Apocalipsis 13:1-18
13 Rü nüxü̃ chadau ga wüxi ga ngo̱xo ga taxü̃ ga márwa íxüãchixü̃. Rü nüxü̃́ nayexma ga 7 ga naerugü rü 10 ga naxchata̱xcuregü. Rü wüxichigü ga naxchata̱xcu̱xre rü nüxü̃́ nayexma ga norü nga̱xcueruxü̃. Rü yema 7 ga naerugü rü nixãéga. Rü yema naégagü rü Tupanachiga chixexü̃ nixugü.
2 Rü yema ngo̱xo ga nüxü̃ chadauxü̃, rü ñoma airüxü̃ nixĩ. Rü naxme̱xgü rü chatüme̱xẽrüxü̃ nixĩgü. Rü naã̱x rü wüxi ga leóü̃a̱xrüxü̃ nixĩ. Rü yema coya ga Chataná rü yema ngo̱xoxü̃ naporaxẽxẽ nax naxrüxü̃ naporaxü̃ca̱x rü naxrüxü̃ taxü̃ ga ãẽ̱xgacü yixĩxü̃ca̱x.
3 Rü wüxi ga naeruwa ga yema ngo̱xo, rü nüxü̃́ nayexma ga wüxi ga taxü̃ ga norü o̱xri ga namaxã nayuxchaü̃xü̃. Natürü ga yema norü o̱xri rü nüxü̃́ nixẽ, rü naxca̱x nitaane. Rü guxü̃ma ga ñoma ga naanecüã̱x ga duü̃xü̃gü rü poraãcü yema ngo̱xomaxã naba̱i̱xãchie, rü nawe narüxĩ.
4 Rü ga duü̃xü̃gü rü yema coya ga Chatanáxü̃ nicua̱xüü̃gü yerü yema ngo̱xoxü̃ naporaxẽxẽ nax ãẽ̱xgacü yixĩxü̃ca̱x. Rü nüma ga duü̃xü̃gü rü yexgumarüxü̃ ta yema ngo̱xoxü̃ nicua̱xüü̃gü, rü ñanagürügü: “¿Texé tangexma ya ñaa ngo̱xorüxü̃ poraxe? ¿Rü texé tapora nax namaxã tügü tadaixü̃?” ñanagürügü.
5 Natürü tama yema ngo̱xona nanachu̱xu nax nügü yacua̱xüxüxü̃ca̱x rü chixri Tupanachiga yadexaxü̃ca̱x. Rü yema ngo̱xona naxã ga pora nax 42 ga tauemacü ãẽ̱xgacü yixĩxü̃ca̱x.
6 Rü yemaacü chixexü̃ naxü ga yema ngo̱xo. Rü poraãcü chixri Tupanachiga nidexa, rü chixri napatachiga nidexa, rü chixri tümachiga nidexa ga guxãma ga yíxema daxũguxü̃ ga naanewa yexmagüxe.
7 Rü yema coya ga Chataná rü yema ngo̱xoxü̃ naporaxẽxẽ nax Tupanaarü duü̃xü̃gümaxã nügü nada̱i̱xü̃ca̱x ñu̱xmatáta tüxü̃ nayexera. Rü ãẽ̱xgacüxü̃ nayaxĩxẽxẽ nax namaxã inacuáxü̃ca̱x ga naguxü̃raü̃xü̃ ga duü̃xü̃gütücumü, rü naguxü̃raü̃xü̃ ga ĩanegücüã̱x, rü naguxü̃raü̃xü̃ ga duü̃xü̃gü ga to ga nagawa idexagüxü̃, rü naguxü̃raü̃xü̃ ga nachixü̃anecüã̱x.
8 Rü tá ngẽma ngo̱xoxü̃ nicua̱xüü̃gü i guxü̃ma i ñoma i naanecüã̱x i ngeégagüxü̃ nawa i norü popera ya yimá Carnéruxacü ga yama̱xgüãcü. Rü noxritama naanearü ügügu rü yima Carnéruxacüarü poperagu nixĩ i naxümatüxü̃ i naéga i ngẽma duü̃xü̃gü i nüxü̃́ nangẽxmagüxü̃ i maxü̃ i taguma gúxü̃.
