2 Samuel 20:1-26
20 Rü yéma nayexma ga wüxi ga Bẽyamíü̃tanüxü̃ ga chixexü̃gu rüxĩnüxü̃ ga Chebágu ãégaxü̃. Rü nüma ga Chebá ga Biquirí nane ixĩxü̃ rü duü̃xü̃güxü̃ namu nax Dabímaxã nanuexü̃ca̱x. Rü ñanagürü: —Yixema rü taxuxü̃ma tüxna naxǘ i naxü̃tawa i Dabí i Ichaxí nane. Rü ngẽmaca̱x ngĩxã rü nüxna tixĩgachi, Pa Iraéanecüã̱xgüx, rü guxãma i pema rü noxtacüma pepataca̱x pewoegu —ñanagürü.
2 Rü yemaca̱x guxü̃ma ga yatügü ga Iraéanecüã̱xgü rü Dabína nixĩgachi rü Chebá ga Biquirí naneweama narüxĩ. Natürü guxü̃ma ga yema Yudáanecüã̱xgü ga natü ga Yudáü̃wa ãẽ̱xgacümaxã ne ĩxü̃ rü naweama narüxĩ rü ñu̱xmata Yerucharéü̃wa nangugü.
3 Rü yexguma Dabí napatawa nguxgu ga Yerucharéü̃wa, rü ngĩca̱x nangema ga yema 10 ga norü ngegü ga napatana ngĩxü̃ nadauxẽẽgücü ga yexguma nüxna yañaxgu. Rü wüxi ga ĩpatagu ngĩxü̃ namugü rü yéma rü ngĩxna nadaugü. Rü yemaacü yéma ngĩxna nadaugü, natürü taguma wena ngĩmaxã inape. Rü guxü̃guma irüwãxtaü̃gü, rü yéma iyexmagü ñoma nayutegüxü̃rüxü̃ ñu̱xmata nayue.
4 Rü yemawena rü nüma ga ãẽ̱xgacü rü norü churaragüeru ga Amacháxü̃ ñanagürü: —¡Naxca̱x naca i guxü̃ma i yatügü i Yudáanecüã̱xgü, rü norü tomaepü̱x i ngunexü̃gu tá namaxã nua cuxũxü̃! —ñanagürü.
5 Rü nüma ga Amachá rü inaxũãchi nax nanutaque̱xeãxü̃ca̱x ga churaragü, natürü tama paxa yéma nangu nagu ga yema ngunexü̃ ga nagu naxunetaxü̃.
6 Rü yexguma ga Dabí rü Abicháixü̃ ñanagürü: —Chebá rü taxü̃ i chixexü̃ tá tamaxã naxü Acharóü̃arü yexera. ¡Rü ngẽmaca̱x namaxã inacua̱x i chorü churaragü rü nawe nangẽ naxü̃pa nax ĩanegü ya ípoxegunexü̃ iyangauxü̃ rü ngẽmaãcü marü taxucürüwa tayayaxu! —ñanagürü.
7 Rü Yoáxarü churaragü, rü yema churaragü ga ãẽ̱xgacüarü dauruü̃gü ga Queretéugü rü Peretéugü, rü yema churaragü ga rüporamaegüxü̃, rü Abicháimaxã Yerucharéü̃wa inaxĩãchi nax Chebáwe nangẽgüxü̃.
8 Rü yexguma Abichái rü Yoá norü churaragümaxã nuta ga tacü ga Gabaóü̃wa yexmacüarü ngaixcamawa nangugügu rü nüma ga Amachá rü yéma naxca̱x inayago. Rü nüma ga Yoá rü daixchiruxü̃gu nicu̱x, rü norü goyexü̃wa narütu ga wüxi ga tara ga nachiü̃wa yexmaxü̃ rü yexguma ñaxtüwaama nacuxuchigu rü nüechama ínatuxuchi.
9 Rü nüma ga Yoá rü norü tügünechacüümaxã Amacháchinágugu ningĩ ñoma Amacháxü̃ nachúxchaxü̃xü̃rüxü̃, rü yemaacü nüxna naca: —¿Mea cuxü̃ nangupetüxü̃ Pa Chauenexẽx? —ñanagürü.
