2 Samuel 21:1-22
21 Yexguma Dabí ãẽ̱xgacü ixĩxgu rü 3 ga taunecü taiya nangu̱x. Rü nüma ga Dabí rü Cori ya Tupanamaxã nidexa. Rü nüma ga Cori ya Tupana rü Dabíxü̃ nangãxü̃ rü ñanagürü nüxü̃: —Ngẽma nax taiya ngúxü̃ rü nüma ga Chaú rü natanüxü̃ máetagüxü̃gagu nixĩ, yerü nanadai ga muxü̃ma ga Gabaóü̃cüã̱xgü —ñanagürü nüxü̃.
2 Dabí rü Gabaóü̃cüã̱xgüca̱x nangema rü ñu̱xũchi namaxã nidexa. (Yema Gabaóü̃cüã̱xgü rü tama Iraétanüxü̃ nixĩgü. Rü wüxi ga natücumü ga Amoréugüna íyaxügüxü̃ nixĩgü. Rü yema Gabaóü̃cüã̱xgümaxã nixĩ ga Iraétanüxü̃ ga nügümaxã inaxügagüxü̃ nax nügüga tá naxĩnüexü̃. Rü yemagüxü̃ nixĩ ga Chaú ga nadaixichichaü̃xü̃ yerü tama nanaxwa̱xe nax totücumü ga duü̃xü̃gü natanüwa yexmaxü̃ ga Iraéanecüã̱xgü rü Yudáanecüã̱xgü.)
3 Dabí rü yema Gabaóü̃cüã̱xgüna naca rü ñanagürü: —¿Ta̱xacü penaxwa̱xe nax pexca̱x chanaxüxü̃? ¿Ñuxãcü tá chanamexẽxẽxü̃ ga yema chixexü̃ ga Chaú pemaxã üxü̃ nax ngẽmaãcü i pema rü mexü̃ tomaxã pexueguxü̃ca̱x i toma i Cori ya Tupanaarü duü̃xü̃gü? —ñanagürü.
4 Rü nümagü ga Gabaóü̃cüã̱xgü rü nanangãxü̃gü rü ñanagürügü: —Tama nixĩ i diẽru tanaxwa̱xexü̃ naxca̱x ga yema Chaú rü natanüxü̃ tomaxã üxü̃, rü tama tanaxwa̱xe nax texé yuxü̃ i Iraétanüxü̃tanüwa —ñanagürügü. Rü Dabí rü nanangãxü̃ rü ñanagürü nüxü̃: —¡Chomaxã nüxü̃ pixu ega ta̱xacü penaxwa̱xegu nax pexca̱x chanaxüxü̃ca̱x! —ñanagürü.
5 21:5-6 Rü nümagü nanangãxü̃gü rü ñanagürügü: —Nagagu ga yema yatü ga toxü̃ iyarüxoxẽẽchaü̃xü̃ rü nagu rüxĩnüxü̃ nax itayarüxoxü̃ca̱x i Iraéarü naanewa, rü tanaxwa̱xe i toxna cunamugü i 7 i natanüxü̃ i Chaú ga Cori ya Tupana nüxü̃ unetacü. Rü toma rü ĩane ya Guibeágu tá Cori ya Tupanape̱xegu tanawẽxgünaxã —ñanagürügü. Rü nüma ga ãẽ̱xgacü rü naga naxĩnü nax nüxna namugüãxü̃ ga yema Chaútanüxü̃.
6 Nüü̃ nadau 21:5
7 Natürü nüma ga ãẽ̱xgacü ga Dabí rü tama inanamu ga Mepi-bóchex ga Yonatáü̃ nane ga Chaútaxa ixĩcü. Yerü ga Dabí rü ü̃paacü marü Tupanape̱xewa Yonatáü̃maxã nügümaxã inaxügagü nax Mepi-bóchexna nadauxü̃.
8 Natürü yema inamugüxü̃ nixĩ ga yema taxre ga Richapá ngĩnegü ga Chaúmaxã ngĩxü̃́ yexmaxü̃. Rü wüxi rü Armoní nixĩ ga naéga rü to rü Mepi-bóchex nixĩ ga naéga. Rü ngĩma ga Richapá rü Aiáxacü iyixĩ. Rü yema to ga nüxna namugüxü̃ nixĩ ga 5 ga Chaútaagü ga naxacü ga Merá ngĩnegü. Rü ngĩma ga Merá rü Adrié naxma̱x iyixĩ. Rü nüma ga Adrié rü Bachilái ga Meorácüã̱x nane nixĩ.
9 Rü yemagü nixĩ ga Gabaóü̃cüã̱xgüna namugüxü̃. Rü nümax ga Gabaóü̃cüã̱xgü rü wüxi ga ma̱xpǘnegu nayanawe̱xgünaxãgü nape̱xegu ga Cori ya Tupana. Rü yemaacü wüxigu nanadai ga yema 7 yexguma chebádaarü buxgü ixügügu.
10 Rü ngĩma ga Richapá ga Aiáxacü rü naxchiru ga témüxü̃gu iyacu̱x, rü yemaacü nanaxü yerü ngechaü̃ ngĩxü̃́ ngúxü̃. Rü wüxi ya nutagu inangücuchi. Rü yéma iyexma, noritama chebádaarü buxgü ixügügu ñu̱xmata nawa nangu ga nax wena napuxü̃. Rü yéma nüxna idau ga yema naxü̃negü nax tama ngurucu nangṍxü̃ca̱x ga ngunecü, rü tama aigü nangṍxü̃ca̱x ga chütacü.
