Apocalipsis 22:1-21
22 Rü ñu̱xũchi ga yema orearü ngeruxü̃ rü choxü̃ nüxü̃ nadauxẽxẽ ga wüxi ga natü ga ñoma bídriurüxü̃ ichipetüchiüxü̃ ga dexá ga maxẽẽruxü̃ nawa yexmaxü̃. Rü yema natü rü Tupanaarü tochicaxü̃wa rü yimá Carnéruxacüarü tochicaxü̃wa nixĩ ga ne nadaxü̃.
2 Rü guma ĩanearü ngãxü̃gu idaxü̃ ga namaarü ngãxü̃gu nida ga yema natü. Rü nacutügüwa narüxü ga yima nai ga maxẽẽruxü̃. Rü yema nai rü wüxichigü ga tauemacügu naxo, rü yemaacü 12 e̱xpü̱xcüna naxo ga wüxichigü ga taunecügu. Rü naatügü ga yema nai, rü guxü̃ i nachixü̃anegüca̱x üxüxü̃ruxü̃ nixĩ.
3 Rü ngéma rü nataxutama i ta̱xacü ya Tupana chixexü̃ namaxã ueguxü̃. Rü yima ĩanewa tá nangẽxma i norü tochicaxü̃ ya Tupana rü yimá Corderuxacü. Rü norü duü̃xü̃gü rü tá nüxü̃ nicua̱xüü̃gü.
4 Rü mea tá nachiwexüchixü̃ nadaugü, rü nacatügüwa tá nangẽxma i naéga.
5 Rü ngéma rü tagutáma nachüta. Rü ngẽma norü duü̃xü̃gü, rü taxuca̱xtama nanaxwa̱xe i daparínaarü omü rü ẽ̱xna üa̱xcüarü ngóonexü̃, erü nümatama ya tórü Cori ya Tupana rü norü ngóonexẽẽruxü̃ tá nixĩ. Rü nümagü rü guxü̃gutáma ãẽ̱xgacügü nixĩgüecha.
Marü ningaica nax wena núma naxũxü̃ ya Ngechuchu ya Cristu
6 Rü ñu̱xũchi ga yema Tupanaarü orearü ngeruxü̃ rü ñanagürü choxü̃: “Ñaa ore rü aixcüma nixĩ, rü name nax yaxõxü̃. Rü nüma ya tórü Cori ya Tupana ga nũxcüma norü orearü uruü̃gümaxã nüxü̃ ixucü nax ta̱xacü tá ínguxü̃, rü nümatama nixĩ i ñu̱xma inamuãxü̃ i norü orearü ngeruxü̃ i daxũcüã̱x nax norü duü̃xü̃güxü̃ nüxü̃ nadauxẽẽxü̃ca̱x nax ta̱xacü tá paxa ínguxü̃”, ñanagürü.
7 Rü nüma rü ñanagürü: “Paxa tá íchangu. Rü tataãxẽ ya yíxema naga ĩnüxe i ngẽma ore i ñaa poperagu ümatüxü̃ nachiga i ngẽma tá ínguxü̃”, ñanagürü.
8 Rü chomatama i Cuáü̃ rü nüxü̃ chaxĩnü rü nüxü̃ chadau i guxü̃ma i ngẽma nüxü̃ chixuxü̃. Rü yemaxü̃ chaxĩnügu rü nüxü̃ chada̱u̱xguwena, rü yema orearü ngeruxü̃ ga yemaxü̃ choxü̃ dauxẽẽxü̃pe̱xegu chacaxã́pü̱xü nax nüxü̃ chicua̱xüü̃xü̃ca̱x.
9 Natürü ga nüma rü ñanagürü choxü̃: “¡Taxṹ i ngẽma cuxüxü̃! Erü choma rü ta Tupanaarü duü̃xü̃ chixĩ, ngẽxgumarüxü̃ i cuma rü cuenexẽgü i Tupanaarü orexü̃ ixugüxü̃ rü guxü̃ma i ngẽma duü̃xü̃gü i naga ĩnüexü̃ i ngẽma ore i ñaa poperagu ümatüxü̃. Rü name nixĩ i Tupanaxü̃ quicua̱xüxü̃”, ñanagürü.
10 Rü ñanagürü ta choxü̃: “Tama name nax icuyacúxü̃ i ngẽma ore i ñaa poperagu ümatüxü̃ nachiga i ngẽma tá ínguxü̃, erü marü ningaica nax yanguxü̃ i ngẽma nüxü̃ yaxuxü̃ i ngẽma ore.
