Apocalipsis 18:1-24
18 Rü yemawena nüxü̃ chadau ga wüxi ga to ga orearü ngeruxü̃ ga daxũguxü̃ ga naanewa írüxĩxü̃. Rü nüma rü taxü̃ ga pora nüxü̃́ nayexma. Rü norü ya̱u̱xracüüxü̃maxã nangóone ga ñoma ga naane.
2 Rü tagaãcü ñanagürü: “Marü nagu narüchixe. Marü nagu narüchixe ya yima ĩane ya taxü̃ne ya Babirónia. Rü ñu̱xma rü ngo̱xogüchiü̃ nixĩ rü naguxü̃raü̃xü̃ i naãxẽ i chixexü̃güchiü̃ nixĩ. Rü ñu̱xma rü ngẽxma naxãchiü̃ i naguxü̃raü̃xü̃ i ngurucugü rü werigü i chixexü̃ i duü̃xü̃gü naxchi aiexü̃.
3 Rü guxü̃ma ga nachixü̃anecüã̱xgü, rü guma ĩanearü chixexü̃ca̱x nadauxü̃taegü. Rü yema togü ga nachixü̃anegüarü ãẽ̱xgacügü, rü guma ĩanearü chixexü̃gu namaxẽ. Rü guxü̃ma ga yema to ga nachixü̃anegüarü taxetanüxü̃, rü nügü namuarü diẽruã̱xẽẽgü namaxã ga yema ĩanearü yemaxü̃gü ga tatanüxü̃”, ñanagürü.
4 Rü ñu̱xũchi nüxü̃ chaxĩnü ga to ga naga ga daxũguxü̃ ga naanewa inaxũxü̃ ga ñaxü̃: “¡Guxãma i pema ya chorü duü̃xü̃gü ixĩgüxe, rü ípechoxü̃ nawa ya yima ĩane nax tama yima ĩanecüã̱xrüxü̃ chixexü̃gu pemaxẽxü̃ca̱x rü tama naxrüxü̃ pipoxcuexü̃ca̱x namaxã i ngẽma poxcu i tá yima ĩanewa nguxü̃!
5 Erü ngẽma ĩanecüã̱xarü pecadugü, rü nügüétüwa narünucue, rü düxwa marü daxũguxü̃ i naanewa nangu. Rü nüma ya Tupana rü tama yáxna namaxã naxĩnü i ngẽma chixexü̃ i naxügüxü̃.
6 Rü ngẽma nax poraãcü chixexü̃ togüca̱x naxügüxü̃rüxü̃, rü ngẽxgumarüxü̃ tá ta nixĩ nax chixexü̃maxã nüxü̃́ penaxütanüxü̃ i pemax. ¡Rü taxree̱xpü̱xcüna chixexü̃maxã tá nüxü̃́ penaxütanü naxca̱x i ngẽma chixexü̃ i togüca̱x naxügüxü̃! ¡Rü ngẽma chixexü̃ ga yema ĩanecüã̱x togüca̱x mexẽẽgüxü̃, rü pema rü taxree̱xpü̱xcüna tá naxca̱x penamexẽxẽ i ngẽma chixexü̃!
7 ¡Rü ñu̱xma nax ngẽma ĩanecüã̱x nügü yacua̱xüxü̃güxü̃ rü mexẽchixü̃wa nax namaxẽxü̃, rü ngẽxgumarüxü̃ tá ta nixĩ nax ngúxü̃ nüxü̃ pingexẽxẽgüxü̃ rü ngechaü̃ nüxü̃ pingexẽxẽgüxü̃! Erü ngẽma ĩanecüã̱x rü nügüãẽwa ñanagürügü: ‘Yixema rü ñoma wüxi i ngexü̃ i nachixü̃anearü ãẽ̱xgacüma̱xrüxü̃ mexẽchixü̃wa tangexmagü. Rü tagutáma wüxi i yutexü̃rüxü̃ tangechaü̃gü’, ñanagürügü i ngẽma ĩanecüã̱x.
8 Rü ngẽmaca̱x tá nixĩ i wüxitatama i ngunexü̃gu ínanguxü̃ i ngẽma ĩanearü poxcu. Rü ngẽma ĩanecüã̱x rü ngúanemaxã tá nayue, rü poraãcü tá nangechaü̃gü, rü tá naxauxe rü poraãcü taiya tá nüxü̃́ nangu̱x, rü norü ĩane rü üxümaxã tá nigu. Erü naporaxüchi ya yimá Cori ya Tupana i ngẽma ĩanexü̃ poxcucü”, ñanagürü ga yema naga.