11 21:11-12 Yexguma Dabímaxã nüxü̃ yaxugügu ga yema Richapá ga Chaúarü nge üxü̃, rü nüma ga Dabí rü ĩane ga Yabé ga Garaáxanewa yexmaxü̃wa naxũ nax yéma Yabécüã̱xna nadeaxü̃ca̱x ga Chaúchina̱xãgü rü nane ga Yonatáü̃china̱xãgü. Yerü nawena nax ma̱xpǘne ga Guibóagu Chaúxü̃ yama̱xgüxü̃ ga Firitéugü, rü nümagü ga Yabécüã̱x nixĩ ga Bex-cháü̃arü plazawa nadeaxü̃ ga Chaúxüne rü Yonatáü̃üne ga Firitéugü ínatugüxẽẽxü̃wa.
12 Nüü̃ nadau 21:11
13 21:13-14 Rü yemawena ga Dabí rü duü̃xü̃güxü̃ namu nax nadeaxü̃ca̱x ga guma Chaúchina̱xãgü rü nane ga Yonatáü̃china̱xãgü rü ñu̱xũchi naxchina̱xãgü ga yema 7 ga nawẽxgünaaxü̃. Rü Bẽyamíü̃anewa yexmane ga ĩane ga Cheráwa nanana, rü yema nachica ga Chaúnatü ga Chíx nagu natáxü̃gu nanata̱xgü ga Chaúchina̱xãgü rü nane ga Yonatáü̃china̱xãgü. Rü yemaacü ãẽ̱xgacü ga Dabí nüxü̃ ixuxü̃ãcüma nanaxügü. Rü yemawena Tupana nanangãxü̃ ga yema duü̃xü̃güarü yumüxẽ ga nachixü̃aneca̱x nüxna naxca̱x nacagüxü̃.
14 Nüü̃ nadau 21:13
Abichái rü ãũcümaxü̃wa Dabíxü̃ ínanguxuchixẽxẽ
15 Rü nüma ga Firitéugü rü wenaxarü Iraécüã̱xgümaxã nanaxunagügü nax nügü nada̱i̱xü̃ca̱x. Yexguma ga Dabí rü ñu̱xũchi norü churaragüerugü rü yéma naxĩ nax namaxã nügü nada̱i̱xü̃ca̱x. Rü nüma ga Dabí rü poraãcü nipa.
16 Rü yemaca̱x wüxi ga Firitéu ga máchanexü̃ ga Ibí-benoxgu ãégaxü̃ rü Dabíxü̃ nimáxchaü̃. Rü guma naxne ga wocae rü 3 quíruarü yexera naya. Rü nacüwawa irütu ga norü tara ga yexwaca̱xü̃cü.
17 Natürü nüma ga Abichái ga Cheruiá nane rü yéma naña rü Dabíxü̃ nayarüngü̃xẽxẽ, rü yema Firitéuxü̃ nima̱x. Rü ñu̱xũchi Dabíarü churaragüerugü rü Dabíxü̃ inaxunetagüxẽxẽ nax taguma wena daiwa nawe naxũxü̃ca̱x nax ngẽmaãcü tama nayuxü̃ca̱x ya Iraéanearü ãẽ̱xgacü.
Firitéugü ga imáchanexü̃maxã nügü nadai ga Iraéanecüã̱xgü
18 Yemawena rü Góxgu Firitéugümaxã nügü nadai ga Iraéanecüã̱xgü. Rü yema daigu ga Chibecái ga Uchátanüxü̃ rü nayama̱x ga wüxi ga Firitéu ga Cháxgu ãégaxü̃. Rü nüma ga Cháx rü máchanexü̃tanüxü̃ nixĩ.
19 Rü yexguma wenaxarü Góxgu Firitéugümaxã nügü nadaixgu ga Iraéanecüã̱x, rü nüma ga Eranáü̃ ga Beréü̃cüã̱x ga Yaíx nane rü nayama̱x ga Goriáx ga Gáxcüã̱x. Rü nüma ga Goriáx rü nüxü̃́ nayexma ga wüxi ga naxne ga wocae ga tamena̱xãxüchicü.
20 Rü Gáxwa rü nayexma ga to ga dai. Yéma rü nayexma ga wüxi ga yatü ga Firitéu ga máchanexü̃chixü̃ ga 6 tanüme̱xẽxü̃ ga wüxichigü ga naxme̱xwa rü wüxichigü ga nacutüwa. Rü nüma ga yema Firitéu rü nataxa nixĩ ga yema duü̃xü̃gü ga imáchanexü̃chixü̃.
21 Rü nüma ga yema Firitéu rü Iraéanecüã̱xgüxü̃ naxãxũne. Natürü Yonatáü̃ ga Chimá nane rü nayama̱x. Rü nüma ga Chimá rü Dabíenexẽ nixĩ.
22 Rü yema ãgümücü ga imáchanexü̃ rü guma Gáxcüã̱x ga Refátanüxü̃ nixĩgü. Natürü nüma ga Dabí rü norü churaragüerugümaxã nanadai ga yema ãgümücü ga imáchanexü̃.
