2 Samuel 19:1-43
19 19:1-2 Rü yexguma duü̃xü̃gü nüxü̃ cua̱xgügu ga nüma ga ãẽ̱xgacü ga Dabí ga poraãcü nane ga Acharóü̃ ga yucüca̱x nax nangechaü̃xü̃ rü naxca̱x naxaxuxü̃ rü Yoámaxã nüxü̃ nayarüxugüe. Rü yemaacü ga yema ngunexü̃gu ga yema nax norü uanügüxü̃ naporamaegüchirexü̃ ga daiwa rü ngechaü̃xü̃ nananguxuchi.
2 Nüü̃ nadau 19:1
3 Rü nümatama ga yema churaragü rü bexmamare ĩanegu nachocu rü ãneãcü inaxĩ ñoma chi daiwa yabuxmüxü̃rüxü̃.
4 Rü yexgumayane ga nüma ga ãẽ̱xgacü rü nügü yadüxchiweãcüma poraãcü aita naxüüxü̃ rü ñanagürü: —Pa Chaunex, Pa Acharóü̃x. Pa Chaunex, Pa Acharóü̃x, Pa Chaunex —ñanagürü.
5 Rü yexguma ga Yoá rü Dabíxü̃tawa naxũ rü ñanagürü: —Pa Ãẽ̱xgacüx, wüxi i ãne nüxü̃ quingexẽxẽ i ngẽma curü churaragü i cuxü̃ ípoxü̃güxü̃ nax tama peyuexü̃ca̱x i cumax rü cunegü, rü cuxacügü, rü cuxma̱xgü, rü curü ngexü̃gü.
6 Rü ñu̱xma rü cunango̱xẽxẽ nax cuxca̱x rü taxuwama timexü̃ i toma nax cutüü̃wa taxügüxü̃ i ãẽ̱xgacügü rü churaragü, erü nüxü̃ cungechaü̃ i ngẽma cuxchi aiexü̃, rü naxchi cuxai i ngẽma cuxü̃ ngechaü̃güxü̃. Ñu̱xma nüxü̃ chicua̱xãchi, Pa Ãẽ̱xgacüx, rü cuxca̱x narümemae chi nixĩ nax Acharóü̃ maxü̃xü̃, rü nüetama chi nixĩ ga nax tayuexü̃ i tomax.
7 ¡Rü ínaxũxũ rü nataãẽgüxẽxẽ i ngẽma curü churaragü! Erü Tupanaégagu cumaxã nüxü̃ chixu rü ngẽxguma taxũtáma ngẽmaãcü cunaxüxgux, rü bai i wüxi i curü churaragü tá nuxã cuxü̃tagu narüxã̱ũ̱x i ñoma chütaxü̃gu. Ngẽma rü tá guxü̃ma ga chixexü̃ ga yema curü ngextü̱xügu cuxü̃ ngupetüxü̃arü yexera tá nixĩ i cuxca̱x ínguxü̃ i ñu̱xma —ñanagürü ga Yoá.
8 Rü yexguma ga nüma ga ãẽ̱xgacü rü inachi, rü ĩanearü ĩã̱xwa narüto. Rü yexguma duü̃xü̃gü nüxü̃ cua̱xgügu ga gumá ãẽ̱xgacü rü ĩanearü ĩã̱xwa nax yanatoxü̃, rü guxü̃ma ga duü̃xü̃gü rü naxü̃tawa naxĩ. Rü yema Iraéanecüã̱xgü ga Acharóü̃we rüxĩxü̃ rü nibuxmü rü nachiü̃wa naxĩ.
Dabí rü Yerucharéü̃ca̱x nataegu
9 Rü guxü̃ma ga yema Iraécüã̱xgütücumü ga Acharóü̃we rüxĩxü̃ rü nügümaxã nidexagü rü ñanagürügü: —Yimá ãẽ̱xgacü ya Dabí rü tórü uanügü i Firitéugüme̱xẽwa tüxü̃ ínanguxü̃xẽxẽ. Natürü Acharóü̃gagu nixĩ ga yañaxü̃ ga tachixü̃anewa.
