2 Samuel 13:1-39
13 Acharóü̃ ga Dabí nane rü nüxü̃́ iyexma ga naeya̱x ga Tamáragu ãégacü. Rü ngĩma rü imechametüxüchi. Rü nayexma ta ga to ga Dabí nane ga Anóü̃gu ãégaxü̃. Rü nüma ga Anóü̃ rü poraãcü naeya̱x ga Tamáraxü̃ nangẽ̱xẽ.
2 Rü ngĩma ga Tamára rü ípaxüchi rü taguma yatü ngĩxĩne nacua̱x. Rü yemaca̱x ichu̱xu rü Anóü̃axü̃́ naguxcha nax ngĩmaxã yadexaxü̃. Rü düxwa yema norü ngúchaü̃maxã nügü nida̱xawexẽxẽ rü taguma nataãxẽ.
3 Natürü Anóü̃ nüxü̃́ nayexma ga wüxi ga namücü ga womüxẽẽxü̃ cua̱xüchixü̃ ga Yonadágu ãégaxü̃. Rü nüma ga Yonadá rü Chimá ga Dabí naenexẽ nane nixĩ.
4 Rü wüxi ga ngunexü̃gu rü nüma ga Yonadá rü Anóü̃na naca rü ñanagürü: —¿Ta̱xacü cuxü̃ nangupetü, Pa Ãẽ̱xgacü Nanex? ¿Rü ta̱xacüca̱x wüxichigü i ngunexü̃gu yexeraãcü cungechaxü̃ rü taguma cutaãẽxü̃? ¿Tama ẽ̱xna chomaxã nüxü̃ quixuxchaü̃? —ñanagürü. Rü yexguma nüma ga Anóü̃ rü Yonadáxü̃ nangãxü̃ rü ñanagürü: —Chauenexẽ i Acharóü̃ naeya̱x i Tamáraxü̃ changẽ̱xẽ rü ngẽmaca̱x nixĩ i taguma chataãẽxü̃ —ñanagürü.
5 Rü yexguma nüma ga Yonadá rü Anóü̃xü̃ naxuxcu̱xẽ rü ñanagürü: —Ẽcü curü pechicaxü̃gu yaca rü poraãcü cugü ida̱xawexẽẽneta. Rü ngẽxguma cunatü cuxü̃ íyada̱u̱xgu, rü tümamaxã nüxü̃ ixu nax cuxü̃tawa ngĩxü̃ tamuxü̃ i cueya̱x i Tamára nax cuxü̃ nachibüxẽẽxü̃ca̱x rü ngématama cuxca̱x naxüwemüxü̃ca̱x nax ngẽmaãcü ngĩxü̃ cudauxü̃ca̱x rü cunangṍxü̃ca̱x i ngẽma õna i ngĩma cuxna naxãxü̃ —ñanagürü.
6 Rü yexguma nüma ga Anóü̃ rü ínapexü̃gu nayaca rü nügü nida̱xawexẽẽneta. Rü nüma ga ãẽ̱xgacü ga Dabí rü Anóü̃xü̃ ínayadau. Rü yexguma ga Anóü̃ rü Dabíxü̃ ñanagürü: —¡Nua namu i chaueya̱x i Tamára nax nuatama ñuxre i paũ choxü̃́ naxüxü̃ca̱x, rü ngĩmatama choxna naxããxü̃ca̱x! —ñanagürü.
7 Rü yexguma ga nüma ga Dabí rü Tamáraca̱x nangema rü ngĩxü̃ ñanagürü: —¡Ẽcü cuenexẽ i Anóü̃patawa naxũ rü naxca̱x naxüwemü nax ngẽma nangṍxü̃ca̱x! —ñanagürü.
8 Rü yexguma ngĩma ga Tamára rü Anóü̃patawa ixũ. Rü nüma rü norü pechicaxü̃gu naca. Rü yexguma ga ngĩma rü inayaxu ga trigute̱xe rü iyañumü, rü ínagu ga ñuxre ga paũ.
9 Rü yexguma marü nangẽxẽ̱xgu ga paũ rü wüxi ga piripáü̃gu inanu rü Anóü̃xü̃tawa inange. Natürü nüma ga Anóü̃ rü tama nanangṍxchaü̃ ga yema paũ. Rü yexguma Tamáraxü̃ namu rü ñanagürü: —¡Chorü duü̃xü̃gümaxã nüxü̃ ixu rü ínachoxü̃ i nua! —ñanagürü.
