2 Samuel 11:1-27
11 Rü gumá tauemacügu ga yexguma taunecüwa nanguxchaü̃gu, rü yexguma nixĩ ga ãẽ̱xgacügü ga ínachoxü̃xü̃ ga daiwa nax naxĩxü̃ca̱x. Rü nüma ga Dabí rü nanamu ga Yoá rü norü churaragüarü ãẽ̱xgacügü nax guxü̃ma ga Iraéarü churaragümaxã yema Amóü̃tanüxü̃arü churaragümaxã nügü nada̱i̱xü̃ca̱x. Rü guma Amóü̃tanüxü̃arü ĩane ga Rabáxü̃ ínachoeguãchi. Natürü nüma ga Dabí rü Yerucharéü̃gu narüxã̱ũ̱x.
2 Rü wüxi ga yáuanecü ga yexguma pewa ínadaxgu ga Dabí, rü guma napataarü doxétüxü̃gu naxĩnagü rü yexma ínixũãchixü̃. Rü yexguma guma ĩaneétü ínadawenügu, rü ngĩxü̃ nadau ga wüxi ga nge ga mexẽchicü ga yéma aiyacü.
3 11:3-4 Rü yema nge rü ngĩgü imexẽxẽ, yerü yexwacax ngĩxca̱x nitaane ga ngĩrü da̱xawexü̃newa. Rü nüma ga Dabí rü norü duü̃xü̃xü̃ namu nax ínaca̱xü̃ca̱x nax texe yixĩxü̃ ga yema nge. Rü namaxã nüxü̃ nixugüe ga Bechabé ga Eriáü̃xacü ga Uría ga Itítanüxü̃ naxma̱x nax yixĩxü̃. Rü yexguma ga Dabí rü ñuxre ga norü duü̃xü̃güxü̃ namu nax ngĩxca̱x yacagüxü̃ca̱x nax naxü̃tawa naxũxü̃ca̱x. Rü yexguma yéma naxü̃tawa nanguxgu, rü nüma rü ngĩmaxã namaxü̃. Rü yemawena ga ngĩma rü ngĩpataca̱x itaegu.
4 Nüü̃ nadau 11:3
5 Rü ngĩma ga yema nge rü nüxü̃́ ixãxacü, rü yemaca̱x Dabíxü̃ nüxü̃ icua̱xẽxẽ.
6 Rü yexguma ga Dabí rü wüxi ga poperagu Yoáxü̃tawa nanamu ga ore ga ñaxü̃: —¡Nua chauxü̃tawa namu ya yimá Itítanüxü̃ ya Uría! —ñaxü̃. Rü yemaacü nanaxü ga Yoá.
7 Rü yexguma Uría Dabíxü̃tawa nguxgu, rü nüma ga Dabí rü nüxna naca nax ñuxãcü nüxü̃ naxüpetüxü̃ ga Yoá rü yema norü churaragü, rü ñuxãcü iyaxũxü̃ ga yema nügü ínada̱i̱xü̃wa.
8 Rü yemawena ga Dabí rü ñanagürü: —¡Ẽcü, cuchiü̃wa naxũ rü ngẽxma yarüngü̃! —ñanagürü. Rü yexguma Dabíxü̃tawa ínaxũxũxgu ga Uría, rü nüma ga Dabí rü Uríapatawa nanamu ga wüxi ga õna ga mexü̃ norü ãmarexü̃.
9 Natürü nüma ga Uría rü tama nachiü̃wa naxũ. Rü ãẽ̱xgacüpataarü ĩã̱xü̃tagu nape naxü̃tagu ga yema churaragü ga yéma dauxü̃taegüxü̃.
10 Rü yexguma Dabí nüxü̃ cua̱xgu ga Uría rü tama nachiü̃wa nax naxũxü̃, rü nüxna naca rü ñanagürü: —¿Ta̱xacü cuxü̃ nangupetü? ¿Tü̱xcüü̃ tama cuchiü̃gu cuyape woo nax ñuxre i ngunexü̃ ngextámare nax cungexmaxü̃? —ñanagürü.
