Apocalipsis 17:1-18
17 Rü yema 7 ga orearü ngeruxü̃ ga daxũcüã̱x ga nüxü̃́ yexmagüxü̃ ga 7 ga copugü, rü yematanüwa rü wüxi rü cha̱u̱xca̱x nixũ, rü ñanagürü choxü̃: “¡Nua naxũ! Rü tá cuxü̃ nüxü̃ chadauxẽxẽ i ta̱xacü tá nixĩ i ngĩrü poxcu i ngẽma nge i naxü̃nemaxã taxexü̃ i dexáétüwa rütocü.
2 Rü ñoma i naanewa ngẽxmagüxü̃ i nachixü̃anegüarü ãẽ̱xgacügü, rü ngĩmaxã namaxẽ, rü yemaacü poraãcü chixexü̃ naxügü. Rü ñoma i naanecüã̱x, rü naxca̱x nadauxü̃taegü i ngĩrü chixexü̃ i ngẽma nge”, ñanagürü.
3 Rü yexguma Tupanaãxẽ ya Üünecü yemaacü choxü̃ ngo̱xetüxẽẽgu, rü yema orearü ngeruxü̃ ga daxũcüã̱x rü chianewa choxü̃ naga. Rü yéma ngĩxü̃ chadau ga wüxi ga nge ga wüxi ga ngo̱xo ga dauxü̃étüwa rütocü. Rü yema ngo̱xo rü guxü̃wama naxãégaxü̃ne, rü yema naégagü rü Tupanamaxã naguxchiga. Rü 7 nixĩ ga naeru rü 10 ga naxchata̱xcure.
4 Rü yema nge rü wüxi ga naxchiru ga dauxracharaxü̃ rü dauxü̃maxã ixãxchiru. Rü úirumaxã rü nutaxacügü ga imexẽchicümaxã rü perlagümaxã ingã̱xãxẽ. Rü ngĩxme̱xwa ngĩxü̃́ nayexma ga wüxi ga copu ga úirunaxca̱x. Rü yema copu rü namaxã naxããcu ga naguxü̃raü̃xü̃ ga yema Tupanape̱xewa ãũãchixü̃ rü naguxü̃raü̃xü̃ ga chixexü̃gü ga yema nge ga ngĩxü̃nemaxã taxecü üxü̃.
5 Rü ngĩcatügu naxümatü ga wüxi ga naéga ga taxúema nüxü̃ cuáxü̃ nax ñuxũ ñaxü̃chiga yixĩxü̃. Rü yema naéga rü ñanagürü: “Taxü̃ne ya Babirónia i norü mama ixĩxü̃ne i ngẽma ngexü̃gü i naxü̃nemaxã taxegüxü̃ rü ngẽma ãũãchixü̃ i ñoma i naanewa ngẽxmagüxü̃”, ñanagürü.
6 Rü ngĩxü̃ chadau ga yema nge ga nax nangãxü̃xü̃ namaxã ga gumá nagü ga yema duü̃xü̃gü ga Tupanaarü ixĩgüxü̃ rü yema duü̃xü̃gü ga Ngechuchuarü orexü̃ nax yaxugüxü̃ca̱x daixü̃. Rü yexguma yemaxü̃ chada̱u̱xgu, rü chabaixãchi.
7 Rü yexguma ga yema orearü ngeruxü̃ rü ñanagürü choxü̃: “¿Ta̱xacüca̱x cubaixãchi? Dücax, tá cumaxã nüxü̃ chixu nax ta̱xacüchiga yixĩxü̃ i ngẽma nge, rü ta̱xacüchiga yixĩxü̃ i ngẽma ngo̱xo i 7 eruxü̃ rü 10 chata̱xcuxrexü̃ i naétüwa natoxü̃.
8 Rü ngẽma ngo̱xo i nüxü̃ cudauxü̃, rü yema nixĩ ga nũxcüma maxü̃xü̃ natürü marü yuxü̃ rü ngẽma ãxmaxü̃ i taxuguma iyacuáxü̃wa ngẽxmaxü̃. Natürü tá ínaxũxũ nawa i ngẽma ãxmaxü̃ naxü̃pa nax ngẽma nachica i guxü̃gutáma nagu napoxcuxü̃wa naxũxü̃. Rü ngẽma ngo̱xomaxã tá naba̱i̱xãchiãẽgü i ngẽma duü̃xü̃gü i ñoma i naanewa maxẽxü̃ i noxritama naane ixügügu tama nawa ngo̱xégagüxü̃ i Tupanaarü popera i nagu naxümatüxü̃ i naéga i ngẽma maxü̃ nüxü̃ ngẽxmagüxü̃. Rü ngẽmaãcü i ngẽma duü̃xü̃gü i tama nawa ngo̱xégagüxü̃ i Tupanaarü popera rü tá naba̱i̱xãchie i ngẽxguma nüxü̃ nada̱u̱xgu i ngẽma ngo̱xo ga nũxcüma maxü̃xü̃ rü marü yuxü̃, natürü wena tá ínguxü̃.
