2 Samuel 16:1-23
16 Rü yexguma guma ma̱xpǘnechitaeruarü yéamaxü̃ra nanguxgu ga Dabí rü yexma namaxã nügü nangau ga Chibá ga Mepi-bóchexarü puracütanüxü̃. Rü yéma nanagagü ga taxre ga búru ga ixãxwetaxü̃ namaxã ga 200 i paũ rü 100 ga paũ ga maixcuraxü̃ ga úbamaxã ngauxü̃ rü 100 ga paũ ga igumaxã ngauxü̃, rü wüxipüü̃ ga bínu ga naxcha̱xmügu bacucü.
2 Rü yexguma nüma ga ãẽ̱xgacü ga Dabí rü Chibána naca rü ñanagürü: —¿Tü̱xcüü̃ nua cunana i guxü̃ma i ñaa? —ñanagürü. Rü nüma ga Chibá rü nanangãxü̃ rü ñanagürü: —Ñaa búrugü rü cuxacügü nagu itoü̃xü̃ca̱x nixĩ. Rü ñaa paũgü rü ñaa ori̱xgü rü curü churaragüca̱x nixĩ. Rü daa bínu rü ñaa nachica i taxúema nagu ãpataxü̃gu ipaexü̃ca̱x nixĩ —ñanagürü.
3 Rü yexguma nüma ga Dabí rü wenaxarü nüxna naca rü ñanagürü: —¿Ngextácü ya Mepi-bóchex ya Chaú nataxa? —ñanagürü. Rü yexguma nüma ga Chibá rü Dabíxü̃ nangãxü̃ rü ñanagürü: —Yerucharéü̃gucütama. Erü nüma nagu narüxĩnü rü ngẽma Iraétanüxü̃ rü norü o̱xichicüxü tá ãẽ̱xgacüxü̃ nayangucuchixẽẽgü —ñanagürü.
4 Rü yexguma nüma ga ãẽ̱xgacü ga Dabí rü Chibáxü̃ nangãxü̃ rü ñanagürü nüxü̃: —Ñu̱xma rü cuxrügü nixĩ i guxü̃ma i ngẽma noxri Mepi-bóchexarü ixĩxü̃ —ñanagürü. Rü nüma ga Chibá rü ãẽ̱xgacüpe̱xe nangücuchiãcüma nanangãxü̃ rü ñanagürü: —Chierüx guxü̃guma chomaxã cutaãẽgu, Pa Ãẽ̱xgacüx —ñanagürü.
5 16:5-6 Rü yexguma Bauríü̃wa nanguxgu ga ãẽ̱xgacü ga Dabí, rü yexma nüxü̃ nangau ga wüxi ga yatü ga Chaútanüxü̃. Rü nüma rü Guerá nane nixĩ rü Chimígu naxãéga. Rü woo nax duü̃xü̃gü rü norü churaragü nüxna daugüxü̃ ga Dabí, rü nüma ga Chimí rü inanaxügü nax chixexü̃ Dabímaxã yaxugüchigüxü̃ rü nutamaxã Dabíxü̃ rü guxü̃ma ga norü churaragüerugüxü̃ ínamuxũchixü̃.
6 Nüü̃ nadau 16:5
7 Rü yemaacü chixexü̃ Dabímaxã nixugü rü ñanagürü: —¡Ixũgachi i nua, Pa Máetaxü̃ rü Chixexü̃arü Üruxü̃x!
8 Ñu̱xma rü Tupana cuxü̃ napoxcu yerü cuma rü cunadai ga Chaútanüxü̃ nax cuma nachicüxü ãẽ̱xgacü quixĩxü̃ca̱x. Rü ngẽmaca̱x i ñu̱xma rü Cori ya Tupana rü cune ya Acharóü̃xü̃ ningucuchixẽxẽ nax ãẽ̱xgacü yixĩxü̃ca̱x. Rü ngẽma nixĩ i curü natanü erü wüxi i máetaxü̃ quixĩ —ñanagürü.
9 Rü yexguma ga Abichái ga Cheruiá nane rü ãẽ̱xgacü ga Dabíxü̃ ñanagürü: —Pa Ãẽ̱xgacüx ¿tü̱xcüü̃ taxu ñacurügümare nüxü̃ i ñaa yatü i tama naãxẽxü̃ cuáxü̃ nax ta̱xacü cumaxã yaxugüxü̃? ¡Rü choxü̃ namu nax chayadaeeruxü̃ca̱x! —ñanagürü.
10 Natürü nüma ga ãẽ̱xgacü rü nanangãxü̃ rü ñanagürü: —Ñaa rü tama perü guxcha nixĩ, Pa Cheruiá Nanegüx. Rü ngẽxguma Tupanaarü mu yixĩxgu nax ta̱xacü chomaxã yaxugüxü̃ rü ¿texé tá tixĩ ya nüxna naxca̱x caxe i ngẽma inaxüxü̃? —ñanagürü.