11 Rü nüma ga Uría nanangãxü̃ rü ñanagürü: —Ngẽma baú i Tupanaarü mugüchixü̃ rü Iraéanecüã̱xgüarü churaragü rü Yudáanearü churaragü rü düxenügütüü̃gumare napegü. Rü ngẽxgumarüxü̃ ta ya Yoá ya chorü ãẽ̱xgacü, rü ngẽma ãẽ̱xgacügü i cutüü̃wa ügüxü̃ rü düxétüanegumare napegü. ¿Rü ñuxãcü i choma rü chiarü chauchiü̃gu chaxücuxü̃, rü chachibüxü̃, rü chaxaxexü̃, rü cha̱u̱xma̱xü̃ta chi chapexü̃? Rü Tupanaégagu cumaxã nüxü̃ chixu rü tagutáma ngéma chaxũ —ñanagürü.
12 Natürü nüma ga Dabí rü nanamu ga yexmatama nax naxã́ũxü̃ca̱x rü ñanagürü: —¡Ñu̱xmatama rüxã̱ũ̱x i ñu̱xmax rü chanaxwa̱xe i moxü̃ nax cutaeguxü̃! —ñanagürü. Rü yemaacü ga Uría rü moxü̃ãcü rü ta Yerucharéü̃gu narüxã̱ũ̱x.
13 Rü nüma ga Dabí rü nüxna naxu nax namaxã nachibüxü̃ca̱x rü namaxã nax naxaxexü̃ca̱x, rü nanangãxẽxẽ. Rü yexguma marü nachütagu ga Uría, rü ínaxũxũ rü yema churaragü ga ídauxü̃taegüxü̃tanügu nayape, natürü tama nachiü̃wa naxũ.
14 Rü moxü̃ãcü pa̱xmama ga Dabí rü Yoáca̱x popera naxümatü rü Uríamaxã yéma nanamu.
15 Rü yema poperawa rü ñanagürü: —¡Ngéma nape̱xegu ãgüxü̃ i curü churaragümaxã yamu ya Uría i ngextá ngẽma tórü uanügüarü churaragü írüporamaegüxü̃wa nax naxũxü̃ca̱x! ¡Rü ñu̱xũchi nüxica ngéma penata̱x nax ngẽmaãcü yapi̱xẽẽgüãxü̃ca̱x rü ngẽxma nayuxü̃ca̱x! —ñanagürü ga norü poperawa.
16 Rü yemaca̱x ga Yoá ga yexguma guma ĩanexü̃ ínachoeguãchigu ga nügü nax nada̱i̱xü̃ca̱x, rü Uríaxü̃ namu nax ngextá norü uanügüarü churaragü írüporamaexü̃wa naxũxü̃ca̱x.
17 Rü yexguma iyayixgu ga yema norü uanügü nax Yoáxarü churaragümaxã nügü nada̱i̱xü̃ca̱x rü ínapoxü̃güãxü̃ca̱x ga guma norü ĩane, rü yexma nayue ga ñuxre ga Dabíarü churaragüeru. Rü yematanüwa nayexma ga Uría.
18 Rü nüma ga Yoá rü Dabíxü̃tawa nanamu ga popera ga nawa nüxü̃ yaxuxü̃ nax ñuxãcü ínanguxuchixü̃ ga yema nügü ínada̱i̱xü̃wa.
19 Rü nanaxucu̱xẽ ga yema duü̃xü̃ ga orearü ngeruxü̃, rü ñanagürü: —Ngẽxguma quigúegagu nax ãẽ̱xgacümaxã nüxü̃ quixuxü̃ i nachiga nax ñuxãcü ínanguxuchixü̃ nax yigü namaxã ida̱i̱xü̃ i tórü uanügü,
20 rü ngürüãchi nüma ya ãẽ̱xgacü rü tá nanu rü cuxna tá naca rü ñanagürü tá: “¿Tü̱xcüü̃ nüxna pengaicamaxüchi ya yima ĩane? ¿Tama ẽ̱xna nüxü̃ pecua̱x i norü poxeguxü̃tápü̱xétüwa nax pexü̃ ínamuxũchigüxü̃ namaxã ya nutagü i ngẽma tórü uanügü?
