Apocalipsis 3:1-22
3 Rü yema chomaxã idexaxü̃ rü ñanagürü ta: “Chanaxwa̱xe i Chárdexwa ngẽxmagüxü̃ i yaxõgüxü̃arü ãẽ̱xgacüca̱x cunaxümatü, rü ñacurügü tá: ‘Ñaa nixĩ i norü ore ya yimá 7 i Tupanaãxẽ ya Üünecü nawa ngẽxmacü rü 7 ya woramacuri nüxü̃́ ngẽxmacü’. Rü ñanagürü i nümax: ‘Choma nüxü̃ chacua̱x i guxü̃ma i ngẽma cuxüxü̃. Rü nüxü̃ chacua̱x rü woo duü̃xü̃gü nüxü̃ ixugügu nax cha̱u̱xca̱x cumaxü̱̃xgu, natürü tama aixcüma cha̱u̱xca̱x cumaxü̃.
2 Rü name nixĩ i cubaixãchi rü cugü íquicua̱x rü cuyangüxẽxẽ i ngẽma íxraxü̃ i mexü̃ i cuxü̃́ íyaxüxü̃ i marü iyarüxoxchaü̃xü̃. Erü nüxü̃ chadau rü ngẽma cuxüxü̃ rü tama Tupanape̱xewa name.
3 ¡Rü nüxna nacua̱xãchi ga yema ngu̱xẽẽtae ga mexü̃ ga noxri nüxü̃ cuxĩnüxü̃ rü cuyaxuxü̃, rü nagu ixũ! ¡Rü nüxü̃ rüxo i ngẽma chixexü̃ i cuxüxü̃ rü Tupanaca̱x nataegu! Natürü ngẽxguma tama nüxü̃ curüxoxgu i curü chixexü̃, rü ñoma wüxi i ngĩ́ta̱xáxü̃ i ngürüãchi ínguxü̃rüxü̃ tá cuxü̃tawa chaxũ. Rü taxũtáma nüxü̃ cucua̱x nax ñuxguacü yixĩxü̃.
4 Natürü ngéma Chárdexwa cuxü̃́ nangẽxma i ñuxre i duü̃xü̃gü i mexü̃ i tama ñoma i naanearü chixexü̃maxã nügü ãũãchiarü maxü̃ã̱xgüxü̃. Rü nümagü rü tá cómüxü̃maxã nixãxchiru rü ngẽmaãcü tá chomaxã inaxĩ, erü nümagü rü duü̃xü̃gü i mexü̃ i cha̱u̱xca̱x maxẽxü̃ nixĩgü.
5 Rü yíxema nüxü̃ rüporamaegüxe i chixexü̃, rü tá cómüxü̃maxã tixãxchiru. Rü taxũtáma nawa tüxü̃ íchapiéga i ngẽma chorü popera i nagu chayawǘgüxü̃ i ngẽma duü̃xü̃gü i nüxü̃́ ngẽxmaxü̃ i maxü̃ i taguma gúxü̃. Rü Chaunatüpe̱xewa rü guxü̃ma i norü orearü ngeruü̃gü i daxũcüã̱xgüpe̱xewa tá tüxü̃ chixu nax chorü duü̃xü̃gü tixĩgüxü̃’.
6 Rü yíxema ãchi̱xẽ́xẽ rü name nixĩ i naga taxĩnü i ngẽma Tupanaãxẽ ya Üünecü nüxü̃ ixuxü̃ namaxã i ngẽma yaxõgüxü̃tücumügü”.
Ore ga yema yaxõgüxü̃ ga Filadélfiaarü ĩanewa yexmagüxü̃ca̱x ümatüxü̃
7 Rü yema chomaxã idexaxü̃ rü ñanagürü ta: “Chanaxwa̱xe i Filadélfiawa ngẽxmagüxü̃ i yaxõgüxü̃arü ãẽ̱xgacüca̱x cunaxümatü rü ñacurügü tá: ‘Ñaa nixĩ i norü ore ya yimá Üünecü ya aixcüma Cristu ixĩcü. Rü nüma rü ãẽ̱xgacü ya Dabírüxü̃ poracü nixĩ. Rü nüxü̃́ nangẽxma i pora nax yawãxnaãxü̃ca̱x rü nawãxtaãxü̃ca̱x. Rü ngẽxguma texéca̱x yawãxnaãgu, rü taxucürüwama texé tümacha̱xwa tanawãxta. Rü ngẽxguma texécha̱xwa nawãxtaãgu, rü taxucürüwa texé tümaca̱x tayawãxna’.
