Apocalipsis 14:1-20
14 Rü yemawena ichadawenü, rü nüxü̃ chadau ga gumá Carnéruxacü ga guma ma̱xpǘne ga Chióü̃étügu chicü. Rü naxü̃tawa nayexma ga 144,000 ga duü̃xü̃gü ga nacatüwa ixãégaxü̃ namaxã ga gumá Carnéruxacüéga rü Nanatü ya Tupanaéga.
2 Rü ñu̱xũchi nüxü̃ chaxĩnü ga wüxi ga naga ga tagaxü̃ ga daxũguxü̃ ga naanewa inaxũxü̃ ga ñoma taxü̃ i cotüna i chuxchuxü̃garüxü̃ ixĩxü̃ rü ñoma poraãcü yaduruanexü̃rüxü̃ ixĩxü̃ rü ñoma muxũchixü̃ i duü̃xü̃gü i árpawa ípaxetagüxü̃rüxü̃ ixĩxü̃.
3 Rü yema 144,000 ga duü̃xü̃gü rü nagu nawiyaegü ga wüxi ga yexwaca̱xüxü̃ ga wiyae nape̱xewa ga Tupanaarü tochicaxü̃ rü nape̱xewa ga yema ãgümücü ga daxũcüã̱x ga maxẽxü̃ rü nape̱xewa ga yema 24 ga ãẽ̱xgacügü. Rü taxucürüwama texé ga togue nüxü̃ tacua̱x ga yema wiyae. Rü yema 144,000 ga duü̃xü̃güxicatama nixĩ ga nüxü̃ cua̱xgüxü̃. Rü yema nixĩ ga Tupana ñoma ga naanewa dexü̃ nax namaxẽxẽẽãxü̃ca̱x.
4 Rü yema nixĩ ga duü̃xü̃gü ga tama ñoma ga naanearü ngúchaü̃ i chixexü̃maxã nügü ãũãchiarü maxü̃ã̱xgüxü̃ rü tama nüxü̃ rüxoexü̃ nax Tupanaaxü̃́ yaxõgüãxü̃. Rü nümagü rü yimá Carnéruxacüwe narüxĩ i ngextá ínaxũxü̃wa. Rü yemagü nixĩ ga ñoma ga naanecüã̱xtanüwa nüxíra Tupanaaxü̃́ yaxõgüxü̃ rü gumá Carnéruxacüaxü̃́ yaxõgüxü̃ rü nayauxgüxü̃ i maxü̃ i taguma gúxü̃.
5 Rü yematanüwa rü nataxuma ga dora, erü Tupanape̱xewa rü taxuxü̃ma ga chixexü̃ naxügü.
Orearü ngeruü̃gü ga daxũcüã̱xarü orechiga
6 Rü ñu̱xũchi nüxü̃ chadau ga wüxi ga to ga orearü ngeruxü̃ ga daxũguxü̃ ga naanegu íxexeü̃xü̃ ga yangexü̃ ga Tupanaarü ore i guxü̃gutáma ixĩxü̃, nax namaxã nüxü̃ yaxuxü̃ca̱x ga duü̃xü̃gü ga ñoma ga naanewa maxẽxü̃, rü naguxü̃raü̃xü̃ ga duü̃xü̃gütücumü, rü naguxü̃raü̃xü̃ ga duü̃xü̃gü ga to ga nagawa idexagüxü̃, rü naguxü̃raü̃xü̃ ga ĩanegücüã̱x.
7 Rü tagaãcü ñanagürü: “¡Nüxü̃ pemuü̃e ya Tupana rü nüxü̃ picua̱xüü̃gü! Erü marü nawa nangu nax guxü̃ma i duü̃xü̃güna naca̱xaxü̃. ¡Rü nüxü̃ picua̱xüü̃gü ya yimá naxücü i daxũguxü̃ i naane, rü ñoma i naane, rü ngẽma már, rü guxü̃ma i natüxacügü!” ñanagürü.
8 Rü yemawena nango̱x ga to ga orearü ngeruxü̃ ga daxũcüã̱x, rü ñanagürü: “Marü nagu nayarüchixe ya yima ĩane ya taxü̃ne ya Babirónia, rü nagu napogüe ya norü ĩgü. Yerü nanachixexẽxẽ ga guxü̃ma ga yema togü ga nachixü̃anegü namaxã ga norü chixexü̃. Rü inanamu nax bínu yaxagüãxü̃, rü naxü̃nearü ngúchaü̃ naxügüxü̃”, ñanagürü.
9 14:9-10 Rü yemawena nango̱x ga to ga orearü ngeruxü̃ ga daxũcüã̱x ga tagaãcü ñaxü̃: “Ngẽxguma chi texé nüxü̃ icua̱xüxü̃gu i ngẽma ngo̱xo rü naxchicüna̱xã rü ñu̱xũchi tümacatüwa rü ẽ̱xna tümame̱xẽwa ngẽma ngo̱xoégamaxã tacua̱xruü̃ã̱xgu, rü Tupana rü poraãcüxüchi tá tüxü̃ napoxcu namaxã i ngẽma poxcu i guxü̃arü yexera ixĩxü̃ i nümatama ya Tupana norü numaxã namexẽẽxü̃. Rü achúfremaxã iya̱u̱xrane ga üxüwa tá ngúxü̃ tinge nape̱xewa i Tupanaarü orearü ngeruü̃gü rü nape̱xewa ya yimá Carnéruxacü.