9 13:9-10 Rü ngẽxguma texé ãchi̱xẽgu, rü name nixĩ i naga taxĩnü i ñaa tá pemaxã nüxü̃ chixuxü̃. Rü ngẽxguma texé tümamaxã naxuegugu nax tüxü̃ yayauxgüxü̃, rü noxtacüma tá tiyaxu. Rü ngẽxguma texé tümamaxã naxuegugu nax taramaxã tüxü̃ yama̱xgüxü̃, rü noxtacüma tá taramaxã tüxü̃ nima̱xgü. Rü ngẽma rü wüxi i cua̱xruxü̃ nixĩ i tümaca̱x ya yíxema Tupanaarü duü̃xü̃gü ixĩgüxe. Rü woo ta̱xacürü guxchaxü̃ tüxü̃ ngupetügu, rü tanaxwa̱xe nax yáxna namaxã taxĩnüexü̃ rü tayaxõgüamaxü̃.
10 Nüü̃ nadau 13:9
11 Rü yemawena nüxü̃ chadau ga wüxi ga to ga ngo̱xo ga taxrechata̱xcurexü̃ ga waixü̃müanewa ixũxũxü̃. Rü yema naxchata̱xcu̱xre rü ñoma carnéruchatacu̱xrerüxü̃ nixĩ. Natürü ga naga rü ñoma coya ga taxüchixü̃garüxü̃ nixĩ.
12 Rü yexguma yema nüxíraxü̃xü̃ ga ngo̱xope̱xewa nayexmagu, rü naxrüü̃tama napora. Rü ñoma ga naanemaxã inacua̱x, rü nanamu ga ñoma ga naanewa maxẽxü̃ ga duü̃xü̃gü nax yema nüxíraxü̃xü̃ ga ngo̱xo ga ĩxẽarü o̱xriã́xü̃xü̃ nax yacua̱xüü̃güxü̃ca̱x.
13 Rü yema ngo̱xo nanaxü ga taxü̃ ga cua̱xruü̃gü, rü daxũwa nanayixẽxẽ ga üxü, rü ñoma ga naanegu nayi nape̱xegu ga duü̃xü̃gü.
14 Natürü ga Tupana rü tama yema ngo̱xona nanachu̱xu nax ñoma ga naanewa maxẽxü̃ ga duü̃xü̃güxü̃ nawomüxẽẽxü̃ namaxã ga yema cua̱xruü̃gü ga yema nüxíraxü̃xü̃ ga ngo̱xope̱xewa naxüxü̃. Rü yemaacü ga yema ngo̱xo rü duü̃xü̃güxü̃ namu nax naxügüã̱xü̃ca̱x ga wüxi ga naxchicüna̱xã ga yema nüxíraxü̃xü̃ ga ngo̱xo ga taramaxã chexexü̃ natürü tama yuxü̃.
15 Rü Tupana rü tama yema to ga ngo̱xona nanachu̱xu nax namaxẽẽãxü̃ca̱x ga yema nüxíraxü̃xü̃ ga ngo̱xochicüna̱xã nax yadexaxü̃ca̱x rü namuaxü̃ca̱x nax nadaiaxü̃ca̱x ga guxü̃ma ga yema duü̃xü̃gü ga tama nüxü̃ icua̱xüü̃güxü̃.
16 Rü nanamu nax guxü̃ma ga duü̃xü̃gü, rü woo buxü̃ rüe̱xna yáxü̃, rü woo duü̃xü̃gü i muarü diẽruã̱xgüxü̃ rüe̱xna ngearü diẽruã̱xgüxü̃, rü woo duü̃xü̃gü i ngearü coriã̱xgüxü̃ rüe̱xna duü̃xü̃gü i ixãarü coriã̱xgüxü̃, rü nanamu nax norü tügüneme̱xẽwa rüe̱xna nacatüwa nüxü̃́ nayexmaxü̃ca̱x ga wüxi ga cua̱xruxü̃.
17 Rü taxucürüwa texé tümaarü ta̱xacüca̱x tataxe rüe̱xna tümaarü ta̱xacümaxã tataxe ega nataxuguma ga tümaarü cua̱xruxü̃ ga yema ngo̱xoéga rüe̱xna yema ngo̱xoarü númeru.
18 Rü yíxema tüxü̃́ nangẽxmaxẽ i tümaarü cua̱x, rü name nixĩ i tanangugü i ngẽma númeru i ngẽma ngo̱xoéga ixĩxü̃. Erü ngẽma númeru rü wüxi i duü̃xü̃arü númeru nixĩ. Rü ngẽma númeru rü 666 nixĩ.
