Apocalipsis 10:1-11
10 Rü nüxü̃ chadau ga wüxi ga to ga Tupanaarü orearü ngeruxü̃ ga daxũguxü̃ ga naanewa írüxĩxü̃. Rü wüxi ga caixanexü̃arü ngãxü̃wa nayexma, rü wüxi ga chirapa naétügu nabo. Rü nachiwe rü ñoma üa̱xcürüxü̃ niyauracüxü. Rü naparagü rü ta ñoma üxüemarüxü̃ niyauracüxü.
2 Rü naxme̱xwa nüxü̃́ nayexma ga wüxi ga poperaxacü ga íiwẽgüxü̃. Rü norü tügünepara rü márgu nachicutü. Rü norü to̱xwepara rü waixü̃müanegu nachicutü.
3 Rü ñu̱xũchi ga nüma rü tagaãcü aita naxü ñoma wüxi ya leóü̃ ya ingĩnecüxücürüxü̃. Rü yexguma aita naxü̱xgu rü 7 e̱xpü̱xcüna naduruãchiane.
4 Rü yexguma yema 7 e̱xpü̱xcüna nax naduruãchianexü̃guwena rü chanaxümatüchaü̃. Natürü nüxü̃ chaxĩnü ga wüxi ga naga ga daxũguxü̃ ga naanewa inaxũxü̃ ga ñaxü̃ choxü̃: “¡Cuxicatama nüxü̃ nacua̱x i ngẽma 7 i duruanexü̃ nüxü̃ ixuxü̃! ¡Rü ngexrüma nax cunaxümatüxü̃!” ñaxü̃ choxü̃.
5 Rü ñu̱xũchi ga yema Tupanaarü orearü ngeruxü̃ ga nüxü̃ chadauxü̃ nax márétügu rü waixü̃müétügu nachicutüxü̃, rü daxũ naxunagü ga norü tügünechacüxü.
6 Rü inaxuneta naégagu ga Tupana ya yimá guxü̃guma maxü̃cü ya yimá naxücü i daxũguxü̃ i naane rü ñoma i naane rü már rü guxü̃ma i ta̱xacü nawa ngẽxmagüxü̃. Rü ñanagürü ga yema orearü ngeruxü̃: “Paxa tá ningu i ngẽma Tupana nüxü̃ ixuxü̃.
7 Rü ngẽxguma tá nawa nanguxgu nax yacueãxü̃ ya norü cornéta i ngẽma norü 7 i Tupanaarü orearü ngeruxü̃, rü ngẽxguma tá nixĩ i yanguxü̃ ga yema noxri ẽxü̃guxü̃ ga Tupanaarü uneta, yema nũxcümaü̃güxü̃ ga norü orearü uruü̃gümaxã nüxü̃ yaxuxü̃ ga Tupana”, ñanagürü.
8 Rü yema naga ga noxri nüxü̃ chaxĩnüxü̃ ga daxũguxü̃ ga naanewa inaxũxü̃, rü wenaxarü chomaxã nidexa. Rü ñanagürü choxü̃: “¡Naxü̃tawa naxũ i ngẽma Tupanaarü orearü ngeruxü̃ i márétügu rü waixü̃müaneétügu chicutüxü̃! ¡Rü nüxna nayaxu i ngẽma poperaxacü i marü íiwẽgüxü̃ i naxme̱xwa ngẽxmaxü̃!” ñanagürü.
9 Rü naxü̃tawa chaxũ ga yema orearü ngeruxü̃, rü nüxna naxca̱x chaca ga yema poperaxacü nax choxna naxããxü̃ca̱x. Rü nüma rü ñanagürü choxü̃: “Ñaa nixĩ. ¡Rü nayaxu rü nangõ̱x! Rü cua̱xwa rü berurerüxü̃ tá namaixcura. Natürü cuanüwa rü tá nanaxüxãchi”, ñanagürü choxü̃.
10 Rü yema orearü ngeruü̃me̱xẽwa chanayaxu ga yema poperaxacü, rü chanangõ̱x. Rü cha̱u̱a̱xwa rü berurerüxü̃ namaixcura. Natürü yexguma chanangõ̱xguwena rü chauanüwa rü nanaxüxãchi rü changu̱xneca.
11 Rü ñu̱xũchi chomaxã nüxü̃ nixu, rü ñanagürü choxü̃: “Name nixĩ nax wenaxarü Tupanaarü orexü̃ quixuxü̃ nachiga i muxü̃ma i duü̃xü̃gütücumügü, rü muxü̃ma i nachixü̃anecüã̱xgü i duü̃xü̃gü, rü muxü̃ma i duü̃xü̃gü i to i nagawa idexagüxü̃, rü muxü̃ma i nachixü̃anegüarü ãẽ̱xgacügü”, ñanagürü choxü̃.