21 ¿Tama ẽ̱xna nüxna pecua̱xãchiexü̃ ga yema nge ga Tebéxcüã̱x ga ãẽ̱xgacü ga Abimeréx ga Yerubaá nanexü̃ ima̱xcü ga yexguma wüxi ga nuta ga caeruxü̃ naétü nañaxgu? Rü ngẽmaca̱x ¿tü̱xcüü̃ nüxna pengaicamaxüchi ya yima ĩanearü poxeguxü̃?” ñaãcü tá cuxna naca. Rü ngẽxguma i cuma rü tá cunangãxü̃ga rü ñacurügü tá: “Ngẽxma ta nixĩ i nayuxü̃ ya Uría ya Itítanüxü̃ ixĩcü, Pa Chorü Ãẽ̱xgacüx”, ñacurügü tá —ñanagürü ga Yoá.
22 Rü yema orearü ngeruxü̃ rü yéma Dabíxü̃tawa naxũ. Rü yexguma yéma nanguxgu rü Dabímaxã nüxü̃ nixu ga guxü̃ma ga yema ore ga Yoá namaxã nüxü̃ ixuxü̃. Rü nüma ga Dabí rü Yoámaxã nanu, rü yema orearü ngeruü̃xü̃ ñanagürü: —¿Tü̱xcüü̃ nüxna pengaicamaxüchi ya yima ĩane? ¿Rü tama ẽ̱xna nüxü̃ pecua̱x i norü poxeguxü̃tápü̱xétüwa nax pexü̃ ínamuxũchigüxü̃ namaxã ya nutagü i ngẽma tórü uanügü? ¿Tama ẽ̱xna nüxna pecua̱xãchiexü̃ ga yema nge ga Tebéxcüã̱x ga Abimeréx ga Yerubaá nanexü̃ ima̱xcü ga yexguma wüxi ga nuta ga caeruxü̃ naétü nañaxgu? Rü ngẽmaca̱x ¿tü̱xcüü̃ nüxna pengaicamaxüchi ya yima ĩanearü poxeguxü̃? —ñanagürü.
23 Rü nüma ga yema orearü ngeruxü̃ rü nanangãxü̃ rü ñanagürü: —Nüma ga yema tórü uanügüarü churaragü rü inayayi, rü tomaxã nügü nadai. Natürü ga toma rü nügü ítayabuxmüxẽxẽ rü ñu̱xmata ĩaneca̱x ixücuxü̃wa nangugü.
24 Rü yexgumayane ga yema tórü uanügü rü ĩanearü poxeguxü̃arü daxũwa würamaxã curü churaragüxü̃ nadai, Pa Chorü Ãẽ̱xgacüx. Rü ngẽxma nayue i ñuxre i churaragüeru rü ngẽmatanügu nayu ya Uría ya Itítanüxü̃ ixĩcü —ñanagürü.
25 Rü yexguma ga Dabí rü yema orearü ngeruü̃xü̃ nangãxü̃, rü ñanagürü: —¡Yoámaxã nüxü̃ ixu: “Rü taxuca̱xma naxca̱x naxoegaãẽ i ngẽma, erü woetama ngẽmaãcü nangupetü i daiwa! ¡Rü namaxã nüxü̃ ixu nax yexera pora naxüxü̃ca̱x nax nadaiãcuãxü̃ca̱x ya yima ĩane”, ñacurügü tá nüxü̃! Rü cuma rü name nixĩ i yexeraãcü pora Yoána cuxã —ñanagürü.
26 Rü yexguma nüxü̃ nacua̱xgu ga Uría naxma̱x ga marü nax nayuxü̃ ga gumá ngĩte rü inaxaure.
27 Natürü yexguma marü nangupetüxgu ga nax naxaurexü̃, rü nüma ga Dabí rü nachiü̃wa ngĩxca̱x nangema, rü naxma̱xü̃ ngĩxü̃ nixĩxẽxẽ, rü nüxü̃́ ixãxacü. Natürü nüma ga Cori ya Tupana rü tama namaxã nataãxẽ ga yema Dabí üxü̃.