10 Rü yexguma marü guxü̃ma íchoxü̃guwena rü nüma ga Anóü̃ rü Tamáraxü̃ ñanagürü: —Nua chorü pechicaxü̃wa nange i ngẽma paũ rü cumatama choxü̃ nangõ̱xẽxẽ —ñanagürü. Rü yexguma ngĩma ga Tamára rü inayauxtaü̃ ga yema paũ rü Anóü̃arü pechicaxü̃wa inangetaü̃.
11 Natürü yexguma nüxna nangaicamagu, rü nüma ga Anóü̃ rü ngĩxna nichü̱xüxü rü ngĩxü̃ ñanagürü: —¡Nua naxũ, Pa Chaueya̱x, rü chauxü̃tagu naca! —ñanagürü.
12 Rü yexguma ga ngĩma rü Anóü̃xü̃ ngĩgürügü: —¡Pa Chauenexẽx, taxṹ i chomaxã cumaxü̃xü̃! Erü ngẽma rü poraãcü nachu̱xu i nua Iraétanüxü̃tanü̃wa. ¡Rü taxṹ i ngẽma chixexü̃ cuxüxü̃!
13 Rü ngẽxguma tá choxü̃ quiyaxu̱xgu rü ngextá tá i chorü ãnemaxã chaxũxü̃. Rü ngẽxguma i cuma rü chixexü̃arü üruü̃ãcü tá cuxü̃ nacua̱xgü i nua Iraétanüxü̃tanüwa. Rü name nixĩ i ãẽ̱xgacüna cuca nax cuxma̱x chixĩxü̃ca̱x, rü nüma rü tá cuxna choxü̃ namu —ngĩgürügü.
14 Natürü nüma ga Anóü̃ rü tama ngĩga naxĩnü. Rü nüma nax ngĩxü̃ narüporamaexü̃ rü ngĩxü̃ niyaxu rü ngĩmaxã namaxü̃.
15 Rü yexguma marü ngĩmaxã namaxü̃guwena, rü nüma ga Anóü̃ rü ngĩchi ínayaxaiãchi. Rü yema nax nangĩxwa̱xechiréxü̃arü yexera nüxü̃́ iwa̱xtümüxü̃. Rü ngĩxü̃ ñanagürü: —¡Inachi rü ínaxũxũ i nua! —ñanagürü.
16 Natürü ga ngĩma rü Anóü̃xü̃ ingãxü̃ rü ngĩgürügü: —¡Pa Chauenexẽx, taxṹ i nua choxü̃ ícuta̱xüchixü̃! Erü ngẽma nax choxü̃ ícuta̱xüchixü̃ rü ngẽma marü chomaxã cuxüxü̃arü yexera narüchixemae —ngĩgürügü. Natürü nüma ga Anóü̃ rü tama ngĩga naxĩnüchaü̃.
17 Rü yexguma rü norü duü̃xü̃ca̱x naca rü nüxü̃ ñanagürü: —¡Nua ínata̱xüchi i ñaa ngexü̃ rü ñu̱xũchi mea nawãxta i ĩã̱x! —ñanagürü.
18 Rü yexguma ga yema norü duü̃xü̃ rü Tamáraxü̃ ínata̱xüchi, rü yemawena rü nanawãxta ga ĩã̱x. Rü ngĩma ga Tamára rü nagu iyacu̱x ga wüxi ga naxchiru ga mexẽchixü̃ ga máxü̃. Rü yemaacü nixĩ ga yaxãxchiruxü̃ ga paxü̃gü ga ãẽ̱xgacüxacügü ixĩgüxü̃.
19 Rü yexguma ga ngĩma rü ngĩgüchirugu igáugü rü tanimacamaxã ngĩgü igüeru. Rü ixauxãcüma ngĩgüerugu iyangĩ rü yemaacü namagu iyaxũ.
