2 Samuel 3:1-39
3 Rü yema nügü nax nada̱i̱xü̃ ga Chaúarü churaragü namaxã ga Dabíarü churaragü rü tama paxa nigue. Natürü Dabíarü pora rü yexera nixĩnagüchigü, rü Chaútanüxü̃arü pora rü ínarüxĩchigü.
Dabí nanegüchiga
2 Ñaagü nixĩ ga Dabí nanegü ga Ebróü̃gu buexü̃ ga yexguma yéma nayexmagu: Rü gumá yaxcü ga nane rü Anóü̃ nixĩ, rü Ainóaü̃ ga Yereécüã̱x iyixĩ ga naé.
3 Rü gumá norü taxre ga nane rü Quiráx nixĩ, rü Abigái iyixĩ ga naé. Rü ngĩma ga Abigái rü Nabáx ga yucüma̱xchire̱x iyixĩ. Rü nüma ga Nabáx rü Carméxcüã̱x nixĩ. Rü norü tomaepü̱x ga Dabí nane rü Acharóü̃ nixĩ, rü naé rü Maacá iyixĩ. Rü ngĩma rü Tarmáixacü iyixĩ. Rü nüma ga Tarmái rü Yechúxarü ãẽ̱xgacü nixĩ.
4 Rü norü ãgümücü ga Dabí nane rü Adonía nixĩ, rü Aguíx iyixĩ ga naé. Rü norü wüxime̱e̱xpü̱x ga nane rü Chepatía nixĩ, rü Abitái iyixĩ ga naé.
5 Rü norü 6 ga Dabí nane rü Itareáü̃ nixĩ, rü Égra iyixĩ ga naé. Rü ngĩma rü nai ga Dabí naxma̱x iyixĩ. Rü yemagü nixĩ ga Dabí nanegü ga Ebróü̃gu buexü̃ ga yexguma Ebróü̃wa nayexmagu.
Abnéx rü Dabí nügümaxã inaxunetagü
6 Rü yema nügü nax nada̱i̱xü̃ ga Chaúarü churaragü namaxã ga Dabíarü churaragü rü inida. Rü Abnéx rü yexeraãcü napora namaxã ga Chaútanüxü̃.
7 Rü Chaú rü nüxü̃́ iyexma ga norü nge ga Richapá ga ngĩéga. Rü Aiáxacü iyixĩ. Rü Abnéx rü yemamaxã namaxü̃. Rü yemaca̱x ga Ibóchex rü Abnéxü̃ naxoregü rü ñanagürü: —¿Tü̱xcüü̃ chaunatü ga Chaúarü naxma̱xmaxã icupe? —ñanagürü.
8 Rü yemaca̱x ga Abnéx rü poraãcüma Ibóchexmaxã nanu naxca̱x nax nüxü̃ nax naxoregüxü̃. Rü nanangãxü̃ rü ñanagürü: —¿Ẽ̱xna wüxi i airumare i Yudáca̱x puracüxü̃ chixĩ? Choma rü aixcüma mea cunatü ga Chaúga chaxĩnü, rü natanüxü̃axü̃́, rü namücügüaxü̃́ chapuracü. Rü ñu̱xũchi tama Dabíme̱xẽgu cuxü̃ changu̱xẽxẽ. ¿Rü tü̱xcüü̃ i ñu̱xma rü choxü̃ quixu nax ngẽma ngexü̃maxã pecadu chaxüxü̃?
9 3:9-10 ¡Rü Cori ya Tupana choxü̃ poxcu ega ngẽxguma taxũtáma Dabíaxü̃́ chanatauxchaxẽxẽgu ga yema Cori ya Tupana Dabímaxã ueguxü̃! Yerü nüma ga Tupana rü Dabímaxã nüxü̃ nixu nax Chaútanüxü̃na naya̱u̱xãxü̃ nax ãẽ̱xgacü yixĩgüxü̃, rü Dabíxü̃ naxuneta nax nüma namaxã inacuáxü̃ca̱x i Iraéane rü Yudáane i Dáü̃arü ĩanewa inaxügü rü ñu̱xmata Bechébagu yacuáx —ñanagürü.
