Apocalipsis 21:1-27
21 Rü yemawena nüxü̃ chadau nax nayexwaca̱xü̃xü̃ ga ñoma ga naane rü nayexwaca̱xü̃xü̃ ga guxü̃ma ga ta̱xacü ga daxũwa yexmagüxü̃. Yerü yema nüxíra yexmagüxü̃ rü marü nangupetü, rü yema már rü marü nataxuma.
2 Rü nüxü̃ chadau ga guma ĩane ga mexü̃ne ga Yerucharéü̃ ga yexwaca̱xü̃ne ga daxũguxü̃ ga naanewa Tupanaxü̃tawa írüxĩxü̃ne. Rü guma ĩane rü guxü̃wama nimexẽchi ñoma wüxi i pacü i ngẽxguma iyangĩxgu rü ngĩteca̱x ngĩgü mexẽẽcürüxü̃ ixĩxü̃ne.
3 Rü nüxü̃ chaxĩnü ga wüxi ga naga ga yema tochicaxü̃wa inaxũxü̃ ga tagaãcü ñaxü̃: “Ñaa nixĩ i nachica ya Tupana nawa maxü̃xü̃ natanüwa i duü̃xü̃gü. Rü nüma rü natanüwa tá nangẽxma, rü nümagü rü norü duü̃xü̃gü tá nixĩgü. Rü nüma tátama natanüwa namaxü̃ nax guxü̃guma norü Tupana yixĩxü̃ca̱x.
4 Rü nüma tá ínanapi i naxgüü̃xẽtü i guxü̃ma i ngẽma duü̃xü̃gü. Rü marü taxũtáma texé tayu, rü taxũtáma texé tümaarü ngechaü̃maxã taxaxu, rü taxũtáma texé ngúxü̃ tingegü. Erü guxü̃ma ga yema noxri yexmaxü̃ rü marü inayarüxo”, ñanagürü.
5 Rü gumá yema tochicaxü̃wa rütocü rü ñanagürü: “Dücax, choma rü chanangexwacaxü̃xẽxẽ i guxü̃ma i ta̱xacü i ngẽxmaxü̃”, ñanagürü. Rü ñu̱xũchi ñanagürü ta: “¡Naxümatü i ñaa ore! Erü ñaa ore rü aixcüma nixĩ, rü ñaa nixĩ i ore i mexü̃ nax yaxõxü̃”, ñanagürü.
6 Rü yemawena rü ñanagürü choxü̃: “Ñu̱xma rü marü ningu i guxü̃ma. Choma nixĩ i norü ügü i guxü̃ma, rü chowa nixĩ i yacuáxü̃ erü nataxuma i ta̱xacü i choweama üxü̃. Rü yíxema ita̱xawaxe, rü choma rü tá ngetanüãcüma tüxü̃ chaxaxexẽxẽ nawa i ngẽma dexáarü chuxchuxü̃arü dexá i maxẽẽruxü̃.
7 Rü yíxema nüxü̃ rüporamaexẽ i chixexü̃, rü tá tanayaxu i guxü̃ma i ngẽma mexü̃gü i nüxü̃ chixuxü̃. Rü choma rü tá tümaarü Tupana chixĩ, rü tüma rü chauxacü tá tixĩ.
8 Natürü ngẽma muü̃exü̃ rü ngẽma tama yaxõgüxü̃, rü nawa tá nawoü̃ ya yima naxtaxa ya üxümaxã iya̱u̱xrachiüne ya achúfremaxã ixaxü̃ne. Rü ngẽxgumarüxü̃ ta i ngẽma aixwa̱xegüxü̃, rü ngẽma máetagüxü̃, rü ngẽma naxü̃nearü ngúchaü̃gu maxẽxü̃, rü ngẽma iyuüxü̃, rü ngẽma tupananetachicüna̱xãxü̃ icua̱xüü̃güxü̃, rü ngẽma idorata̱a̱xgüxü̃, rü nawa tá nawoü̃ ya yima naxtaxa ya üxümaxã iya̱u̱xrachiüne ya achúfremaxã ixaxü̃ne. Rü ngẽma nixĩ i poxcu i taguma iyacuáxü̃”, ñanagürü.