20 Rü yexguma guma ngĩenexẽ ga Acharóü̃ rü ngĩxna naca rü ñanagürü: —Pa Chaueya̱x, ¿ẽ̱xna ngẽma cuenexẽ i Anóü̃ nixĩ i cumaxã ngúchaü̃ üxü̃? ¡Natürü taxṹ i texémaxã nüxü̃ quixuxü̃! Erü nüma rü cuenexẽ nixĩ. ¡Rü taxṹ i poraãcü cuxoegaãxẽ naxca̱x i ngẽma cuxü̃ ngupetüxü̃! —ñanagürü. Rü yexgumacürüwa ga ngĩma ga Tamára rü ngĩenexẽ ga Acharóü̃patawa imaxü̃ yerü yéma ita̱xmare.
21 Rü yexguma Dabí nüxü̃ cuáchigagu ga yema ngupetüxü̃, rü poraãcüma nanu. Natürü tama Anóü̃xü̃ napoxcu, yerü nüma ga Anóü̃ rü Dabí nane ga rüyamaecü nixĩ, rü poraãcüma nüxü̃ nangechaü̃.
22 Rü yexgumacürüwa nüma ga Acharóü̃ rü Anóü̃chi naxai rü taguma namaxã nidexachaü̃ yerü naeya̱x ga Tamáraxü̃ niyaxu ga Anóü̃.
Anóü̃xü̃ nima̱x ga Acharóü̃
23 Rü yexguma taxre ga taunecüguwena rü Acharóü̃arü duü̃xü̃gü rü Baá-achúwa norü carnérugüxü̃ ínayoü̃taxa ga ĩane ga Efraíü̃arü ngaicamana. Rü nüma ga Acharóü̃ rü guxü̃ma ga naenexẽgü ga ãẽ̱xgacü nanegüna naxu nax namaxã nachibüxü̃ca̱x.
24 Rü nüma ga Acharóü̃ rü nanatü ga ãẽ̱xgacüxü̃tawa naxũ rü ñanagürü nüxü̃: —Pa Ãẽ̱xgacüx, ñu̱xma rü chorü carnérugü tüxü̃ ínayoü̃ta̱xagü i chorü duü̃xü̃gü. Rü ngẽmaca̱x i choma nax curü duü̃xü̃ chixĩxü̃ rü chanaxwa̱xe i choxü̃ cuxümücü namaxã i curü churaragüerugü —ñanagürü.
25 Natürü nüma ga ãẽ̱xgacü ga Dabí rü Acharóü̃xü̃ nangãxü̃ rü ñanagürü: —Pa Chaunex, taxuacüma i guxãma i tomax ngéma taxĩ nax tama tacü i diẽru ngĩxü̃ ícutáxü̃ca̱x —ñanagürü. Rü woo nüma ga Acharóü̃ rü nanatüxü̃ naca̱a̱xü̃, natürü nüma ga ãẽ̱xgacü rü tama yéma naxũxchaü̃. Natürü mexü̃ nanemaxã naxuegu.
26 Rü yexguma nüma ga Acharóü̃ rü Dabíxü̃ ñanagürü: —Ngẽxguma cuma taxuacüma chauxü̃tawa cuxũxgu, rü name nixĩ i cuchicüxü chauxü̃tawa naxũ i chauenexẽ i Anóü̃ —ñanagürü. Rü yexguma nüma ga ãẽ̱xgacü rü Acharóü̃na naca rü ñanagürü: —¿Tü̱xcüü̃ cunaxwa̱xe nax Anóü̃ ngéma cuxü̃tawa ũxü̃? —ñanagürü.
27 Natürü nüma ga Acharóü̃ rü ãẽ̱xgacüxü̃ naca̱a̱xü̃ rü yemaca̱x nüma ga Dabí rü yéma Anóü̃xü̃ namu namaxã ga guxü̃ma ga yema togü ga nanegü. Rü nüma ga Acharóü̃ rü nanamexẽxẽ ga wüxi ga taxü̃ ga õna ñoma wüxi ya ãẽ̱xgacü ya réica̱x naxüxü̃rüxü̃.
28 Rü nüma ga Acharóü̃ rü marü norü duü̃xü̃güxü̃ naxuxcu̱xẽ rü ñanagürü nüxü̃: —¡Peyangugü i Anóü̃, rü ngẽxguma marü bínumaxã nangãxü̱̃xgu, rü choma rü tá pemaxã nüxü̃ chixu nax peyamáxü̃ca̱x, rü peyamá! ¡Rü taxṹ i pemuü̃exü̃! Erü choma nixĩ i pexü̃ chamuxü̃. ¡Rü pegü peporaexẽxẽ rü taxṹ i pemuü̃exü̃! —ñanagürü.
