2 Samuel 2:1-32
2 Rü yemawena rü nüma ga Dabí rü Cori ya Tupanana naca rü ñanagürü: —¿Yudáaneca̱x tá chataeguxü̃? —ñanagürü. Rü nüma ga Cori ya Tupana nanangãxü̃ rü ñanagürü: —Ngü̃, name nixĩ i ngéma cuxũ —ñanagürü. Rü yexguma ga Dabí rü ínaca rü ñanagürü: —¿Ngextá tá chaxũxü̃? —ñanagürü. Rü nüma ga Cori ya Tupana nanangãxü̃ rü ñanagürü: —Ĩane ya Ebróü̃wa —ñanagürü.
2 Rü yexguma ga Dabí rü yéma Ebróü̃wa naxũ ngĩmaxã ga naxma̱xgü ga Ainóaü̃ ga Yereécüã̱x, rü ñu̱xũchi Abigái ga naxma̱xchire̱x ixĩcü ga Nabáx ga Carméxcüã̱x ga yucü.
3 Rü natanüxü̃maxã yéma nanagagü ta ga namücügü. Rü ĩane ga Ebróü̃gu rü yema ĩanexacügü ga norü ngaicamana yexmagüxü̃gu nayaxãchiü̃gü.
4 Rü yemawena rü Ebróü̃wa nangugü ga Yudáanecüã̱x ga duü̃xü̃gü, rü chíxü̃maxã Dabíxü̃ nabaerugü nax Yudáanearü ãẽ̱xgacü yixĩxü̃ca̱x. Rü yexgumarüxü̃ ta Dabímaxã nüxü̃ yaxugüegu nax guma Garaáxanewa yexmane ga ĩane ga Yabécüã̱xgü yixĩxü̃ ga Chaúxü̃ íta̱xgüxü̃,
5 rü nüma ga Dabí rü ñuxre ga norü orearü ngeruxü̃ yéma namugü namaxã ga ore ga ñaxü̃: —¡Cori ya Tupana pexü̃ rüngü̃xẽxẽ! Erü poraãcü nüxü̃ pengechaü̃ ga perü ãẽ̱xgacü ga Chaú rü ngẽmaca̱x mea ipenata̱x.
6 ¡Rü Tupana rü pemaxã namecüma rü pemaxã nixaixcüma! Rü chomax rü tá ta pemaxã chamecüma naxca̱x ga yema mexü̃ ga pexüxü̃.
7 Rü ngẽmaca̱x i ñu̱xmax rü woo nax nayuxü̃ i Chaú rü ¡taxṹ i perümaãchitanüxü̃ rü taxṹ i pemuü̃exü̃! Erü ngẽma Yudáanecüã̱x i duü̃xü̃gü rü marü ãẽ̱xgacüxü̃ choxü̃ ningucuchixẽẽgü —ñaxü̃ ga Dabí.
Iraéanecüã̱xgü rü nügü nadai namaxã ga Yudáanecüã̱xgü
8 Natürü ga Abnéx ga Néx nane ga Chaúarü churaragümaxã icuácü, rü nayaga ga Chaú nane ga Ibóchex rü ĩane ga Maanaíü̃wa namaxã naxũ.
9 Rü yéma chíxü̃maxã nanabaeru nax ãẽ̱xgacü yixĩxü̃ca̱x ga Garaáxanewa, rü Guechuríanewa, rü Yereéanewa, rü Efraíü̃anewa, rü Bẽyamíü̃anewa, rü guxü̃ma ga Iraéanewa.
10 Rü yexguma inaxügüãgu nax Iraéanemaxã inacuáxü̃ ga Ibóchex rü 40 ga taunecü nüxü̃́ nayexma. Rü taxretama ga taunecü Iraéanecüã̱xgümaxã inacua̱x. Natürü ga yema Yudáanecüã̱xgü ga duü̃xü̃gü rü Dabíxü̃ nayauxgü nax norü ãẽ̱xgacü yixĩxü̃.
11 Rü yemaacü ga Dabí rü 7 ga taunecü rü naétü 6 ga tauemacü Yudáanewa ãẽ̱xgacü nixĩ. Rü ĩane ga Ebróü̃wa nayexma.
12 Rü nüma ga Abnéx ga Néx nane rü wüxi ga ngunexü̃gu Ibóchexarü churaragümaxã Maanaíü̃wa inaxĩãchi rü Gabaóü̃wa naxĩ.
13 Rü nüma ga Yoá ga Cheruiá nane rü Dabíarü churaragümaxã Ebróü̃wa inaxũãchi rü Gabaóü̃arü puchu íyexmaxü̃gu nügü nangaugü namaxã ga yema Abnéarü churaragü. Rü yema Yoáxarü churaragü rü Gabaóü̃arü puchucutüwa nayexmagü rü yema Abnéarü churaragü rü guma puchuarü tocutüwa nayexmagü.
14 Rü yexguma ga Abnéx rü Yoáxü̃ ñanagürü: —Ẽcü ngẽma curü ngextü̱xücügü rü chorü ngextü̱xücügümaxã tape̱xegu nügü nadai —ñanagürü. Rü yexguma ga Yoá rü: —Marü name —ñanagürü.
15 Rü 12 ga Bẽyamíü̃tanüxü̃ ga Ibóchexarü churaragü rü wixpe̱xewa naxĩ rü yexgumarüxü̃ ta ga 12 ga Dabíarü churaragü rü wixpe̱xewa naxĩ.
