2 Samuel 18:1-33
18 Rü nüma ga Dabí rü norü churaragüxü̃ nixugü rü ñaãcü inayanu: Rü yema 1,000 ga churaragüca̱x rü nüxü̃ naxuneta ga naerugü. Rü yema 100 ga churaragüca̱x rü nüxü̃ naxuneta ga naerugü.
2 Rü yemawena rü tomaepü̱xtücumügu nayayauxye ga norü churaragü. Rü wüxitücumümaxã inacua̱x ga Yoá. Rü totücumümaxã inacua̱x ga Abichái ga Cheruiá nane ga Yoáenexẽ ixĩcü. Rü yema totücumümaxã inacua̱x ga Itái ga ĩane ga Gáxcüã̱x ixĩcü. Rü ñu̱xũchi ga nüma ga Dabí rü guxü̃ma ga yema norü churaragüxü̃ ñanagürü: —Choma rü tá ta pexü̃ íchixümücü i daiwa —ñanagürü.
3 Natürü ga nümagü rü nanangãxü̃gü rü ñanagürügü: —Taxuacüma ngẽmaãcü cunaxü, Pa Ãẽ̱xgacüx, erü ngẽma tórü uanügüca̱x rü nüetama ega woo naxcha̱xwa tibuxmü̃xgu rüe̱xna ngãxü̃ i tatanüxü̃ yuegu, erü ngẽma nüma nanaxwa̱xegüxü̃ nixĩ nax cuxü̃ yama̱xgüxü̃. Rü ngẽmaca̱x, Pa Ãẽ̱xgacüx, rü cuma rü 10,000 i tomax i curü churaragüarü yexera toxü̃́ cume. Rü ngẽmaca̱x narümemae i nuxãtama ĩanegu curüxã̱ũ̱x nax ngẽmaãcü to i churaragü toxü̃tawa cumugüxü̃ca̱x —ñanagürügü.
4 Rü yexguma ga nüma ga ãẽ̱xgacü rü nanangãxü̃ rü ñanagürü: —Tá chanaxü i ngẽma pexca̱x rümemaexü̃ —ñanagürü. Rü yexgumatama ga nüma ga ãẽ̱xgacü rü guma ĩanearü ĩã̱xgu ínachicuchi rü nüma ga norü churaragü rü ínachoxü̃tücumü.
5 Rü ñu̱xũchi ga nüma ga ãẽ̱xgacü rü nayaxucu̱xẽgü ga Yoá rü Abichái rü Itái, rü ñanagürü nüxü̃: —¡Mea namaxã pechopetü ya yimá ngextü̱xücü ya Acharóü̃! —ñanagürü. Rü guxü̃ma ga norü churaragü rü nüxü̃ naxĩnüe ga yexguma ãẽ̱xgacü yema ñaxgu nüxü̃ ga yema churaragüerugü nachiga ga Acharóü̃.
6 Rü yemaacü inaxĩãchi ga yema Dabíarü churaragü nax Iraéanecüã̱xgüarü churaragü ga Acharóü̃waama ügüxü̃maxã nügü nada̱i̱xü̃ca̱x. Rü Efraíü̃arü naanewa yexmaxü̃ ga naixnecügu nixĩ ga nügü nada̱i̱xü̃.
7 Rü yema Dabíwe rüxĩxü̃ ga churaragü rü Acharóü̃arü churaragüxü̃ narüporamaegü. Rü poraãcü nügü nadai, rü 20,000 ga yatü yexma nayue.
8 Rü guxü̃wama nangu ga nügü nax nada̱i̱xü̃ ga yema Efraíü̃arü naanewa. Rü yema taramaxã nügü ínadaixü̃gu nayue ga muxü̃ma, natürü yemaarü yexera nixĩ ga naixnecügu yuexü̃.
9 Rü yexguma nügü nadaiyane rü nüma ga Acharóü̃ ga norü mulogu ixũcü, rü ngürüãchi yexma Dabíarü churaragümaxã nügü nangau. Rü nüma ga Acharóü̃ rü norü mulomaxã niña. Rü wüxi ga nai ga taxü̃chacüütüü̃wa namaxã nagopetü, rü yéma niwaxcuchinaxã, rü yéma narütu. Rü yema mulo rü nagopetümare.
10 Rü wüxi ga yema Dabíarü duü̃xü̃ ga nüxü̃ dauxü̃ rü Yoámaxã nüxü̃ nixu.
11 Rü nüma ga Yoá rü ñanagürü: —¿Ta̱xacü nixĩ? ¿Rü ngẽxguma nüxü̃ cuda̱u̱xgu rü tü̱xcüü̃ tama noxtacüma cuyama̱x? Erü ngẽxguma chi cuyama̱xgu rü choma rü 10 tachinü i diẽru chi cuxna chaxã rü wüxi i goyexü̃ —ñanagürü.
