Apocalipsis 15:1-8
15 Rü ñu̱xũchi ga daxũguxü̃ ga naanewa rü nüxü̃ chadau ga wüxi ga to ga taxü̃ ga cua̱xruxü̃ ga namaxã ibaixãchixü̃. Rü nayexma ga 7 ga orearü ngeruü̃gü ga daxũcüã̱x ga nüxü̃́ yexmagüxü̃ ga 7 ga poxcuruü̃gü. Rü yema guxchaxü̃gu nixĩ ga yagúxü̃ ga norü nu ga Tupana.
2 Rü yexgumarüxü̃ ta nüxü̃ chadau ga ta̱xacü ga ñoma már baixétügurüxü̃ ixĩxü̃ rü üxüemarüxü̃ iya̱u̱xracüüxü̃. Rü yema márcutügu tachigü ga guxema nüxü̃ rüyexeragüxe ga yema ngo̱xo rü yema ngo̱xochicüna̱xã. Rü tümagü rü tama tügü tixügüéga namaxã ga yema ngo̱xoéga rü yema norü númeru. Rü tümame̱xẽwa nayexmagü ga tümaarü paxetaruü̃gü ga árpa ga Tupana tüxna ãxü̃.
3 Rü nagu tawiyaegü ga Moiché ga Tupanaarü duü̃arü wiyae. Rü yexgumarüxü̃ ta nagu tawiyaegü ga gumá Carnéruxacüarü wiyae ga ñaxü̃:“Pa Torü Cori ya Tupana ya Guxü̃étüwa Ngẽxmacüx, nataxüchi rü namexẽchi i guxü̃ma i ngẽma cuxüxü̃.Rü curü ĩnü rü aixcüma nawe̱xgu rü taguma quidora, Pa Guxü̃ i Nachixü̃anegümaxã Icuácü.
4 ¿Rü texé taxũtáma cuxü̃ tamuü̃, Pa Corix?¿Rü texé taxũtáma cuxü̃ ticua̱xüxü̃?Erü cuma rü cuxicatama nixĩ i üünecü quixĩxü̃.Rü guxü̃ma i nachixü̃anecüã̱x rü tá cuxü̃tawa naxĩ, rü tá cuxü̃ nicua̱xüü̃gü, erü nüxü̃ nadaugü nax aixcüma namexü̃ i guxü̃ma i ngẽma nagu curüxĩnüxü̃ rü cuxüxü̃, rü aixcüma tá cunapoxcuexü̃ i ngẽma chixexü̃ ügüxü̃”,
ñanagürü ga yema wiyae.
5 Rü yemawena ichadawenü rü nüxü̃ chadau ga daxũguxü̃ ga naanewa nax yawãxnaxü̃ ga yema naxmachiã ga Üünexüchixü̃ ga Tupanapata ya taxü̃nearü aixepewa yexmaxü̃ ga ngexta namaxã ínanguxü̃güxü̃wa ga guma nutatachinügü ga Tupanaarü mugü nagu ümatügüxü̃.
6 Rü gumá Tupanapata ya taxü̃newa ínachoxü̃ ga yema 7 ga orearü ngeruü̃gü ga daxũcüã̱x ga nüxü̃́ nayexmagüxü̃ ga yema 7 ga poxcuruü̃gü. Rü línuchinaxca̱x ga naxchiru ga mexẽchixü̃maxã rü iyauracüüxü̃maxã nixãxchiru. Rü naremüwa nüxü̃́ nayexma ga norü goyeremüruü̃gü ga úirunaxca̱x.
7 Rü ñu̱xũchi wüxi ga yema ãgümücü ga daxũcüã̱x ga maxẽxü̃, rü wüxichigü ga yema 7 ga orearü ngeruü̃güna nanaxã ga wüxi ga copu ga úirunaxca̱x ga namaxã ixããcuxü̃ ga norü nu ga Tupana ya guxü̃guma maxẽchacü.
8 Rü gumá Tupanapata ga taxü̃ne rü namaxã naxããcu ga yema caxixü̃ ga Tupanaarü üüne i poraxü̃wa ne ũxü̃. Rü taxucürüwama texé yexma taxücu ñu̱xmata nagu̱x ga yema 7 ga poxcuruü̃gü ga yema 7 ga orearü ngeruü̃güaxü̃́ yexmaxü̃.