8 Rü ñanagürü i nümax: ‘Choma nüxü̃ chacua̱x i guxü̃ma i ngẽma cuxüxü̃. Rü cuxca̱x chayawãxna i wüxi ya ĩã̱x rü taxucürüwa texe cuxcha̱xwa tanawãta.* Rü choma nüxü̃ chacua̱x nax tama cuporaxüchixü̃, natürü naga cuxĩnü i chorü ore, rü tama icuyacu̱x nax chorü duü̃xü̃ quixĩxü̃.
9 Rü nangẽxma i duü̃xü̃gü i Chatanáarü ixĩgüxü̃ i nügü ixugüxü̃ nax chorü duü̃xü̃gü yaxĩgüxü̃, natürü tama aixcüma choxrü duü̃xü̃gü nixĩgü. Rü tá chanamu i ngẽma duü̃xü̃gü nax cupe̱xegu nacaxã́pü̱xügüxü̃ca̱x nax nüxü̃ nacua̱xgüxü̃ca̱x nax aixcüma cuxü̃ changechaü̃xü̃.
10 Cuma rü meama cuyanguxẽxẽ i ngẽma cuxü̃ chamuxü̃ nax aixcüma cuyaxõõmaxü̃ naétüwa i ngẽma guxchaxü̃gü i cuxca̱x ínguxü̃. Rü ngẽmaca̱x tá cuxü̃ íchapoxü̃ nax tama cuxna nanguxü̃ca̱x i ngẽma guxchaxü̃ i taxü̃ i ñoma i naanewa tá ínguxü̃ nax guxü̃ma i ñoma i naanecüã̱x i duü̃xü̃güxü̃ naxüxü̃ca̱x.
11 Rü paxa tá chataegu. Rü chanaxwa̱xe i ñu̱xma mea cumaxü̃xü̃rüxü̃ mea cumaxecha nax taxúema cuxna nanapuxü̃ca̱x i ngẽma curü ãmare.
12 Rü yíxema nüxü̃ rüporamaegüxe i ngẽma chixexü̃, rü Chaunatü ya Tupanapatawa tá tüxü̃ chaxüchica nax tagutáma ngéma ítachoxü̃xü̃ca̱x. Rü tümagu tá chanaxümatü i naéga ya Chaunatü ya Tupana. Rü ngẽxgumarüxü̃ tá ta tümagu chanaxümatü i naéga ya Tupanaarü ĩane ya Yerucharéü̃ ya ngexwacaxü̃ne ya Tupanaxü̃tawa i daxũguxü̃ i naanewa írüxĩxü̃ne. Rü ngẽxgumarüxü̃ tá ta tümagu chanaxümatü i chauéga i ngexwaca̱xü̃xü̃’.
13 Rü yíxema ãchi̱xẽ́xẽ rü name nixĩ i naga taxĩnü i ngẽma Tupanaãxẽ ya Üünecü nüxü̃ ixuxü̃ namaxã i ngẽma yaxõgüxü̃tücumügü”.
Ore ga yema yaxõgüxü̃ ga Laodichéawa yexmagüxü̃ca̱x ümatüxü̃
14 Rü yema chomaxã idexaxü̃ rü ñanagürü ta: “Chanaxwa̱xe i Laodichéawa ngẽxmagüxü̃ i yaxõgüxü̃arü ãẽ̱xgacüca̱x cunaxümatü rü ñacurügü tá: ‘Ñaa nixĩ i norü ore ya yimá aixcüma ixĩcü. Rü nüma nixĩ i nüxü̃ yaxuxü̃ i ore i aixcüma ixĩxü̃ rü inaxügüxü̃ ga guxü̃ma ga yema Tupana üxü̃’.