10 Natürü Amachá rü tama nüxü̃ nadau ga Yoáarü tara ga naxme̱xwa yexmaxü̃, rü yemaca̱x tama ínaxuãẽ. Rü Yoá rü ngürüãchimare Amacháxü̃ nacanapütüwe norü taramaxã rü guxü̃ma i naü̃nütachapa̱xa rü waixü̃müanegu ínayixü̃. Rü Yoá rü taxuca̱xma wena Amacháxü̃ nacana, yerü wüxixü̃cüxü nayu. Rü yemawena ga Yoá rü naenexẽ ga Abicháimaxã Chebá ga Biquirí nanewe nangẽgü.
11 Rü yexguma ga wüxi ga Yoáxarü churara rü Amacháxü̃nexü̃tagu nayachi rü ñanagürü: —¡Yíxema texé ya Yoáwa rü Dabíwa üxe, rü Yoáwe tarüxũ! —ñanagürü.
12 Natürü ga Amachá rü namaarü ngãxü̃watama nayexma, rü nagüétüwa yéma nidixegucüxü. Rü yexguma yema churara nüxü̃ da̱u̱xgu nax guxü̃ma ga duü̃xü̃gü yéma yachaxãchigüxü̃, rü yemaca̱x namacüwagu Amacháxü̃ inaxücuchi rü wüxi ga düxruü̃maxã yexma nayadüxü. Yerü nüxü̃ nicua̱xãchi nax guxü̃ma ga yéma chopetüxü̃ rü Amachá íxüxü̃gu nayachiãchitanü.
13 Rü yexguma namawa ínaxügachiã̱xguwena rü nachopetü ga guxü̃ma ga yema churaragü ga Yoáwe rüxĩxü̃ nax Chebá ga Biquirí nanewe nangegüxü̃ca̱x.
14 Rü nüma ga Chebá rü guxü̃ma ga Iraéanecüã̱xgütanüwa naxũ rü ñu̱xmata ĩane ga Abé-béx-maacáwa nangu. Rü guxü̃ma ga Biquirítanüxü̃ rü nawa naxügü, rü nawe guma ĩanegu nachocu.
15 Rü yexguma ĩane ga Abé-béx-maacáwa nangugügu ga Yoáarü churaragü rü ĩanearü poxeguxü̃tapü̱xarü düxétüwa nanaxügü ga waixü̃müarü günagüxü̃ nax yemawa nagu nachocuxü̃ca̱x ga guma ĩane. Rü ñu̱xũchi guxü̃ma ga Yoáarü churaragü rü wüxigu inanaxügüe nax ĩanearü poxeguxü̃gu napogüexü̃ rü yemaacü nax yawáxü̃ca̱x ga naxtapü̱x.
16 Rü ngürüãchi wüxi ga ngecü ga ngĩãẽxü̃ cua̱xcü rü ĩanearü poxeguxü̃arü dauxnawa icagü rü ngĩgürügü: —¡Choxü̃ iperüxĩnüe! ¡Name nixĩ i choxü̃ iperüxĩnüe! ¡Rü Yoámaxã nüxü̃ pixu rü chauxü̃tawa naxũ, erü namaxã chidexachaü̃! —ngĩgürügü.
17 Rü yexguma Yoá marü ngĩrü ngaicamawa nanguxgu rü ngĩma rü nüxna ica: —¿Cuma nixĩ i Yoá? —ngĩgürügü. Rü nüma rü ngĩxü̃ nangãxü̃ rü: —Ngü̃, choma chixĩ i Yoá —ñanagürü. Rü ngĩma rü ngĩgürügü: —Choma i curü ngü̃xẽẽruxü̃ nax chixĩxü̃ nax cumaxã chidexaxü̃, ¡rü choxü̃ irüxĩnü i ngẽma tá cumaxã nüxü̃ chixuxü̃! —ngĩgürügü. Rü nüma ga Yoá rü ngĩxü̃ nangãxü̃ rü: —Marü tá cuxü̃́ icharüxĩnü —ñanagürü.
