Apocalipsis 12:1-17
12 Rü ñu̱xũchi daxũwa nango̱x ga wüxi ga cua̱xruxü̃ ga taxü̃. Rü iyexma ga wüxi ga nge ga üa̱xcümaxã ãxchirucü. Rü tauemacüétügu ichi. Rü 12 ga woramacurigü nixĩ ga ngĩrü nga̱xcueruxü̃ ga ngĩeruwa yexmaxü̃.
2 Rü yema nge rü itacharaü̃. Rü aita ixü yerü ixíraxacüchaü̃ rü poraãcü inguxneca.
3 Rü yemawena daxũwa nango̱x ga to ga cua̱xruxü̃. Rü yéma nayexma ga wüxi ga coya ga dauxü̃ ga taxüchixü̃ ga 7 ga naeru nüxü̃́ yexmaxü̃ rü 10 ga naxchata̱xcure. Rü wüxichigü ga naeruwa rü nüxü̃́ nayexma ga norü nga̱xcueruxü̃.
4 Rü nareexü̃maxã inayatúgü ga wüxitücumü ga norü tomaepü̱xarü üye ga woramacurigü, rü ñoma ga naaneétügu nanawogü. Rü yema coya rü ngĩpe̱xegu nayachi ga yema nge ga íraxacüchaü̃cü, yerü tüxü̃ nangṍxchaü̃ ga guxema ngĩxacüxe ga yexguma tabuxgu.
5 Rü yema nge rü ixíraxacü, rü nayatü. Rü nüma rü tá guxü̃ i nachixü̃anegüarü ãẽ̱xgacü nixĩ, rü poragaãcüma tá namaxã inacua̱x. Natürü ga gumá ngĩne rü ngĩxna nanayaxu rü Tupana ínatoxü̃pe̱xewa nanaga.
6 Rü ngĩma ga nge rü ínachianexü̃wa iña. Rü yéma Tupana ngĩxca̱x nanamexẽxẽ ga wüxi ga ngĩchica nax yéma ngĩxna nadauxü̃ca̱x rü ngĩxü̃ naxüwemüxü̃ca̱x ga 1,260 ga ngunexü̃.
7 Rü yemawena ga daxũwa rü Miguére ga Tupanaarü orearü ngeruü̃güarü ãẽ̱xgacü rü guxü̃ma ga natanüxü̃ ga orearü ngeruü̃gü, rü nügü nadai namaxã ga yema coya ga taxüchixü̃ rü norü orearü ngeruü̃gü. Rü yema coya rü ñu̱xũchi norü orearü ngeruü̃gü i chixexü̃ rü poraãcü Tupanaarü orearü ngeruü̃gümaxã nügü nadai.
8 Natürü ga yema coya rü norü orearü ngeruü̃gü rü tama Tupanaarü orearü ngeruü̃güxü̃ narüporamaegü. Rü ñu̱xũchi ga yema coya rü namücügü rü daxũguxü̃ ga naanewa rü nangechica.
9 Rü ínata̱xüchi ga daxũguxü̃ ga naanewa ga yema coya ga yema nũxcümaü̃xü̃ ga ãxtape. Rü nüma rü Ngo̱xogu rü Chatanágu naxãéga. Rü nüma nixĩ i guxü̃ma i ñoma i naanecüã̱x i duü̃xü̃güxü̃ nawomüxẽẽxü̃. Rü nüma rü norü orearü ngeruü̃gümaxã ñoma ga naanegu narüwoü̃.
10 Rü ñu̱xũchi nüxü̃ chaxĩnü ga wüxi ga naga ga daxũguxü̃ ga naanewa tagaãcü ñaxü̃: “Ñu̱xma rü marü nawa nangu nax tórü Tupana namaxẽxẽẽãxü̃ i duü̃xü̃gü. Rü nüma rü marü nua naxũ nax norü poramaxã guxü̃arü ãẽ̱xgacü yixĩxü̃ca̱x. Rü Nane ya Cristu rü marü ínangu nax nüma guxü̃maxã inacuáxü̃ca̱x. Erü marü daxũguxü̃ i naanewa ínata̱xüchi i Chataná ga ngunecü rü chütacü tórü Tupanape̱xewa taenexẽgüxü̃ ixugüechaxü̃.
11 Rü nümagü ga yema taenexẽgü, rü marü Chatanáxü̃ narüyexeragü namaxã ga nagü ga gumá Carnéruxacü rü namaxã ga Tupanaarü ore ga yema taenexẽgü nüxü̃ ixugüxü̃. Nümagü rü tama namuü̃e rü tama nayanuxũgü ga norü maxü̃ woo yema orexü̃ yaxugüxü̃ca̱x nayuegu.
12 ¡Rü ngẽmaca̱x petaãẽgü i guxãma i pema i daxũguxü̃ i naanewa ngẽxmagüxe! ¡Natürü pengechaü̃tümüxü̃gü i pemax, i ñoma naanewa ngẽxmagüxe rü márwa ngẽxmagüxe! Erü ngẽma ngo̱xo i Chataná rü marü petanügu narütáe. Rü poraãcü nanu i nüma erü marü noxretama i ngunexü̃ nüxü̃́ ínayaxü nax chixexü̃ naxüxü̃, erü paxa tá napoxcu”, ñanagürü ga yema naga.
13 Rü yema coya ga taxüchixü̃ ga Chataná nagu icúxü̃ rü yexguma nügü yacua̱xãchigu nax ñoma ga naanegu natáexü̃, rü ngĩwe ningechigü ga yema nge ga íxraxacücü.
14 Natürü ga Tupana rü ngĩxü̃ naxüxpe̱xatü ga yema nge. Rü ĩyüpe̱xatürüxü̃ nita. Rü yemaacü ga yema nge rü iyagóe rü yema nachica ga chianexü̃wa yexmaxü̃wa iña na̱xcha̱xwa ga yema ãxtape ga Chataná. Rü yema nachicawa tá nixĩ ya Tupana ngĩxna dauxü̃, rü ngĩxü̃ üwemüxü̃ i tomaepü̱x ya taunecüarü ngãxü̃.
15 Rü yema coya ga Chataná rü nügüa̱xwa ínaxũxũxẽxẽ ga dexá nax wüxi ga natü naxüxü̃ca̱x, rü yema natümaxã ngĩxü̃ yachaxẽẽxü̃ca̱x ga yema nge.
16 Natürü ga waixü̃mü rü yema ngexü̃ narüngü̃xẽxẽ, rü ninge̱x nax iyachexẽẽãxü̃ca̱x ga yema dexá ga coya nügüa̱xwa íxũxũxẽẽxü̃.
17 Rü ñu̱xũchi ga yema coya ga Chataná, rü poraãcüxüchima ngĩmaxã nanu ga yema nge. Rü ínixũ nax nügü namaxã yadaixü̃ca̱x ga yema togü ga ngĩxacügü ga yema nge. Rü ngẽma ngĩxacügü i ngẽma coyamaxã nügü daixü̃, rü ngẽma nixĩ i ngẽma duü̃xü̃gü i mea Tupanaarü orega ĩnüexü̃ rü mea yaxõgüechaxü̃ ya Ngechuchu ya Cristuarü ore.
18 Rü ñu̱xũchi ga yema coya rü naxãnacügu nayarüñu ga yema már.