9 Rü ngẽma togü i nachixü̃anegüarü ãẽ̱xgacügü ga guma ĩanewa poraãcü chixexü̃ yaxügüxü̃ rü meruü̃güwa yexmagüxü̃, rü tá poraãcü norü ngechaü̃maxã yima ĩaneca̱x naxauxe i ngẽxguma nüxü̃ nadaugügu i ngẽma üxüema i namaxã yaxãxü̃.
10 Rü ngẽma ãẽ̱xgacügü rü ngẽxguma nüxü̃ nadaugügu i ngẽma ãũcümaxü̃ i norü poxcu ya yima ĩane rü norü muü̃maxã tá yáxü̃wa nüxü̃ narüdaunü, rü ñanagürügü tá: “Cungechaü̃tümüxü̃, Cungechaü̃tümüxü̃, Pa Taxü̃ne ya Ĩane ya Babirónia ya Guxü̃ i Nachixü̃anegümaxã Icuáxü̃nex. Erü wüxitama i oragu cuxca̱x ínangu i curü poxcu ya Tupana cuxca̱x íngu̱xẽẽxü̃”, ñanagürügü tá.
11 Rü ñoma i naanecüã̱x i taxetanüxü̃, rü tá poraãcü norü ngechaü̃maxã naxca̱x naxauxe ya yima ĩane. Erü marü taxúetama naxca̱x nüxü̃́ tataxe i norü ngẽmaxü̃gü i ngéma nangegüxü̃.
12 Rü marü taxúetama naxca̱x nüxü̃́ tataxe i norü úiru, rü norü diẽrumü, rü norü nutaxacügü i ngã̱xãẽruü̃gü, rü naxpügü i línuchinaxca̱x i mexẽchixü̃ i dauxracharaxü̃ rü idauxcharaü̃ i ngéma nangegüxü̃. Rü ngẽxgumarüxü̃ ta taxúetama naxca̱x nüxü̃́ tataxe i naguxü̃raü̃xü̃ i norü naixchipanügü i yixixü̃, rü norü ngẽmaxü̃gü i marfínaxca̱x, rü norü ngẽmaxü̃gü i naigü i mexẽchixü̃wa naxügüxü̃, rü norü ngẽmaxü̃gü i cobrenaxca̱x, rü fierunaxca̱x, rü nuta i mármonaxca̱x i ngéma nangegüxü̃.
13 Rü taxúetama naxca̱x nüxü̃́ tataxe i norü canela rü togü i norü üexü̃wemüxü̃gü i yixixü̃, rü pumarate̱xe i guruxü̃ ixĩxü̃, rü togü i pumaragü i yixixü̃, rü bínugü rü chíxü̃gü, rü arína i mexẽchixü̃, rü trigu i ngéma nangegüxü̃. Rü ngẽxgumarüxü̃ ta ngéma nanagagü i wocagü, rü carnérugü, rü cowarugü, rü carugü i cowaru itúchigüxü̃, rü duü̃xü̃gü i puracüruü̃gü. Rü ngẽmaãcü woo duü̃xẽgü rü ngéma tüxü̃ nagagü nax tümamaxã nataxegüxü̃ca̱x.
14 Rü ngẽma taxetanüxü̃, rü ñanagürügü tá nüxü̃ ya yima ĩane: “Cuwa rü marü nataxuma i ngẽma ori̱x i curü duü̃xü̃güarü me ixĩxü̃. Rü marü nataxuma i guxü̃ma i ngẽma meruü̃gü ga noxri cuxü̃́ yexmaxü̃. Rü tagutáma wenaxarü cuxü̃́ nangẽxma”, ñanagürügü tá.
15 Rü ngẽma taxetanüxü̃ i guxü̃ma i ngẽma ori̱xgümaxã rü ngẽma meruü̃gümaxã taxegüxü̃ rü gumá ĩanegu nügü muarü diẽruã̱xẽẽgüxü̃, rü yáxü̃wa tátama nüxü̃ narüdaunü ya yima ĩane, erü nüxü̃ namuü̃e i ngẽma poxcu ya yima ĩaneca̱x ínguxü̃. Rü tá poraãcü norü ngechaü̃maxã naxauxe.
16 Rü ñanagürügü tá: “Nangechaü̃tümüxü̃, nangechaü̃tümüxü̃ ya yima ĩane ya itaxü̃ne. Erü noxri i curü duü̃xü̃gü rü mexẽchixü̃ i naxchiru i dauxracharaxü̃ rü dauxcharaxü̃maxã nixãxchiru, rü úirumaxã rü nga̱xãẽruü̃gü i perlamaxã rü nutaxacügü ya mexẽchicümaxã ninga̱xãẽgü.
