Apocalipsis 19:1-21
19 Rü yemawena nüxü̃ chaxĩnü ga muxü̃ma ga duü̃xü̃güga ga daxũguxü̃ ga naanewa tagaãcü ñagüxü̃: “¡Areruya! Torü Tupana nixĩ i tüxü̃ namaxẽxẽẽxü̃. Rü nüma ya tórü Tupana nixĩ i guxü̃arü yexera naxüünexü̃ rü naporaxüchixü̃.
2 Rü nüma rü tama inatü ega texémaxã poxcu naxueguxgu. Rü ngẽmaca̱x marü nanapoxcu ya yima ĩane ya taxü̃ne ya norü chixexü̃maxã nachixexẽẽgüxü̃ i guxü̃ma i ñoma i naanecüã̱x i duü̃xü̃gü. Rü ñu̱xma ya Tupana rü norü duü̃xü̃güxü̃ naxütanü rü yima ĩanexü̃ napoxcu nagagu nax norü duü̃xü̃güxü̃ nada̱i̱xü̃”, ñanagürügü.
3 Rü ñu̱xũchi wenaxarü ñanagürügü: “¡Areruya! Rü ngẽma norü caxixü̃ nax yaxãxü̃ ya yima ĩane, rü tagutáma ngéma nayarüxo”, ñanagürügü.
4 Rü yema 24 ga ãẽ̱xgacügü rü yema ãgümücü ga daxũcüã̱x ga maxẽxü̃ rü yexma nanangücuchitanü, rü Tupana ya norü tochicaxü̃wa rütocüxü̃ nicua̱xüü̃gü. Rü ñanagürügü: “Rü ngẽmaãcü yixĩ. ¡Areruya!” ñanagürügü.
5 Rü ñu̱xũchi yema tochicaxü̃xü̃tawa inanaxũ ga wüxi ga naga ga ñaxü̃: “Name nixĩ i tórü Tupanaxü̃ picua̱xüü̃gü i guxãma i pema i buxü̃gü, rü yaxü̃gü, rü guxü̃ma i pema i nüxü̃ pengechaü̃ãcüma nax nüxü̃́ pepuracüexü̃”, ñanagürügü.
Carnéruxacüarü ãmücüchiga
6 Rü ñu̱xũchi nüxü̃ chaxĩnü ga ta̱xacü ga ñoma muxũchixü̃ ga duü̃xü̃gü idexagüxü̃rüxü̃ ixĩxü̃ ga ñoma taxü̃ i dexá i chuxchuxü̃rüxü̃ ixĩxü̃ ga ñoma poraãcü yaduruanexü̃rüxü̃ ixĩxü̃ ga ñaxü̃: “¡Areruya! Erü nüma ya tórü Cori ya Tupana ya Guxü̃étüwa Ngẽxmacü, rü marü ningucuchi nax guxü̃maxã inacuáxü̃.
7 ¡Rü ngĩxã tataãẽgü rü guxü̃ i tórü taãẽmaxã nüxü̃ ticua̱xüü̃gü! Erü marü nawa nangu nax naxãmücüxü̃ ya yima Carnéruxacü. Rü ngẽma norü duü̃xü̃gü i namücü tá ixĩgüxü̃ rü marü nügü ínamexẽẽgü.
8 Rü ngẽma tá namaxã naxãmücüxü̃na nanaxã i mexẽchixü̃ rü cómüxü̃ rü iya̱u̱xracüüxü̃ i naxchiru nax namaxã yaxãxchiruxü̃”, ñanagürügü. Rü ngẽma naxchiru i mexẽchixü̃ rü ngẽma nixĩ i ngẽma duü̃xü̃güarü maxü̃ i mexü̃chiga.
9 Rü ñu̱xũchi ga Tupanaarü orearü ngeruxü̃ ga daxũcüã̱x rü ñanagürü choxü̃: “Chanaxwa̱xe i cunaxümatü i ñaa ore i cumaxã tá nüxü̃ chixuxü̃: ‘Tataãẽgü ya yíxema tüxna naxuxe i norü ãmücüchixüwa ya Carnéruxacü’ ”, ñanagürü. Rü ñu̱xũchi ñanagürü ta: “Ngẽma nixĩ i Tupanaarü ore i aixcüma ixĩxü̃”, ñanagürü.
10 Rü choma rü yema orearü ngeruü̃pe̱xegu chacaxã́pü̱xü nax nüxü̃ chicua̱xüü̃xü̃ca̱x. Natürü ga nüma rü ñanagürü choxü̃: “¡Taxṹ i ngẽma cuxüxü̃! Erü choma rü ta Tupanaarü duü̃xü̃ chixĩ, ngẽxgumarüxü̃ i cuma rü cuenexẽgü i mea Ngechuchuarü ore ixõgüxü̃rüxü̃ chixĩ. Rü ngẽma Ngechuchuarü ore rü yematama ore nixĩ ga Tupanaarü orearü uruü̃gü nüxü̃ ixugüexü̃ ga yexguma Tupanaãxẽ ya Üünecü nawa idexaxgu. Rü name nixĩ i Tupanaxü̃ quicua̱xüxü̃”, ñanagürü.
