2 Samuel 12:1-31
12 Rü nüma ga Cori ya Tupana rü norü orearü uruxü̃ ga Natáü̃xü̃ namu ga Dabíxü̃tawa nax naxũxü̃ca̱x. Rü yexguma Natáü̃ Dabíxü̃tawa nguxgu, rü ñanagürü nüxü̃: —Wüxi ga ĩanewa nayexma ga taxre ga yatü. Wüxi rü namuarü yemaxü̃ã̱xü̃chi rü yema to rü nangearü yemaxü̃ã̱x.
2 Rü yema muarü yemaxü̃ã́xü̃ rü muxü̃ma ga carnérugü rü wocagü nüxü̃́ nayexma.
3 Natürü ga yema ngearü yemaxü̃ã́xü̃ rü wüxitama ga carnéruxacü nüxü̃́ tayexma ga tümaca̱x nataxexe. Rü nümatama tüxü̃ nayaxẽxẽ ga guxema carnéruxacü, rü naxü̃tawa rü nanegüxü̃tawa taya. Rü yematama õna ga tümaarü yora ngṍxü̃ tangõ̱x rü naxpáü̃watama taxaxe, rü nügüxü̃ta tüxü̃ napexẽxẽ. Rü nüma ga gumá yatü tüxü̃ nangechaü̃ ñoma naxacüxü̃ nangechaü̃xü̃rüxü̃.
4 Rü wüxi ga ngunexü̃ rü yema muarü yemaxü̃ã́xü̃xü̃tagu nanaxũane ga wüxi ga duü̃xü̃ ga tóxnamana ne ũxü̃. Natürü nüma ga yema duü̃xü̃ ga muarü yemaxü̃ã́xü̃ rü tama norü carnéruta rüe̱xna norü wocata nimáxchaü̃ nax yemaacü naxca̱x nax naxüwemüxü̃ca̱x ga yema naxü̃tagu naxũanexü̃. Rü guxema ngearü diẽruã́xẽarü carnéru niyaxu, rü yema yéma nguxü̃ca̱x tüxü̃ —ñanagürü.
5 Rü yexguma yemaxü̃ naxĩnügu ga Dabí, rü yema yatümaxã poraãcü nanu, rü Natáü̃xü̃ ñanagürü: —Tupanaégagu cumaxã nüxü̃ chixu rü texé ya ngẽma ǘxe rü name nixĩ i tüxü̃ nax imáxü̃.
6 Rü 4 e̱xpü̱xcüna tá tüxü̃ naxütanü ya yíxema carnéruxacü, erü tama nüxü̃́ tangechaxü̃tümüxü̃ãcüma nanaxü i ngẽma —ñanagürü.
7 Rü yexguma ga Natáü̃ rü ñanagürü: —Cuma nixĩ i ngẽma yatü quixĩxü̃. Rü ñaa nixĩ i norü ore i Cori ya Iraéanecüã̱xgüarü Tupana cumaxã nüxü̃ ixuxü̃: “Choma cuxü̃ chayaxu nax Iraéanecüã̱xgüarü ãẽ̱xgacü nax quixĩxü̃, rü Chaúme̱xẽwa cuxü̃ íchapoxü̃.
8 Rü napata cuxna chaxã, rü cuxme̱xwa tüxü̃ changexmagüxẽxẽ ga naxma̱xgü, rü guxü̃ma i Iraéane rü Yudáane rü cuxna chaxã. Rü ngẽxguma chi cuxca̱x nanoxregu i ngẽma, rü chi muxü̃ma i togü i ngẽmaxü̃gü chi cuxna chaxã.
9 ¿Rü tü̱xcüü̃ tama naga cuxĩnü i chorü ore, rü cunaxü i ngẽma tama chauãẽwa mexü̃? Rü cuma rü Amóü̃tanüxü̃arü taramaxã cuyama̱x ya Uría ya Itítanüxü̃ rü naxma̱xca̱x cungĩ̱x.
10 Rü ngẽma nax choxü̃ cuxoxü̃, rü ngẽmaca̱x Uría ya Itítanüxü̃ naxma̱x tüxü̃ cuyapu rü cuxma̱xü̃ tüxü̃ quixĩxẽxẽ. Rü ngẽmagagu rü guxü̃gutáma ãũcümaxü̃wa nangẽxmagü i cutanüxü̃.