10 Nüü̃ nadau 3:9
11 Rü nüma ga Ibóchex rü bai ga wüxi ga dexamaxã nangãxü̃ãxü̃ yerü Abnéxü̃ namuü̃.
12 Rü nüma ga Abnéx rü Dabíxü̃tawa nanamugü ga norü orearü ngeruü̃gü nax namaxã nüxü̃ yanaxugüxü̃ca̱x ga ñaa ore: —¿Texéarü nixĩ i ñaa nachixü̃ane? ¡Ngĩxã yigümaxã itaxügagü! Choma rü tá cuxü̃ charüngü̃xẽxẽ nax guxü̃ma i Iraéanearü ãẽ̱xgacü quixĩxü̃ca̱x —ñanagürü.
13 Rü nüma ga Dabí rü nanangãxü̃ rü ñanagürü: —Choma chanayaxu i ngẽma nagu curüxĩnüxü̃ nax wüxi i uneta cumaxã chaxüxü̃, natürü taxũtáma nua cuxũ ega tama nua ngĩxü̃ cugaxgu i cho̱xma̱x i Micá i Chaúxacü —ñanagürü.
14 Rü ñu̱xũchi nüma ga Dabí rü norü duü̃xü̃güxü̃ namu nax Ibóchexmaxã nüxü̃ yanaxugüexü̃ca̱x ga norü dexa ga ñaxü̃: —Choxna ngĩxü̃ namu i Micá i cho̱xma̱x ixĩcü ga ngĩmaxã ichingĩcü natanü ga yema 100 ga Firitéugücha̱xmüpe̱xechiraü̃gü —ñanagürü.
15 Rü yexguma ga Ibóchex rü norü duü̃xü̃güxü̃ namu nax ngĩte ga Patié ga Laíx nane ixĩcüna ngĩxü̃ yanapugüxü̃ca̱x.
16 Natürü nüma ga Patié rü ngĩwe nangẽ rü iyaxaxunechigü rü ñu̱xmata Bauríü̃wa ngĩwe nangu. Rü yéma nixĩ ga Abnéx ga Patiéxü̃ namueguxü̃, rü Patié rü nataegu.
17 Yixcamaxü̃ra ga Abnéx rü Iraétanüxü̃arü ãẽ̱xgacügümaxã nidexa rü ñanagürü: —Mucüma ya taunecü i pemax rü naxca̱x pedau nax Dabí yixĩxü̃ca̱x i perü ãẽ̱xgacü.
18 Rü ñu̱xma rü marü nawa nangu erü Cori ya Tupana rü Dabímaxã nanaxuegu nax nüma tá yixĩxü̃ i ínanguxü̃xẽẽãxü̃ i Iraétanüxü̃ naxme̱xwa i Firitéugü, rü ñu̱xũchi naxme̱xwa i guxü̃ma i norü uanügü —ñanagürü.
19 Rü nüma ga Abnéx rü Bẽyamíü̃tanüxü̃maxã nidexa, rü yemawena rü Ebróü̃wa naxũ nax Dabímaxã nüxü̃ yanaxuxü̃ca̱x ga yema Iraétanüxü̃arü ĩnü, rü Bẽyamíü̃tanüxü̃arü ĩnü nax nümagü rü nanaxwa̱xegüxü̃ nax Dabí rü norü ãẽ̱xgacü yixĩxü̃.
20 Rü nüma ga Abnéx rü 20 ga yatügümaxã Ebróü̃wa nangu ga Dabíxü̃tawa. Rü nüma ga Dabí rü taxü̃ma ga õna Abnéxca̱x rü namücügüca̱x naxü.