Cowaru ga cómüxü̃étüwa rütocüchiga
11 Rü ñu̱xũchi nüxü̃ chadau ga daxũguxü̃ ga naane nax yawãxnaxü̃. Rü yéma nango̱x ga wüxi ga cowaru ga cómüxü̃. Rü gumá naétüwa rütocü rü naéga nixĩ i Aixcüma Yanguxẽẽcü rü Ixaixcümacü. Rü nüma rü tama inatü i ngẽxguma poxcu naxueguxgu rü ngẽxguma norü uanügümaxã nügü nadaixgu.
12 Rü naxetügü, rü ñoma üxüemarüxü̃ niyauracüxü. Rü naeruwa rü namu ga norü nga̱xcueruü̃gü. Rü nacatügu naxümatü ga wüxi ga naéga ga nüxicatama nüxü̃ nacuáxü̃.
13 Rü wüxi ga naxchiru ga ducharaxü̃gu nicu̱x. Rü naéga rü Tupanaarü Ore nixĩ.
14 Rü nawe narüxĩ ga guxü̃ma ga churaragü ga daxũcüã̱x. Rü nümagü rü naxchiru ga imexẽchixü̃ rü cómüxü̃ ga línuchinaxca̱xmaxã nixãxchiru. Rü cowarugü ga icómüxü̃étügu naxĩ.
15 Rü naã̱xwa ínaxũxũ ga wüxi ga tara ga guxü̃cüwawa téxü̃ nax yemamaxã nüxü̃ naporamaexü̃ca̱x i guxü̃ma i nachixü̃anegü. Rü nüma rü poraãcü tá namaxã inacua̱x. Rü ñoma úbagü i norü ma̱i̱xruü̃wa ima̱i̱xtüü̃xü̃rüxü̃ tá nixĩ nax napoxcueãxü̃ namaxã i ngẽma poxcu ya Tupana ya Guxü̃étüwa Ngẽxmacü norü numaxã mexẽẽxü̃.
16 Rü naxchirugu rü naperemagu naxümatü ga wüxi ga naéga ga ñaxü̃: “Guxü̃ma i Nachixü̃anegüarü Ãẽ̱xgacügüarü Ãẽ̱xgacü, rü Guxü̃ma i Corigüarü Cori Ixĩcü”, ñaxü̃.
17 19:17-18 Rü ñu̱xũchi nüxü̃ chadau ga wüxi ga Tupanaarü orearü ngeruxü̃ ga daxũcüã̱x ga üa̱xcügu chixü̃. Rü nüma rü tagaãcü ñanagürü nüxü̃ ga guxü̃ma ga ngurucugü ga yexma íxexeü̃xü̃tanüxü̃: “¡Nua pexĩ rü pengutaque̱xegü naxca̱x i õna i taxü̃ ya Tupana pexca̱x mexẽẽxü̃ nax penangṍxü̃ca̱x i nachixü̃anegüarü ãẽ̱xgacügümachi, rü churaragüarü ãẽ̱xgacügümachi, rü yatügü i poraxü̃machi, rü cowarugümachi, rü ngẽma cowaruétügu ĩxü̃machi, rü ngẽma coriã̱xgüxü̃machi rü ngẽma ngearü coriã̱xgüxü̃machi rü ngẽma buxü̃gümachi rü ngẽma yaxü̃gümachi!” ñanagürü.
18 Nüü̃ nadau 19:17
19 Rü ñu̱xũchi nüxü̃ chadau ga yema nüxíraxü̃xü̃ ga ngo̱xo rü guxü̃ma ga nachixü̃anegüarü ãẽ̱xgacügü ga norü churaragümaxã yéma ngutaque̱xegüxü̃ nax nügü nada̱i̱xü̃ca̱x namaxã ya yimá cowaruétügu ixũcü rü norü churaragü.
20 Rü yema nüxíraxü̃xü̃ ga ngo̱xo rü niyaxu. Rü wüxigu namaxã niyaxu ga yema to ga ngo̱xo ga orearü uruü̃neta ixĩxü̃ ga yema nüxíraxü̃xü̃ ga ngo̱xope̱xewa naxüxü̃ ga cua̱xruü̃gü ga duü̃xü̃gü tama nüxü̃ cuáxü̃ nax naxügüãxü̃. Rü yema cua̱xruü̃gümaxã nixĩ ga nawomüxẽẽãxü̃ ga yema duü̃xü̃gü ga nüxü̃ icua̱xüü̃güxü̃ ga naxchicüna̱xã ga yema nüxíraxü̃xü̃ ga ngo̱xo rü nügü ixãgüxü̃ nax yema ngo̱xoégamaxã nax yaxüégagüxü̃. Rü yema nüxíraxü̃xü̃ ga ngo̱xo rü yema to ga ngo̱xo ga orearü uruü̃neta ixĩxü̃, rü wüxigu maxẽxacü̃ma nawa nawoü̃ ga gumá naxtaxa ga achúfremaxã iya̱u̱xrachiüne.
21 Rü yema tara ga gumá cowaruétüwa rütocüa̱xwa ixũxũxü̃maxã nanadai ga yema ngo̱xogüarü churaragü. Rü guxü̃ma ga ngurucugü, rü yemamachimaxã nangãxcharaü̃gü.
