Apocalipsis 4:1-11
4 Rü yemawena ga choma ga Cuáü̃ rü ichadauwenü rü nüxü̃ chadau ga wüxi ga ĩã̱x ga iwãxnaxü̃ ga daxũguxü̃ ga naanewa. Rü yema naga ga nacornétagaraü̃xü̃ ga noxri nüxü̃ chaxĩnüxü̃ ga chomaxã idexaxü̃, rü ñanagürü choxü̃: “¡Nuxã naxĩnagü! Rü tá cuxü̃ nüxü̃ chadauxẽxẽ i ngẽma yixcüra tá ngupetüxü̃”, ñanagürü.
2 Rü yexgumatama ga choma rü Tupanaãxẽ ya Üünecü rü chauãẽmaxã inacua̱x, rü daxũwa nanaga. Rü yéma daxũguxü̃ ga naanewa nüxü̃ chadau ga wüxi ga tochicaxü̃ ga mexẽchixü̃ ga yéma wüxi nawa rütoxü̃.
3 Rü yema tochicaxü̃wa rütoxü̃ rü ñoma nga̱xãẽruxü̃ ya yásperüxü̃ rüe̱xna nga̱xãẽruxü̃ ya cornalinarüxü̃ nixĩ nax yayauracüüxü̃. Rü norü guxü̃cüwawa ga yema tochicaxü̃ rü nayexma ga wüxi ga chirapa, rü ñoma nga̱xãẽruxü̃ ya esmerádarüxü̃ niyauracüxü.
4 Rü yema tochicaxü̃cüwawa nayexmagü ta ga to ga 24 ga tochicaxü̃gü ga nüxü̃ ínumaeguãchixü̃. Rü yema tochicaxü̃güwa narütogü ga 24 ga yaxõgüxü̃arü ãẽ̱xgacügü. Rü naxchiru rü nicómü, rü norü nga̱xcueruü̃gü rü úirunaxca̱x nixĩ.
5 Rü yema tochicaxü̃ ga ngãxü̃wa üxü̃ rü yemawa ínaxũxũ ga ãẽmacügü rü duruanexü̃ rü nagagü. Rü yema tochicaxü̃pe̱xewa nayexmagü ga 7 ga omügü ga yéma naigüxü̃. Rü yema omügü nixĩ ga yema 7 ga Tupanaãxẽ ya Üünecü.
6 Rü yema tochicaxü̃pe̱xewa rü nayexma ga ta̱xacü ga ñoma taxü̃ ga dexáétüwarüxü̃ iya̱u̱xracüüxü̃. Rü ñoma bídriurüxü̃ nichipetü. Rü yema tochicaxü̃xü̃ ínachomaeguãchi ga ãgümücü ga daxũcüã̱x ga maxẽxü̃ ga guxü̃wama ãxetüxü̃ naweama rü nape̱xewa.
7 Rü wüxi ga yema daxũcüã̱x ga maxẽxü̃ rü nanaleóü̃raxü̃. Rü yema to rü nanawoca iyatüxü̃rüxü̃. Rü yema norü tomaepü̱x rü nanaduü̃xü̃chiweraxü̃. Rü yema norü ãgümücü rü nanaxĩyü i gonagüxü̃raxü̃.
8 Rü yema ãgümücü ga daxũcüã̱x ga maxẽxü̃, rü wüxichigü nüxü̃́ nayexma ga 6 ga naxpe̱xatügü. Rü guxü̃wama ga naxpe̱xátüétüwa rü naxpe̱xátütüü̃wa rü namuxetü. Rü ngunecü rü chütacü rü ñanagürügüecha: “Naxüüne, naxüüne, naxüüne nixĩ ya tórü Cori ya Tupana ya Guxü̃étüwa Ngẽxmacü rü Woetama Yexmacü rü Ñu̱xma Ngẽxmacü rü Guxü̃gutáma Ngẽxmacü”, ñanagürügüecha.
9 4:9-10 Rü yema daxũcüã̱x ga maxẽxü̃, rü yexguma gumá tochicaxü̃wa rütocü ga woetama ngẽxmaechacüxü̃ yacua̱xüü̃gügu rü moxẽ nüxna naxãgügu, rü yema 24 ga ãẽ̱xgacügü rü nape̱xegu nacaxã́pü̱xügü, rü nüxü̃ nicua̱xüü̃gü, rü nape̱xegu nananu ga norü nga̱xcueruü̃gü.
10 Nüü̃ nadau 4:9
11 Rü ñanagürügü: “Pa Torü Cori, Pa Torü Tupanax, cuxü̃ nixĩ i namexü̃ nax ticua̱xüü̃güxü̃ rü cuxü̃ tataxẽẽgüxü̃, yerü cuma nixĩ ga cunaxüxü̃ ga guxü̃ma, rü curü ngúchaü̃gagu nixĩ i ñu̱xma nangẽxmagüxü̃ i ngẽma cuxüxü̃”, ñanagürügü.