Amós 7:1-17
7 Ñaa nixĩ ga yema Cori ya Tupana choxü̃ wéxü̃. Rü nawena nax ãẽ̱xgacüca̱x nabuxgüãxü̃ ga nanetüarü o rü yexwacax naxügügu ga maxẽ rü nüxü̃ chadau ga Cori ya Tupana nax munügü ínangugüxẽẽxü̃.
2 Rü yexguma nüxü̃ chada̱u̱xgu ga yema munügü nax nangõ̱xgüãxü̃ ga guxcüma ga guma maxẽ ga yexwacax ügücü, rü Cori ya Tupanaxü̃ ñachagürü: —¡Pa Cori ya Tupanax, ẽcü toxü̃ nangechaxü̃! ¿Ta̱xacümaxã tá tamaxẽxü̃ i toma i curü duü̃xü̃gü i Acóbutanüxü̃ nax tanoxrexüchixü̃? —ñachagürü.
3 Rü yexguma nüma ga Cori ya Tupana rü nüxü̃́ nangechaxü̃tümüxü̃ ga yema duü̃xü̃gü. Rü tama nayanguxẽxẽ ya yema nagu naxĩnüxü̃, rü ñanagürü: —¡Ngẽma rü taxũtáma nangupetü! —ñanagürü.
Ngo̱xetü i üxüchiga
4 Rü ñaa nixĩ ga yema Cori ya Tupana choxü̃ wéxü̃. Rü nüxü̃ chadau nax ñoma ga naanewa namuaxü̃ ga wüxi ga üxüema ga ãũcümaxü̃ nax yemamaxã napoxcueãxü̃ca̱x ga duü̃xü̃gü. Rü yema üxüema rü nayachexẽxẽ ga yema már, rü ñu̱xũchi duü̃xü̃güarü naanegü ínagu.
5 Rü yexguma ga choma rü Cori ya Tupanaxü̃ ñachagürü: —¡Pa Cori ya Tupanax, ẽcü toxü̃ nangechaxü̃ rü íyachaxãchi i ngẽma poxcu! ¿Rü ta̱xacümaxã tá tamaxẽxü̃ i tomax i curü duü̃xü̃gü i Acóbutanüxü̃ nax tanoxrexüchixü̃? —ñachagürü.
6 Rü yexguma nüma ga Cori ya Tupana rü nüxü̃́ nangechaxü̃tümüxü̃ ga yema duü̃xü̃gü. Rü tama nayanguxẽxẽ ga yema nagu naxĩnüxü̃, rü ñanagürü: —¡Ngẽma rü ta rü taxũtáma nangupetü! —ñanagürü.
Ĩxtapü̱xarü ngugüruü̃xü̃ nadau ga Amúx
7 Rü ñu̱xũchi ñaa ta nixĩ ga Cori ya Tupana choxü̃ wéxü̃. Rü nüma ga Cori ya Tupana rü wüxi ga ĩxtapü̱xcüwagu nachi. Rü nanange ga wüxi ga ĩxtapü̱xarü ngugüruxü̃ ga nawa nüxü̃ icuáxü̃ nax mea ínatoxü̃.
8 Rü yexguma ga nüma rü choxna naca rü ñanagürü: —¿Ta̱xacü nixĩ i nüxü̃ cudauxü̃, Pa Amúx? —ñanagürü choxü̃. Rü yexguma ga choma rü ñachagürü nüxü̃: —Wüxi i ĩxtapü̱xarü ngugüruxü̃ i nawa nüxü̃ icuáxü̃ nax mea ínatoxü̃ —ñachagürü. Rü yexguma ga nüma rü choxü̃ ñanagürü: —Rü ñaa ĩxtapü̱xarü ngugüruxü̃maxã tá nixĩ i nüxü̃ chacuáxü̃ rü aixcüma nawe̱xguxü̃ i nacüma i ngẽma chorü duü̃xü̃gü i Iraétanüxü̃. Rü taxũtáma nüxü̃́ nüxü̃ charüngüma ega chixexü̃gu namaxẽgu.
9 Rü ngẽma ãmarearü guruü̃gü i nawa Iraétanüxü̃ norü tupananetagüca̱x ãmaregü igugüxü̃ rü tá chayanaxoxẽxẽ. Rü yima Iraétanüxü̃arü tupananetagüpataxü̃gü rü nagu tá chipogügü. Rü taramaxã tá chanadai i ngẽma Yeruboáü̃tanüxü̃ —ñanagürü ga Cori ya Tupana.