10 Natürü nüma i Acharóü̃ ga yixema tórü ãẽ̱xgacüxü̃ nüxü̃ ixunetacü rü marü daigu nayu. ¿Rü taux ẽ̱xna inamexü̃ nax naxca̱x ingemaxü̃ ya ãẽ̱xgacü ya Dabí nax nümatama wena tamaxã inacuáxü̃ca̱x? —ñanagürügü.
11 19:11-12 Rü yexguma ãẽ̱xgacü ga Dabí nüxü̃ cua̱xgu nax yemagu naxĩnüexü̃ ga Acharóü̃arü duü̃xü̃gü ixĩgüchiréxü̃, rü yemaca̱x chacherdótegü ga Chadóxü̃tawa rü Abiatáxü̃tawa namuga rü ñanagürü: —Namaxã nüxü̃ peyarüxu i ngẽma Yudátücumüarü ãẽ̱xgacügü rü ñapegü nüxü̃: “¿Rü tü̱xcüü̃ tama pexíra cha̱u̱xca̱x pengemaxü̃ nax wenaxarü chopatawa changexmaxü̃ca̱x? Erü pemax i Yudátanüxü̃ rü chauenexẽgü pixĩgü rü chauxchina̱xãgü pixĩgü rü chomachi pixĩgü. ¿Rü tü̱xcüü̃ i pewa iyacuáxü̃ nax choxü̃ petaeguxẽẽgüxü̃?” —ñanagürü ga Dabí.
12 Nüü̃ nadau 19:11
13 Rü yexgumarüxü̃ ta yema chacherdótegüca̱x yéma namuga nax Amachámaxã nüxü̃ yaxugüexü̃ca̱x ga ore ga ñaxü̃: —Cuma rü chautanüxü̃xüchi quixĩ, rü Tupanaégagu cumaxã nüxü̃ chixu rü Yoáchicüxü tá chorü churaragümaxã icucua̱x. Rü Tupana poraãcü choxü̃ poxcu ega tama chayanguxẽẽgu i ngẽma ore i nüxü̃ chixuxü̃ —ñaxü̃.
14 Rü nüma ga Dabí rü yemaacü nanangüxmüexẽxẽ ga yema Yudáanecüã̱xgü. Rü guxü̃ma ga nümagü rü Dabíca̱x yéma namugagü nax guxü̃ma ga norü duü̃xü̃gümaxã nataeguxü̃ca̱x.
15 Rü nüma ga ãẽ̱xgacü rü inanaxügü nax Yerucharéü̃ca̱x nataeguxü̃, rü natü ga Yudáü̃wa nangu. Rü nüma ga Yudáanecüã̱xgü rü Guirigáwa naxĩ nax yéma Dabíxü̃ nayauxgüxü̃ca̱x rü nüxü̃ nangü̃xẽẽgüxü̃ca̱x nax yaxüexü̃ca̱x ga natü ga Yudáü̃.
16 Rü Chimí ga Guerá nane ga Bẽyamíü̃tanüxü̃ ga Bauríü̃cüã̱x rü nañu̱xãẽ nax ínaxĩxü̃ namaxã ga yema Yudátanüxü̃ nax ãẽ̱xgacü ga Dabíxü̃ nayauxgüxü̃ca̱x.
17 Rü 1,000 ga yatügü ga Bẽyamíü̃tanüxü̃ nanaxümücügü. Rü natanüwa nayexma ta ga Chibá ga Chaúarü duü̃xü̃, namaxã ga 15 ga nanegü rü 20 ga norü puracütanüxü̃. Rü nüxíra Yudáü̃wa nangu naxü̃pa ga ãẽ̱xgacü ga Dabí yéma nguxü̃.
