Amós 1:1-15
1 Ñaa nixĩ ga yema ore ga gumá carnérugüarü dauruxü̃ ga Amú ga Tecóacüã̱xmaxã nüxü̃ yaxuxü̃ ga Tupana ga Iraéanecüã̱xgüchiga. Rü yema nangupetü taxre ga taunecü naxü̃pa ga yema ĩã̱xãchiane ga yexguma Uchía Yudáanewa ãẽ̱xgacü ixĩxgu, rü Yeruboáü̃ ga Yoá nane ãẽ̱xgacü ixĩxgu ga Iraéanewa.
2 Nüma ya Cori ya Tupana rü ngẽxguma yima ma̱xpǘne ya Chióü̃ ya Yerucharéü̃wa ngẽxmanewa yadexaxgu, rü naga rü ñoma duruanexü̃rüxü̃ nixĩ. Rü ngẽxguma ya yima maxẽ ya carnérugüchitaxü̃wa ngẽxmacü rü nipagü rü yima ma̱xpǘne ya Carmérutape̱xewa rü nipaane.
3 Rü Cori ya Tupana rü nüxü̃ nixu rü ñanagürü: —Ngẽma Damácucüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chapoxcuexü̃, yerü nüma rü nanadai ga chorü duü̃xü̃gü ga Garaáxcüã̱xgü ñoma fierumena̱xãmaxã ta̱xacü ipoxü̃rüxü̃.
4 Rü ngẽmaca̱x i ngẽma Damácuarü ãẽ̱xgacü ya Achaé rü tá chayagu ya napata. Rü ngẽmatama üxüemamaxã rü tá nixae ya napatagü i ãẽ̱xgacü i Achaé nane i Ben-adáxü̃.
5 Rü tá chayaponaama i Damácuarü poxeguxü̃arü ĩã̱x. Rü tá chayama̱x i norü ãẽ̱xgacü i Bicax-abéü̃wa ãẽ̱xgacü ixĩxü̃. Rü ngẽxgumarüxü̃ tá ta chayama̱x i norü ãẽ̱xgacü i Bex-edéü̃wa ãẽ̱xgacü ixĩxü̃. Rü norü uanügü rü tá Quíruwa nanagagü i ngẽma Chíriacüã̱xgü —ñanagürü ya Cori ya Tupana.
6 Rü Cori ya Tupana rü ñanagürü ta: —Ngẽma Gáchacüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü nüma ga Gáchacüã̱xgü rü ínanayauxü̃ ga wüxi ga ĩaneãcu ga duü̃xü̃gü, rü ñu̱xũchi Edóü̃cüã̱xgüxü̃ tümamaxã nayataxegü norü puracütanüxü̃ruxü̃.
7 Rü ngẽmaca̱x tá üxümaxã chayagu i Gáchaarü poxeguxü̃gü. Rü ngẽma üxüema tá nixĩ i norü ãẽ̱xgacüpatagü ixaexẽẽxü̃.
8 Rü tá chayama̱x ya ĩane ya Adúxarü ãẽ̱xgacü, rü ngẽxgumarüxü̃ tá ta chayama̱x ya ĩane ya Acharóü̃arü ãẽ̱xgacü. Rü guxü̃ i chorü poramaxã tá ichayanaxoxẽxẽ ya yima Ecróü̃. Rü taxuxü̃táma i Firitéu íchayaxüxẽxẽ nax chanadaixü̃ —ñanagürü ya Cori ya Tupana.
9 Rü nüma ya Cori ya Tupana rü ñanagürü ta: —Ngẽma Tírucüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü nüma ga yema Tírucüã̱xgü rü woo nügümaxã nanaxuegu nax nügü tá nangü̃xẽẽgüxü̃, natürü nüma i Tírucüã̱xgü rü Edóü̃cüã̱xgüxü̃ tümamaxã nataxegüama ga ñuxre ga ĩaneãcugü ga guxema tümamaxã inaxügagüchiréxe
10 Rü ngẽmaca̱x tá üxümaxã chayagu i Tíruarü poxeguxü̃gü. Rü ngẽma üxüema tá nixĩ i norü ãẽ̱xgacüpatagü ixaexẽẽxü̃ —ñanagürü ya Cori ya Tupana.
11 Rü Cori ya Tupana rü ñanagürü ta: —Yema Edóü̃cüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü yema natanüxü̃ ga Iraétanüxü̃we nangegü taramaxã rü tama nüxü̃́ nangechaxü̃tümüxü̃güãcüma nanadaiama. Yerü poraãcü namaxã nanue rü tama namaxã narüngüxmügü.
12 Rü ngẽmaca̱x tá üxümaxã chayagu i Temáü̃ane. Rü ngẽma üxüema tá nixĩ ya yima Bochráarü ãẽ̱xgacüpatagü iguxü̃ne —ñanagürü ga Cori ya Tupana.
13 Rü ñanagürü ya Cori ya Tupana: —Ngẽma Amóü̃cüã̱x rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü yema norü ĩnügü nixĩ nax nüxü̃ natanetagüchaü̃ ga yema norü naanegü. Rü yemaca̱x tüxü̃ narüwítepütüwegü ga guxema ngexegü ga itacharaü̃güxẽ ga Garaáxcüã̱xgü.
14 Rü ngẽmaca̱x tá üxümaxã chayagu i Rabáarü poxeguxü̃gü. Rü wüxi i ngunexü̃ i nagu yaduruanexü̃ rü nagu nawaanexü̃ rü ngẽxguma nügü ínadaiyane tá nixĩ i üxüemamaxã íchanaguxü̃ ya yima norü ãẽ̱xgacüpatagü.
15 Rü ngẽma norü ãẽ̱xgacü rü to i nachixü̃anewa tá nanaga wüxigu namaxã i norü ngü̃xẽẽruü̃gü —ñanagürü ya Cori ya Tupana.
