Apocalipsis 5:1-14
5 Rü ñu̱xũchi nüxü̃ chadau ga gumá tochicaxü̃wa rütocüarü tügüneme̱xẽwa nax nayexmaxü̃ ga wüxi ga popera ga idixixü̃. Rü düxétüwa rü aixepewa rü naxãmatü ga yema popera. Rü 7 wa niñaxtachipe̱xe.
2 Rü nüxü̃ chadau ga wüxi ga norü orearü ngeruxü̃ ga daxũcüã̱x ga poraxüchixü̃ ga tagaãcü íca̱xaxü̃ rü ñaxü̃: “¿Texé tixĩ ya yíxema mexẽ nax tayagautanüxü̃ i norü ñaxtachipe̱xexü̃ rü ítayadixgüxü̃ i ñaa popera?” ñaxü̃.
3 Natürü woo ga daxũguxü̃ ga naanewa rü bai ga ñoma ga naanewa rü bai ga yuexü̃tanüwa, rü nataxuma ga texé ga mexẽ nax ítayadixgüxü̃ rü nüxü̃ tadaumatüxü̃ nax ñuxũ ñaxü̃ ga yema popera.
4 Rü choma rü poraãcü chaxaxu yerü tataxuma ga texé ga mexẽ nax ítayadixgüxü̃ rü nüxü̃ tadaumatüxü̃ nax ñuxũ ñaxü̃ ga yema popera.
5 Natürü wüxi ga yema 24 ga ãẽ̱xgacügü, rü ñanagürü choxü̃: “¡Taxṹ i cuxaxuxü̃! Erü yimá Leóü̃ ya Yudátanüxü̃ ya Dabítaxa ixĩcü, rü marü nüxü̃ narüyexera i ngẽma yu. Rü nüma nixĩ i naporaxü̃ nax yagáutanüãxü̃ca̱x i ngẽma 7 i norü ñaxtachipe̱xexü̃ rü íyadixgüãxü̃ca̱x i ngẽma popera”, ñanagürü.
6 Rü ñu̱xũchi nüxü̃ chadau ga wüxi ga Carnéruxacü ga ma̱xwa írüdaxü̃ ga yexma chixü̃ naxü̃tagu ga gumá tochicaxü̃wa rütocü rü norü ngãxü̃tanügu ga yema ãgümücü ga daxũcüã̱x ga maxẽxü̃ rü yema 24 ga ãẽ̱xgacügü. Rü nüxü̃́ nayexma ga 7 ga naxchata̱xcu̱xre rü 7 ga naxetü. Rü gumá 7 ga naxetü rü ngẽma nixĩ i ngẽma 7 i Tupanaãxẽ ya Üünecü i guxü̃wama i ñoma i naanewa namugüxü̃.
7 Rü yema Carnéruxacü rü gumá tochicaxü̃wa rütocüca̱x nixũ, rü nanayaxu ga yema popera ga norü tügüneme̱xẽwa yexmaxü̃.
8 Rü yexguma nayauxãgu ga yema popera, rü yema ãgümücü ga daxũcüã̱x ga maxẽxü̃ rü yema 24 ga ãẽ̱xgacügü rü nacaxã́pü̱xügü nape̱xegu ga yema Carnéruxacü. Rü wüxichigü ga yema daxũcüã̱x ga maxẽxü̃ rü yema ãẽ̱xgacügü rü nüxü̃́ nayexma ga wüxi ga norü paxetaruxü̃ ga árpa. Rü yexgumarüxü̃ ta nüxü̃́ nayexma ga copu ga úirunaxca̱x ga pumarate̱xemaxã napagüxü̃. Rü yema pumarate̱xe rü nayixichi ga yexguma yaxaxgu. Rü yema pumaragü rü ngẽma nixĩ i Tupanaarü duü̃xü̃güarü yumüxẽgü.
9 Rü nagu nawiyaegü ga wüxi ga wiyae ga yexwaca̱xüxü̃ ga ñaxü̃:“Cuma nixĩ i cumexü̃ nax cunayaxuxü̃ i ngẽma popera rü cuyagáutanüxü̃ i ngẽma norü ñaxtachipe̱xexü̃.Yerü cuma rü marü quima̱xchire̱x, rü cugümaxã Tupanaaxü̃́ naxca̱x cutaxe i naguxü̃raü̃xü̃ i duü̃xü̃gütücumü rü naguxü̃raü̃xü̃ i duü̃xü̃gü i to i nagawa idexagüxü̃ rü naguxü̃raü̃xü̃ i ĩanegücüã̱x rü naguxü̃raü̃xü̃ i nachixü̃anecüã̱x.
10 Rü Tupanaca̱x cunade i ngẽma duü̃xü̃gü nax nüma ya Tupana rü norü ãẽ̱xgacü yixĩxü̃ca̱x rü nümagü norü ngü̃xẽẽruü̃gü i chacherdótegü yixĩgüxü̃ca̱x.Rü nümagü tá nixĩ i ñoma i naanemaxã inacua̱xgüxü̃”,
ñanagürügü.
11 Rü yemawena ichadawenü, rü nüxü̃ chaxĩnü ga naga ga muxũchixü̃ma ga Tupanaarü orearü ngeruü̃gü ga daxũcüã̱x. Rü norü ngãxü̃wa nayexma ga yema tochicaxü̃ rü yema ãgümücü ga daxũcüã̱x ga maxẽxü̃ rü yema 24 ga ãẽ̱xgacügü. Rü namuxũchima ga yema Tupanaarü orearü ngeruü̃gü ga daxũcüã̱x ga yéma yexmagüxü̃.
12 Rü tagaãcü ñanagürügü: “Yimá Carnéru ga pecaduarü ütanüca̱x yucü rü yimá nixĩ yamecü nax guxü̃arü ãẽ̱xgacü yixĩxü̃, rü guxü̃arü yora yixĩxü̃. Rü name nax guxü̃ i cua̱x nüxü̃́ ngẽxmaxü̃, rü guxü̃arü yexera naporaxü̃. Rü nüma nixĩ i namexü̃ nax guxãma nüxü̃ ngechaü̃güxü̃ rü nataxẽẽgüxü̃ rü nüxü̃ icua̱xüü̃güxü̃”, ñanagürügü.
13 Rü nüxü̃ chaxĩnü ta ga naga ga guxü̃ma i ta̱xacü i maxü̃xü̃ i daxũguxü̃ i naanewa rü ñoma i naanewa rü naanetüü̃wa rü márwa ngẽxmagüxü̃ ga ñagüxü̃: “Name nixĩ nax guxü̃gutáma guxãma nüxü̃ icua̱xüü̃güxü̃ rü nüxü̃ ngechaü̃güxü̃ rü nataxẽẽgüxü̃ ya yimá Carnéruxacü rü yimá tochicaxü̃wa rütocü”, ñanagürügü.
14 Rü yema ãgümücü ga daxũcüã̱x ga maxẽxü̃ rü ñanagürügü: “Ngẽmaãcü yixĩ”, ñanagürügü. Rü yema 24 ga ãẽ̱xgacügü rü inacaxã́pü̱xügü rü nüxü̃ nicua̱xüü̃gü.
