2 Samuel 9:1-13
9 Rü wüxi ga ngunexü̃gu ga Dabí rü ínaca rü ñanagürü: —¿Tayíxemaxü̃ ya wüxíe ya Chaútanüxü̃ i ñu̱xma rü ta ngextá maxü̃́xẽ? Erü ngẽxguma tayíxemagu rü Yonatáü̃égagu tüxü̃ charüngü̃xẽẽchaü̃ —ñanagürü.
2 Rü yexguma Dabí nüxü̃ cua̱xgu ga nax nayexmaxü̃ ga wüxi ga yatü ga Chibágu ãégacü ga Chaúarü duü̃xü̃ ixĩcü, rü nüma ga Dabí rü naxca̱x nangema nax naxü̃tawa naxũxü̃ca̱x. Rü yexguma Chibá Dabíxü̃tawa ũxgu, rü nüma ga ãẽ̱xgacü rü nüxna naca rü ñanagürü: —¿Cuma nixĩ i Chibá quixĩxü̃? —ñanagürü. Rü nüma nanangãxü̃ rü ñanagürü: —Ngü̃, Pa Chorü Ãẽ̱xgacüx —ñanagürü.
3 Rü yexguma ga nüma ga ãẽ̱xgacü rü nüxna naca rü ñanagürü: —¿Tangexmaxü̃ ya maxü̃́xẽ ya Chaútanüxü̃wa íyaxüxe? Rü ngẽxguma tangexmagu, rü Tupanaégagu tüxü̃ charüngü̃xẽẽchaü̃ —ñanagürü. Rü nüma ga Chibá rü nanangãxü̃ rü ñanagürü: —Nangexma nixĩ ya wüxi ya Yonatáü̃ nane ya norü guxü̃neparawa chixecü —ñanagürü.
4 Rü nüma ga ãẽ̱xgacü rü ñanagürü: —¿Ngextá inangexmaxü̃? —ñanagürü. Rü nüma ga Chibá nanangãxü̃ga rü ñanagürü: —Lodebáwa nixĩ i nangẽxmaxü̃ i Maquí ya Amié nanepatawa —ñanagürü.
5 Rü yexguma ga nüma ga ãẽ̱xgacü ga Dabí rü nanamu ga yema ínayexmaxü̃wa nax yagagüãxü̃ca̱x.
6 Rü yexguma Dabíxü̃tawa nanguxgu ga nüma ga Mepi-bóchex ga Yonatáü̃ nane ga Chaútaxa ixĩcü, rü nape̱xegu nanangücuchi ga nüxü̃ nax namoxẽxü̃ca̱x. Rü nüma ga Dabí rü nüxna naca rü ñanagürü: —¿Ẽ̱xna cuma quixĩxü̃, Pa Mepi-bóchex? —ñanagürü. Rü nüma nanangãxü̃ rü ñanagürü: —Cuxme̱xwa changexma, Pa Ãẽ̱xgacüx —ñanagürü.
7 Rü nüma ga Dabí rü ñanagürü nüxü̃: —¡Taxuca̱xma cumuü̃! Erü choma rü meatama cumaxã ichacua̱x cunatü ga Yonatáü̃égagu. Rü tá chanamu nax cuxü̃ natáegugüxẽẽãxü̃ca̱x i guxü̃ma i ngẽma naane ga curü o̱xi ga Chaúarü ixĩxü̃. Rü guxü̃gutáma chorü mecha i choma íchachibüxü̃wa tá cuchibü —ñanagürü.
8 Natürü nüma ga Mepi-bóchex rü ãẽ̱xgacüpe̱xegu nanangücuchi rü ñanagürü nüxü̃: —¿Tü̱xcüü̃ chaugu curüxĩnü i choma i curü duü̃xü̃ chixĩxü̃, Pa Ãẽ̱xgacüx, ega ngẽxguma taxuwama cuxü̃́ chamexgux? —ñanagürü.
9 Natürü nüma ga ãẽ̱xgacü rü naxca̱x naca ga Chibá ga ü̃pa Chaúarü puracütanüxü̃ ixĩxü̃, rü ñanagürü nüxü̃: —Guxü̃ma ga yema Chaúarü ixĩchiréxü̃ rü yema natanüxü̃arü ixĩchiréxü̃ rü marü nataxa i Mepi-bóchexna chanaxã.
10 Rü ngẽmaca̱x i cuma rü cunegümaxã rü curü puracütanüxü̃maxã rü tá Mepi-bóchexaxü̃́ cupuracü nawa i ngẽma norü naane. Rü ngẽxguma yaxo̱xgu i ngẽma nanetü rü tá namaxã cunguxü̃ nax ngẽmaãcü Mepi-bóchexacügü nüxü̃́ ngẽxmaxü̃ca̱x i norü õna. Natürü nümatama i Mepi-bóchex i Chaútaxa rü guxü̃gutáma chorü mechawa nachibü —ñanagürü ga Dabí. Rü nüma ga Chibá ga 15 ga nanegü rü 20 ga norü puracütanüxü̃ nüxü̃́ yexmacü,
11 rü nanangãxü̃ rü ñanagürü: —Guxü̃ma i ngẽma choxü̃ cumuxü̃, Pa Ãẽ̱xgacüx, rü choma nax curü puracütanüxü̃ chixĩxü̃ rü tá chanaxü —ñanagürü. Rü nüma ga Mepi-bóchex rü guxü̃guma ãẽ̱xgacü ga Dabíarü mechawa nachibü wüxigu nanegümaxã ga ãẽ̱xgacü.
12 Rü nüma ga Mepi-bóchex rü nüxü̃́ nayexma ga wüxi ga nane ga buxü̃ ga Micaíagu ãégaxü̃. Rü guxü̃ma ga Chibáarü duü̃xü̃gü rü Mepi-bóchexü̃ narüngü̃xẽẽgü.
13 Natürü nüma ga Mepi-bóchex ga guxü̃neparawa chixecü rü Yerucharéü̃gu naxãchiü̃, yerü guxü̃guma ãẽ̱xgacüarü mechawa nachibü.
