2 Samuel 24:1-25
24 Cori ya Tupana rü wenaxarü Iraétanüxü̃arü chixexü̃gagu nanu. Rü yemaca̱x ga nüma ga Tupana rü Dabíãẽwa nananguxẽxẽ nax Iraécüã̱xgüca̱x guxchaxü̃ ínanguxẽẽxü̃. Rü Dabíxü̃ namu nax yaxugügüãxü̃ca̱x ga guxü̃ma ga duü̃xü̃gü ga Iraéanewa rü Yudáanewa yexmagüxü̃.
2 Yexguma ga ãẽ̱xgacü rü nanamu ga Yoá ga churaragüeru ga yéma naxü̃tawa yexmaxü̃ rü nüxü̃ ñanagürü: —Rü natanüwa naxũ i guxü̃ma i ngẽma Iraétücumügü, rü ĩane ya Dáü̃wa inaxügü ñu̱xmata ĩane ya Bechébawa nangu nax cuyaxugüxü̃ i guxü̃ma i duü̃xü̃gü nax ngẽmaãcü nüxü̃ chacuáxü̃ca̱x i ñuxre i duü̃xü̃gü nax ngẽxmaxü̃ —ñanagürü.
3 Natürü ga Yoá rü ãẽ̱xgacüxü̃ nangãxü̃ga rü ñanagürü: —Rü yima Cori ya curü Tupana, Pa Ãẽ̱xgacüx, rü name nax 100 e̱xpü̱xcüna ñu̱xmaarü yexera yamuxẽẽxãxü̃ i curü duü̃xü̃gü, rü name nax cumax, Pa Ãẽ̱xgacüx, cumaxü̃xü̃ nax nüxü̃ cudauxü̃ca̱x i ngẽma. ¿Natürü tü̱xcüü̃ i cunaxwa̱xexü̃ nax cuyaxugüxü̃, Pa Ãẽ̱xgacüx? —ñanagürü.
4 Natürü nüma ga ãẽ̱xgacü rü Yoáxü̃ rü yema churaragüerugüxü̃ namuama nax duü̃xü̃güxü̃ yaxugüexü̃ca̱x. Rü nüma ga Yoá rü yema togü ga churaragüeru rü ãẽ̱xgacüna nixĩgachitanü nax yemaacü naxügüã̱xü̃ca̱x nax yaxugüãxü̃ca̱x ga guxü̃ma ga duü̃xü̃gü ga Iraéanewa yexmagüxü̃.
5 Rü nichoü̃ ga natü ga Yudáü̃. Rü ĩane ga Aroéwa rü ñu̱xũchi guma ĩane ga doxonexü̃arü ngãxü̃wa yexmanewa inanaxügüe nax tüxü̃ yaxugügüxü̃ ya duü̃xẽgü. Rü yemawena rü Gáxarü naanewa nachopetü rü ñu̱xũchi ĩane ga Yachéxwa nangugü.
6 Rü yemawena rü Garaáxanewa rü ñu̱xũchi Cadéanewa ga Itítanüxü̃chixü̃anewa yexmanewa naxĩ. Rü Dáü̃anewa nangugü rü ñu̱xũchi ĩane ga Chidóü̃wa naxĩ.
7 Rü yemawena rü ĩane ga Tíruarü dauxü̃taechicawa nangugü. Rü ñu̱xũchi nawa naxĩ ga guxü̃nema ga Ebéutanüxü̃arü ĩanegü rü Canaáü̃tanüxü̃arü ĩanegü ñu̱xmata Yudáanearü súrwaama yexmane ga ĩane ga Bechébawa nangugü.
8 Rü 9 ga tauemacü rü naétü 20 ga ngunexü̃ ningu nax nagu yaxĩãgütanüxü̃ ga guxü̃nema ga Iraéanearü ĩanegü, rü yemawena Yerucharéü̃wa nangugü.
9 Rü nüma ga Yoá rü ãẽ̱xgacüna nanaxã ga yema popera ga duü̃xü̃güarü mu nagu ümatüxü̃. Rü yemawa nango̱x nax Iraéanewa nayexma ga 800,000 ga yatügü ga churarawa imexü̃ rü Yudáanewa nayexma ga 500,000.