15 Rü ñanagürü i nümax: ‘Choma nüxü̃ chacua̱x i guxü̃ma i ngẽma cuxüxü̃. Rü nüxü̃ chacua̱x nax tama wüxi i duü̃xü̃ i chauxchi aixü̃ quixĩxü̃, natürü tama wüxi i duü̃xü̃ i aixcüma choxü̃ ngechaü̃xü̃ quixĩ. Rü chierüx noxtacüma wüxi i duü̃xü̃ i chauxchi aixü̃ quixĩxgu rüẽ̱xna noxtacüma wüxi i duü̃xü̃ i aixcüma choxü̃ ngechaü̃xü̃ quixĩxgu.
16 Natürü ñu̱xma nax tama noxtacüma wüxi i duü̃xü̃ i chauxchi aixü̃ quixĩxü̃ rü tama noxtacüma wüxi i duü̃xü̃ i aixcüma choxü̃ ngechaü̃xü̃ nax quixĩxü̃, rü tá cuxü̃ chaxo.
17 Rü cuma cugü quixuxgu rü cumuarü diẽruã̱x, rü cumuarü ngẽmaxü̃ã̱x, rü meama cuxü̃ naxüpetü, rü taxuxü̃ma cuxü̃́ nataxu. Natürü i cuma rü tama nüxna cucua̱xãchi nax chope̱xewa rü wüxi i taxúema cumaxã taãẽxü̃ quixĩxü̃, rü wüxi ngechaü̃tümüxü̃ nax quixĩxü̃, rü wüxi i taxuxü̃ma cuxü̃́ ngẽxmaxe quixĩxü̃, rü ñoma wüxi i ngexetüxü̃rüxü̃ quixĩxü̃, rü ñoma wüxi i ngexchiruxü̃rüxü̃ quixĩxü̃.
18 Rü ñu̱xma rü cuxü̃ chaxucu̱xẽ nax chauxü̃tawa naxca̱x cutaxexü̃ca̱x i úiru i marü üxüwa iguxü̃ i nüxicatama ixĩxü̃. Rü ngẽmaãcü tá aixcüma cuxü̃́ nangẽxma i curü ngẽmaxü̃gü. Rü ngẽxgumarüxü̃ ta cuxü̃ chaxucu̱xẽ nax chauxü̃tawa naxca̱x cutaxexü̃ca̱x i cuxchiru i cómüxü̃ nax ngẽmagu quicúxü̃ca̱x nax taxúema cuxü̃ dauxü̃ca̱x nax cungexchiruxü̃. Rü ngẽxgumarüxü̃ ta cuxü̃ chaxucu̱xẽ nax chauxü̃tawa naxca̱x cutaxexü̃ca̱x i curü ma̱ĩ̱xetüxü̃ nax curümexẽtüxü̃ca̱x rü wena quidauchixü̃ca̱x.
19 Choma rü tüxü̃ chaxucu̱xẽ rü tüxü̃ ichayarüwe̱xãchixẽxẽ ya guxãma ya yíxema tüxü̃ changechaü̃xẽ. Rü ngẽmaca̱x name nixĩ i nüxü̃ curüxo i cucüma i chixexü̃ rü Tupanaca̱x cutaegu.
20 Rü dücax, choma rü ĩã̱xwa changẽxma rü ngéma rü tu tu tu, ñacharügü. Rü ngẽxguma chi texé choxü̃ ĩnügu rü cha̱u̱xca̱x tayawãxnagu, rü tá tümaxü̃tagu chaxücu. Rü tümamaxã tá chachibü rü tüma i chomaxã.
21 Rü yíxema nüxü̃ rüporamaexe i chixexü̃, rü tá chaugüxü̃tawa tüxü̃ charütoxẽxẽ, yexgumarüxü̃ ga choma rü nüxü̃ nax charüporamaexü̃ ga chixexü̃, rü ñu̱xũchi Chaunatüxü̃tawa nax chayarütoxü̃rüxü̃’.
22 Rü yíxema ãchi̱xẽ́xẽ rü name nixĩ i naga taxĩnü i ngẽma Tupanaãxẽ ya Üünecü nüxü̃ ixuxü̃ namaxã i ngẽma yaxõgüxü̃tücumügü”, ñanagürü ga yema chomaxã idexaxü̃.
Notas
^ 3:8 Cuxü̃́ chanatauxchaxẽxẽ nax duü̃xü̃gümaxã nüxü̃ quixuxü̃ca̱x i chorü ore, rü taxucürüwa texé cuxna tanachu̱xu.