21 Rü ñu̱xũchi nüma ga Abnéx rü Dabíxü̃ ñanagürü: —Ñu̱xma rü tá cuxna chataegu nax namaxã changutaque̱xexẽẽxü̃ca̱x i guxü̃ma i Iraétanüxü̃ nax nüma nüxü̃ yaxugüxü̃ca̱x nax norü ãẽ̱xgacüxü̃ cuxü̃ naxunetagüxü̃ nax ngẽmaãcü i cumax, Pa Ãẽ̱xgacüx, rü ngẽma cuma cunaxwa̱xexü̃ãcü namaxã nax icucuáxü̃ca̱x —ñanagürü. Rü nüma ga Dabí rü Abnéxü̃ narümoxẽ, rü Abnéx rü taãẽxãcü nataegu.
Yoá rü Abnéxü̃ nima̱x
22 Rü nüma ga Yoá rü Dabíarü churaragümaxã ínangugü nax daiwa ne naxĩxü̃. Rü yéma ne nanana ga muxü̃ma ga yemaxü̃gü ga norü uanügüna napuxü̃xü̃. Rü nüma ga Abnéx rü marü nataxuma ga Dabíxü̃tawa ga Ebróü̃wa yerü marü Dabí ínayamu rü taãẽxãcü nataegu.
23 Rü yexguma yéma nanguxgu ga Yoá namaxã ga guxü̃ma ga Dabíarü churaragü ga naxümücügüxü̃, rü duü̃xü̃gü namaxã nüxü̃ nixugü nax Abnéx ga Néx nane rü Dabíxü̃tawa nax naxũxü̃, rü nüma ga Dabí rü nüxü̃ narümoxẽ rü nanamuegu.
24 Rü yexguma ga Yoá rü ãẽ̱xgacüxü̃tawa naxũ, rü nüxü̃ ñanagürü: —¿Ta̱xacü nixĩ icuxüxü̃ Pa Ãẽ̱xgacüx? Abnéx rü nua cuxü̃ ínayadau Pa Ãẽ̱xgacüx, rü cuma rü mea nua cunataeguxẽẽmare.
25 ¿Tama ẽ̱xna nüxü̃ cucua̱x nax Abnéx ya Néx nane nax nua naxũxü̃ nax cuxü̃ yawomüxẽẽxü̃ca̱x, rü nua cuxü̃ yangugüxü̃ nax ñuxgu ngextá cuxũxü̃ nax ngẽmaãcü nüxü̃ nacuáxü̃ca̱x i guxü̃ma i ngẽma cuxüxü̃? —ñanagürü.
26 Rü yexguma Yoá ixũxgu nax Dabímaxã yadexaxü̃, rü norü duü̃xü̃gü inamuãchitanü nax Abnéxca̱x yadaugüxü̃ca̱x. Natürü nüma ga Dabí rü tama nüxü̃ nacua̱x. Rü puchu ga Chirágu Abnéxü̃ inayangaugü rü yéma nanatáeguxẽẽgü.
27 Rü yexguma Ebróü̃wa nanguxgu ga Abnéx, rü Yoá rü guma ĩanearü ĩã̱xwa Abnéxü̃ naga nax namaxãxicatama yadexaxü̃ca̱x. Rü yexma nanacanapütüwe rü nayu. Rü yexma nüxü̃́ ningutanü ga naenexẽ ga Achaéxü̃ nax yamáxü̃.
28 Natürü yixcamaxü̃ra ga yexguma Dabí nüxü̃ cuáxchigagu, rü ñanagürü: —Cori ya Tupanape̱xewa nüxü̃ chixu rü choma rü chorü duü̃xü̃gü rü tama togagu nixĩ nax nayuxü̃ ya Abnéx ya Néx nane.
29 ¡Rü Yoáxétügu rü guxü̃ma i natanüxü̃xétügu nangu i ngẽma guxchaxü̃! ¡Rü ngẽmaca̱x tagutáma nataxu i natanüxü̃tanüwa ya ãgümaxã ida̱xawexe, rü chaxünemaxã ida̱xawexe, rü ingã̱xãnechigüxe, rü togü tüxü̃ imáxẽ, rü taiya tüxü̃́ ngúxe! —ñanagürü.