17 Natürü ngürüãchi nagu̱x i guxü̃ma i ngẽma ĩanearü meruü̃gü”, ñanagürügü tá. Rü guxü̃ne ya wapurugüarü yoragü, rü guxü̃ma ya yima wapurugüwa puracüexü̃, rü guxü̃ma i duü̃xü̃gü ya yima wapurugügu ĩxü̃, rü guxü̃ma i taxetanüxü̃ i wapurugügu yarüxĩĩü̃xü̃, rü yáxü̃wa tátama nayachaxgütanüãchi, rü ngéma tá nüxü̃ narüdaunü.
18 Rü ngẽxguma nüxü̃ nadaugügu i norü caxixü̃ nax yaxãxü̃ ya yima ĩane, rü tagaãcü tá ñanagürügü: “Nataxuma ya nai ya ĩane ya daa ĩane ya taxü̃nerüxü̃ ixĩxü̃ne”, ñanagürügü.
19 Rü norü ngechaü̃maxã nügüétügu tá waixü̃mü nagünagügü, rü tá poraãcü naxauxe, rü tagaãcü ñanagürügü tá: “Nangechaü̃tümüxü̃, nangechaü̃tümüxü̃ ya yima ĩane ya itaxü̃ne. Rü noxri rü norü yemaxü̃gümaxã nügü nimuarü diẽruã̱xẽẽgü ga guxü̃ne ga wapurugüarü yoragü. Natürü i ñu̱xma rü ngürüãchi wüxi i oragutama rü inayarüxo i guxü̃ma i ngẽma.
20 Natürü ñu̱xma nax napoxcuxü̃ ya yima ĩane, rü name nixĩ i cutaãxẽ Pa Daxũguxü̃ i Naane. Rü ngẽxgumarüxü̃ ta rü name nixĩ i petaãẽgü i pema i Tupana norü oremaxã pexü̃ namugüxe, rü pema i Tupanaarü orexü̃ ixugüe, rü guxãma i pema i Tupanaarü duü̃xü̃gü ixĩgüxe. Erü ñu̱xma nax napoxcuxü̃ ya yima ĩane, rü ngẽmaãcü Tupana pexü̃ naxütanü naxca̱x ga yema chixexü̃ ga pemaxã naxügüxü̃ ga gumá ĩanecüã̱x”, ñanagürügü.
21 Rü ñu̱xũchi wüxi ga Tupanaarü orearü ngeruxü̃ ga daxũcüã̱x rü nanangenagü ga wüxi ga nuta ga taxüchicü ga ñoma tríguarü caruü̃rüxü̃ ixĩcü. Rü yema orearü ngeruxü̃ rü márgü nanaña ga gumá nuta ga taxüchicü, rü ñanagürü: “Ngẽxgumarüxü̃ tá quixĩ nax icuyarüxoxü̃, Pa Ĩane ya Taxü̃ne ya Babiróniax, rü tagutáma texé wena cuxü̃ tadau.
22 Rü tagutáma wena curü namagüwa texé nüxü̃ taxĩnü i paxetaruü̃gü i árpagü rü quenagü rü cornétagü. Rü ngẽxgumarüxü̃ ta cuwa nataxutáma i puracütanüxü̃ i ta̱xacüwa puracüexü̃, rü tagutáma texé cuwa nüxü̃ taxĩnü nax namaxã ínapuracüexü̃ ya yimá nuta ya tríguarü caruxü̃.
23 Rü marü tagutáma texé nüxü̃ tadau i cuwa i omü. Rü marü tagutáma texé nüxü̃ taxĩnü i ngĩgüchigaarü petagüarü cuxcuane. Rü yema taxetanüxü̃ ga cuwa taxegüxü̃ rü guxü̃ma ga togü ga taxetanüxü̃arü yexera nixĩgü. Natürü i ñu̱xma rü cupoxcu nagagu ga yema chixexü̃ ga namaxã cunawomüxẽẽxü̃ ga guxü̃ma ga togü ga nachixü̃anecüã̱x ga duü̃xü̃gü.
24 Yerü gumá ĩanecüã̱x ga duü̃xü̃gü nixĩ ga nada̱i̱xü̃ rü inabaxẽẽgüxü̃ ga nagü ga Tupanaarü orearü uruü̃gü, rü yema duü̃xü̃gü ga Tupanaarü ixĩgüxü̃, rü guxü̃ma ga yema ñoma ga naanewa daixü̃”, ñanagürü.