Yexwaca̱xü̃ne ga Yerucharéü̃chiga
9 Rü yema 7 ga orearü ngeruü̃gü ga daxũcüã̱x nüxü̃́ yexmagüxü̃ ga 7 ga copugü ga yema 7 ga poxcuruü̃maxã ixããcuxü̃, rü yematanüwa rü wüxi ga orearü ngeruxü̃ rü cha̱u̱xca̱x nixũ, rü ñanagürü choxü̃: “¡Nua naxũ! Rü tá cuxü̃ nüxü̃ chadauxẽxẽ i ngẽma yaxõgüxü̃ i ñoma naxma̱xrüxü̃ tá ixĩgüxü̃ ya yimá Carnéruxacü”, ñanagürü.
10 Rü yexguma Tupanaãxẽ ya Üünecü choxü̃ ngo̱xetüxẽẽgu, rü yema orearü ngeruxü̃ rü wüxi ga ma̱xpǘne ga taxü̃newa choxü̃ naga. Rü choxü̃ nüxü̃ nadauxẽxẽ ga guma ĩane ya üünene ga Yerucharéü̃ ga daxũguxü̃ ga naanewa Tupanaxü̃tawa írüxĩxü̃ne.
11 Rü guma ĩane rü Tupanaarü ya̱u̱xracüüxü̃maxã nangóone. Rü yema norü ya̱u̱xracüüxü̃ ga guma ĩane rü ñoma wüxi ya nuta ya nga̱xãẽruxü̃ ya diamánte nixĩ. Rü ñoma nuta ya nga̱xãẽruxü̃ ya yásperüxü̃ nixĩ nax yachipetüxü̃.
12 Rü guma ĩane rü guxü̃wama ínapoxegu. Rü nataxüchi rü namáchanexüchi ga yema norü poxeguxü̃. Rü yema norü poxeguxü̃ rü nüxü̃́ nayexma ga 12 ga norü ĩã̱x. Rü wüxichigü ga yema ĩã̱xwa nayexma ga wüxi ga Tupanaarü orearü ngeruxü̃ ga daxũcüã̱x. Rü wüxichigü ga yema ĩã̱xwa nango̱xéga ga yema 12 ga Iraétücumügü.
13 Rü norü éstecüwawa nayexma ga tomaepü̱x ga norü ĩã̱x, rü norü nórtecüwawa nayexma ga to ga tomaepü̱x ga norü ĩã̱x, rü norü súrcüwawa nayexma ga to ga tomaepü̱x ga norü ĩã̱x, rü yema norü oéstecüwawa nayexma ga to ga tomaepü̱x ga norü ĩã̱x.
14 Rü guma ĩanearü poxeguxü̃ rü 12 ga nuta ga taxüchicüétüwa inaxügü. Rü wüxichigü ga gumá 12 ga nutagüwa nango̱xéga ga yema 12 ga norü ngúexü̃gü ga gumá Carnéruxacü.
15 Rü yema orearü ngeruxü̃ ga chomaxã idexaxü̃, rü nüxü̃́ nayexma ga wüxi ga norü ngugüxü̃ ga úirumena̱xãnaxca̱x nax yemamaxã nangugüãxü̃ca̱x ga guma ĩane rü norü ĩã̱xgü rü norü poxeguxü̃gü.
16 Rü guma ĩane rü nawüxigumare ga guxü̃cüwawa. Rü norü ma̱x rü nawüxigumare namaxã ga norü tatachinü. Rü yema orearü ngeruxü̃ rü yema úirumena̱xãmaxã nanangugü ga guma ĩane. Rü 2,200 quirumétru nixĩ ga norü ma̱x. Rü yexgumarüxü̃ ta 2,200 quirumétru nixĩ ga norü tatachinü. Rü 2,200 quirumétru ta nixĩ ga norü máchane.
