2 Samuel 23:1-39
23 Ñaa nixĩ ga nawa iyacuáxü̃ ga Dabíarü dexa.Rü nüma ya Dabí ya Ichaxí nane nixĩ ga gumá yatü ga Tupana natachigaxẽẽcü.Rü nüma nixĩ ga Acóbuarü Tupana nüxü̃ unetaxü̃ nax Iraéanearü ãẽ̱xgacü yixĩxü̃ca̱x.Rü nüma ya Dabí nixĩ ya Iraétanüwa meama wiyaexü̃ nacuáxü̃. Rü nüma rü ñanagürü:
2 —Tupanaãxẽ ya Üünecü rü chowa narüdexa rü norü ore rü chorü conüwa nangẽxma.
3 23:3-4 Iraétanüxü̃güarü Tupana ya norü poxü̃ruxü̃ ixĩcü rü chomaxã nidexa rü ñanagürü:“Yimá ãẽ̱xgacü ya mea norü duü̃xü̃gümaxã icuácü rü mea Tupanaga ĩnücü,rü ñoma ngunexü̃arü dexemaxü̃ irügoxü̃rüxü̃ nixĩ.Rü ñoma üa̱xcü i pa̱xmama ngearü caixanexü̃wa ibáxichixü̃ rü pucüwena maxẽ naxügüxẽẽxü̃rüxü̃ nixĩ”, ñanagürü.
4 Nüü̃ nadau 23:3
5 Rü ngẽmaca̱x i chautaagü rü chowena Iraéanearü ãẽ̱xgacügü tá nixĩgü,erü nüma ya Tupana rü wüxi i taguma iyacuáxü̃ i uneta marü chomaxã naxü.Rü ngẽma chomaxã naxueguxü̃ rü marü nawe̱xgu rü aixcüma nixĩ.Rü ngẽmaca̱x tama chaxoegaãxẽ erü nüma ya Tupana nixĩ i choxü̃ naporamaexẽẽxü̃ rü yanguxẽẽxü̃ i guxü̃ma i ngẽma nagu charüxĩnüxü̃.
6 Natürü ngẽma chixexü̃arü ürüxü̃gü rü tá ínawogü.Rü ñoma tuxu i taxúema tümame̱xẽmaxã nüxü̃ iyauxãchichaü̃xü̃rüxü̃ tá nixĩgü.
7 Rü ngẽma tuxu rü tama nüxü̃ nax ingógüxü̃ca̱x rü áchumena̱xãmaxã rüe̱xna wocaemaxã tayacuixü̃tanü üxüétüwa nax ngẽxma meama yaxaexü̃ca̱x
—ñanagürü ga Dabí.
Dabíarü churaragü ga iporaexü̃
8 Rü ñaagü nixĩ i naégagü ga Dabíarü churaragü ga iporaexü̃ ga daiwa: Ibóchex, ga Axmóü̃cüã̱x ixĩxü̃, rü nüma nixĩ ga yema tomaepü̱x ga iporaxüchixü̃maxã inacuáxü̃. Rü wüxicana ga nüma rü wocaemaxã 800 ga yatü nadai.
9 Rü naweama naxǘ ga Ereachá, ga Dodó nane ga Aótanüxü̃ ixĩxü̃. Rü nüma rü wüxi ga poracü nixĩ natanüwa ga yema tomaepü̱x ga iporaexüchixü̃. Rü wüxigu Dabímaxã Padamíwa nayexma ga yexguma Firitéugü yexma ĩtaque̱xegu nax Iraétanüxü̃maxã nügü nada̱i̱xü̃ca̱x. Rü nüma ga Iraétanüxü̃ rü nixĩgachi.
10 Natürü nüma ga Ereachá rü tama niña. Rü yema Firitéugüxü̃ nadaiama, rü woo nipa̱xme̱xüchi natürü tama nüxü̃ ninge̱x ga norü tara. Rü yema ngunexü̃gu rü Cori ya Tupana yexeraãcü norü uanügüxü̃ nanaporamaexẽxẽ. Rü yemaxü̃ nax nadaugüxü̃ ga Iraéanearü churaragü, rü Ereacháca̱x nawoegu nax nügüaxü̃́ nadeaxü̃ca̱x ga yema yemaxü̃gü ga norü uanügüna napuxü̃xü̃.