18 Rü yexguma inaxügü nax yadexaxü̃ rü ngĩgürügü: —Nũxcüma ga duü̃xü̃gü rü ñanagürügü: “Texé guxchaxü̃ mexẽẽchaü̃gu, rü ẽcü Abéarü ĩanewa ucu̱xẽca̱x ítayaca̱x”, ñanagürü i ngẽma ore. Rü yemaacü nanamexẽẽgü ga guxchaxü̃gü ga duü̃xü̃gü.
19 Rü daa torü ĩane rü Iraéanearü ĩanegütanüwa rü wüxi ya ĩane ya tama daigu rüxĩnüne nixĩ, rü mexü̃gu rüxĩnüne nixĩ. Rü wüxi ya ĩane ya poraãcü tachigane nixĩ. Natürü cuma rü nagu curüxĩnü nax cunada̱i̱xü̃ i norü duü̃xü̃gü. ¿Tü̱xcüü̃ icuyanaxoxẽẽchaü̃ ya daa Cori ya Tupanaarü ĩane? —ngĩgürügü.
20 Rü nüma ga Yoá rü ngĩxü̃ nangãxü̃ rü: —Tama ngẽmagu charüxĩnü. Tama chorü ĩnü nixĩ nax chanachixexẽẽxü̃ ya daa ĩane rü nachicarica íchayaxüxẽẽxü̃.
21 Tama nixĩ i ngẽmawa nixĩ i nua chaxũxü̃, natürü wüxi i yatü i Efraíü̃arü ma̱xpǘnecüã̱x i Chebágu ãégaxü̃, rü ãẽ̱xgacü ga Dabíca̱x nügü nanutaque̱xe nax yama̱xgüãxü̃ca̱x. Rü chanaxwa̱xe nax nüxicatama choxna penamuxü̃, rü ngẽxguma i choma rü tá nüxna chixũgachi ya daa ĩane —ñanagürü. Rü ngĩma ga yema ngecü rü Yoáxü̃ ingãxü̃: —Rü marü ĩanearü poxeguxü̃tápü̱xétüwa tá cuxca̱x tanatáe i naeru —ngĩgürügü.
22 Rü yexgumatama ga yema ngecü rü guxü̃ma ga guma ĩanearü duü̃xü̃güxü̃ iyaxucu̱xẽ. Rü ngĩga naxĩnüe ga yema namaxã nüxü̃ yaxuxü̃, rü yemaca̱x Chebáxü̃ nidaerugü rü Yoáca̱x nanatáegü ga naeru. Rü yexgumatama ga Yoá rü nanamu nax cornétagu yacuexü̃ nax guma ĩanena yaxĩgachitanüxü̃ca̱x ga norü churaragü. Rü wüxichigü napataca̱x nataegu. Rü yemawena ga nüma ga Yoá rü Yerucharéü̃wa naxũ nax ãẽ̱xgacümaxã yanadexaxü̃ca̱x.
Dabíarü churaragüeru
23 Rü nüma ga Yoá nixĩ ga guxü̃ma ga Iraéanearü churaragümaxã inacuáxü̃, natürü nüma ga Benaía ga Yoiadá nane rü ãẽ̱xgacüarü dauruü̃gü ga Queretéugümaxã rü Peretéugümaxã inacua̱x.
24 Rü Aduráü̃ nixĩ ga ĩanearü puracümaxã icuáxü̃, rü Yochapáx ga Ailúx nane nixĩ ga ãẽ̱xgacüarü poperaarü ümatüruxü̃ ixĩxü̃.
25 Rü Chebá nixĩ ga ta̱xacü ga ngupetüxü̃arü ümatüruxü̃. Rü Chadóx rü Abiatá nixĩ ga chacherdótegü.
26 Rü Irá ga Yaíarü ĩanecüã̱x rü Dabíarü chacherdóte ta nixĩ.