10 Nüü̃ nadau 14:9
11 Rü naema ya yima üxü ya nawa Tupana ngúxü̃ tüxü̃ ingexẽẽ́ne, rü guxü̃gutáma ngéma nicaixque. Rü bai i ngunecü rü bai i chütacü rü tá írarüwa tüxü̃́ narüna i ngẽma ngúxü̃ ya yíxema ngẽma ngo̱xoxü̃ icua̱xüxü̃güxe rü ngẽma ngo̱xochicüna̱xãxü̃ icua̱xüxü̃güxe rü tügü ixãxẽ nax ngẽma ngo̱xoégamaxã taxãégaxü̃”, ñanagürü.
12 Rü ngẽmaca̱x ya yíxema Tupanaarü duü̃xü̃gü ixĩgüxe rü mea norü orega ĩnüexe rü name nixĩ nax yáxna namaxã taxĩnüexü̃ i tümaarü guxchaxü̃gü rü Ngechuchuaxü̃́ nax tayaxõgüamaxü̃.
13 Rü ñu̱xũchi nüxü̃ chaxĩnü ga wüxi ga naga ga daxũguxü̃ ga naanewa inaxũxü̃ ga ñaxü̃ choxü̃: “¡Naxümatü i ñaa ore i tá cumaxã nüxü̃ chixuxü̃! Rü ñu̱xmaü̃cüü tá tataãẽgü ya yíxema tórü Coriaxü̃́ mea yaxõgüãcüma yuexe. Erü Tupanaãxẽ ya Üünecü rü ñanagürü: ‘Ngü̃, ngẽmáacü tá tataãẽgü ya yíxema, erü tá itarüngüe nüxna i tümaarü puracügü. Rü ngẽma mexü̃ i taxügüxü̃ rü tümamaxã wüxigu daxũguxü̃ i naanewa tá naxũ’ ”, ñanagürü.
Ñoma i naanewa nanade i ngẽma duü̃xü̃gü i Tupanaarü ixĩgüxü̃
14 Rü yexguma chadawenügu rü nüxü̃ chadau ga wüxi ga caixanexü̃ ga cómüxü̃. Rü yema caixanexü̃étüwa narüto ga wüxi ga duü̃xü̃ ga Tupana Nane ga duü̃xü̃xü̃ ixĩcüraü̃xü̃. Rü naeruwa nayexma ga wüxi ga norü nga̱xcueruxü̃ ga úirunaxca̱x. Rü naxme̱xwa nayexma ga wüxi ga cüxchi ga ínapomaguxü̃ ga te̱xechixü̃.
15 Rü Tupanapata ya taxü̃newa ínaxũxũ ga wüxi ga to ga orearü ngeruxü̃ ga daxũcüã̱x ga tagaãcü ñaxü̃ nüxü̃ ga gumá caixanexü̃étüwa rütocü: “¡Inaxügü nax cunadexü̃ i ngẽma duü̃xü̃gü i cuxrü ixĩgüxü̃! Erü marü nawa nangu nax cugüxü̃tawa cunagagüxü̃, erü ngẽma curü duü̃xü̃gü i ñoma i naanewa ngẽxmagüxü̃ rü ínamemare nax cunadexü̃”, ñanagürü.
16 Rü ñu̱xũchi ga gumá yema caixanexü̃étüwa rütocü rü ñoma i naaneétügu ngĩmaxã nayabuãchi ga norü cüxchi. Rü nanade ga yema norü duü̃xü̃gü ga ñoma ga naanewa yexmagüxü̃.
17 Rü ñu̱xũchi daxũguxü̃ i naanewa ngẽxmane ya Tupanapata ya taxü̃newa ínaxũxũ ga wüxi ga to ga orearü ngeruxü̃ ga daxũcüã̱x. Rü nüma rü ta nüxü̃́ nayexma ga wüxi ga cüxchi ga ínapomaguxü̃ ga te̱xechixü̃.
18 Rü yema ãmarearü guruü̃wa ínaxũxũ ga to ga orearü ngeruxü̃ ga daxũcüã̱x. Rü nüma rü üxümaxã inacua̱x. Rü nüma rü tagaãcü ñanagürü nüxü̃ ga yema to ga orearü ngeruxü̃ ga yema cüxchi ga ínapomaguxü̃ ga te̱xechixü̃ nüxü̃́ yexmaxü̃: “¡Inaxügü nax curü cüxchimaxã cunabuxuxü̃ i ngẽma úbagü i naanewa ngẽxmagüxü̃, erü marü nidau!” ñanagürü.
19 Rü yema orearü ngeruxü̃ rü ñoma ga naaneétügu ngĩmaxã nayabuãchi ga norü cüxchi. Rü nanabuxu ga yema úbagü ga naanewa yexmagüxü̃. Rü wüxi ga taxü̃ ga naxpáü̃gu nananucu nax yemawa nama̱i̱xtüxü̃ãxü̃ca̱x. Rü ngẽma rü Tupanaarü nuchiga nixĩ.
20 Rü ĩanearü ĩxpemawa nayama̱i̱xtüxü̃. Rü yema naxpáü̃wa ínagoxochi ga nagü. Rü gumá nagü rü 300 ga quirumétru narübaichi, rü wüxi ga metruarü ngãxü̃ nixĩ ga norü mátama ga gumá nagü.
