2 Samuel 8:1-18
8 Rü yemawena rü Firitéugüxü̃ narüporamae ga Dabí, rü nüxna nayapu ga ĩane ga Metéx-amagu ãégane. Rü yemaacü Dabíme̱xẽwa nayexmagü ga Firitéugü.
2 Rü yexgumarüxü̃ ta rü Moátanüxü̃xü̃ narüporamae. Rü ñaxtüanegu nayacamaxẽxẽ rü wüxi ga napana̱xãmaxã nanangugü. Rü yema duü̃xü̃gü ga taxrearü ngugüwa yexmagüxü̃ rü nanadai. Rü yema norü tomaepü̱xarü ngugüwa yexmagüxü̃ rü tama nanadai. Rü yemaacü ga yema Moátanüxü̃ rü Dabíme̱xẽwa nayexmagü rü nüxü̃́ nanaxütanügü ga yema diẽru ga Dabí nagu unetaxü̃.
3 Rü nüma ga Dabí rü yexgumarüxü̃ ta Reóx nane ga Adáx-éche ga Chobáarü ãẽ̱xgacüxü̃ narüporamae ga yexguma nüma ga Adáx-éche rü natü ga Eufrátewa naxũxgu nax wena naya̱u̱xãxü̃ca̱x ga yema naane.
4 Rü yema daiwa rü nüma ga Dabí rü ínanayauxü̃ ga 1,700 ya churaragü ga cowarugu ĩxü̃, rü 20,000 ga churaragü ga ixĩmarexü̃. Rü nanawíü̃arü tarumametüxüã̱x ga guxü̃ma ga yema cowarugü ga caru ga dairuxü̃ itúgüxü̃. Rü guma 100 ga carue̱xpü̱xicatama ga cowarugü ínayaxüxẽxẽ.
5 Rü yema Chíriaanecüã̱xgü ga Damácuwa maxẽxü̃ rü yéma naxĩ nax Chobáarü ãẽ̱xgacü ga Adáx-échexü̃ yanangü̃xẽẽgüxü̃ca̱x. Natürü ga Dabí rü nüxü̃ narüporamae, rü 22,000 ga Chíriaanecüã̱xgüxü̃ nadai.
6 Rü yemawena ga Dabí rü Damácugu nayaxüa ga norü churarapatagü. Rü yemaacü ga Chíriaanecüã̱xgü rü Dabíme̱xẽwa nayexmagü rü Dabíaxü̃́ nanaxütanügü ga yema diẽru ga Dabí nagu unetaxü̃. Rü yemaacü ga Cori ya Tupana rü Dabíxü̃ naporaxẽxẽ nax norü uanügüxü̃ naporamaexü̃ca̱x ga ngexta ínaxũxü̃wa.
7 Rü yemawena ga Dabí rü nanade ga yema Adáx-échearü churaragüerugüarü poxü̃ruü̃gü ga úirunaxca̱x, rü ñu̱xũchi Yerucharéü̃wa nanana.
8 Rü nayana ta ga muxü̃ ga bróũchegü ga Adáx-échearü ĩanegü ga Betáwa rü Berotáiwa yexmagüxü̃.
9 Rü nüma ga Toí ga ĩane ga Amáarü ãẽ̱xgacü rü nüxü̃ nacuáchiga nax Dabí rü Adáx-échearü churaragüxü̃ naporamaexü̃.
10 Rü nüma ga Toí rü nane ga Yoráü̃xü̃ Dabíxü̃tawa namu nax moxẽ nüxna yaxãxü̃ca̱x rü nataãẽxẽẽãxü̃ca̱x yerü norü uanü ga Adáx-échexü̃ narüporamae. Rü yéma Dabíca̱x nanana ga yemaxü̃gü ga diẽrumünaxca̱x, rü úirunaxca̱x, rü bróũchenaxca̱x. Rü nüma ga Toí rü ta rü Adáx-échemaxã nügü nadai ga ü̃paacü.
11 8:11-12 Rü nüma ga Dabí rü Tupanana nanaxuaxü̃ ga yema yemaxü̃gü ga diẽrumünaxca̱x rü úirunaxca̱x rü bróũchenaxca̱x ga yema nachixü̃anegü ga nüxü̃ naporamaexü̃wa napuxü̃xü̃ ga Edóü̃wa, rü Moáwa, rü Amóü̃wa, rü Firitéugütanüwa rü Amaréxtanüxü̃wa. Rü yexgumarüxü̃ ta Tupanana nanaxuaxü̃ ga yema yemaxü̃gü ga Reóx nane ga Adáx-éche ga Chobáarü ãẽ̱xgacüna napuxü̃.
12 Nüü̃ nadau 8:11
13 Rü nüma ga Dabí rü Yucüragu ãégaxü̃ ga doxonexü̃gu nanadai ga 18,000 ga Edóü̃tanüxü̃. Rü yexguma yéma ne naxũxgu ga Dabí rü yexeraãcü natachiga.
14 Rü yemawena rü guxü̃ma ga Edóü̃arü naanegu nanaxü ga norü churaragüpatagü. Rü yemaacü guxü̃ma ga Edóü̃tanüxü̃ rü Dabíme̱xẽwa nayexmagü. Rü ngextá Dabí íxũxü̃wa rü nüma ga Cori ya Tupana rü norü uanüxü̃ nanaporamaexẽxẽ.
Dabíarü churaragüerugü
15 Rü nüma ga Dabí rü guxü̃ma ga Iraéanearü ãẽ̱xgacü nixĩ. Rü meama guxü̃ma ga norü duü̃xü̃gümaxã inacua̱x.
16 Rü norü churaragümaxã icuáxü̃ nixĩ ga Yoá ga Cheruiá nane. Rü ãẽ̱xgacüarü poperaarü ümatüruxü̃ nixĩ ga Yochapáx ga Ailúx nane.
17 Rü Chadóx ga Aitúx nane rü Aimérex ga Abiatá nane, rü yemagü nixĩ ga chacherdótegü ixĩgüxü̃. Rü Cheraía nixĩ ga naxümatüxü̃ ga yema Iraéanewa ngupetüxü̃.
18 Rü nanegü ga Dabí rü norü ngü̃xẽẽruü̃gü nixĩgü. Rü Benaía ga Yoiadá nane rü churaragü ga Queretéugümaxã rü Peretéugümaxã inacua̱x.
