Apocalipsis 6:1-17
6 Rü ñu̱xũchi nüxü̃ chadau ga yexguma gumá Carnéruxacü yagáuyegu ga yema nüxíraxü̃xü̃ ga norü ñaxtachipe̱xexü̃ ga yema popera. Rü nüxü̃ chaxĩnü ga wüxi ga yema daxũcüã̱x ga maxü̃xü̃ rü tagaãcü ñoma duruanexü̃rüxü̃ ñaxü̃ choxü̃: “¡Nua naxũ!” ñaxü̃.
2 Rü ichadawenü rü nüxü̃ chadau nax yéma nangóxü̃ ga wüxi ga cowaru ga cómüxü̃. Rü yema naétüwa rütoxü̃ rü nüxü̃́ nayexma ga wüxi ga norü würa. Rü wüxi ga nga̱xcueruxü̃ nüxna naxã. Rü nüma rü nagu narüxĩnü nax norü uanügüxü̃ tá narüporamaexü̃. Rü inaxũãchi nax norü uanügüxü̃ naporamaexü̃ca̱x.
3 Rü yexguma gumá Carnéruxacü yagáuyegu ga yema norü taxre ga yema poperaarü ñaxtachipe̱xexü̃, rü nüxü̃ chaxĩnü ga yema norü taxre ga yema daxũcüã̱x ga maxü̃xü̃ ga ñaxü̃ choxü̃: “¡Nua naxũ!” ñaxü̃.
4 Rü inaxũãchi ga wüxi ga to ga cowaru rü yema rü nadau. Rü yema naétüwa rütoxü̃ rü wüxi ga tara ga taxü̃ nüxna naxã. Rü pora nayaxu nax iyanaxoxẽẽãxü̃ca̱x nax nügü nangechaü̃güxü̃ ga duü̃xü̃gü rü nügü nax nada̱i̱xü̃ca̱x
5 Rü yexguma gumá Carnéruxacü yagáuyegu ga yema norü tomaepü̱x ga yema poperaarü ñaxtachipe̱xexü̃, rü nüxü̃ chaxĩnü ga yema norü tomaepü̱x ga yema daxũcüã̱x ga maxü̃xü̃ ga ñaxü̃ choxü̃: “¡Nua naxũ!” ñaxü̃. Rü ichadawenü rü nüxü̃ chadau ga wüxi ga cowaru ga waxüxü̃. Rü yema naétüwa rütoxü̃ rü naxme̱xwa nüxü̃́ nayexma ga wüxi ga yáruxü̃ ga balanza.
6 Rü nüxü̃ chaxĩnü ga wüxi ga naga ga yema daxũcüã̱x ga maxẽxü̃arü ngãxü̃tanüwa inaxũxü̃ ga ñaxü̃: “Wüxi i ngunexü̃arü puracütanü rü naxãtanü i wüxi i quíru i trigu Rü wüxi i ngunexü̃arü puracütanü naxãtanü i tomaepü̱x i quíru i chebáda. ¡Natürü taxṹ i cunatatanümaexü̃ i ngẽma chíxü̃ rü yimá bínu!” ñanagürü.
7 Rü yexguma gumá Carnéruxacü yagáuyegu ga yema norü ãgümücü ga yema poperaarü ñaxtachipe̱xexü̃, rü nüxü̃ chaxĩnü ga yema norü ãgümücü ga daxũcüã̱x ga maxẽxü̃ ga ñaxü̃ choxü̃: “¡Nua naxũ!” ñaxü̃.
8 Rü ichadawenü rü nüxü̃ chadau ga wüxi ga cowaru ga dexexü̃. Rü yema naétüwa rütoxü̃ rü Yu nixĩ ga naéga. Rü yema naweama ne ũxü̃, rü Yuexü̃chica nixĩ ga naéga. Rü yema taxre nanayauxgü ga pora nax ñoma ga naanewa rü wüxi cuarto ga duü̃xü̃güxü̃ nada̱i̱xü̃ca̱x taramaxã rü taiyamaxã rü da̱xaweanemaxã rü naeü̃gü i düraexü̃maxã.