11 Natürü ngẽma chixexü̃ ügüxü̃, rü nüetama nixĩ nax chixexü̃ naxügüamáxü̃. Rü ngẽma chixexü̃gu maxẽxü̃, rü nüetama nixĩ nax chixexü̃gu namaxẽxü̃. Natürü yíxema mexü̃ ügüxe, rü name nixĩ i yexera mexü̃ taxügüechaxü̃. Rü yíxema Tupanape̱xewa ixüünexe, rü name nixĩ nax yexera tügü tixüünexẽxẽ”, ñanagürü.
12 Rü ñanagürü: “Dücax, paxa tá íchangu namaxã i ngẽma ãmare i wüxichigüna tá chaxãxü̃ ngẽxgumarüxü̃ nax ñuxãcü tanaxüxü̃ i tümax.
13 Choma nixĩ i norü ügü i guxü̃ma, rü chowa nixĩ i yacuáxü̃, rü nataxuma i ta̱xacü i nüxíra ngẽxmaxü̃ rü nataxuma i ta̱xacü i choweama üxü̃.
14 Rü tataãẽgü ya guxãma ya yíxema ya mexẽẽgüxe i tümaarü maxü̃ ñoma tügü tiyauxgüchiruxü̃rüxü̃ nax Tupanape̱xewa timexü̃ca̱x nax yima ĩanearü ĩã̱xwa tichocuxü̃ca̱x rü nüxü̃ tangõ̱xnetagüxü̃ca̱x i ngẽma norü o i ngẽma nai i maxẽẽruxü̃.
15 Natürü taxũtáma yima ĩanewa nichocu i ngẽma chixexü̃gü maxẽxü̃, rü ngẽma iyuüxü̃, rü ngẽma naxü̃nearü ngúchaü̃gu maxẽxü̃, rü ngẽma máetagüxü̃, rü ngẽma tupananetachicüna̱xãgüxü̃ icua̱xüü̃güxü̃, rü ngẽma womüxẽẽwa̱xegüxü̃ rü taxũtáma nawa nichocu ya yima ĩane.
16 Rü choma ya Ngechuchu, rü chanamu i chorü orearü ngeruxü̃ nax guxü̃ma i ngẽma yaxõgüxü̃tücumümaxã nüxü̃ yaxuxü̃ca̱x i ngẽma chorü ore. Rü choma nixĩ i ãẽ̱xgacü ga Dabítaxa chixĩxü̃. Rü choma nixĩ ya yimá woramacuri ya pa̱xmama poraãcü nangóonexẽẽcürüxü̃ chixĩxü̃”, ñanagürü.
17 Rü Tupanaãxẽ ya Üünecü rü guxü̃ma i yaxõgüxü̃, rü Ngechuchuxü̃ ñanagürügü: “¡Nua naxũ!” ñanagürügü. Rü yíxema nüxü̃ ĩnüxe i ñaa ore, rü: “¡Nua naxũ!” ñatagügü. Rü yíxema ita̱xawaxe rü tüxü̃́ nachi̱xégaxe, rü name nixĩ i nua taxũ rü tüxü̃́ nangetanüãcüma nawa taxaxe i ngẽma dexá i maxẽẽruxü̃.
18 Rü guxãma ya yíxema nüxü̃ ĩnüexe i ñaa Tupanaarü ore i ñaa poperagu ümatüxü̃ nachiga i ta̱xacü tá ínguxü̃, rü tümamaxã nüxü̃ chixu rü ngẽxguma chi texé nayexeraxẽẽgu i ngẽma ore rü Tupana rü tá tümaca̱x nanayexeraxẽxẽ i ngẽma poxcugü i ñaa poperawa nachiga naxümatüxü̃.
19 Rü ngẽxguma chi texé ínaxíraãchigu i ngẽma ore i ñaa poperagu ümatüxü̃ nachiga i ta̱xacü tá ínguxü̃, rü Tupana rü taxũtáma tüxü̃ nüxü̃ nangõ̱xnetaxẽxẽ i ngẽma norü o i ngẽma nai i maxẽẽruxü̃, rü taxũtáma tüxü̃ nimucuchi nawa ya yima ĩane ya üünene i ñaa poperawa nachiga naxümatüne.
20 Rü yimá nüxü̃ ixucü i ñaa ore, rü ñanagürü: “Ngẽmáacüx, paxa tá íchangu”, ñanagürü. Rü ngẽmaãcü yixĩ. ¡Nua naxũ Pa Cori ya Ngechuchu!
21 Rü chanaxwa̱xe i tórü Cori ya Ngechuchu ya Cristu poraãcü pexü̃ narüngü̃xẽxẽ i guxãma i pemax. Rü ngẽmaãcü yixĩ.
