxü̃ nadaugügu nax Iraétanüxü̃ nüxü̃ rüporamaegüxü̃, rü Iraétanüxü̃maxã narüngüxmüe rü naxme̱xwa nügü naxügüxẽxẽ. Rü yexgumaü̃cüxü ga nüma ga Chíriaanecüã̱xgü rü namuü̃e nax Amóü̃tanüxü̃xü̃ nangü̃xẽẽgüxü̃.
