2 Samuel 22:1-51
22 Rü yexguma Cori ya Tupana Dabíxü̃ rüngü̃xẽẽgu nax Chaúme̱xẽwa rü guxü̃ma ga norü uanügüme̱xẽwa ínanguxuchixẽẽãxü̃, rü nüma ga Dabí rü ñaa wiyaemaxã Tupanaxü̃ nicua̱xüxü̃.
2 22:2-3 Rü ñanagürü:—Cumax, Pa Corix, rü chorü poxü̃ruxü̃ quixĩ,rü chorü cu̱xchicaxü̃ quixĩ,rü chorü nguxuchixẽẽruxü̃ quixĩ,rü chorü Tupana quixĩ,rü nuta ya chorü poxü̃ruxü̃ quixĩ,rü chorü tüpe̱xeruxü̃ quixĩ,rü chorü maxẽẽruxü̃ quixĩ, rü ma̱xpǘnetape̱xewa ngẽxmaxü̃ i chorü cu̱xchicaxü̃ i nagu changaxixü̃ quixĩ.Rü ngẽmaãcü chorü maxẽẽruxü̃ quixĩ.Rü cuma nixĩ i chorü uanügüme̱xẽwa choxü̃ ícunguxuchixẽẽxü̃ nax tama choxü̃ yama̱xgüxü̃ca̱x.
3 Nüü̃ nadau 22:2
4 Rü cuxü̃́ nixĩ i namexü̃, Pa Corix, nax ticua̱xüü̃güxü̃.Rü ngẽxguma ãũcümaxü̃wa changexmagu rü aita cuxca̱x chaxüxgu,rü cuma rü chorü uanügüme̱xẽwa choxü̃ ícupoxü̃.
5 Rü yema yu rü ñoma tacü ga yuaperüxü̃ choxü̃ niyaxu.Rü poraãcü chamuü̃ nape̱xewa ga yema ãũcümaxü̃ ga choxü̃ imáxchaü̃xü̃.
6 Rü yema yu rü choxü̃ niyaxu rü marü naxme̱xwa chayexma nax chayuxü̃ca̱x.
7 Rü yexguma yema ngúxü̃wa chayexmagu rü tagaãcü nüxna chacagü ga Cori ya Tupana nax choxü̃ nangü̃xẽẽxü̃ca̱x.Rü nüma rü napatawa ínangexmaxü̃wa choxü̃ naxĩnü.Rü yema aixta nax chaxüxü̃ rü naxmachi̱xẽwa changuga.
8 Rü yexguma rü naxĩã̱xãchiane.Rü naxĩã̱xãchitanü ga ma̱xpǘnegü yerü nüma ga Cori ya Tupana rü norü numaxã nanaxĩã̱xãchixẽxẽ.
9 Rü naxmaraü̃wa ínaxũxũ ga caixemaxü̃,rü naã̱xwa ínaxũxũ ga üxüema ga nawa iyuxü̃,rü naã̱xwa ínachoxü̃ ga ã́xwe ga inaixcü.
10 Rü nüma ga Tupana rü nayangena ga daxũguxü̃ ga naane rü ñoma ga naanegu ínarüxĩ.Rü nacutütüxü̃wa nayexma ga taxüchixü̃ ga caixanexü̃ ga waemaxü̃.
11 Rü wüxi ga dauxü̃cüã̱x ga ãxpe̱xatüxü̃étügu naxaunagü rü yema namaxã nigoe.Rü nüxü̃ tadau nax buanecüemagu namaxã yañaxü̃.
12 Rü waanexü̃gu nayaxücu nagu ga yema caixanexü̃ ga pamüemaxü̃ ga dexááxü̃.Rü yema nixĩ ga nayexmaxü̃.
13 Rü yema norü ya̱u̱xracüümaxã naxãẽmacüane rü inaixcü ga ã́xwe narüyixixü̃.
14 Rü yexguma ga nüma ga Cori ya Tupana ya Guxü̃étüwa Ngẽxmacü rü yema daxũwa yexmaxü̃ ga waanexü̃wa tüxü̃ nüxü̃ naxĩnüxẽxẽ ga naga ga ñoma duruanexü̃rüxü̃ ixĩxü̃.
15 Rü yéma inanacuxgü ga naxnegü rü nanayixẽxẽ ga ãẽmacügü.Rü yemacha̱xwa ga yema chorü uanügü rü nibuxmü rü nügü nawoone.