30 Yoá rü Abichái nixĩ ga Abnéxü̃ ima̱xgüxü̃, yerü yexguma Gabaóü̃gu nügü nadaixgu rü naenexẽ ga Achaéxü̃ nima̱x ga Abnéx.
31 3:31-32 Yemawena ga Dabí rü Yoámaxã rü guxü̃ma ga namücügümaxã nüxü̃ nixu rü ñanagürü: —¡Pexchirugu pegáugüe, rü naxchiru i témüxü̃gu picu̱xgü rü Abnéxca̱x pengechaü̃gü! —ñanagürü. Rü nüma ga ãẽ̱xgacü ga Dabí rü yema Abnéxü̃ nagu yangetaü̃güxü̃weama nixũchigü. Rü Ebróü̃gu nixĩ ga Abnéxü̃ nata̱xgüxü̃. Rü yéma Abnéx itáxü̃xü̃tawa rü ãẽ̱xgacü ga Dabí rü norü ngechaü̃maxã tagaãcü naxaxu, rü guxü̃ma ga duü̃xü̃gü rü ta naxauxe.
32 Nüü̃ nadau 3:31
33 3:33-34 Rü yexguma ga ãẽ̱xgacü ga Dabí rü norü ngechaü̃maxã Abnéxgagu ñaa wiyaegu nawiyae:“¿Ta̱xacüca̱x, Pa Abnéx,i ñoma wüxi i duü̃xü̃ i chixexü̃gu maxü̃xü̃rüü̃ãcü cuyu?Rü cuxme̱xgü rü tama wüxiwa yana̱i̱xgü, rü woo cucutü rü tama cadénamaxã wüxiwa yachota.Rü cuma rü cuyu naxme̱xgu ya máetagüxü̃”,
nawiyae. Rü guxü̃ma ga duü̃xü̃gü rü nayadaxẽẽgü ga nax naxca̱x naxauxexü̃.
34 Nüü̃ nadau 3:33
35 Rü yemawena ga Dabíarü duü̃xü̃gü rü naxü̃tawa naxĩ rü nüxü̃ nayaca̱a̱xü̃gü nax nachibüxü̃ca̱x naxü̃pa nax nayáuanexü̃. Natürü nüma ga Dabí rü ñanagürü: —¡Cori ya Tupana poraãcü choxü̃ poxcu ega ngẽxguma paũ rüe̱xna ta̱xacürü to i õna changõ̱xnetagu naxü̃pa nax üa̱xcü yarüxücuxü̃! —ñanagürü.
36 Rü guxü̃ma ga duü̃xü̃gü rü nüxü̃ nicua̱xãchitanü ga yema ãẽ̱xgacü üxü̃ rü nax namexü̃. Yerü guxü̃ma ga yema ãẽ̱xgacü ga Dabí üxü̃ rü duü̃xü̃gü rü namaxã nataãẽgü.
37 Rü yema ngunexü̃gu rü guxü̃ma ga Iraétanüxü̃ nayaxõgü nax tama ãẽ̱xgacü ga Dabígagu yixĩxü̃ ga nax nayuxü̃ ga Abnéx ga Néx nane.
38 Rü yemawena ga ãẽ̱xgacü ga Dabí rü norü churaragüerugüxü̃ ñanagürü: —Pema rü nüxü̃ pecua̱x rü ñu̱xma i Iraéanewa nayu i wüxi i churaragüeru i poraxü̃ rü taégaxü̃.
39 Rü ngẽmaca̱x i choma rü woo Tupana choxü̃ unetaxü̃ nax ãẽ̱xgacü chixĩxü̃ rü chaugü chacua̱x nax chaturaxü̃ nape̱xewa i ngẽma taxü̃ i chixexü̃ i naxüexü̃ i Cheruiá nanegü i tama chauga ĩnüexü̃. ¡Rü Cori ya Tupana tüxna naxã i tümaarü poxcu ya yíxema ñaa chixexü̃ üxe! —ñanagürü.
