Amós 8:1-14
8 8:1-2 Ñaa nixĩ ga yema Cori ya Tupana choxü̃ wéxü̃. Rü nayexma ga wüxi ga pexchi ga ori̱x ga idauxü̃maxã ããcuxü̃. Rü nüma ya Cori ya Tupana rü choxna naca rü ñanagürü choxü̃: —¿Pa Amúx, ta̱xacü nixĩ i nüxü̃ cudauxü̃? —ñanagürü. Rü choma chanangãxü̃ rü ñachagürü nüxü̃: —Wüxi i pexchi i ori̱x i dauxüchixü̃maxã ããcuxü̃ —ñachagürü. Rü yexguma ga nüma ga Cori ya Tupana rü ñanagürü choxü̃: —Ngẽma chorü duü̃xü̃gü i Iraétanüxü̃ rü ñoma ori̱x i daxuchixü̃rüxü̃ nixĩgü. Rü marü nangupetüxüchiama i norü chixexü̃. Rü ngẽmaca̱x marü nawa nangu nax taxũtáma wena nüxü̃́ nüxü̃ charüngümaxü̃ i norü chixexü̃ —ñanagürü.
2 Nüü̃ nadau 8:1
3 Rü ñanagürü ta: —Ngẽma ngunexü̃gu rü ngẽma ãẽ̱xgacüpatawa taãẽãcü nax nawiyaegüxü̃ rü tá ngechaü̃xü̃ nananguxuchi. Erü ngẽma ngunexü̃gü rü muxü̃tama i duü̃xü̃gü nayue. Rü bexma tá düxétüguama ínanawoxü̃ i ngẽma yuexü̃ —ñanagürü ya Cori ya Tupana.
Ningaica i ngẽma Iraétanüxü̃arü poxcu
4 Rü Cori ya Tupana rü ñanagürü: —¡Nüxü̃ pexĩnüe i pemax nax chixri tümamaxã pixĩgüxü̃ ya yíxema taxuxü̃ma tüxü̃́ ngẽxmagüxe rü tüxü̃ pedaixü̃ ya yíxema ingearü diẽruã̱xgüxe i ñaa nachixü̃anewa ngẽxmagüxe!
5 Rü pegüna pecagü rü ñaperügügü: “¿Ñuxgu tá nangupetüxü̃ i ngẽma ngexwacaxü̃cü ya tauemacüarü peta nax ngẽmaãcü wena namaxã itaxegüxü̃ca̱x ya tórü trigugü? ¿Rü ñuxgu tá nangupetüxü̃ i ngẽma ngü̃xchigaarü ngunexü̃ nax wena namaxã itaxegüxü̃ca̱x ya tórü trigugü?” ñaperügügü. Rü pema rü chixecü ya yáruxü̃wa ipenayá i perü trigugü. Rü íxraxü̃ i ngugüruxü̃wa penangugü i ngẽma trigu Rü naétü nagu perüxĩnüe nax penatatanüxẽẽxü̃ i perü trigugü.
6 Rü ngẽma ngearü diẽruã̱xgüxü̃ rü penaxwa̱xe nax pexü̃ nügümaxã nataxegüxü̃ nax ngẽmaãcü naxütanügüãxü̃ca̱x i ngẽma diẽru i pexü̃́ nangetanügüxü̃ woo taxre i chapatu nangetanügügu. Rü woo ngẽma trigucha̱xmügü rü namaxã petaxegü —ñanagürü
7 Rü ñanagürü ta: —Choma ya perü Cori ya Tupana rü Acóbuégagu pemaxã nüxü̃ chixu rü tagutáma nüxü̃ charüngüma ga yema chixexü̃ ga pexügüxü̃.
8 Rü ngẽmaca̱x i ñoma i naane rü tá nixĩã̱xcüxü rü norü duü̃xü̃gü rü tá naxauxe. Rü ñaa naane rü tá naxĩnagüxü̃ rü ínarüxĩĩxü̃ ñoma taxtü i Níruarü yuape ya tacürüxü̃
9 Rü choma i Cori ya Tupana rü pemaxã nüxü̃ chixu rü ñachagürü: “Rü ngẽma ngunexü̃gu rü tá tocuchigu chayaxoxẽxẽ ya üa̱xcü. Rü woo ngunecü rü tá chanawaanexẽxẽ i ñoma i naane.
10 Rü ngẽma perü petachigagü rü ngechaü̃xü̃ tá chayanguxuchixẽxẽ erü yuexü̃ca̱x tá pexauxe. Rü ngẽma perü wiyaegü rü ngechaü̃arü wiyaexü̃ tá chayanguxuchixẽẽgü. Rü ngechaü̃chirugu tá pexü̃ chicu̱xgüxẽxẽ. Rü ngechaü̃maxã tá pegü pibaierugü. Rü yíxema tümane i nügümaxã wüxicacü i yuxü̃ca̱x auxexü̃rüxü̃ tá pexauxe. Rü guxü̃táma taxü̃ i guxchaxü̃gu nayagu”, ñachagürü.
11 Rü choma ya Cori ya Tupana rü pemaxã nüxü̃ chixu rü ñachagürü: “Rü ñoma i naanewa tá ínangu i ngunexü̃gü i nagu tá taiya íchanguxẽxẽxü̃. Rü taxũtáma nixĩ i paũca̱x nax petaiyaexü̃ rüe̱xna dexáca̱x nax pita̱xawaexü̃, natürü Cori ya Tupanaarü orexü̃ nax pexĩnüexü̃ca̱x tá nixĩ i petaiyaexü̃.
12 Rü tá nu ne nanaxĩ i duü̃xü̃gü nax naxca̱x nadaugüxü̃ i Cori ya Tupanaarü ore. Rü Már ya Ngearü Maxü̃ã́xü̃wa tá inanaxügüe rü ñu̱xmata Már i Mediteráneuwa nangugü. Rü ngéma rü nórtewa tá naxĩ rü ñu̱xmata éstewa tá nangugü nax naxca̱x nadaugüxü̃ i Cori ya Tupanaarü ore, natürü taxũtáma nüxü̃ inayangaugü.
13 Rü pacügü i mechametücü rü ngextü̱xücügü ya poraecü rü ta̱xawamaxã tá niyuãchitanü i ngẽma ngunexü̃gu.
14 Rü ngẽma duü̃xü̃gü i Chamáriaarü tupananetagüaxü̃́ yaxõgüxü̃, rü tá inayayitanü rü tagutáma ínarüdagü. Rü ngẽxgumarüxü̃ tá ta namaxã nangupetü i ngẽma Dáü̃tanüxü̃ i norü tupananetagüaxü̃́ yaxõgüxü̃ rü ngẽma Bechébacüã̱xgü i norü tupananetagüaxü̃́ yaxõgüxü̃” —ñanagürü.