11 Rü choma i Cori ya Tupana rü cumaxã nüxü̃ chixu rü cumaxã chanaxuegu rü cutanüxü̃ tátama guxchaxü̃ cuxca̱x ínguxẽẽxü̃. Rü cupe̱xewa tátama tüxü̃ chade ya cuxma̱xgü rü ngẽma cutanüxü̃na tá tüxü̃ chamugü, rü guxãpe̱xewa tá tümamaxã namaxü̃.
12 Cuma rü cúãcü cunaxü i ngẽma chixexü̃, natürü i choma rü guxü̃ma i Iraéanecüã̱xgüpe̱xewa tá chanaxü i ngẽma cumaxã nüxü̃ chixuxü̃ nax guxãma nüxü̃ dauxü̃ca̱x”, ñanagürü ga Tupana —ñanagürü ga Natáü̃
13 Rü nüma ga Dabí rü Natáü̃xü̃ nangãxü̃ rü ñanagürü: —Tupanape̱xewa chixexü̃ chaxü —ñanagürü. Rü nüma ga Natáü̃ nanangãxü̃ rü ñanagürü: —Ngẽmáacüx, natürü Tupana rü cuxü̃ nangechaü̃, rü taxũtáma ngẽma chixexü̃gagu cuyu.
14 Natürü ngẽma chixexü̃ i cuxüxü̃gagu rü Tupanaarü uanügü rü nayoxnie nax chixri nachiga yadexagüxü̃. Rü ngẽmaca̱x ya yimá cune ya ngexwaca íxracü rü tá nayu —ñanagürü.
15 Rü yexguma Natáü̃ nachiü̃ca̱x taegugu rü nüma ga Cori ya Tupana rü poraãcü nayada̱xawexẽxẽ ga yema buxü̃ ga Uría naxma̱xwáü̃xü̃.
16 Rü nüma ga Dabí rü Tupanana naca naxca̱x ga yema buxü̃, rü naxaure, rü ñaxtüanegumare naca rü yexma nüxü̃ nangupetü ga ñuxre ga chütaxü̃.
17 Rü yema ãẽ̱xgacügü ga norü ngü̃xẽẽruü̃gü ga yéma naxü̃tawa yexmagüxü̃, rü nüxü̃ naca̱a̱xü̃gü nax inachixü̃ca̱x ga ñaxtüanewa. Natürü ga nüma ga Dabí rü tama inachixchaü̃ rü tama natanüwa nachibüchaü̃.
18 Rü 7 ga ngunexü̃ ngupetü̱xguwena rü nayu ga gumá bucü. Rü nümagü ga yema Dabíarü ngü̃xẽẽruü̃gü rü namuü̃e ga namaxã nüxü̃ nax yaxugüexü̃, yerü ñaxü̃gu narüxĩnüe: —Rü yexguma namaxü̃gu ga gumá bucü rü nüma ga ãẽ̱xgacü rü tama taga naxĩnüchaü̃ rü tama nachibüchaü̃. Rü ngẽmaca̱x i ñu̱xma nax nayuxü̃ rü ñuxãcü tá namaxã nüxü̃ tixu, erü tama nüxü̃ tacua̱x nax ta̱xacü tá naxüxü̃ —ñaxü̃gu narüxĩnüe.
19 Natürü nüma ga Dabí rü nüxü̃ nadau ga yema norü ngü̃xẽẽruü̃gü ga bexma nügümaxã nax yadexagüxü̃, rü yemawa nüxü̃ nacua̱x ga gumá bucü rü marü nayuxü̃. Rü yemaca̱x nüxna naca rü ñanagürü: —¿Marü nayu ya yimá bucü? —ñanagürü. Rü nüma ga yema norü ngü̃xẽẽruü̃gü rü nanangãxü̃gü rü ñanagürügü: —Ngü̃, marü nayu —ñanagürügü.
20 Rü yexguma ga Dabí rü inachi ga ñaxtüanewa, rü naxaiya rü nügü napumara rü ínacuxuchi, rü to ga naxchirugu nicu̱x. Rü Tupanapatawa naxũ rü yexma naxücu rü Cori ya Tupanaxü̃ nicua̱xüxü̃. Rü yemawena rü nachiü̃ca̱x nataegu rü õnaca̱x ínaca rü nachibü.