16 Rü yexguma nügüyáewa nichü̱xüxgü rü ñu̱xũchi taramaxã nügü nacagüpacütüxü̃. Rü wüxigu nayue ga guxü̃ma ga yema 24 ga churaragü. Rü yemaca̱x ga yema nachica ga Gabaóü̃wa yexmaxü̃ rü “Espádaarü naane”, ñaxü̃gu naxãéga.
17 Rü yexguma ga yema togü ga churaragü rü inanaxügü nax nügü nada̱i̱xü̃. Rü Abnéxarü churaragüxü̃ narüporamaegü ga Dabíarü churaragü.
18 Rü yema tomaepü̱x ga Cheruiá nanegü ga Yoá rü Abichái rü Achaé rü yema nügü ínadaixü̃wa nayexmagü. Rü yema Achaé rü wüxi ga cowürüxü̃ napora ga ñaãchiwa.
19 Rü yemaca̱x Abnéxwe nangẽ, rü tama nanaxüchica nax yañaxü̃ca̱x.
20 Rü yexguma nügü íyada̱u̱xgu ga Abnéx rü ñanagürü: —¿Cumax ẽ̱xna Pa Achaé? —ñanagürü. Rü yexguma nüma ga Achaé rü ñanagürü: —Ngẽmaãcü choma chixĩ —ñanagürü.
21 Rü yexguma nüma ga Abnéx rü ñanagürü: —¡Marütama nax chowe quingechigüxü̃! ¡Rü tomare i duü̃xü̃we nangẽ rü nade ya naxnegü! —ñanagürü. Natürü ga Achaé rü tama Abnéxga naxĩnüchaü̃ rü nawe ningechigüama.
22 Rü yemaca̱x nüma ga Abnéx rü wenaxarü Achaéxü̃ ñanagürü: —Ngẽxguma taxũtáma ícuyachaxãchigu nax chowe quingẽchigüxü̃ rü cuxü̃ tá chiima̱x rü ¿ta̱xacüxü̃ tá namaxã chixuxü̃ ya cuenexẽ ya Yoá? —ñanagürü.
23 Natürü nüma ga Achaé rü nawe ningechigüama. Rü yexguma nüma ga Abnéx rü düxwa Achaépütüwegu nanama̱x ga norü wocaetape̱xe, rü nitoxpetü. Rü nayu rü yexma nayangu. Rü guxü̃ma ga duü̃xü̃gü rü yexguma Achaé íxüxü̃wa nangugügu rü yéma nayachaxãchitanü rü nüxü̃ narüdaunü.
24 Rü yexguma ga Yoá rü Abichái rü Abnéxwe nangẽgü. Rü yexguma marü nachütachaü̃gu rü nawa nangugü ga guma ma̱xpǘne ga Amá ga Guíaarü to̱xma̱xtawa yexmane ga nama ga yema chianexü̃ ga Gabaóü̃wa nadaxü̃.
25 Rü yéma guma ma̱xpǘnechitaeruwa rü nüma ga Bẽyamíü̃tanüxü̃ ga churaragü rü wenaxarü Abnéxca̱x naxĩ nax wüxitücumü yixĩxü̃ca̱x. Rü guma ma̱xpǘnewa mea nügü ninu.
26 Rü ñu̱xũchi nüma ga Abnéx rü tagaãcü yéma Yoána nacagü rü ñanagürü: —Marütama nax yigütanüxü̃watama yigü idaixü̃. ¡Rü namaxã nüxü̃ ixu i curü churaragü rü marütama nax naenexẽgüwe yangexü̃tanüxü̃! ¿Tama ẽ̱xna nüxü̃ cucua̱x nax ñaa rü ngúxü̃ rü ngechaü̃xica tá taxca̱x ínanguxẽxẽxü̃? —ñanagürü.
27 Rü yexguma ga Yoá rü nanangãxü̃ rü ñanagürü: —Tupanaégagu cumaxã nüxü̃ chixu rü ngẽxguma chi taxṹ ngẽma ñacumaregu rü ñaa chorü churaragü rü ngẽma curü churaragüwe chi nangẽgü ñu̱xmata yangóonemare —ñanagürü.
28 Rü yexgumatama ga Yoá rü nagu nicue ga norü carnéruchatacu̱xre rü yexguma ínayachaxãchitanü ga norü churaragü nax Iraéanecüã̱xgüarü churaragüwe yangexü̃tanüxü̃. Rü yexguma nüxü̃ narüchaue nax nügü nada̱i̱xü̃.
29 Rü yematama ga chütaxü̃gu ga Abnéx rü norü churaragümaxã rü Arabáarü doxanexü̃wa nachopetü. Rü nichoü̃ ga natü ga Yudáü̃wa, rü Bitróü̃arü naanegu naxĩ ñu̱xmata Maanaíü̃wa nangugü.
30 Rü nüma ga Yoá rü marü nüxü̃ narüchau nax Abnéxwe yangẽchigüxü̃. Rü nanangutaque̱xexẽxẽ ga guxü̃ma ga norü churaragü rü nayaxugü. Rü 19 ga Dabíarü churaragü nataxu rü naétü ga Achaé.
31 Natürü yema Dabíarü churaragü rü nanadai ga 360 ga Bẽyamíü̃cüã̱x ga Abnéxarü churaragü ixĩgüxü̃.
32 Rü nüma ga Yoá rü ñu̱xũchi yema norü duü̃xü̃gü rü Beréü̃wa nanangegü ga Achaéxü̃ne rü yexma nanatüxü̃tagu nayata̱xgü. Rü nüma ga Yoá rü norü churaragümaxã guxü̃ ga chütaxü̃ inaxĩ, rü moxü̃ãcü pa̱xmama Ebróü̃wa nangugü.