16 Rü Cori ya Tupana rü naga ga ãũcümaxü̃gagu rü yema poraãcü cue ñaxü̃gagu rü nangótama ga már rü nango̱x ga yema ñoma i naanearü aixepewa ngẽxmaxü̃.
17 Rü daxũguxü̃ ga naanewa cha̱u̱xca̱x narüxueme̱xẽ rü yema már ga mátamaxü̃wa choxü̃ nayangõxõchi.
18 Rü choxü̃ nanapu naxme̱xwa ga yema chorü uanügü ga poraexüchixü̃ ga chauxchi aiexü̃ rü choxü̃ poramaexü̃.
19 Rü cha̱u̱xca̱x ínayaxüãchi ga yexguma guxchaxü̃wa chayexmayane,natürü nüma ga Cori rü choxü̃ narüngü̃xẽxẽ.
20 Rü choxü̃ ínanguxuchixẽxẽ rü choxü̃ nanapu yerü choxü̃ nangechaü̃.
21 22:21-22 Rü nüma ga Cori rü choxü̃́ nanaxütanü yerü aixcüma mexü̃ chaxü rü nacümagu chixũ rü taguma nüxna chixũgachi ga chorü Tupana.
22 Nüü̃ nadau 22:21
23 Rü chayanguxẽxẽ ga guxü̃ma ga norü mugü rü taguma nüxü̃ chayarüngüma.
24 Rü nape̱xewa rü taguma ta̱xacürü chixexü̃ chaxü rü nüxna chixũgachi i ngẽma chixexü̃.
25 Rü nüma ga Cori ya Tupana rü choxü̃́ nanaxütanü naxca̱x ga yema mexü̃ ga chaucüma ga nape̱xewa ichawéxü̃.
26 Rü cumax, Pa Corix,rü tümamaxã quixaixcüma ya yíxema cumaxã ixaixcümáxe.Rü tama tüxü̃ cuxo ya yíxema aixcüma cupe̱xewa mexü̃gu rüxĩnüxe.
27 Rü tümamaxã quixaixcüma ya yíxema ixaixcümáxe.Natürü ngẽma womüxẽẽwa̱xexü̃ rü cuma nüxü̃ cucua̱xama i ngẽma naxüxü̃.
28 Cuma rü tüxü̃ ícunguxü̃xẽxẽ ya yíxema tama tügü icua̱xüü̃güxe,natürü cuyanangea̱xgüxẽxẽ i ngẽma nügü icua̱xüü̃güxü̃.
29 Cumax, Pa Corix, rü chorü maxü̃arü omü quixĩ.Rü cumax, Pa Chorü Tupanax,rü cunangóonexẽxẽ i ngextá cha̱u̱xca̱x ínaxẽanexü̃wa.
30 Rü curü ngü̃xẽẽmaxã rü tá naxca̱x íchayagoõchi i chorü uanü.Rü norü ĩanegüarü poxeguxü̃étüwa tá chaxüpetü.
31 Rü ngẽma Tupana nagu rüxĩnüxü̃ rü aixcüma name.Rü ngẽma Coriarü uneta rü name nax yaxõxü̃.Rü nüma ya Tupana rü tüxna nadau ya guxãma ya yíxema nüxü̃́ yaxõgüxe.
32 ¿Rü texé tixĩ ya Coriétüwa Tupana ixĩxẽ?¿Rü nangemaxü̃ i ta̱xacü i to i Tupanarüxü̃ nüxü̃́ tauxchaxü̃ nax tüxü̃ ínapoxü̃xü̃?
33 Rü nüma ya Tupana nixĩ i choxü̃ naporaxẽẽxü̃.Rü yimá nixĩ ya iyanawe̱xãchixẽẽcü i chaucüma.
34 Rü nüma ya Tupana nixĩ i choxna naxãxü̃ i pora nax ñoma cowürüxü̃ ichañaãchixü̃ca̱x.Rü ma̱xpǘneanewa chomaxã inacua̱x nax tama charünguxü̃ca̱x.
35 Rü nüma nixĩ i choxü̃ nangu̱xẽẽxü̃ nax daixü̃ chacuáxü̃ca̱x.Rü nüma nixĩ i pora choxna naxãxü̃ nax bróũchenaxca̱x ya würa ichamaxü̃xü̃ca̱x.