18 Rü guxü̃ma ga yema duü̃xü̃gü rü nichoü̃ ga yema natü ga Yudáü̃ nax ãẽ̱xgacütanüxü̃xü̃ nangü̃xẽẽgüxü̃ca̱x nax yamuãxü̃ca̱x ga Yudáü̃arü tocutüwa rü yemaacü ãẽ̱xgacüxü̃ nataãẽxẽẽgüxü̃ca̱x. Rü yexguma marü yachoü̃chaü̃gu ga nüma ga ãẽ̱xgacü, rü nüma ga Chimí rü ãẽ̱xgacüpe̱xegu nacaxã́pü̱xü.
19 Rü ñanagürü: —Pa Ãẽ̱xgacüx, ¡choxü̃ nangechaü̃ rü choxü̃́ nüxü̃ rüngüma ga yema chixexü̃ ga cupe̱xewa chaxüxü̃ ga yexguma Yerucharéü̃wa ícuxũxũxgu! ¡Rü taxṹ i chauxchi cuxaixü̃!
20 Choma nüxü̃ chacua̱x rü poraãcüma nachixe ga yema chaxüxü̃. Rü ngẽmaca̱x i choma rü guxü̃ma i Yúchetanüxü̃tanüwa chaxíra ichaxũãchi nax cuxü̃ íchayadauxü̃ca̱x, Pa Ãẽ̱xgacüx —ñanagürü.
21 Rü yexguma ga Abichái ga Cheruiá nane, rü Dabíxü̃ ñanagürü: —¿Name nax nayuxü̃ i Chimí, erü chixexü̃ nixugü cumaxã, Pa Ãẽ̱xgacüx, nax Tupana cuxü̃ unetaxü̃ nax ãẽ̱xgacü quixĩxü̃? —ñanagürü.
22 Natürü nüma ga Dabí rü nanangãxü̃ rü ñanagürü —Ñaa rü tama perü guxcha nixĩ, Pa Cheruiá Nanegüx. ¿Rü tü̱xcüü̃ ñoma chorü uanügürüxü̃ pegü pixĩxẽxẽgü? Choma rü meama nüxü̃ chacua̱x nax woetama Iraéanecüã̱xgüarü ãẽ̱xgacü nax chixĩxü̃. Rü ngẽmaca̱x i ñaa ngunexü̃gu rü taxúetama tayu —ñanagürü.
23 Yemawena rü Chimíxü̃ ñanagürü: —Aixcüma cumaxã nüxü̃ chixu rü taxũtáma cuyu —ñanagürü.
24 19:24-25 Rü yexgumarüxü̃ ta inaxũãchi ga Mepi-bóchex ga Chaú nataxa nax Dabíxü̃ íyadauxü̃ca̱x. Rü nüma ga Mepi-bóchex rü yexguma Dabí Yerucharéü̃wa ixũxgucürüwa rü ñu̱xmata mea wenaxarü nataegu rü taguma nügü naya̱u̱xcutü rü taguma nügü naya̱u̱xchiru rü taguma nügü nidüchinagu. Natürü yexguma Yerucharéü̃wa nanguxgu nax Dabíxü̃ namoxẽxü̃ca̱x rü nüma ga Dabí rü nüxna naca rü ñanagürü: —¿Tü̱xcüü̃ tama chowe curüxũ ga yexguma íchaxũxü̃gu, Pa Mepi-bóchex? —ñanagürü.
25 Nüü̃ nadau 19:24
26 Rü nüma ga Mepi-bóchex rü nanangãxü̃ rü ñanagürü: —Pa Ãẽ̱xgacüx, ngẽma nax choma rü taxuacü chixũxü̃, rü ngẽmaca̱x chanamu ga chorü duü̃ nax wüxi i búru choxü̃́ namexẽẽxü̃ca̱x rü yemagu chixüexü̃ca̱x nax cuwe charüxũxü̃ca̱x, Pa Ãẽ̱xgacüx. Natürü nüma rü choxü̃ nawomüxẽxẽ rü tama nanaxü ga yema chanamuxü̃.