Amachía rü Amúxü̃ napoxcuchaü̃
10 Rü Amachía nixĩ ga chacherdóte ga Betéwa. Rü yexguma nüxü̃ nacua̱xgu ga yema Amú nüxü̃ ixuxü̃, rü paxãma wüxi ga norü orearü ngeruü̃xü̃ Iraéanearü ãẽ̱xgacü ga Yeruboáü̃xü̃tawa namu nax namaxã nüxü̃ yanaxuxü̃ca̱x ga ore ga ñaxü̃: —Amú rü Iraécüã̱xgü i duü̃xü̃gütanügu nixũgüchigü rü cumaxã nananuexẽxẽ, Pa Ãẽ̱xgacüx. Rü curü duü̃xü̃gü rü marü tama yáxna namaxã naxĩnüe nax ngẽmaãcü yadexaxü̃.
11 Erü ñanagürü: “Yeruboáü̃ rü taramaxã tá nayu, rü guxü̃táma i Iraécüã̱xgü i duü̃xü̃gü rü to i nachixü̃anewa tá nanagagü” —ñanagürü.
12 Rü yemawena ga Amachía rü Amúxü̃ namu rü ñanagürü: —¡Ínaxũxũ i nua, Pa Orearü Uruxü̃x! Rü ngẽxguma cunaxwa̱xegu nax cuxü̃́ naxãtanüxü̃ i ngẽma orexü̃ nax quixuxü̃ ¡ẽcü Yudáanewa naxũ rü ngéma nüxü̃ ixu i ngẽma ore!
13 Rü tama chanaxwa̱xe i nua Betéwa nüxü̃ quixuxü̃ i ngẽma ore. Erü nua nixĩ i nangẽxmaxü̃ i ñaa nachixü̃anearü ãẽ̱xgacüarü ãmarearü guruxü̃. Rü ñu̱xũchi nua nixĩ i nangẽxmaxü̃ i ñaa nachixü̃anearü tupauca ya taxü̃ne —ñanagürü.
14 Natürü ga Amú rü nanangãxü̃ rü ñanagürü: —Choma rü tama nixĩ i orearü uruxü̃ chixĩxü̃, rü bai nax orearü uruxü̃ nane chixĩxü̃. Choma rü carnérugüarü dauruxü̃mare chixĩ, rü ñu̱xũchi namaxã chataxe i dauxchitacüã̱x i iguarü o. Rü ngẽmaãcü nixĩ i chayaxuxü̃ i chorü diẽru.
15 Natürü ya Cori ya Tupana rü choxna nanayaxu nax carnérugüarü dauruxü̃ chixĩxü̃. Rü ñanagürü choxü̃: “¡Ngéma naxũ rü chauégagu chorü duü̃xü̃gü i Iraéanecüã̱xgümaxã nüxü̃ yarüxu i chorü ore!” ñanagürü.
16 Rü ngẽmaca̱x ¡írüxĩnü i ngẽma Cori ya Tupanaarü ore! Rü cuma rü ñacurügü choxü̃: “¡Taxṹ i Tupanaégagu poxcu namaxã cuxuegu i ngẽma Iraétanüxü̃, rü bai i ta̱xacürü chixexü̃xü̃ quixu nachiga i ngẽma Ichaátaagü!” ñacurügü.
17 Natürü i ñu̱xma rü ñaa nixĩ i ngẽma ore i Cori ya Tupana cumaxã nüxü̃ ixuxü̃, rü ñanagürü: “Cuxma̱x rü daa ĩanewa tátama ngexü̃ i ngeãẽxü̃ tixĩ. Rü ngẽma cunegü i iyatüxü̃ rü ñu̱xũchi yíxema cuxacügü ya ingexe rü taramaxã tá tüxü̃ nadai. Rü ngẽma cuanegü rü ngẽma uanügü rü sortéuãcüma tá nügü nayanu. Rü cuma rü duü̃xü̃gü i tama Tupanaxü̃ cua̱xgüxü̃arü nachixü̃anegu tá cuyayu. Rü norü uanügü i ngẽma Iraétanüxü̃ rü Iraéanearü yáxü̃wa tá nanagagü” —ñanagürü ya Cori ya Tupana.