9 Rü yexguma gumá Carnéruxacü yagáuyegu ga yema norü wüxime̱e̱xpü̱x ga yema poperaarü ñaxtachipe̱xexü̃, rü yema ãmarearü guruü̃tüü̃wa nüxü̃ chadau ga naãxẽgü ga yema duü̃xü̃gü ga Tupanaaxü̃́ yaxõgüxü̃ca̱x daixü̃ rü norü orexü̃ nax yaxugüxü̃ca̱x daixü̃.
10 Rü yema naãxẽgü rü tagaãcü ñanagürügü: “Pa Torü Cori ya Guxü̃étüwa Ngẽxmacü rü Üünecü rü Ixaixcümacüx, ¿ñuxgura tá ta i nüxna cucaxü̃ rü cunapoxcuexü̃ i ngẽma ñoma i naanecüã̱x ga toxü̃ daixü̃?” ñanagürügü.
11 Rü ñu̱xũchi wüxichigü ga yema duü̃xü̃güna nanaxã ga naxchiru ga máxü̃ rü cómüxü̃. Rü yema duü̃xü̃güãẽgüxü̃ ñanagürü: “¡Paxaãchi iperüngüe ñu̱xmatáta yangu i norü mu i ngẽma peenexẽgü i pexrüxü̃ Cristuarü puracüca̱x nada̱i̱xü̃!” ñanagürü.
12 Rü yexguma gumá Carnéruxacü yagáuyegu ga yema norü 6 ga yema poperaarü ñaxtachipe̱xexü̃, rü poraãcü naxĩã̱xãchiane. Rü üa̱xcü rü ñoma ngechaü̃chiru ga waxü̃rüxü̃ nawamare. Rü tauemacü rü ñoma nagürüxü̃ naduema.
13 Rü woramacurigü rü ẽxtagü rü daxũwa narüyiixü̃ ñoma i naanegu, ñoma ori̱x i igu i doxüxü̃ma buanecü ya tacümaxã rüyi̱xü̃rüxü̃.
14 Rü guxü̃ma i daxũwa nüxü̃ idauxü̃ rü inayarütaxu. Rü ñoma wüxi i popera i dixcumüãchixü̃rüxü̃ inayarütaxu. Rü guxü̃nema ga guma ma̱xpǘnegü rü yema capaxũgü rü nixĩgachi ga nachicawa.
15 Rü ñoma ga naanewa yexmagüxü̃ ga nachixü̃anegüarü ãẽ̱xgacügü, rü ma̱xpǘnemagu rü ma̱xpü̃́nearü nutatanügu nicu̱xgü. Rü wüxigu yexma namaxã nicu̱xgü ga yema togü ga ãẽ̱xgacügü ga taxü̃gü ga ñoma ga naanemaxã icua̱xgüxü̃, rü churaragüarü ãẽ̱xgacügü ga taxü̃gü, rü yema duü̃xü̃gü ga muarü diẽruã̱xgüxü̃, rü yema duü̃xü̃gü ga ñoma ga naanewa poraexü̃, rü guxü̃ma ga duü̃xü̃gü ga mugüruü̃gü ixĩgüxü̃, rü guxü̃ma ga duü̃xü̃gü ga ngearü coriã̱xgüxü̃.
16 Rü guxü̃ma ga nümagü, rü guma ma̱xpǘnexü̃ rü gumá nutagüxü̃ ñanagürügü: “¡Toétügu peyi nax toxü̃ ipicu̱xgüxü̃ca̱x naxcha̱xwa ya yimá tochicaxü̃wa rütocü, rü na̱xcha̱xwa ya yimá Carnéruxacü nax tama norü numaxã toxü̃ napoxcuexü̃ ya yimá Carnéruxacü!
17 Erü marü ínangu i ngẽma ngunexü̃ i ãũcümaxü̃ i nagu norü numaxã napoxcuexü̃ i duü̃xü̃gü. ¿Rü texé tá namaxã tapora i ngẽma?” ñanagürügü.