11 Rü Ereacháweama naxǘ ga Chamá ga Agué nane ga Ararátanüxü̃. Rü nüma ga Firitéugü rü Leígu nangutaque̱xe nagu ga wüxi ga naane ga purutu nagu togüxü̃ nax yexma Iraétanüxü̃gümaxã nügü nada̱i̱xü̃ca̱x. Rü nüma ga Iraétanüxü̃ ga churaragü rü Firitéugücha̱xwa nibuxmü.
12 Natürü nüma ga Chamá rü yema naanearü ngãxü̃wa nüxica nayaxǘ rü yema naane ínapoxü̃ rü Firitéugüxü̃ nadai. Rü nüma ga Cori ya Tupana rü Chamáxü̃ narüngü̃xẽxẽ rü yemaca̱x yema Firitéugüxü̃ narüporamae.
13 Rü yexguma nanetügüarü buxchigawa nanguxgu, rü yema 30 ga churaragü ga iporaexü̃tanüwa, rü inaxĩãchi ga yema tomaepü̱x ga yexera iporaxüchixü̃ nax Dabíxü̃ íyadaugüxü̃ca̱x nawa ga yema ãxmaxü̃ ga Aduráü̃gu ãégaxü̃. Rü nümagü ga Firitéugüarü churaragü rü doxonexü̃ ga Refaíü̃wa nayexmagü.
14 Rü nüma ga Dabí rü norü poxü̃chicaxü̃wa nayexma. Rü yema ngunexü̃gügu ga Firitéugüarü churaragü rü Beréü̃wa nayexmagü.
15 Rü Dabí rü yexma nita̱xawa rü ñanagürü: —Chierüx texé nua choxü̃ yaxãxẽẽgu namaxã i norü dexá ya yima puchu ya Beréü̃ca̱x ixücuxü̃wa ngẽxmacü —ñanagürü.
16 Rü yexguma ga yema tomaepü̱x ga churaragü ga iporaexüchixü̃, rü Firitéugüarü churaragü íyexmagüxü̃gu nachocu, rü gumá puchu ga Beréü̃ca̱x ixücuxü̃wa yexmacüarü dexá tanayauxgü, rü Dabíxü̃tawa nanangegü. Natürü nüma ga Dabí rü tama nayaxaxchaü̃, rü ínanabamare Tupanaarü ãmareruxü̃.
17 Rü ñanagürü: —¡Tupana choxü̃ ípoxü̃ nax tama ñaa dexá chixaxüxü̃ca̱x! Erü ngẽxguma chi ñaa dexá chixaxügu, rü ñoma nagü i ngẽma yatügü i norü maxü̃ ixãgüxü̃ nax nawa naxĩxü̃ chixaxüxü̃rüxü̃ chixĩ —ñanagürü. Rü tama nayaxaxü. Rü yema tomaepü̱x ga iporaxüchixü̃ rü muẽ̱xpü̱xcüna yemaacü nanaxügü.
18 Rü nüma ga Cheruiá nane ga Abichái ga Yoáenexẽ nixĩ ga yema 30 ga churaragü ga iporaxüchixü̃maxã inacuáxü̃. Rü wüxicana ga Abichái rü 300 ga yatügümaxã nügü nadai. Rü norü wocaemaxã nanadai ga guxü̃ma. Rü yema nax naxüxü̃ca̱x rü natachiga natanüwa ga yema 30 ga iporaxüchixü̃.
19 Rü yema 30 ga churaragütanüwa rü Abichái nixĩ ga guxü̃arü yexera tachigaxü̃ rü nawa nangu nax namücügüarü ãẽ̱xgacü yixĩxü̃. Natürü nüma ga Abichái rü tama yema tomaepü̱x ga nüxíra daiwa inguxü̃xü̃maxã nawüxigu.
