2 Samuel 6:1-23
6 Dabí rü wenaxarü nananutaque̱xexẽxẽ ga yema norü churaragü ga Iraétanüxü̃tanüwa yadexechixü̃. Rü 30,000 nixĩ.
2 Rü guxü̃ma ga yema churaragümaxã Yudáanewa yexmane ga ĩane ga Baaráwa naxĩ nax Yerucharéü̃wa nangegüãxü̃ca̱x ga yema baú ga Tupanaarü mugü nawa yexmaxü̃. Rü yema baúxü̃tawa nixĩ ga namaxã yadexagüxü̃ ga Cori ya Tupana ya Guxü̃étüwa Nangexmacü ya querubíü̃güarü ngãxü̃tanüwa rütocü.
3 6:3-4 Rü yema baú ga Tupanaarü mugüchixü̃ rü Abinadápata ga ma̱xpǘnewa yexmanegu naxǘ. Rü yexguma yéma yayauxgüãgu ga yema baú, rü nagu nayaxüegü ga wüxi ga caru ga yexwaca̱xü̃ne. Rü nümagü ga Uchá rü Aió ga Abinadá nanegü rü yema carumaxã inacua̱xgü. Rü Aió nixĩ ga yema baúpe̱xegu ixũxü̃.
4 Nüü̃ nadau 6:3
5 Rü nüma ga Dabí rü guxü̃ma ga Iraétanüxü̃maxã Cori ya Tupanape̱xegu naxĩ. Rü guxü̃ma norü taãẽmaxã nawiyaegü, rü íniyüxüe. Rü paxetaruü̃gü ga árpagümaxã rü árpa i íxraxü̃gümaxã rü paü̃derugümaxã rü arugümaxã rü platíyugümaxã nipaxetatanü.
6 Rü yexguma nawa nangugügu ga yema nachica ga Erá-nacóü̃ nawa trigu ícuexechite̱xexü̃, rü nüma ga Uchá rü nüxü̃ nayayauxãchi ga yema baú ga Tupanaarü mugü nagu üxü̃ nax tama nanguxü̃ca̱x, yerü yema wocagü ga yangegüxü̃ rü iniyi yerü nutagu nayarüpucutügü.
7 Rü yemaca̱x ga Cori ya Tupana rü Uchámaxã nanu yerü nüxü̃ ningõgü ga yema baú ga Cori ya Tupanaarü mugü nawa yexmaxü̃. Rü yemaca̱x yexmatama baúxü̃tagu yumaxã nayangu.
8 Rü yexguma ga Dabí rü poraãcüma nanu yerü Cori ya Tupana rü Ucháxü̃ nayuxẽxẽ. Rü yemaca̱x ga yema nachica rü Fére-uchágu nanaxüéga, rü ñu̱xma rü ta ngẽmatama nixĩ i naéga.
9 Natürü yematama ngunexü̃gu ga Dabí rü poraãcüma Tupanaxü̃ namuü̃, rü tagaãcü ñanagürü: —Marü tama nagu charüxĩnü nax chopatawa chanangexü̃ i ngẽma baú i Tupanaarü mugüchixü̃ —ñanagürü ga Dabí.
10 Rü yemaca̱x tama guma Dabíarü Ĩanewa nayangéxchaü̃ ga yema baú ga Cori ya Tupanaarü mugüchixü̃. Rü norü duü̃xü̃güxü̃ namu nax Obéx-edóü̃patawa nangegüãxü̃ca̱x. Rü nüma ga Obéx-edóü̃ rü wüxi ga yatü ga Gáxcüã̱x nixĩ.
11 Rü yema baú ga Cori ya Tupanaarü mugü nawa yexmaxü̃ rü tomaepü̱x ga tauemacü Obéx-edóü̃patawa nayexma. Rü nüma ga Cori ya Tupana rü Obéx-edóü̃xü̃ narüngü̃xẽxẽ guxü̃ma ga naxacügümaxã.
Dabí rü Yerucharéü̃wa nanange ga baú ga Cori ya Tupanaarü mugü nawa yexmaxü̃
12 Rü ãẽ̱xgacü ga Dabímaxã nüxü̃ nixugüe nax yema baú ga Cori ya Tupanaarü mugü nawa yexmaxü̃gagu Tupana rü Obéx-edóü̃xü̃ nangü̃xẽẽxü̃ wüxigu namaxã ga naxacügü rü guxü̃ma ga norü yemaxü̃güwa. Rü yemaca̱x ga nüma ga Dabí rü yéma naxũ rü norü taãẽmaxã Obéx-edóü̃patawa nayayaxu ga yema baú ga Tupanaarü mugü nawa yexmaxü̃. Rü Yerucharéü̃wa yexmane ga Dabíarü Ĩanewa nanange.
