Apocalipsis 20:1-15
20 Rü yemawena nüxü̃ chadau ga wüxi ga Tupanaarü orearü ngeruxü̃ ga daxũguxü̃ ga naanewa írüxĩxü̃. Rü naxme̱xwa nayexma ga norü chawi ga yema ãxmaxü̃ i taxuguma iyacuáxü̃ rü ñu̱xũchi wüxi ga tacü ga cadéna.
2 Rü yema Tupanaarü orearü ngeruxü̃ rü yema coyaxü̃ niyaxu. Rü yematama coya nixĩ ga yema nũxcümaü̃xü̃ ga ãxtape ga ngo̱xo ga Chataná ixĩxü̃. Rü yema orearü ngeruxü̃ rü 1,000 ga taunecügüca̱x cadénamaxã nayana̱i̱x.
3 Rü yema orearü ngeruxü̃ rü yema ãxmaxü̃ i taxuguma iyacuáxü̃gu nayata̱xcuchi. Rü ñu̱xũchi yexma meama nanawãxtaxü̃ nax nüma ga Chataná rü marü taguma wenaxarü nachixü̃anegüarü duü̃xü̃güxü̃ nawomüxẽẽxü̃ca̱x ñu̱xmatáta 1,000 ya taunecü ngẽxma yangeã. Rü ngẽxguma marü yanguxẽẽãgu ya yimá 1,000 ya taunecü, rü tá paxaxãchi nayange̱x.
4 Rü ñu̱xũchi nüxü̃ chadau ga ñuxre ga tochicaxü̃gü. Rü yema tochicaxü̃wa tarütogü ga guxema Tupanaxü̃tawa nayauxgüxe ga pora nax duü̃xü̃güna naca̱xaxü̃ i norü maxü̃chiga. Rü yexgumarüxü̃ ta nüxü̃ chadau ga naãxẽgü ga yema duü̃xü̃gü ga Tupanaarü oreca̱x rü Ngechuchuchigaxü̃ nax yaxugüxü̃ca̱x nadaü̃naagüxü̃. Rü yema nixĩ ga duü̃xü̃gü ga tama yema ngo̱xoxü̃ icua̱xüü̃güxü̃ rü bai ga yema ngo̱xochicüna̱xãxü̃ icua̱xüü̃güxü̃, rü tama nügü ixãgüxü̃ nax nacatüwa rü ẽ̱xna naxme̱xwa yema ngo̱xoégamaxã yaxãégaxü̃. Rü nüxü̃ chadau ga wena nax namaxẽxü̃ ga yema duü̃xü̃gü, rü 1,000 ga taunecü Cristumaxã wüxigu ãẽ̱xgacügü nixĩgü.
5 Rü yemagü nixĩ ga nüxíra írüdagüxü̃. Natürü ga yema togü ga yuexü̃ rü taxũtá wena namaxẽ ñu̱xmatáta yimá 1,000 ya taunecüguwena.
6 Rü tataãẽgü ya yíxema tüxíra írüdagüxe erü Tupanaarü duü̃xü̃gü tixĩgü. Rü ngẽma Tupanaarü poxcu rü marü taxũtáma tümaca̱x nixĩ. Rü tá Tupanaarü rü Cristuarü ngü̃xẽẽruü̃gü i chacherdótegü tixĩgü. Rü 1,000 ya taunecü tá Cristumaxã ãẽ̱xgacügü tixĩgü.
Poxcu Chatanámaxã naxuegu
7 Rü ngẽxguma marü nangupetügu ya yimá 1,000 ya taunecü, rü Chataná rü tá ninge̱x i ngẽma ínapoxcuxü̃wa.
8 Rü nüma i Chataná rü tá ínaxũxũ nax yawomüxẽẽãxü̃ca̱x i guxü̃ma i nachixü̃anegü i ñoma i naanewa ngẽxmagüxü̃. Rü tá nanawomüxẽxẽ i Góx rü Magóx nax ngẽmagüxü̃ namuxü̃ca̱x nax nanutaque̱xeãxü̃ca̱x i norü churaragü nax nügü nada̱i̱xü̃ca̱x. Rü ngẽma norü churaragü, rü ñoma márcutüarü naxnecüchicute̱xerüxü̃ namuxũchi.