9 Rü ñaa ore rü naxca̱x nixĩ i ngẽma duü̃xü̃gü i nüxü̃́ natauxchaxü̃ nax nüxü̃ nacuáxü̃. Rü ngẽma 7 i naerugü i ngẽma ngo̱xo, rü yima nixĩ ya 7 ya ma̱xpǘnechiga. Rü yima 7 ya ma̱xpǘneétüwa nixĩ i natoxü̃ i ngẽma nge. Rü ngẽxgumarüxü̃ ta i ngẽma 7 i naerugü i ngẽma ngo̱xo, rü 7 i nachixü̃anegüarü ãẽ̱xgacügüchiga nixĩ.
10 Rü ngẽma 7 tanüwa rü wüxime̱e̱xpü̱x i ngẽma ãẽ̱xgacügü rü marü nayue. Rü wüxi rü ñu̱xma rü ãẽ̱xgacü nixĩ. Rü ngẽma to tá nixĩ i yixcüra ínguxü̃. Natürü ngẽxguma ínanguxgu i ngẽma to rü paxaãchimare tá nixĩ i ãẽ̱xgacü yixĩxü̃.
11 Rü ngẽma ngo̱xo ga nũxcüma maxü̃ rü ñu̱xma rü marü yuxü̃, rü ngẽma nixĩ i norü 8 i ngẽma ãẽ̱xgacügü. Rü nüma rü ngẽma 7 tanüxü̃ nixĩ. Natürü i nüma rü ngẽma nachica i guxü̃gutáma nagu napoxcuxü̃wa tá naxũ.
12 Rü ngẽma 10 i naxchata̱xcu̱xre i nüxü̃ cudauxü̃, rü 10 i nachixü̃anegüarü ãẽ̱xgacügüchiga nixĩ. Natürü i nümagü rü tauta inanaxügüe nax duü̃xü̃gümaxã inacua̱xgüxü̃. Natürü yixcüra tá nanayauxgü i pora nax wüxitatama i ora ngẽma ngo̱xomaxã wüxigu ãẽ̱xgacügü yixĩgüxü̃ca̱x.
13 Rü ngẽma 10 i ãẽ̱xgacügü rü wüxigu nagu narüxĩnüe nax ngẽma ngo̱xona naxãgüãxü̃ca̱x i norü pora nax ngẽma ngo̱xo rü guxü̃arü ãẽ̱xgacü yixĩxü̃ca̱x.
14 Rü ñu̱xũchi i ngẽma ãẽ̱xgacügü rü ngẽma ngo̱xo rü tá nügü nadai namaxã ya yimá Carnéruxacü. Natürü ya yimá Carnéruxacü rü tá nüxü̃ narüyexera, erü nüma rü guxü̃ i corigüarü Cori nixĩ, rü guxü̃ i nachixü̃anegüarü ãẽ̱xgacügüarü Ãẽ̱xgacü nixĩ. Rü yíxema namücügü ixĩgüxe, rü yíxemagü tixĩgü ya Tupana tümaca̱x caxe rü tüxü̃ nadexe rü naga ĩnüexe”, ñanagürü choxü̃.
15 Rü yema orearü ngeruxü̃ rü ñanagürü ta choxü̃: “Ngẽma taxü̃ i dexá i nüxü̃ cudauxü̃ i naétüwa natoxü̃ i ngẽma nge i naxü̃nemaxã taxexü̃, rü ngẽma nixĩ i naguxü̃raü̃xü̃ i ĩanegücüã̱x, rü naguxü̃raü̃xü̃ i duü̃xü̃gütücumü, rü naguxü̃raü̃xü̃ i nachixü̃anecüã̱x, rü naguxü̃raü̃xü̃ i duü̃xü̃gü i to i nagawa idexagüxü̃.
16 Rü ngẽma 10 i naxchata̱xcu̱xre i nüxü̃ cudauxü̃ rü ngẽma ngo̱xo, rü wüxigu tá ngĩchi naxaie i ngẽma nge i naxü̃nemaxã taxexü̃. Rü tá ngĩxna nanapuxü̃ i guxü̃ma i ta̱xacü i ngĩxü̃́ ngẽxmaxü̃, rü ngẽmaãcü ngexchiruãcüma tá ngẽxma irüxã̱ũ̱x. Rü tá nanangõ̱xgü i ngĩmachi, rü üxüwa tá nayagugü i ngẽma íyaxüxü̃.
17 Rü nüma ga Tupana rü yema 10 ga ãẽ̱xgacügüãẽwa nanagu̱xẽxẽ nax naxügüã̱xü̃ca̱x ga yema nanaxwa̱xexü̃ ga Tupana. Rü ngẽmaca̱x i ngẽma ãẽ̱xgacügü, rü tá wüxigu nagu narüxĩnüe nax ngẽma ngo̱xoxü̃ naporaxẽẽgüxü̃ nax norü ãẽ̱xgacü yixĩxü̃ca̱x. Rü ngẽmaãcü tá nixĩ ñu̱xmatáta Tupana yanguxẽxẽ i ngẽma norü orewa nüxü̃ yaxuxü̃.
18 Rü ngẽma nge i ngĩxü̃ cuda̱u̱xcü, rü yima nixĩ ya yima ĩane ya taxü̃ne ya guxü̃ma i nachixü̃anegüarü ãẽ̱xgacügümaxã icuáxü̃ne”, ñanagürü.