27 Rü cuxü̃tawa naxũ nax chauchiga doraxü̃ cumaxã yaxuxü̃ca̱x. Natürü cumax, Pa Ãẽ̱xgacüx, rü ñoma wüxi i Tupanaarü orearü ngeruü̃rüxü̃ i dauxü̃cüã̱xrüxü̃ quixĩ. Rü ngẽmaca̱x ẽcü ¡naxü i ngẽma cuxca̱x rümemaexü̃!
28 Rü woo i guxü̃ma i chaunatütanüxü̃ rü name chi nax cunada̱i̱xü̃, Pa Ãẽ̱xgacüx, natürü i cuma rü curü mechawa choxü̃ cuchibüxẽxẽ. ¿Rü ngẽmaca̱x ta̱xacürü to i ngü̃xẽxẽxü̃ca̱x chi i cuxna chacaxü̃, Pa Ãẽ̱xgacüx? —ñanagürü.
29 Rü yexguma nüma ga ãẽ̱xgacü rü nanangãxü̃ rü ñanagürü: —Marü nataxuma i ta̱xacü i to i nachiga idexagüxü̃. Rü marü chanaxuegu nax cuma rü Chibá rü pegümaxã peyayauxyexü̃ i ngẽma naanegü i Chaúarüchire̱x ixĩgüxü̃ —ñanagürü.
30 Natürü ga Mepi-bóchex rü nanangãxü̃ rü ñanagürü: —¡Ẽcü Chibána naxã i guxü̃ma! Erü choma rü namaxã chataãxẽ nax taxuxü̃ma cuxü̃ üpetüxü̃ãcüma cupataca̱x cutaeguxü̃, Pa Ãẽ̱xgacüx —ñanagürü.
31 19:31-32 Rü Bachilái ga Garaáxanecüã̱x rü wüxi ga yatü ga muarü diẽruã́cü nixĩ. Rü yexguma Maanaíü̃wa nayexmagu ga Dabí namaxã ga norü churaragü, rü nüma ga Bachilái rü Dabíxü̃ narüngü̃xẽxẽ õnamaxã. Rü yexguma natü ga Yudáü̃wa yaxüechaü̃gu ga ãẽ̱xgacü ga Dabí, rü nüma ga Bachilái rü Rogueríü̃wa ne naxũ nax ãẽ̱xgacüxü̃ naxümücüxü̃ca̱x ga yexguma yaxüegu ga Yudáü̃wa rü yemawena napataca̱x nataeguxü̃ca̱x. Yerü nüma ga Bachilái rü marü yaxguã̱x nixĩ rü 80 ga taunecü nüxü̃́ nayexma.
32 Nüü̃ nadau 19:31
33 Rü yexguma nüma ga ãẽ̱xgacü rü Bachiláixü̃ ñanagürü: —¡Chowe rüxũ i Yerucharéü̃wa! Rü choma tá cuxna chadau rü taxuxü̃táma cuxü̃́ nataxu —ñanagürü.
34 Natürü nüma ga Bachilái rü Dabíxü̃ nangãxü̃ rü ñanagürü: —Marü tama mucü ya taunecü choxü̃́ ínayaxü nax chayuxü̃ca̱x. Rü ngẽmaca̱x, Pa Ãẽ̱xgacüx, taxuacüma cuwe charüxũ i Yerucharéü̃wa.
35 Erü ñu̱xma rü marü choxü̃́ nangẽxma i 80 ya taunecü rü marü tama nüxü̃ chacua̱x nax nañuxãcaxü̃ i õna ega chachibügu rü chaxaxegu. Rü marü tama mea nüxü̃ chaxĩnü i naga i ngẽma wiyaetanüxü̃ i yatüxü̃ rü ngexü̃gü. Rü ngẽmaca̱x tama chanaxwa̱xe nax wüxi i curü guxcharuxü̃ chixĩxü̃.