10 Natürü nawena ga nax yaxugüãxü̃ ga duü̃xü̃gü rü nüma ga Dabí rü nüxü̃́ nangu̱x ga yema naxüxü̃. Rü yemaca̱x Cori ya Tupanamaxã ñanagürü: —Wüxi i taxü̃ i chixexü̃ chaxü nax chayaxugüxü̃ i duü̃xü̃gü. Natürü, Pa Corix, choma nax curü duü̃xü̃ nax chixĩxü̃ rü cuxna naxca̱x chaca nax choxü̃́ nüxü̃ curüngü̃maxü̃ i ngẽma chixexü̃ i cupe̱xewa chaxüxü̃ erü ñoma wüxi i tama naãxẽxü̃ cuáxü̃rüü̃ãcü chanaxü —ñanagürü.
11 Yexguma moxü̃ãcü pa̱xmama naba̱i̱xãchigu ga Dabí, rü nümax ga Cori ya Tupana rü norü orearü uruxü̃ ga Gáx ga Dabíarü ngü̃xẽẽruxü̃ ixĩcümaxã nidexa rü ñanagürü nüxü̃:
12 —¡Dabíxü̃tawa naxũ rü chauégagu namaxã nüxü̃ ixu i ñaa chorü ore!: “Choma rü tomaepü̱x i poxcugu namaxã charüxĩnü, rü chanaxwa̱xe i nüxü̃ nixu i ngexü̃rüü̃xü̃ i nanaxwa̱xexü̃ nax chanaxüxü̃” —ñanagürü nüxü̃.
13 Rü nüma ga Gáx rü Dabíxü̃tawa naxũ rü nüxna naca rü ñanagürü nüxü̃: —¿Ta̱xacü i cunaxwa̱xexü̃ nax naxüaxü̃ ya Tupana? ¿Cunaxwa̱xe nax 7 ya taunecü taiya ngúxü̃ i ñaa nachixü̃anewa, rüe̱xna cunaxwa̱xe nax 3 ya tauemacü curü uanügücha̱xwa nu ne cunañaxü̃, rüe̱xna cunaxwa̱xe i 3 i ngunexü̃ poraxü̃ i da̱xaweane naxca̱x ínguxü̃ i ñaa nachixü̃anewa? ¡Nagu rüxĩnü rü ñu̱xũchi nüxü̃ ixu i ñu̱xma i ngẽma tá namaxã chanangãxü̃xü̃ i ngẽma nua choxü̃ muxü̃! —ñanagürü.
14 Rü Gáxü̃ nangãxü̃ ga Dabí rü ñanagürü: —Wüxi i taxü̃ i guxchaxü̃ i ãũcümaxü̃wa changexma. Rü name nixĩ nax Cori ya Tupaname̱xẽwa íngexmagüxü̃ erü norü ngechaü̃ rü nataxüchi, rü tama i yatügüme̱xẽwa —ñanagürü.
15 Rü yexguma ga Cori ya Tupana rü yematama pa̱xmama Iraégütanüwa nanamu ga poraxü̃ ga da̱xaweane rü ñu̱xmata yangu ga yema tomaepü̱x ga ngunexü̃ ga nagu naxunetaxü̃. Rü Dáü̃anewa inaxügü ñu̱xmata Bechébagu yacuá nax nayuexü̃ ga 70,000 ga duü̃xü̃gü.
16 Rü yexguma yema Tupanaarü orearü ngeruxü̃ ga daxũcüã̱x inaxügüchaü̃gu ga nax nadaiaxü̃ ga yema Yerucharéü̃cüã̱xgü ga duü̃xü̃gü, rü Cori ya Tupanaaxü̃́ nangu̱x ga yema chixexü̃. Rü nüxna nachogü ga yema norü orearü ngeruxü̃ ga daxũcüã̱x ga duü̃xü̃güxü̃ daixü̃, rü ñanagürü nüxü̃: —¡Marü ngẽxmatama yacua̱xẽxẽ, rü taxṹ i cuyadaxẽxẽxü̃! —ñanagürü. Rü yexguma ga yema Cori ya Tupanaarü orearü ngeruxü̃ ga daxũcüã̱x rü Aráuna ga Yebútanüxü̃ trigu íbuxuxü̃wa nayexma.
