Amós 9:1-15
9 Nüxü̃ chadau ga Cori ya Tupana. Rü nüma rü ngẽma tupananetagüarü ãmarearü guruü̃xü̃tagu nachi, rü ñanagürü choxü̃: —¡Daa tupananetapataarü caxtagüerugu napogü nax duü̃xü̃güétü nangutaü̃xü̃ca̱x rü ngẽxma nayuexü̃ca̱x! Rü ngẽma maxẽxü̃ rü woo nabuxmügu rü norü uanügü tá taramaxã nanadai. Rü ngẽmaãcü taxuxü̃táma niña.
2 Rü woo waixü̃müarü ãxmaxü̃gu yacu̱xgügu rü ngéma tá íchanawoxü̃ama. Rü woo ma̱xpǘnetape̱xegu naxĩgügu rü ngéma rü tá íchanaxĩgüxẽxẽama.
3 Rü woo ma̱xpǘnetape̱xe ya Carmérugu yanacu̱xgügu, rü choma rü tá ngẽxma naxca̱x chayadauama. Rü ngẽxguma mártamagu yanacu̱xgügu, rü choma rü tá chanamu i naeü̃ i taxüchixü̃ i düraxü̃ i márcüã̱x nax ngẽxma nagu nawagüxü̃ca̱x.
4 Rü ngẽxguma norü uanügü nachixü̃anegüwa nagagügu, rü choma rü tá ngémacüã̱xü̃ chamu nax taramaxã nadaiaxü̃ca̱x. Choma rü guxü̃gutáma poxcumaxã nüxü̃ chadawenü rü tama ta̱xacürü mexü̃maxã —ñanagürü.
5 Rü yimá Cori ya Tupana ya Guxãétüwa Ngẽxmacü rü ngẽxguma ñoma i naanexü̃ yangógügu rü tá inagü i ngẽma waixü̃mü, rü tá naxauxe i guxü̃ma i duü̃xü̃gü i nawa maxẽxü̃. Rü ñaa naane rü tá naxĩnagüxü̃ rü ínarüxĩĩxü̃ ñoma taxtü i Níruarü yuape ya tacürüxü̃.
6 Rü nüma ya Cori ya Tupana rü dauxü̃guxü̃ i naanegu nanaxü ya napata ya mexẽchine. Rü nanaxü i ngẽma ngo̱xmaanexü̃ i yáuxü̃ i ñoma i naaneétüwa ngẽxmaxü̃. Rü nüma rü dauxü̃ nanaxĩxẽxẽ i már arü dexá rü ñu̱xũchi ñoma i naanegu nanapuxẽxẽ. Rü Cori ya Tupana nixĩ i naéga.
7 Rü nüma ya Cori ya Tupana rü ñanagürü: —Pa Iraétanüxü̃x, chope̱xewa rü pewüxigumare namaxã i ngẽma Etiopíaanecüã̱xgü. Rü yema nax Equítuanewa pexü̃ íchagaxü̃rüxü̃ nixĩ ga Crétawa íchanagaxü̃xü̃ ga Firitéugü, rü Quíruwa íchanagaxü̃xü̃ ga Araméutanüxü̃ —ñanagürü.
8 Rü nüma ya Cori ya Tupana rü nüxü̃ nadawenü i ñaa Iraétanüxü̃ i chixexü̃gu imaxẽxü̃ rü ngẽmaca̱x ñanagürü: —Choma rü ñaa naanewa tá ichayanaxoxẽxẽ i ngẽma Acóbutanüxü̃. Natürü taxũtáma ichayanaxoxẽẽxü̃chi. Rü choma ya Cori ya Tupana nüxü̃ chixu i ngẽma.
9 Rü tá chanamu nax nawooneãxü̃ca̱x i ngẽma Iraétanüxü̃ i chixexü̃gu maxẽxü̃ ngẽxgumarüxü̃ i trigu i norü papetüxü̃wa ipapetüxü̃ nax ínayixü̃ca̱x i ngẽma norü üxaxü̃. Natürü yima mexü̃ne ya napüxüchire rü taxunetáma waixü̃mügu nangu.
10 Rü chorü duü̃xü̃gütanüwa rü taragu tá nayue i guxü̃táma i ngẽma i chixexü̃gu maxẽxü̃ rü ñagüxü̃: “Rü taxuxü̃táma tüxü̃ nangupetü i ngẽma ãũcümaxü̃ rü taxũtáma tawa nangu”, ñagüxü̃ —ñanagürü.
Tupana tá wena ínanadaxẽxẽ i Iraéane nax noxrirüxü̃ wena naporaxü̃ca̱x
11 Rü Cori ya Tupana rü ñanagürü: —Pa Iraétanüxü̃x, yexguma ãẽ̱xgacü ga Dabí pechixü̃anemaxã icua̱xgu, rü naporaxüchi. Natürü i ñu̱xma rü pechixü̃ane rü ñoma wüxi ya ĩpata ya rüngutaxü̃nerüxü̃ nixĩ. Natürü tá nawa nangu i ngunexü̃ nax wena íchanadaxẽẽxü̃ i pechixü̃ane nax noxrirüxü̃ wena naporaxü̃ca̱x.
12 Rü ngẽmaãcü, Pa Iraétanüxü̃x, rü pexrü tá nixĩ i ngẽma íyaxüxü̃ i Edóü̃ane rü guxü̃ma i ngẽma nachixü̃anegü ga ü̃pa Iraétanüxü̃me̱xẽwa yexmagüxü̃. Rü choma ya Cori ya Tupana nixĩ i ngẽma ñachaxü̃. Rü choma rü tá chayanguxẽxẽ i ngẽma —ñanagürü.
13 Rü ñanagürü ta: —Rü ngẽma ngunexü̃gügu rü poraãcü tá nixo i perü trigu. Rü ngẽxguma taxũta yagúegu nax penabuxuxü̃ i perü trigu rü ngẽma perü naane rü marü táxarü name nax wena nagu petoexü̃. Rü ngẽxguma taxũta yagúegu nax penabuxuxü̃ i perü úbagü rü ngẽma perü naane rü marü íname nax perü trigu nagu petoxü̃. Rü guxü̃nema ya yima ma̱xpǘnegüwa rü ngüchitaeruxü̃güwa rü tá nata i perü bínu ñoma dexárüxü̃.
14 Rü choma rü tá wena nachixü̃aneca̱x chanawoeguxẽxẽ i ngẽma chorü duü̃xü̃gü i Iraétanüxü̃. Rü nümagü rü tá nayamexẽxẽ ya yima norü ĩanegü ga nagu nüxü̃́ napogüene rü yimawa tá namaxẽ. Rü tá norü úbanecü naxügü rü ngẽma úbatüxü̃ i bínuwa tá naxaxegü. Rü nanetümaxã tá natoegü rü ngẽmaarü o tá nangõ̱xgü.
15 Rü norü naanewa tá chanangexmagüxẽxẽ i ngẽma Iraétanüxü̃, rü tagutáma texé nawa ítanawoxü̃ i ngẽma norü naane i choma nüxna chaxãxü̃. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