12 Natürü ga yema churara rü Yoáxü̃ nangãxü̃ga rü ñanagürü nüxü̃: —Woo chi 1,000 tachinü i diẽru choxna cuxãxgu rü taxũchima chanaxü i ngẽma. Erü guxãma i tomax rü nüxü̃ taxĩnüe ga ãẽ̱xgacü ga yexguma cuxü̃ rü Abicháixü̃ rü Itáixü̃ ñaxgu: “¡Rü taxũtáma chixexü̃ namaxã pexü ya Acharóü̃!” ñaxgu.
13 Rü ngẽxgumachi ãẽ̱xgacüechita chayama̱xgu ya nane rü nüma ya ãẽ̱xgacü rü tá nüxü̃ nacua̱x nax texé yamáxü̃, rü cuma rü taxũchima chauétüwa cuchogü —ñanagürü.
14 Rü nüma ga Yoá rü ñanagürü: —¡Marütama i ngẽma dexa i chixemarexü̃! —ñanagürü. Rü yexguma nanayaxu ga tomaepü̱x ga naixmena̱xã ga ixãmaguxü̃, rü yemamaxã Acharóü̃xü̃ nacanapacütüxü̃, yerü naichacüüwa nax natuxü̃ rü tama nayu.
15 Rü yemawena rü 10 ga Yoáarü churaragü rü Acharóü̃xü̃ ínachomaeguãchi rü nayama̱xgüxüchi.
16 Yexgumatama ga Yoá rü norü duü̃xü̃güxü̃ namu nax cornéta yacuegüxü̃ca̱x, rü yexguma ga yema churaragü rü ínayachaxãchitanü nax Iraéanecüã̱xgüwe nangegüxü̃ yerü Yoá ínayachaxãchitanüxẽxẽ.
17 Yexguma rü nanayauxgü ga yema Acharóü̃xü̃ne rü wüxi ga ãxmaxü̃ ga taxü̃ ga naixnecüwa yexmaxü̃gu nayata̱xcuchigü rü ñu̱xũchi nutagümaxã nananuétü. Yemawena ga guxü̃ma ga Iraéanecüã̱xgü rü napatawa nabuxmü.
18 Yexguma namaxü̃gu ga Acharóü̃ rü duü̃xü̃güxü̃ namu nax Ãẽ̱xgacüarü Ngatewa nüxü̃́ naxügüã̱xü̃ca̱x ga wüxi ga norü cua̱xãchiruxü̃ ga máchane ga nutagünaxca̱x. Rü ñu̱xũchi naéga yexma naxügü yerü nangene rü nagu narüxĩnü nax yemaacü yemawa guxü̃guma nüxna nacua̱xãchigüxü̃ca̱x i duü̃xü̃gü. Rü ñu̱xma rü ta rü Acharóü̃arü cua̱xãchiruxü̃maxã nanaxugü.
19 Yemawena ga Aimaá ga Chadóx nane rü Yoáxü̃ ñanagürü: —Cuxna chaca nax ngéma choxü̃ cumuxü̃ca̱x nax ãẽ̱xgacümaxã nüxü̃ chayarüxuxü̃ca̱x rü Cori ya Tupana rü marü ãẽ̱xgacüaxü̃́ mexü̃ naxü erü norü uanügüme̱xẽwa ínananguxuchixẽxẽ —ñanagürü.
20 Natürü Yoá nanangãxü̃ rü ñanagürü: —Ñu̱xma rü tama name nax cuma nüxü̃ cuyarüxuxü̃ i ngẽma ngupetüxü̃. Nüe to i ngunexü̃gu namaxã nüxü̃ yarüxu, natürü tama i ñu̱xma, erü ãẽ̱xgacü nane rü nayu —ñanagürü.
21 Yexguma ga Yoá rü wüxi ga churara ga Etiopíaanecüã̱xü̃ ñanagürü: —¡Cuma ngéma naxũ rü ãẽ̱xgacümaxã nüxü̃ ixu i ngẽma nüxü̃ cudauxü̃! —ñanagürü. Rü yema Etiopíaanecüã̱x rü Yoápe̱xegu nacaxã́pü̱xü rü ñu̱xũchi nañaãchi rü yéma naxũ.
22 Rü nüma ga Aimaá rü wenaxarü Yoáxü̃ ñanagürü: —Nüetama ega woo ta̱xacü choxü̃ ngupetügu, natürü chanaxwa̱xe i nawe choxü̃ curümuxü̃ i ngẽma Etiopíaanecüã̱x —ñanagürü. Natürü Yoá nanangãxü̃ga rü ñanagürü: —¿Ta̱xacüruxü̃ ngéma cuxũxchaü̃, Pa Chaunex, ega taxũtáma wüxi i ãmaremaxã cuxü̃́ naxãtanügu i ngéma nüxü̃ cuyarüxuxü̃? —ñanagürü.
23 Natürü ga Aimaá rü nanangãxü̃ga rü ñanagürü: —Nüetama rü tá chañaãchi —ñanagürü. Yoá nanangãxü̃ga rü ñanagürü —¡Ẽcü ínañaachi! —ñanagürü. Rü yexguma ga Aimaá rü ínañaachi rü doxonexü̃guama niña rü Etiopíaanecüã̱xü̃ nayagopetü.
