3 Juan 1:1-14
1 Pa Chauenexẽ, Pa Gáyu ya Cuxü̃ Changechaü̃xex, choma i Cuáü̃ i yaxõgüxü̃arü ãẽ̱xgacü, rü cuxü̃ charümoxẽ.
2 Pa Chauenexẽ ya Cuxü̃ Changechaü̃xex, rü ñu̱xma nax curü õwa mea iquixũxü̃, rü Tupanana chaca nax ngẽxgumarüxü̃ ta mea iquixũxü̃ca̱x i curü puracüwa rü curü maxü̃wa.
3 Rü poraãcü chataãxẽ ga yexguma núma naxĩxgu ga ñuxre ga taenexẽgü, rü chomaxã nüxü̃ yaxugügu nax guxü̃guma mea naga cuxĩnüxü̃ i Tupanaarü ore i aixcüma ixĩxü̃.
4 Rü ngẽma guxü̃arü yexera namaxã chataãẽxü̃ nixĩ i ngẽxguma nüxü̃ chaxĩnügu nax mea Tupanaarü ore nüxü̃ ixuxü̃ãcüma namaxẽxü̃ i ngẽma yaxõgüxü̃.
5 Pa Chauenexẽ i Cuxü̃ Changechaü̃xex, mexü̃ cuxü erü nüxü̃ curüngü̃xẽxẽ i ngẽma togü i taenexẽgü, rü woo ngẽma taenexẽgü i tóxnamana ne ĩxü̃ i cuxü̃tawa ngugüxü̃ rü nüxü̃ curüngü̃xẽxẽ.
6 Rü nümagü rü nua nangugü, rü torü ngutaque̱xepataü̃wa nüxü̃ nixugüe nax aixcüma nüxü̃ cungechaü̃xü̃ rü namaxã cumecümaxü̃. Rü chanaxwa̱xe i nüxü̃ curüngü̃xẽxẽ i ngẽma taenexẽgü i ngẽxguma wena cuxü̃tawa nangugügu. Rü ngẽxguma cuxna íyaxĩxgu rü ¡Tupana naxwa̱xexü̃ãcüma nüxna naxã i ta̱xacü i nüxü̃́ taxuxü̃ i norü namawaxü̃!
7 1:7-8 Rü nümagü, rü marü inaxĩãchi nax naxügüã̱xü̃ca̱x ya Ngechuchu ya Cristuarü puracü. Natürü tama nanayauxgü i ngẽma tama yaxõgüxü̃arü ngü̃xẽxẽ. Rü ngẽmaca̱x name i yixema nüxü̃ tarüngü̃xẽẽgü nax ngẽmaãcü yixema rü ta wüxigu namaxã naxügüxü̃ca̱x i Tupanaarü puracü.
8 Nüü̃ nadau 1:7
Diótepe rü chixexü̃ naxü natürü Demétriu rü mexü̃ naxü
9 Choma rü marü chanaxümatü i wüxi i popera naxca̱x i ngẽma yaxõgüxü̃ i curü ĩanewa ngẽxmagüxü̃. Natürü nüma i Diótepe rü tama naga naxĩnüchaü̃ i ngẽma nüxü̃ tixuxü̃, erü nanaxwa̱xe nax nümatama namuaxü̃ i ngẽma yaxõgüxü̃.
10 Rü ngẽxguma ngéma chaxũxgu rü tá nüxü̃ chaxoregü erü tochiga rü chixexü̃maxã inayarüdexanexü̃. Rü ngẽmaétüwa tama nanayauxchaü̃ i ngẽma taenexẽgü i ngéma ngugüxü̃. Rü nanachu̱xu nax texé nayaxuxü̃ i ngẽma taenexẽgü. Rü yíxema nayauxgüchaü̃xẽ, rü ngutaque̱xepataü̃wa tüxü̃ ínawoxü̃.
11 Pa Chauenexẽ i Cuxü̃ Changechaü̃xex, ¡Taxṹ i nüxü̃ cuyadauxü̃xü̃ i ngẽma chixexü̃ ügüxü̃! Natürü name nixĩ i nüxü̃ cuyadauxü̃ i ngẽma mexü̃ ügüxü̃. Erü yíxema mexü̃ ǘxe rü Tupanaxacü tixĩ. Natürü yíxema chixexü̃ ǘxe rü tama Tupanaxü̃ tacua̱x.
12 Guxü̃ma i duü̃xü̃gü nüxü̃ nixu nax wüxi ya mecü yixĩxü̃ ya Demétriu. Rü ngẽma ore rü aixcüma nixĩ. Rü ngẽxgumarüxü̃ ta i toma rü nüxü̃ tixu nax wüxi ya mecü yixĩxü̃. Rü cuma nüxü̃ cucua̱x nax aixcüma yixĩxü̃ i ngẽma nüxü̃ tixuxü̃.
Cuáü̃arü ore ga nawa iyacuáxü̃
13 Choma choxü̃́ nangẽxmachire̱x i muxü̃ma i chorü ore i cumaxã nüxü̃ chixuxchaü̃xü̃, natürü tama ñaa poperagu chanaxümatüchaü̃.
14 Erü choma rü nagu charüxĩnü nax paxa tá cuxü̃ íchayadauxü̃, rü ngẽxguma rü mea tá cumaxã chidexa.
15 ¡Mea cuxü̃ naxüpetü rü taxṹ i cuxoegaãẽxü̃! Tamücügü i númacüã̱x rü moxẽ cuxca̱x ngéma namugü. Rü chanaxwa̱xe i nüxü̃ curümoxẽ i wüxichigü i tamücügü i ngéma ngẽxmagüxü̃.