13 Rü yexguma 6 arü unecüxü naxügüegu ga yema yangegüxü̃ ga baú ga Tupanaarü mugü nagu nuxü̃, rü nüma ga Dabí rü wüxi ga woca ga yatüxü̃ nima̱x rü ñu̱xũchi wüxi i carnéru ga ingüxüchixü̃ nima̱x rü Tupanaca̱x nayagu.
14 6:14-15 Dabí rü wüxi ga naxchiru ga línunaxca̱xmaxã naxãxchiru. Rü nüma rü guxü̃ma ga Iraétanüxü̃maxã norü taãẽmaxã íniyüxü nape̱xewa ga yema yangegüxü̃ ga yema baú ga Cori ya Tupanaarü mugü nawa yexmaxü̃. Rü norü taãẽmaxã nicaetanü rü cornétagu nicuegü.
15 Nüü̃ nadau 6:14
16 Rü yexguma Dabíarü Ĩanewa nanguxgu ga baú ga Cori ya Tupanaarü mugü nawa yexmaxü̃, rü Micá ga Chaú naxacü rü beü̃tánawa íidauxuchi. Rü nüxü̃ nax nadauxü̃ ga ãẽ̱xgacü ga Dabí ga íiyuxãchiü̃xü̃ rü íyañaãchiü̃xü̃ nape̱xewa ga Cori ya Tupana, rü ngĩma rü poraãcü naxcha̱xwa ixãne.
17 Rü yéma ne nanangegü ga yema baú ga Cori ya Tupanaarü mugü nawa yexmaxü̃. Rü ñu̱xũchi nayaxǘcuchigü nagu ga guma ĩpata ga naxchirunaxca̱x ga Dabí woetama naxca̱x üxü̃ne. Rü yexgumatama ga Dabí rü Cori ya Tupanana ãmare naxã. Rü nanadai ga naxü̃nagü rü ínanagu nax yemaacü namexẽẽãxü̃ca̱x ga norü guxchaxü̃gü ga Cori ya Tupanape̱xewa naxügüxü̃.
18 6:18-19 Rü yexguma marü nüxü̃ nachauegu nax ãmare naxãgüxü̃, rü nüma ga Dabí rü Cori ya Tupana ya Guxãétüwaégagu mexü̃ namaxã naxuegu ga guxü̃ma ga norü duü̃xü̃gü. Rü guxü̃ma ga Iraétanüxü̃ ga yéma yexmagüxü̃ ga iyatüxü̃ rü ingexü̃ rü wüxichigü ga paũ nüxna naxã, rü wüxichigü i maicuraxü̃ i dátilnaxca̱x, rü wüxichigü i maixcuraxü̃ i pachanaxca̱x nüxna nixãchigü. Rü yemawena rü guxü̃ma napataca̱x nawoegu.
19 Nüü̃ nadau 6:18
20 Rü nüma ga Dabí rü ta napataca̱x nataegu nax napatacüã̱xgümaxã mexü̃ naxueguxü̃ca̱x. Natürü ga Micá ga Chaúxacü, rü naxca̱x iyagó rü inayaxu rü ngĩgürügü: —Ñu̱xmawaxix nixĩ i nügü mea inawéxü̃ ya Iraéanearü ãẽ̱xgacü nape̱xewa i norü churaragüerugüarü naxü̃taxü̃gü rü ñoma ngexü̃rüüxü̃mare i duü̃xü̃rüxü̃ nügü nixĩxẽxẽ rü ãne inawe̱x —ngĩgürügü.
21 Nüma ga Dabí rü ngĩxü̃ nangãxü̃ga rü ñanagürü: —Aixcüma nixĩ i ngẽma, nax íchiyüxüxü̃, natürü ngẽma chaxüxü̃ rü naxca̱x nixĩ ya Cori ya Tupana ya choxü̃ yaxucü cunatü rü cutanüxü̃chicüxü nax Iraétanüxü̃maxã ichacuáxü̃ca̱x. Rü ngẽmaca̱x nixĩ i Tupanape̱xewa íchiyüxüxü̃.
22 Rü chaugü tá ícharüxíra ñu̱xmaarü yexera, rü chaugü tá charüxírachigüama ngẽma cuma nagu curüxĩnüxü̃ãcü. Natürü ngẽma naxü̃taxü̃gü i nachiga quidexaxü̃ rü tá chomaxã nataãẽgü —ñanagürü.
23 Rü Micá rü taguma ixãxacü.
