Amós 6:1-14
6 —¡Pegümaxã pengechaxü̃gü, Pa Chióü̃cüã̱x! Pema rü perü ĩanena perüyoü̃ rü petaãxẽgü erü nagu perüxĩnüe rü taxuxü̃táma pexü̃ nangupetü. Rü ngẽxgumarüxü̃ ta ¡pegümaxã pengechaxü̃gü i pema i Chamáriaarü ĩanena rüyoü̃xẽ! Pema rü nagu perüxĩnüe nax naporaxü̃ ya yima ĩane rü ngẽmaca̱x taxuxü̃táma pexü̃ nangupetü. Rü pema i Iraéanecüã̱x rü ngẽma ĩanearü ãẽ̱xgacügüaxü̃́ peyaxõ erü nagu perüxĩnüe rü tá pexü̃ ínapoxü̃gü.
2 ¡Rü ĩane ya Canéxwa pexĩ, rü ngéma nüxü̃ peda̱u̱x i ngẽma ngéma ngupetüxü̃! ¡Rü ĩane ya taxü̃ne ya Amáwa pexĩ rü ñu̱xũchi yima Firitéugüarü ĩane ya Gáxca̱x perüchoü̃! ¿Ẽ̱xna pema nagu perüxĩnüegu rü ngẽma nachixü̃anecüã̱xgüxü̃ perüporamaegü? ¿Ẽ̱xna pema nagu perüxĩnüegu rü ngẽma nachixü̃anegüxü̃ narütamae i perü naane?
3 Pema rü tama nagu perüxĩnüe i ngẽma ngunexü̃ i nagu tá poxcu pexca̱x ínguxü̃. Natürü ngẽma perü chixexü̃gü rü nayangaicaxẽxẽ i ngẽma ngunexü̃ i nagu tá pexü̃ nada̱i̱xü̃ i perü uanügü.
4 Pema rü perü pechicagü i marfíxmaxã nanga̱xãẽxü̃wa pepee, rü perü toruxü̃ i mexẽchixü̃gu pecagü, rü ngẽxma perüngü̃gü. Rü ngéma penangõ̱x i õna i mexẽchixü̃ i carnéruxacümachi rü wocaxacü i ngüexü̃machi.
5 Rü perü árpagümaxã pepaxetagü natürü tama pexü̃́ naxuegu. Rü Dabíxü̃ peyadauxü̃ nax perü paxetaruü̃gü ípexüxü̃xü̃.
6 Rü taxü̃ i pexpáxü̃wa peyaxaxgü ya bínu. Rü pumara i yixichixü̃maxã pegü peyixemagü. Natürü tama nagu perüxĩnüe i ngẽma pechixü̃ane nax chixexü̃gu nanguxü̃.
7 Rü pexíra tá nixĩ i to i nachixü̃anewa pexü̃ nagagüxü̃ i perü uanügü nax norü puracütanüxü̃ pixĩgüxü̃ca̱x. Rü ngẽxma tá nayacua̱x nax penaxüxü̃ i taxü̃ i perü õna i nawa picuxcuxü̃ —ñanagürü.
8 Rü nüma ya Cori ya Tupana rü nügüégagu nanaxuegu. Rü Cori ya Tupana ya Guxãétüwa Ngẽxmacü rü nüxü̃ nixu rü ñanagürü: —Choma rü naxchi chaxai nax nügü yacua̱xüü̃güxü̃ i ngẽma Acóbuarü duü̃xü̃gü. Rü tama namaxã chataãxẽ ya yima norü ãẽ̱xgacüpatagü ya mexẽchine. Rü norü uanügüme̱xẽwa tá chanangexmagüxẽxẽ ya yima norü ĩane namaxã i guxü̃ma i ngẽma nawa ngẽxmaxü̃ —ñanagürü.
9 Rü ngẽxguma wüxi ya ĩpatawa rü 10 i yatü íyaxüxgu rü ngẽma 10 rü tá nayue.
10 Rü poraãcü tá nata i muü̃ i ngẽxguma texe nayaxugu i ngẽma naxü̃ne i yuxü̃ i tümatanüxü̃ nax yima ĩpatawa ítanange̱xechixü̃ca̱x nax tayaguxü̃ca̱x. Rü tá ngẽma to i tümatanüxü̃ i aixepewa ngẽxmaxü̃na taca rü ñatagürü tá nüxü̃: —¿Tangexma ya toguxe i aixepewa ngẽxmaxe? —ñatagürü tá nüxü̃. Rü ngẽma to rü tá tüxü̃ nangãxü̃ rü ñanagürü: —Taxúema —ñanagürü tá. Rü ngẽma nüxna tacaxü̃ rü tá ñanagürü: —¡Írüngea̱x, rü taxũtá i Cori ya Tupanaégamaxã cuwáxü̃! —ñanagürü tá.
11 Erü nüma ya Cori ya Tupana rü tá nanamu nax yima ĩpatagü ya itaxü̃negu rü ĩpatagü ya íxranegu napogüexü̃. Rü guxü̃netáma ya ĩpatagü rü tá nachitaxü̃xica ínayaxügü.
12 ¿Rü nüxü̃́ natauxchaxü̃ nax nutapütawa dauxü̃ naxĩgüxü̃ i cowarugü? ¿Ẽ̱xna natauxchaxü̃ i márwa nax naxaimüaneãxü̃ i wocagü? Natürü i pema rü ngẽma mugü i duü̃xü̃güarü ngü̃xẽẽruxü̃ ixĩxü̃ rü dairuxü̃ peyanguxuchixẽxẽ. Rü ngẽma aixcüma mexü̃ rü pema rü guxchaxü̃xü̃ peyanguxuchixẽxẽ.
13 Pemax rü petaãẽgü yerü nüxü̃ perüporamae ga guma ĩanexacü ga Lo Debáx. Rü ngẽxgumarüxü̃ ta ñaperügügü: —Torü poramaxã nixĩ ga nüxü̃ rüporamaexü̃ ga guma ĩanexacü ga Carnayíü̃ —ñaperügügü.
14 Rü ngẽmaca̱x, Pa Iraétanüxü̃x, rü choma ya Cori ya Tupana ya Guxãétüwa Ngẽxmacü rü pemaxã nüxü̃ chixu rü ñachagürü: —Choma rü tá petanüwa chanamugü i wüxi i nachixü̃anecüã̱xgü i poraãcü chixri tá pemaxã icuáxü̃. Rü nórtewaama rü yima ĩane ya Lebó Amáwa tá inanaxügüe rü ñu̱xmata natü i Arabáwa nangugü i súrwaama —ñanagürü ya Cori ya Tupana.