36 Pa Ãẽ̱xgacüx, ngẽma nax cuxü̃ chaxümücüxü̃ca̱xicatama nixĩ i nua chaxũxü̃ nax quixüexü̃ i natü i Yudáü̃wa. Rü tama chanaxwa̱xe nax choxü̃́ cunatáeguxẽẽxü̃ i ngẽma ngü̃xẽxẽ i cuxca̱x chaxüxü̃.
37 Pa Ãẽ̱xgacüx, ngẽma chanaxwa̱xexü̃ nixĩ nax chorü ĩaneca̱x choxü̃ cumueguxü̃ nax ngẽxma chayuxü̃ca̱x rü chorü papa rü chorü mama ítáxü̃gu chatáxü̃ca̱x. Natürü nua nangẽxma i chaune i Quimáü̃ nax cuwe naxũxü̃ca̱x rü curü duü̃xü̃ yaxĩxü̃ca̱x. Rü name nixĩ i nüxna cunaxã i ta̱xacü i cuma nüxna cuxãxchaü̃xü̃ —ñanagürü ga Bachilái.
38 Rü nüma ga ãẽ̱xgacü nanangãxü̃ rü ñanagürü: —¡Ẽcü chowe naxũ i Quimáü̃! Rü guxü̃ma i ngẽma cuma nagu curüxĩnüxü̃ rü tá chayanguxẽxẽ. Rü tá nüxna chanaxã i guxü̃ma i ngẽma naxca̱x ícuca̱xaxü̃ —ñanagürü.
39 Rü guxü̃ma ga yema duü̃xü̃gü rü nichoü̃ ga natü ga Yudáü̃wa. Rü yexguma marü yangúegu ga ãẽ̱xgacü ga Dabí, rü Bachiláixü̃ nachúxu rü mexü̃ namaxã naxuegu. Rü ñu̱xũchi nüma ga Bachilái rü napataca̱x nataegu.
40 Rü nüma ga ãẽ̱xgacü rü Guirigáwa naxũ. Rü ínayaxümücügü ga Quimáü̃ rü guxü̃ma ga yema Yudáwa ügüxü̃ ga churaragü rü ngãxü̃tücumü ta ga yema churaragü ga yema togü ga Iraétanüxü̃wa ügüxü̃.
41 Natürü yema Iraéanecüã̱xgü rü ãẽ̱xgacüxü̃ ínayadaugü rü ñanagürügü nüxü̃: —¿Tü̱xcüü̃ nüxchiama cuxü̃ ínayadaugü i toenexẽgü i Yudáanecüã̱xgü rü nüxchiama cuxü̃ naxümücügü i ngẽxguma natü i Yudáü̃wa cuma rü cupatacüã̱x rü curü churaragümaxã quixüegu? —ñanagürügü.
42 Rü nüma ga Yudáanecüã̱xgü rü nanangãxü̃gü rü ñanagürügü: —Ngẽmaãcü tanaxü erü nüma ya ãẽ̱xgacü rü totanüxü̃ nixĩ. ¿Rü tü̱xcüü̃ penue? Rü tama nixĩ nax õna toxna naxãxü̃ca̱x rüe̱xna ãmaregü toxna naxãxü̃ca̱x yixĩxü̃ i nüxü̃ tarüngü̃xẽẽxü̃ —ñanagürügü.
43 Rü yexguma nüma ga Iraéanecüã̱xgü rü nanangãxü̃gü rü ñanagürügü: —Natürü i toma rü perü yexera 10 e̱xpü̱xcüna toxü̃́ nangẽxma i tauxcha nax ãẽ̱xgacüna tangaicamagüxü̃ erü pexü̃ tarümumae. ¿Rü ngẽmaca̱x tü̱xcüü̃ toxü̃ pexoe? ¿Rü tama ẽ̱xna toxíra yixĩxü̃ ga nagu tarüxĩnüexü̃ nax tanataeguxẽẽxü̃ ya ãẽ̱xgacü? —ñanagürügü. Natürü nüma ga yema Yudáanecüã̱xgü rü yexeraãcü Iraéanecüã̱xgümaxã niporagatanücüxü.