36 Rü cumax, Pa Cori Pa Tupanax,nixĩ i choxna cudauxü̃ rü choxü̃ ícupoxü̃xü̃.Rü ngẽma nax choxü̃ curüngü̃xẽẽxü̃gagu duü̃xü̃güpe̱xewa chatachiga.
37 Rü cha̱u̱xca̱x cunamexẽxẽ i chaumaü̃ nax ngẽmaãcü tama ichinguxü̃ca̱x.
38 Rü nawe change ga chorü uanügü rü nüxü̃ ichayangau rü chanadai.Rü tama chataegu ñu̱xmata guxü̃ma chadai.
39 Rü chanadai ga guxü̃ma.Rü chayanaxoxẽxẽ. Rü chayapu̱xyegü rü taxuxü̃ma ínarüdagü.
40 Rü cumax, Pa Tupanax,rü choxü̃ cuporaxẽxẽ ga daiwa.Rü yema chomaxã nuexü̃ rü cho̱xme̱xgu cunayixẽxẽ.
41 Rü yemaca̱x cha̱u̱xcha̱xwa nibuxmü ga chorü uanügü.Rü yemaacü ichayanaxoxẽxẽ ga yema chauxchi aiexü̃.
42 Rü nümagü rü ngü̃xẽẽca̱x aita naxüe, natürü taxúema nüxü̃ tarüngü̃xẽxẽ.Rü Tupanana nacagüe natürü nüma rü tama nanangãxü̃.
43 Rü chanadai ñu̱xmata ñoma waixü̃müchicute̱xerüxü̃ yaxĩgü.Rü nawa changa ñoma ãcharaxü̃ i namawa ngaxü̃rüxü̃.
44 Rü cuma nixĩ i naxme̱xwa choxü̃ ícunguxuchixẽẽxü̃ ga yema chautanüxü̃ ga choxü̃ ima̱xgüchaü̃xü̃.Rü choxna cudau rü choxü̃ curüngü̃xẽxẽ nax togü ga nachixü̃anegümaxã ichacuáxü̃ca̱x.Rü yemaacü ga yema duü̃xü̃gü ga noxri tama nüxü̃ chacuáxü̃ rü ñu̱xma rü choxü̃́ napuracüe.
45 Rü ngẽxguma choxü̃ naxĩnüegu rü chauga naxĩnüe.Rü ngẽma duü̃xü̃gü i togü i nachixü̃anecüã̱x ixĩxü̃ rü choxü̃ nicua̱xüü̃gü.
46 Rü ngẽma duü̃xü̃gü i togü i nachixü̃anecüã̱x rü choxü̃ namuü̃e rü ngẽma íyacu̱xgüxü̃wa du̱xrueãcü ínachoxü̃.
47 ¡Namaxü̃ ya Cori ya Tupana!¡Rü namecümaxüchi ya yimá chorü poxü̃ruxü̃!¡Rü ngĩxã tanatachigaxẽxẽ ya Tupana ya chorü maxẽẽruxü̃ ya choxna daucü!
48 Nüma ya Tupana nixĩ i cha̱u̱xca̱x nanuxü̃ rü choxü̃ naxütanüxü̃.Rü nüma nixĩ i cho̱xme̱xgu nayixẽẽãxü̃ i ngẽma togü i nachixü̃anegü.
49 Rü nüma nixĩ i choxü̃ ínanguxuchixẽẽxü̃ naxme̱xwa i chorü uanügü rü naxme̱xwa i ngẽma tama chauga ĩnüechaü̃xü̃ rü chomaxã nuexü̃.Rü cumax, Pa Corix,rü choxü̃ ícupoxü̃ naxme̱xwa i ngẽma choxü̃ ima̱xgüchaü̃xü̃.
50 Rü ngẽmaca̱x cuxü̃ chicua̱xüxü̃ natanüwa i ngẽma nachixü̃anegü,rü cuégagu chawiyae.
51 Cuma rü guxü̃guma cunaporamaexẽxẽ ya yimá ãẽ̱xgacü ya cuma nüxü̃ cuxunetacü.Rü cuma rü guxü̃guma nüxü̃ cungechaü̃ ya Dabí rü nataagü
—ñanagürü ga Dabí ga norü wiyaewa.