9 Rü ngẽmaãcü i ngẽma churaragü rü tá ñoma i naanearü tagu ninguuchi. Rü tá Tupanaarü duü̃xü̃güxü̃ rü yima ĩane ya Tupana nüxü̃ ngechaxü̃ne ya Yerucharéü̃xü̃ ínachoeguãchi. Natürü Tupana rü daxũwa tá nanayixẽxẽ ya üxü, rü yimamaxã tá nixae i guxü̃ma i ngẽma namaxã rüxuanügüxü̃.
10 Rü ngẽma ngo̱xo i ngẽma duü̃xü̃güxü̃ womüxẽẽxü̃, rü nawa tá natáe ya yima naxtaxa ya üxümaxã iya̱u̱xrachiüne ya achúfremaxã ixaxü̃ne. Rü yimá nixĩ ya naxtaxa ga marü nawa nawoxü̃ne ga yema nüxíraxü̃xü̃ ga ngo̱xo rü yema to ga ngo̱xo ga orearü uruü̃neta ixĩxü̃. Rü yima naxtaxawa tá nixĩ i guxü̃gutáma ngunecü rü chütacü ngúxü̃ yangegüxü̃.
Ngẽma taxü̃ i tochicaxü̃ i cómüxü̃wa rütocüpe̱xewa nangugü i duü̃xü̃gü nax nüxna naca̱xaxü̃ i norü maxü̃chiga
11 Rü ñu̱xũchi nüxü̃ chadau ga wüxi ga taxü̃ ga tochicaxü̃ ga cómüxü̃, rü nüxü̃ chadau ga gumá nawa rütocü. Rü gumácha̱xwa nibuxmü ga ñoma ga naane rü guxü̃ma ga daxũwa nüxü̃ idauxü̃, rü inayarütauxe.
12 Rü nüxü̃ chadau ga yema yuexü̃ ga yaexü̃ rü buexü̃ ga yema tochicaxü̃wa rütocüpe̱xegu chigüxü̃. Rü ningena ga poperagü. Rü yexgumarüxü̃ ta ningena ga yema popera i nagu yawǘgüxü̃ i ngẽma duü̃xü̃gü i nüxü̃́ ngẽxmaxü̃ i maxü̃ i taguma gúxü̃. Rü yema yuexü̃ rü yexgumarüxü̃ ga ñuxãcü nax namaxẽxü̃ ga wüxichigü rü yexgumarüxü̃ ga ñuxãcü nax yema poperagu naxümatüxü̃ ga nachiga ga wüxichigü ga duü̃xü̃ rü yemaacü namaxã nüxü̃ nixu nax ngextá tá naxĩxü̃.
13 Rü yema yuexü̃ ga márwa yexmagüxü̃ rü wenaxarü ínarüdagü. Rü yema yuexü̃ ga tauquewa yexmagüxü̃ rü wenaxarü ínarüdagü. Rü yemaacü ínarüdagü ga guxü̃ma ga duü̃xü̃gü ga yuexü̃. Rü guxü̃ma ga yema yuexü̃ rü nüxna nicachigü rü yexgumarüxü̃ ga ñuxãcü nax namaxẽxü̃ ga wüxichigü rü namaxã nüxü̃ nixu nax ngextá tá naxĩxü̃.
14 Rü yemawena rü yema yu rü yema yuexü̃chica rü guma naxtaxa ga üxümaxã iya̱u̱xrachiünewa nawoü̃. Rü ngẽma nixĩ i poxcu i taguma iyacuáxü̃ naxca̱x i ngẽma duü̃xü̃gü i tama Tupanaga ĩnüexü̃.
15 Rü guma naxtaxa ga üxümaxã iya̱u̱xrachiünewa nawoü̃ ga yema tama nawa ngo̱xégagüxü̃ i Tupanaarü popera i nagu yawǘgüxü̃ i ngẽma nüxü̃́ ngẽxmagüxü̃ i maxü̃ i taguma gúxü̃.