17 Rü yexguma Dabí nüxü̃ da̱u̱xgu ga yema Tupanaarü orearü ngeruxü̃ ga daxũcüã̱x ga duü̃xü̃güxü̃ daixü̃, rü nüma ga Dabí rü Cori ya Tupanaxü̃ ñanagürü: —Choma nixĩ ga chixexü̃ chaxüxü̃. Chaugagu nixĩ i ngẽma ngupetüxü̃ ¿Natürü tü̱xcüü̃ cunapoxcu i ñaa duü̃xü̃gü i taxuxü̃ma i chixexü̃ ügüxü̃? Choma rü cuxna naxca̱x chaca nax choxü̃ rü chauxacügüxü̃ cupoxcuxü̃ca̱x —ñanagürü.
Dabí rü wüxi ga ãmarearü guruxü̃ naxü
18 Rü yematama ngunexü̃gu rü Dabíxü̃tawa naxũ ga Gáx, rü namaxã nüxü̃ nixu nax Cori ya Tupanaca̱x naxüaxü̃ i wüxi i ãmarearü guruxü̃ nagu ga yema nachica ga Aráuna ga Yebútanüxü̃ trigu nawa púxü̃.
19 Yexguma ga Dabí rü nanaxü ga yema Gáx namaxã nüxü̃ ixuxü̃ yema Cori ya Tupana Gáxmaxã nüxü̃ ixuxü̃rüxü̃.
20 Aráuna rü yáxü̃gu ãẽ̱xgacüxü̃ nadau ga norü ngü̃xẽẽruü̃gümaxã yéma ne ũxü̃ rü naxca̱xama ĩxü̃. Rü yexguma ga nüma ga Aráuna rü naxca̱x nixũ rü ãẽ̱xgacüpe̱xegu nayacaxã́pü̱xü.
21 Rü ñu̱xũchi ñanagürü nüxü̃: —¿Ta̱xacüwa nua cuxũ, Pa Ãẽ̱xgacüx, chauxü̃tawa i choma nax curü duü̃xü̃ chixĩxü̃? —ñanagürü. Rü nüma ga Dabí rü nanangãxü̃ rü ñanagürü: —Cuxü̃ naxca̱x chataxechaü̃ i ñaa nachica i trigu nawa cupúxü̃ nax ngẽxma chanaxüxü̃ca̱x i wüxi i ãmarearü guruxü̃ naxca̱x ya Cori ya Tupana nax ngẽmaãcü iyanaxoxü̃ca̱x i ngẽma da̱xaweane —ñanagürü.
22 Rü nüma ga Aráuna rü nanangãxü̃ga rü ñanagürü: —¡Nayaxu, Pa Ãẽ̱xgacüx, i ngẽma cuxca̱x mexü̃, rü nawa ãmaregü inaxã! Rü nua nangẽxmagü i wocagü i ãmareruxü̃, rü waixruü̃gü rü wocaarü tocunaxãgüruxü̃ i üxüruü̃gü.
23 Rü guxü̃ma i ngẽma rü cuxna chanana, Pa Ãẽ̱xgacüx —ñanagürü. Rü nüma ga Aráuna rü ñanagürü ta: —Chierüx, Pa Ãẽ̱xgacüx, i ngẽma ãmaremaxã nataãẽgu ya Cori ya Tupana —ñanagürü.
24 Natürü nüma ga ãẽ̱xgacü nanangãxü̃ga rü ñanagürü: —Moxẽ cuxna naxca̱x chaxã. Natürü cuxü̃ tá naxca̱x chataxe rü tá cuxü̃́ chanaxütanü nax ñuxregu naxãtanüxü̃, erü taxucürüwama Cori ya chorü Tupanape̱xewa chanange i ngẽma ãmare i tama choxü̃́ ãtanüxü̃ —ñanagürü. Rü yemaacü ga Dabí rü naxca̱x nataxe ga yema naane rü yema wocagü ga 50 tachinü ga diẽrugu ãtanüxü̃.
25 Rü yema naanegu nanaxü ga ãmarearü guruxü̃ naxca̱x ga Cori ya Tupana. Rü yemawa ínanagu ga ãmaregü ga Cori ya Tupanaarü ngüxmüxẽẽruxü̃. Rü yexguma ga Cori ya Tupana rü Dabíaxü̃́ nüxü̃ naxĩnü ga yema norü yumüxẽwa naxca̱x ínacaxü̃ nax nachixü̃aneétüwa nachogüxü̃. Rü yexguma inayarüxo ga yema da̱xaweane ga Iraéanewa.