21 Rü yexguma ga yema norü ngü̃xẽẽruü̃gü rü Dabína nacagü rü ñanagürügü: —¿Natürü ta̱xacüca̱x ngẽmaãcü cunaxü, Pa Ãẽ̱xgacüx? Rü yexguma namaxü̃gu ga gumá bucü, Pa Ãẽ̱xgacüx, rü cuxaure rü naxca̱x cuxaxu. Natürü i ñu̱xmax marü nax nayuxü̃ ya bucü, Pa Ãẽ̱xgacüx, rü icuchi rü cuchibü —ñanagürügü.
22 Rü Dabí nanangãxü̃ rü ñanagürü: —Yexguma namaxü̃gu ga gumá bucü rü chaxaure rü chaxaxu yerü nagu charüxĩnü chi ga Cori ya Tupanaaxü̃́ nax changechaü̃tümüxü̃xü̃ rü namaxẽẽãxü̃ ga gumá bucü.
23 Natürü i ñu̱xma nax marü nayuxü̃ ¿rü ta̱xacüca̱x i chaxaurexü̃ ega taxucürüwa wena chanamaxẽxẽgu? Choma rü tá naxü̃tawa chaxũ, natürü i nüma rü taxucürüwa cha̱u̱xca̱x nataegu —ñanagürü.
Charumóü̃arü buxchiga
24 12:24-25 Rü yemawena ga Dabí rü naxma̱x ga Bechabéxü̃ nataãẽxẽxẽ. Rü ngĩxü̃ta nanaxũane rü ngĩmaxã namaxü̃, rü nüxü̃́ ixãxacü. Rü nüma ga Dabí rü Charomóü̃gu nanaxüéga. Rü nüma ga Cori ya Tupana rü nüxü̃ nangechaxü̃ ga guma bucü, rü norü orearü uruxü̃ ga Natáü̃wa Dabíxü̃ nüxü̃ nacua̱xẽxẽ. Rü yemaca̱x ga Dabí rü Cori ya Tupana naxwa̱xexü̃ãcüma Yedidíagu nanaxüéga.
25 Nüü̃ nadau 12:24
Dabí rü nayapu ga ĩane ga Rabá
26 12:26-27 Yoxni nüma ga Yoá rü guma Amóü̃tanüxü̃arü ĩane ga Rabáca̱x ínayagoõchi. Rü yexguma marü yapugüchaü̃ãgu ga guma ĩane ga Amóü̃anearü ãẽ̱xgacü nawa yexmane, rü Dabíca̱x yéma namuga ga Yoá rü ñanagürü: —Marü Rabáca̱x íchayagoõchi rü ngẽma marü nüxna chayapuxü̃ nixĩ i ngẽma norü ĩanexacü i nüxna dauxü̃ i ngẽma nachica i dexá nawa nayauxgüxü̃.
27 Nüü̃ nadau 12:26
28 ¡Rü ngẽmaca̱x, Pa Ãẽ̱xgacüx, rü nanutaque̱xe i guxü̃ma i ngẽma togü i curü churaragü rü nua naxũ rü naxca̱x íyagoõchi ya yima ĩane rü yapu nax ngẽmaãcü tama choma chanapuxü̃ca̱x rü duü̃xü̃gü chauégagu naxüégagüxü̃ca̱x! —ñanagürü.
29 Yexguma ga Dabí rü nananutaque̱xe ga guxü̃ma ga norü churaragü rü inaxũãchi. Rü Rabáca̱x ínayagoõchi rü nanapu ga guma ĩane.
30 12:30-31 Rü yemawena rü norü ãẽ̱xgacüeruwa nanayaxu ga norü nga̱xcueruxü̃ ga úirunaxca̱x ga mexẽchicü ga nutagü nawa dexcuxü̃. Rü yema norü nga̱xcueruxü̃ rü naya ga 33 quíru. Rü Dabíeruwa nayanga̱xcuchigü. Rü nüma ga Dabí rü guma ĩanewa nanade ga muxũchixü̃ma ga yemaxü̃gü ga tatanüxü̃. Rü yema duü̃xü̃gü ga yéma yaxǘgüxü̃ ga guma ĩanewa rü nayagagü. Rü cheragümaxã rü picugümaxã rü yuemagümaxã nanapuracüexẽxẽ. Rü togü rü ladriyugüarü guwa nanapuracüexẽxẽ. Rü yemaacütama nanaxü nawa ga guxü̃nema ga Amóü̃tanüxü̃arü ĩanegüwa. Rü yemawena Yerucharéü̃ca̱x nataegu namaxã ga guxü̃ma ga norü churaragü.
31 Nüü̃ nadau 12:30