20 Rü Benaía ga Yoiadá nane ga ĩane ga Caxcheécüã̱x, rü yatü ga poracü nixĩ rü muxü̃ma ga dai ga ãũcümaxü̃wa narüporamae. Rü nüma nixĩ ga nadaiaxü̃ ga guma taxre ga Moáanecüã̱x ga Arié nanegü. Rü wüxi ga ngunexü̃ ga yexguma gáuxü̃ rüyixgu rü yemacha̱xwa wüxi ga ãxmaxü̃gu naxücu rü yexma aixepegu nayama̱x ga wüxi ga leóü̃.
21 Rü yexgumarüxü̃ tá nayama̱x ga wüxi ga Equítuanecüã̱x ga máchanexü̃ ga wocaemaxã ãxnexü̃. Rü nüma ga Benaía rü wüxi ga naixmena̱xãmaxã naxca̱x niña, rü inanapoe ga norü wocae, rü gumamaxãtama yexma nayama̱x.
22 Rü yema nax naxüxü̃ca̱x ga Benaía ga Yoiadá nane, rü natachiga natanüwa ga yema 30 ga churaragü ga iporaexü̃.
23 Rü nüma rü namücügüarü yexera natachiga, natürü tama yema tomaepü̱x ga nüxíra daiwa inguxü̃xü̃maxã nawüxigu. Rü nüma ga Dabí rü Benaíaxü̃ naxuneta nax yema churaragü ga nüxna dauxgüxü̃maxã inacuáxü̃ca̱x
24 Rü yema 30 ga iporaexüchixü̃tanüwa nayexma: Achaé ga Yoá naenexẽ, rü Eranáü̃ ga Beréü̃cüã̱x ga Dodó nane, rü
25 Chamá ga Aróxcüã̱x rü Ericá ga Aróxcüã̱x ta ixĩcü, rü
26 Ére ga Peróü̃tanüxü̃ ixĩcü, rü Irá ga Iqué nane ga Tecóacüã̱x, rü
27 Abiéche, ga Anatócüã̱x, rü Chibecái ga Uchácüã̱x, rü
28 Chamóü̃ ga Aótanüxü̃, rü Maarái ga Netopácüã̱x, rü
29 Érex ga Baaná nane ga Netopácüã̱x ta, rü Itái ga Ribái nane ga ĩane ga Guibeá ga Bẽyamíü̃anewa yexmanecüã̱x, rü
30 Benaía ga Piratóü̃cüã̱x, rü Idái ga dexámaü̃ ga Gaágu ãégaxü̃cüã̱x, rü
31 Abí-alóü̃ ga Arbátanüxü̃, rü Amábe ga Bauríü̃cüã̱x, rü
32 Eriabá ga Chaabóü̃tanüxü̃, rü Yachéü̃ nanegü, rü Yonatáü̃, rü
33 Chamá ga Ararátanüxü̃, rü Aiáü̃ ga Charáx nane ga Ararátanüxü̃ ta, rü
34 Eriférex ga Maacácüã̱x ga Achabaí nane, rü Eliáü̃ ga Guirócüã̱x ga Aitópe nane, rü
35 Eraí ga Carméxcüã̱x, rü Paarái ga Arbátanüxü̃, rü
36 Igá ga Natáü̃ nane. Rü nüma ga Igá rü Chobácüã̱x nixĩ. Rü nayexma ta ga Baní ga Gáxcüã̱x, rü
37 Chérex ga Amóü̃cüã̱x, rü Naarái ga Beerúxcüã̱x ga Yoáarü ngü̃xẽẽruxü̃ ixĩcü. Rü nüma ga Yoá rü Cheruiá ngĩne nixĩ.
38 Rü nayexma ta ga Irá ga Yatícüã̱x, rü Garéx ga Yatícüã̱x ta ixĩxü̃, rü
39 Uría ga Itítanüxü̃. Rü guxü̃wama rü 37 nixĩgü.