17 Rü yemawena rü inanangu ga yema norü poxeguxü̃ ga guma ĩane. Rü 65 metru nixĩ ga norü máchane. Rü yemaacü duü̃xü̃güarü ngugüxü̃maxã nanangugü ga yema Tupanaarü orearü ngeruxü̃ ga daxũcüã̱x.
18 Rü yema norü poxeguxü̃ ga guma ĩane, rü nuta ga nga̱xãẽruxü̃ ga yaspenaxca̱x nixĩ. Rü nümatama ga guma ĩane rü úiruxüchinaxca̱x nixĩ. Rü yema úiru rü ñoma bídriurüxü̃ niyauracüxü.
19 Rü gumá nutagü ga itacü ga norü poxeguxü̃paragü ixĩcü, rü naguxü̃raü̃cü ga nuta ga imexẽchicümaxã nanga̱xãẽ. Rü guma nüxíraü̃cü ga napara rü nuta ga diamántemaxã nanga̱xãẽ. Rü guma norü taxre ga napara rü nuta ga chafírumaxã nanga̱xãẽ. Rü guma norü tomaepü̱x ga napara rü nuta ga ágatamaxã nanga̱xãẽ. Rü guma norü ãgümücü ga napara rü nuta ga esmerádamaxã nanga̱xãẽ.
20 Rü guma norü wüxime̱e̱xpü̱x ga napara rü nuta ga ónichemaxã nanga̱xãẽ. Rü guma norü 6 ga napara rü nuta ga rubímaxã nanga̱xãẽ. Rü guma norü 7 ga napara rü nuta ga crichólitumaxã nanga̱xãẽ. Rü gumá norü 8 ga napara rü nuta ga berílumaxã nanga̱xãẽ. Rü gumá norü 9 ga napara rü nuta ga topáchiumaxã nanga̱xãẽ. Rü gumá norü 10 ga napara rü nuta ga crichopráchamaxã nanga̱xãẽ. Rü gumá norü 11 ga napara rü nuta ga yachĩ́tumaxã nanga̱xãẽ. Rü gumá norü 12 ga napara rü nuta ga amatístamaxã nanga̱xãẽ.
21 Rü yema 12 ga norü ĩã̱x ga guma ĩanearü poxeguxü̃ rü perlanaxca̱x nixĩ. Rü wüxichigü ga yema ĩã̱x rü wüxitama ga perla nixĩ. Rü yema norü nama ga guma ĩanearü ngãxü̃wa dapetüxü̃, rü úiruxüchinaxca̱x nixĩ. Rü ñoma bídriurüxü̃ niyauracüxü.
22 Rü guma ĩanewa rü taxúnema ga Tupanapata ya taxü̃nexü̃ chadau, yerü Tupana ya Guxü̃étüwa Ngẽxmacü rü gumá Carnéruxacü nixĩ i Tupanapata ya taxü̃ne.
23 Rü yima ĩane rü taxuca̱xma üa̱xcü rü tauemacü nüxü̃ nabáxi, erü Tupanaarü ngóonexü̃tama nixĩ i nangóonexẽẽxü̃. Rü yimá Carnéruxacü nixĩ ya norü omü ixĩcü.
24 Rü yima ĩanearü ngóonexü̃gu tá naxĩ i ngẽma nachixü̃anecüã̱x i yaxõgüxü̃. Rü ngéma tá nangugü i ngẽma nachixü̃anegüarü ãẽ̱xgacügü rü Tupanana tá nanana i norü ngẽmaxü̃gü.
25 Rü norü ĩã̱xgü rü ngunecü tagutáma narüwãxtagü erü ngéma rü taguma nachüta.
26 Rü yima ĩanewa tá nanana i guxü̃ma i ñoma i naanearü mexü̃gü.
27 Natürü tagutáma ngẽxma naxücu i ta̱xacü i Tupanape̱xewa chixexü̃, rü bai ya texé ya chixexü̃ ǘxe rüe̱xna idorata̱xáxe. Rü yíxema Carnéruxacüarü poperawa ngo̱xégagüxexica tá tixĩ ya ngẽxma chocuxe rü nayauxgüxe i maxü̃ i taguma gúxü̃.