11 Rü nüma ga Dabí rü yexgumatama Abicháixü̃ rü guxü̃ma ga norü churaragüeruxü̃ ñanagürü: —Rü ñu̱xma nax chaunetamachire̱x choxü̃ imáxchaxü̃xü̃ rü yexera ñaa yatü i Bẽyamíü̃tanüxü̃ nüxü̃́ nangẽxma i ta̱xacüca̱x choxü̃ yamáxchaü̃xü̃. Rü nüetama nax ta̱xacü chomaxã yaxugüxü̃. Rü bexmana woetama ngẽmaãcü nixĩ i Cori ya Tupana namuxü̃.
12 Natürü ngẽxguma Cori ya Tupana choxü̃ da̱u̱xgu nax ngúxü̃ chingexü̃, rü bexmana mexü̃maxã tá choxü̃́ nanaxüchicüxü i ñaa chixexü̃ i ñu̱xma nüxü̃ chaxĩnüxü̃ —ñanagürü.
13 Rü yexguma ga Dabí rü guxü̃ma ga yema norü duü̃xü̃gümaxã rü inaxĩ. Natürü ga Chimí rü guma ma̱xpǘnecüwagu niñachigü rü Dabímaxã chixexü̃ nixugüchigü. Rü nutamaxã ínayamuxũchichigü rü waixü̃müte̱xe nigünagüchigü.
14 Rü yexguma natü ga Yudáü̃wa nangugügu ga Dabí rü guxü̃ma ga yema norü duü̃xü̃gü rü yexma narüngü̃gü yerü poraãcüma nipae.
Yerucharéü̃gu naxücu ga Acharóü̃
15 Rü yoxni ga Acharóü̃ rü ñu̱xũchi Aitópe rü guxü̃ma ga Iraétanüxü̃ ga nawa ügüxü̃maxã Yerucharéü̃gu nachocu.
16 Rü Uchái ga Arquítanüxü̃ ga Dabímücü ixĩcü rü Acharóü̃ca̱x niña rü ñanagürü nüxü̃: —¡Namaxü̃ ya ãẽ̱xgacü! ¡Namaxü̃ ya ãẽ̱xgacü! —ñanagürü.
17 Rü nüma ga Acharóü̃ rü nüxna naca rü ñanagürü: —¿Ngẽmaãcü yixĩxü̃ nax namücü quixĩxü̃ i Dabí? ¿Rü tü̱xcüü̃ tama nawe curüxũ? —ñanagürü.
18 Rü nüma ga Uchái rü Acharóü̃xü̃ nangãxü̃ rü ñanagürü: —Choma rü taxucürüwa Dabíwe charüxũ erü nawe charüxũ ya yimá ãẽ̱xgacü ya Cori ya Tupana rü guxü̃ma i Iraétanüxü̃ nüxü̃ unetacü.
19 ¿Rü texéaxü̃́ tá ichapuracüxü̃ i ñu̱xma? ¿Tama ẽ̱xna cuxü̃́ yixĩxü̃ Pa Ãẽ̱xgacüx, nax chomücü i Dabí nane quixĩxü̃? Rü ñu̱xma rü cuxü̃́ tá chapuracü yema cunatüaxü̃́ chapuracüxü̃rüü̃tama —ñanagürü.
20 Rü yemawena ga Acharóü̃ rü wenaxarü Aitópena naca rü ñanagürü: —¿Ta̱xacürü ucu̱xẽ i pexãxü̃ nax ngẽma perü ucu̱xẽãcü chanaxüxü̃ca̱x? —ñanagürü.
21 Rü nüma ga Aitópe rü Acharóü̃xü̃ nangãxü̃ rü ñanagürü: —¡Ẽcü ngĩmaxã inape i cunatüarü ngegü i nua ngĩxü̃ nawogücü nax ãẽ̱xgacüpatana nadaugüxü̃ca̱x! Rü ngẽmaãcü i ngẽma Iraéanecüã̱xgü rü tá nüxü̃ nacua̱xgü nax cuma rü cunatümaxã curüxuanüxü̃. Rü ngẽxguma i guxü̃ma i Iraéanecüã̱xgü rü cuwa tá naxügü —ñanagürü.
22 Rü guma ãẽ̱xgacüpataétügu Acharóü̃ca̱x nanaxügü ga wüxi ga ĩpata ga naxchirunaxca̱x. Rü gumatüxü̃wa rü guxü̃ma ga Iraétanüxü̃pe̱xewa nanatüarü ngegümaxã namaxü̃.
23 Rü yema ga ngunexü̃gügu rü yema Aitópearü ucu̱xẽgü rü ñomatama Tupanaarü orewa nayauxgüxü̃rüxü̃ nixĩ. Rü yema Dabí naga naxĩnüxü̃rüxü̃ rü Acharóü̃ rü ta naga naxĩnü.