24 Rü yexgumayane rü nüma ga Dabí rü guma ĩanearü ĩã̱xwa narüto. Rü nüma ga yema dauxü̃taeruxü̃ rü yema ĩanearü poxegü̃étügu naxĩnagü nax yéma nadauxü̃taexü̃ca̱x. Rü yexguma yéama nadawenügu ga yema dauxü̃taeruxü̃ rü nüxü̃ nadau ga wüxi ga yatü ga nüxica yéma ne ñaxü̃.
25 18:25-26 Rü tagaãcü ãẽ̱xgacümaxã nayacaxü̃. Rü nüma ga ãẽ̱xgacü rü tagaãcü nanangãxü̃ rü ñanagürü: —Ngẽxguma nüxicatama ngéma ne nañaxgu, rü mexü̃ i ore ngéma ne nange —ñanagürü. Natürü yexguma yema yatü ga yéma ne ñaxü̃ ingaicagu, rü nüma ga yema dauxü̃taeruxü̃ nüxü̃ nadau ga to ga yatü ga yéma ne ñaxü̃. Rü yemaca̱x yema ĩã̱xarü dauruü̃na tagaãcü nacagü rü ñanagürü: —Yea nixĩ i to i yatü rü ngéma ne naxũ —ñanagürü. Rü nüma ga ãẽ̱xgacü rü tagaãcü ñanagürü: —Ngẽma rü ta mexü̃ i ore ngéma ne nange —ñanagürü.
26 Nüü̃ nadau 18:25
27 Rü yexguma nüma ga yema dauxü̃taeruxü̃ rü ñanagürü ta: —Ngẽma nape̱xe iñaxü̃ rü norü ñaãchiwa nüxü̃ chacua̱x nax Chadóx nane ya Aimaá yixĩxü̃ —ñanagürü. Rü nüma ga ãẽ̱xgacü rü nanangãxü̃ rü ñanagürü: —Nüma rü wüxi ya mecü ya yatü nixĩ, rü mexü̃ i ore nua nange —ñanagürü.
28 Rü nüma ga Aimaá rü ãẽ̱xgacüca̱x nixũ rü nape̱xegu nayangücuchi rü yemaacü nüxü̃ narümoxẽ rü ñanagürü: —Name ya Cori ya Tupana, ya curü Tupana, Pa Ãẽ̱xgacüx, erü marü nanadai ga yema tama cuga ĩnüechaü̃xü̃, Pa Ãẽ̱xgacüx —ñanagürü.
29 Rü nüma ga ãẽ̱xgacü rü ínaca, rü ñanagürü: —¿Ñuxãcü nüxü̃ nangupetüxü̃ ya yimá ngextü̱xücü ya Acharóü̃? ¿Rü namemarexü̃ yixĩxü̃? —ñanagürü. Rü nüma ga Aimaá rü nanangãxü̃ rü ñanagürü: —Ngẽxguma Yoá nua choxü̃ muxgu rü ínixáicha i duü̃xü̃gü, natürü tama nüxü̃ chacua̱x, Pa Ãẽ̱xgacüx, nax ta̱xacü ngupetüxü̃ —ñanagürü.
30 Rü nüma ga ãẽ̱xgacü rü ñanagürü nüxü̃: —¡Inachi rü ngẽxma ínachicuchi! —ñanagürü. Rü nüma ga Aimaá rü yexma ínachicuchi.
31 Rü yexgumatama ínangu ga yema to ga yatü ga Etiopíaanecüã̱x rü ñanagürü: —Nangexma i wüxi i mexü̃ i ore, Pa Ãẽ̱xgacüx. Rü ñu̱xma ya Cori ya Tupana rü mexü̃ cumaxã naxü, Pa Ãẽ̱xgacüx, erü cuxü̃ ínapoxü̃ nawa ga yema tama cuga ĩnüechaü̃xü̃, Pa Ãẽ̱xgacüx —ñanagürü.
32 Rü nüma ga ãẽ̱xgacü rü yema Etiopíaanecüã̱xna naca rü ñanagürü: —¿Rü yimá ngextü̱xücü ya Acharóü̃, rü taxuxü̃ma nüxü̃ üpetüxü̃? —ñanagürü. Rü nüma ga Etiopíaanecüã̱x rü nanangãxü̃ rü ñanagürü: —Chierüx ngẽma curü uanügü, Pa Ãẽ̱xgacüx, rü guxü̃ma i ngẽma chixexü̃ cumaxã ügüchaü̃xü̃ rü yimá ngextü̱xücürüxü̃ nayuegu —ñanagürü.
33 Rü nüma ga ãẽ̱xgacü rü axumaxã aita naxü. Rü daxũ naxĩ ga yema norü ucapu ga ĩanearü poxeguxü̃étüwa yexmaxü̃wa, rü yéma nayaxaxu. Rü yexma ínaxũũxü̃ãcüma ñanagürü: —Pa Chaunex, Pa Acharóü̃x. Pa Chaunex, Pa Acharóü̃x. Chierüx choma cuchicüxü chayu̱xgu. Pa Chaunex, Pa Acharóü̃x, Pa Chaunex —ñanagürü.