29 Rü yexguma nüma ga Acharóü̃arü duü̃xü̃gü rü yemaacü nayanguxẽxẽ rü Anóü̃xü̃ nima̱xgü. Rü yexguma yemaxü̃ nadaugügu ga yema togü ga ãẽ̱xgacü nanegü rü norü cowarugu nitoü̃ rü nibuxmü.
30 Rü yexguma namagutama naxĩxgu, rü Dabí nüxü̃ naxĩnüchiga ga ore ga ñaxü̃: —Acharóü̃ rü marü nanadai i guxü̃ma i cunegü rü nataxuma i maxü̃xü̃ íyaxüxü̃ rü bai i wüxi —ñaxü̃.
31 Rü yexguma yemaxü̃ naxĩnügu ga nüma ga ãẽ̱xgacü rü inachi rü norü ngechaü̃maxã nügüchirugu nagáugü rü waixü̃müanegu nanangücuchi. Rü yexgumarüxü̃ ta ga guxü̃ma ga yema norü churaragüerugü ga naxü̃tawa yexmagüxü̃ rü nügüchirugu nagáugüe.
32 13:32-33 Natürü ga Yonadá ga Dabíenexẽ ga Chimá nane rü nidexa rü ñanagürü nüxü̃: —Pa Ãẽ̱xgacüx, ¡taxṹ i cuyaxõxü̃ i ngẽma nüxü̃ cuxĩnüchigaxü̃ nax guxü̃ma i cunegü nada̱i̱xü̃! Rü yimá yama̱xgüãcü rü Anóü̃xicatama nixĩ. Yerü yexguma Anóü̃ rü naeya̱x ga Tamáraxü̃ iyauxgucürüwatama nixĩ i nüma i Acharóü̃ rü nagu naxĩnüxü̃ nax Anóü̃xü̃ yamáxü̃ —ñanagürü.
33 Nüü̃ nadau 13:32
34 Rü nüma ga Acharóü̃ rü yoxni niña. Natürü yema ngextü̱xüxü̃ ga ídauxü̃taexü̃ ga guma ĩanearü ĩã̱xwa rü ngürüãchi nüxü̃ nadau ga muxü̃ma ga duü̃xü̃gü ga yema nama ga Oronaíü̃arü ma̱xpǘnecüwawa dapetüxü̃wa ne ĩxü̃. Rü yexguma yema ĩã̱xarü dauruxü̃ rü Dabímaxã nüxü̃ nayarüxu nax nüxü̃ nadauxü̃ ga duü̃xü̃gü ga nama ga Oronaíü̃arü ma̱xpǘnecüwawa dapetüxü̃wa ne ĩxü̃.
35 Rü yexguma ga Yonadá rü ãẽ̱xgacüxü̃ ñanagürü: —Pa Ãẽ̱xgacüx, ngéma ne naxĩ i cunegü. Rü ngẽma choma nax curü duü̃xü̃ chixĩxü̃ cumaxã nüxü̃ chixuxü̃ rü aixcüma nixĩ —ñanagürü.
36 Rü yexguma yagúegagu ga Yonadá, rü ínangugüama ga ãẽ̱xgacü nanegü. Rü tagaãcü naxauxe. Rü nümata ga ãẽ̱xgacü rü guxü̃ma ga yema norü churaragüerugü rü poraãcü naxauxe.
37 13:37-38 Rü nüma ga Acharóü̃ rü nixũ, rü Tamáixü̃tagu nayarücu̱x. Rü nüma ga Tarmái rü Yechúxarü ãẽ̱xgacü ga Amiúx nane nixĩ. Rü tomaepü̱x ga taunecü yéma nayexma. Rü guxü̃ ga ngunexü̃gu rü nüma ga Dabí rü Anóü̃ca̱x naxaxu.
38 Nüü̃ nadau 13:37
39 Natürü yexguma marü nüxü̃ nangupetügu ga nax Anóü̃ca̱x nangechaü̃xü̃ ga Dabí, rü poraãcüma Acharóü̃xü̃ nadauxchaü̃.
